ဝၼ်းတီႈ 28 /1/2026  ၼႆႉ ၵႅမ်ၽွင်းလူင်ၾၢႆႇၼွၵ်ႈမိူင်း မိူင်းထႆး ဝိၵျႃႊဝတ်ႉ ဢိတ်ႉသရႃႊၽၵ်း လႄႈ ႁူဝ်ပဝ်ႈၵေႃႇမတီႇ ၵဵဝ်ႇလူၺ်ႈၾၢႆႇၵၢၼ်သိုၵ်း သၽႃးလၢင်ႈမိူင်းဢမေႊရိၵၼ်ႊ မၢႆႊၵႄႊလ်တိၼ်း ၼိတ်ႉ  ရေႃႊၵျႃႊ ႁူပ်ႉထူပ်းဢုပ်ႇၵုမ်ၵၼ် တီႈဝဵင်းၵုင်ႈထဵပ်ႈ မိူင်းထႆး ဝႃႈၼႆ။

ႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း မိူင်းထႆးပိုၼ်ၽၢဝ်ႇဝႆႉဝႃႈ – လႆႈဢုပ်ႇၵုမ်ၵၼ်ၵႂႃႇၵဵဝ်ႇလူၺ်ႈ လွင်ႈၵပ်း သိုပ်ႇၵႄႈၵၢင်သွင်ၸိုင်ႈမိူင်း၊ လွင်ႈမိူင်းမၢၼ်ႈ လႄႈ လွင်ႈတေတိုၵ်းတေႃးၽဵဝ်ႈမူၺ်ႉ ၵၢၼ်လွၵ်ႇလႅၼ်  ၵိၼ်ငိုၼ်းၼိူဝ်ဢွၼ်ႊလၢႆႊ ၸိူဝ်းၼႆႉ  ။

လိူဝ်ၼၼ်ႉ လႆႈဢုပ်ႇလၢတ်ႈပႃး လွင်ႈဢမေႊရိၵၼ်ႊ ဝႆႉၼမ်ႉၼၵ်းၼိူဝ် ၼႂ်းပိုၼ်ႉတီႈ ဢိၼ်ႇတူဝ်ႇ – ပသိၾိၵ်ႉ၊ လွင်ႈတေႁူမ်ႈၵၼ်ႁဵတ်းသၢင်ႈ ၵၢၼ်ပၢႆးမၢၵ်ႈမီး၊ လွင်ႈၵဵပ်းၶွၼ်ႇ မိူင်းဢမေႊရိၵၼ်ႊ၊ လွင်ႈ တေႁူမ်ႈၵၼ်ႁဵတ်းသၢင်ႈၵႂႃႇမိူဝ်းၼႃႈ မိူၼ်ၼင်ႇ ၶၢဝ်းတၢင်းသၢႆၵၢၼ်မိၼ် မိူင်းထႆး – မိူင်းဢမေႊရိၵၼ်ႊ ၵမ်းသိုဝ်ႈလႄႈ လွင်ႈႁုၼ်ႈမုၼ်းၶိုၼ်ႈယႂ်ႇ ၼႂ်းပိုၼ်ႉတီႈၸိူဝ်းၼႆႉ ဝႃႈၼႆ။

မိူဝ်ႈဝၼ်းတီႈ 16/01/2026 ပူၼ်ႉမႃးၼၼ်ႉၵေႃႈ ၽူႈမီးပုၼ်ႈၽွၼ်း ၼႂ်းၸုမ်းၾၢႆႇၵူတ်ႇထတ်း ၸႅတ်ႈထၢမ် ၶိုၵ်ႉတွၼ်း မိူင်းဢမေႊရိၵၼ်ႊ ၵဵဝ်ႇလူၺ်ႈပိုၼ်ႉတီႈ  ဢေႊသျႃႊဝၼ်းဢွၵ်ႇ လႄႈ ပိုၼ်ႉတီႈပသိၾိၵ်ႉ (EAPOC/EAPMC) လႆႈႁူပ်ႉဢုပ်ႇၵၼ်တင်း ၸွမ်ၽူႈၵွၼ်းပလိၵ်ႈမိူင်းထႆး တီႈ ၵုင်းထဵပ်ႈသေ ဢုပ်ႇ လၢတ်ႈလွင်ႈၽႅၼ်ၵၢၼ်ယႂ်ႇ တႃႇတေၽဵဝ်ႈမူၺ်ႉၸုမ်းၵျႃႊၽျႅၼ်ႉ။

မိူၼ်ၼႆၼင်ႇၵဝ်ႇ ၼႂ်းလိူၼ်ပူၼ်ႉမႃးၼႆႉၵူၺ်း ၵႅမ်ၽွင်းလူင်ၾၢႆႇၼွၵ်ႈမိူင်း ၵဵဝ်ႇလူၺ်ႈ ဢေႊသျႃႊဝၼ်းဢွၵ်ႇ လႄႈ ပသိၾိၵ်ႉ မိူင်းဢမေႊရိၵၼ်ႊ လႄႈတင်း ၽွင်းလူင်ၾၢႆႇၼွၵ်ႈမိူင်း မိူင်းထႆး ႁူပ်ႉဢုပ်ႇၵၼ်သေ ဢမေႊရိၵၼ်ႊ လႆႈပၼ်ငိုၼ်းၵမ်ႉၸွႆႈတီႈမိူင်းထႆး တႃႇတေၽဵဝ်ႈမူၺ်ႉၸုမ်းၵျႃႊၽျႅၼ်ႉ 10 လၢၼ်ႉ ဢမေႊရိၵၼ်ႊ ၻေႃႊလႃႊ ၼႆယဝ်ႉ။

တႃႇတေၽဵဝ်ႈမူၺ်ႉၸုမ်းၵျႃႊၽျႅၼ်ႉ ၼႂ်းပိုၼ်ႉတီႈဢေႊသျႃႊၸဵင်ႇၸၢၼ်းဝၼ်းဢွၵ်ႇ လႄႈ မိူင်းမၢၼ်ႈ ၼႆသေ မိူဝ်ႈဝၼ်းတီႈ 12 လိူၼ်ၼူဝ်ႊဝႅမ်ႊပိူဝ်ႊ ပီ 2025 ၼၼ်ႉ ၽူႈတၢင်တူဝ် ၼႂ်းလုမ်းၽူႈတၢင်ၼႃႈ မိူင်းဢမေႊရိၵၼ်ႊ၊ ႁွင်ႈၵၢၼ်ၾၢႆႇလုမ်းတြႃး၊ ႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း၊ ၸုမ်းသၢႆလပ်ႉ လႄႈ FBI ၸိူဝ်းၼႆႉႁူမ်ႈၵၼ်သေ ၶွတ်ႇၽွတ်ႈၸုမ်းၶိုၵ်ႉတွၼ်း တႃႇၽဵဝ်ႈမူၺ်ႉၵျႃႊၽျႅၼ်ႉ (Scam Center Strike Force)။

မိူဝ်ႈပီၵၢႆၼႆႉ လုမ်း OFAC  တႂ်ႈႁွင်ႈၵၢၼ်ၽွင်းလူင် ၾၢႆႇၽၢၼ်ႇတႃႇငိုၼ်းတွင်း မိူင်းဢမေႊရိၵၼ်ႊ လႆႈ ပိၵ်ႉဢိုတ်းႁႅတ်ႉႁၢမ်ႈ ၵၢၼ်ငၢၼ်းပၢႆးမၢၵ်ႈမီး ႁူဝ်ၼႃႈၸုမ်း BGF ၸဝ်ႈသိုၵ်းလူင် ၸေႃးၶျိတ်ႉတူႇ လႄႈ လုၵ်ႈၸၢႆးသွင်ၵေႃႉ ၸိူဝ်းမီးလွင်ႈၵဵဝ်ႇၶွင်ႈၸွမ်း ၵၢၼ်လွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊ ၼႂ်းပိုၼ်ႉတီႈ သူၺ်ႇၵူၵ်ႉၵူဝ်ႇ၊ မိူင်းယၢင်းၽိူၵ်ႇ လႅၼ်လိၼ်ထႆး – မၢၼ်ႈ။