ႁူဝ်လိူၼ်မေႊၼႆႉ ၸုမ်းသိုၵ်းဝႃႉ ၸုမ်းသိုၵ်းမိူင်းလႃး လႄႈ ၸုမ်းသိုၵ်းမၢၼ်ႈ တီႉၺွပ်းဢဝ် ၵူၼ်းမိူင်းၶႄႇ ၸိူဝ်းၶဝ်ႈမႃးႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆး (ၵျႃႊ ၽျႅၼ်ႉ) သူင်ႇမွပ်ႈပၼ်ၶိုၼ်းတီႈ လူင်ပွင်ၸိုင်ႈမိူင်းၶႄႇ။
မိူဝ်ႈဝႃး ဝၼ်းတီႈ 11/5/2026 ယၢမ်းၵၢင်ၼႂ် သိုၵ်းမၢၼ်ႈဢဝ်ၵူၼ်းႁဵတ်းၵၢၼ်ၵျႃႊၽျႅၼ်ႉ ၵႂႃႇမွပ်ႈသူင်ႇ ပၼ်ၶိုၼ်းတီႈ လူင်ပွင်ၸိုင်ႈမိူင်းၶႄႇ တီႈၽၵ်းတူၶၢမ်ႈလႅၼ်လိၼ် မိူင်းမၢၼ်ႈ-မိူင်းၶႄႇ ၵဵတ်ႉလၢၼ်ႇမၢၼ်ႈဝဵင်း ။
ၵူၼ်းမိူင်းပိုၼ်ႉတီႈ ၼႂ်းၸႄႈဝဵင်းမူႇၸေႊ လၢတ်ႈၼႄတီႈၽူႈတွႆႇႁွၵ်ႈဝႃႈ “လႆႈႁၼ်ၶဝ်ႁွင်ႉၵူၼ်းၶႄႇၸိူဝ်းၼၼ်ႉ ၵႂႃႇၼင်ႈၶပ်ႉဝႆႉၼႃႈၽၵ်းတူၶၢမ်ႈလႅၼ်လိၼ်။ ၶဝ်တေဢၢပ်ႈပၼ်တီႈ ၶႄႇၶိုၼ်းၼႆဢေႃႈ။ မိူဝ်ႈၵႂႃႇသူင်ႇၼၼ် လႆႈႁၼ်ပလိၵ်ႈၶဝ် ပႃးၶိူင်ႈၵွင်ႈၵၢင်ႇသေ ဢဝ်ႁူမ်ႇလူမ်ႈပႂ်ႉဝႆႉ။ ၶဝ်ငွမ်ဝႆႉၶႃႈၼႃႇ တင်းၼမ်တႄႉ တေမီးမွၵ်ႈ 70 ၵေႃႉၸိူဝ်းၼႆႉယူႇၶႃႈ ဢေႃႈ” ဝႃႈၼႆ။
ၸုမ်းသိုၵ်းဝႃႉ (UWSA) ၵေႃႈ လႆႈၼမ်းဢဝ် ၵူၼ်းမိူင်းၶႄႇ ႁဵတ်းၵၢၼ်ၵျႃႊၽျႅၼ်ႉ ၸိူဝ်းတီႉၺွပ်းလႆႈဝႆႉၼၼ်ႉ သူင်ႇမွပ်ႈပၼ်ၶိုၼ်း တီႈလူင်ပွင်ၸိုင်ႈမိူင်းၶႄႇ ႁူမ်ႈတင်း ၶိူင်ႈၸႂ်ႉၶူဝ်းတိုဝ်းၼႂ်းၵၢၼ်လွၵ်ႇလႅၼ်ၵိၼ်ငိုၼ်းတင်း ဢွၼ်ႊလၢႆး ၼႆယဝ်ႉ။
မိူဝ်ႈဝၼ်းတီႈ 9/5/2026 သိုၵ်းဝႃႉ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ ႁူမ်ႈမိုဝ်းၵၼ်တင်း ၸုမ်းသိုၵ်းမိူင်းလႃး NDAA သေတီႉၺွပ်းဢဝ်ၵူၼ်းႁဵတ်းၵၢၼ်ၵျႃႊၽျႅၼ်ႉ တီႉၺွပ်းလႆႈဝႆႉ ၵူၼ်းမိူင်းၶႄႇ 10 ၵေႃႉ ၶွမ်းပိဝ်ႊတိူဝ်ႊ (ၶွမ်း) 611 လုၵ်ႈ၊ ၾူၼ်း (မိုဝ်းထိုဝ်) 535 လုၵ်ႈ ။ လုၵ်ႉတီႈလႅၼ်လိၼ် မိူင်းၶႄႇ -မိူင်းလႃး သေ သူင်ႇမွပ်ႈပၼ်ၶိုၼ်းတီႈ လူင်ပွင်ၸိုင်ႈမိူင်းၶႄႇ ၶႅမ်ႉလႅပ်ႈလီငၢမ်း ဝႃႈၼႆ။
ၸွမ်းၼင်ႇၼႂ်းလိၵ်ႈပိုၼ်ၽၢဝ်ႇၼၼ်ႉ ပိူင်းၸႅင်ႈၼႄဝႆႉပႃးဝႃႈ – ၼွၵ်ႈလိူဝ်ၵူၼ်းမိူင်းၶႄႇ 10 ၵေႃႉၼၼ်ႉ ယင်းမီးၵူၼ်းၸိူဝ်းၵႂႃႇႁဵတ်းၵၢၼ်ၸွမ်းၶဝ် ထႅင်ႈ 78 ၵေႃႉ ၼႆယဝ်ႉ။
မိူဝ်ႈဝၼ်းတီႈ 8/5/2026 ၼၼ်ႉၵေႃႈ တီႉၺွပ်းလႆႈ ၵူၼ်းႁဵတ်းၵၢၼ်ၵျႃႊၽျႅၼ်ႉ 18 ၵေႃႉ ၼႂ်းၸႄႈဝဵင်းလၢႆးၶႃႈ မိူင်းတႆးပွတ်းၸၢၼ်း ၼႂ်းၼၼ်ႉပႃးၵူၼ်းၸၢဝ်းၶိူဝ်းၶႄႇ 13 ၵေႃႉလႄႈ ၵူၼ်းမိူင်းမၢၼ်ႈ 5 ၵေႃႉ ။
ဝၼ်းတီႈ 4/4/2026 ၼၼ်ႉၵေႃႈ တီႉၺွပ်းလႆႈ ၵူၼ်းမိူင်းၶႄႇ 100 ၵေႃႉပၢႆ လႄႈ ၵူၼ်းမိူင်းမၢၼ်ႈ 20 ၵေႃႉပၢႆ ၸိူဝ်းႁဵတ်းၵၢၼ်ၵျႃႊၽျႅၼ်ႉယူႇ ၼႂ်းၸႄႈဝဵင်းတၢင်ႉယၢၼ်း မိူင်းတႆးပွတ်း ႁွင်ႇ။ ယိုတ်းဢဝ်လႆႈပႃး ၶိူင်ႈ Starlink ၊ ၶိူင်ႈၸၢၵ်ႈၾႆး လႄႈ ၶွမ်း (ၶွမ်ႊပိဝ်ႊတိူဝ်ႊ) ၸဵမ်ၸိူဝ်းၼႆႉထႅင်ႈ ၼႆယဝ်ႉ။
တႄႇႁူဝ်ပီ 2026 မႃး ၸုမ်းသိုၵ်းမၢၼ်ႈ တင်း ၸုမ်းသိုၵ်းဝႃႉ ၸွမ်းသွၵ်ႈႁႃ ၵူၼ်းမိူင်းၶႄႇ ၸိူဝ်းႁဵတ်းၵၢၼ်ၵျႃႊၽျႅၼ်ႉယူႇၼႂ်းမိူင်းတႆးပွတ်းႁွင်ႇ၊ မိူင်းတႆးပွတ်းၸၢၼ်း လႄႈ မိူင်းတႆး ပွတ်းဢွၵ်ႇ ၸိူဝ်းၼႆႉသေ ၸတ်းၵၢၼ်တီႉၺွပ်း သူပ်ႇမွပ်ႈပၼ်ၶိုၼ်းတီႈ လူင်ပွင်ၸိုင်ႈမိူင်းၶႄႇ ၶပ်ႉတၢမ်းၵၼ်မႃး ယႆးႁႅင်းတေႉတေႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ