ႁူဝ်လိူၼ်ၾႅပ်ႉပိဝ်ႊရီႊ ဝၼ်းတီႈ 1 ၼႆႉ ၸုမ်းၼၢင်းယိင်းမိူင်းမၢၼ်ႈ (WLB) ႁဵတ်းၽိုၼ်လိၵ်ႈႁၢႆးငၢၼ်း ပိုၼ်ၽၢဝ်ႇဢွၵ်ႇဝႃႈ – ၼႂ်းၶၢဝ်းတၢင်းသိုၵ်းမၢၼ်ႈယိုတ်းမိူင်းမႃး 5 ပီ ၼႆႉ ၼႂ်းပီ 2025 ၼႆႉ ၼၢင်းယိင်းလႆႈႁူပ်ႉတၢင်းယၢပ်ႇ၊ ပၼ်ႁႃ လႆႈၶၢမ်ႇတၢမ်ႇသိုၵ်း လႄႈ ႁၢမ်းသုၼ်ႇလႆႈသုၼ်ႇပဵၼ်ၵူၼ်း ၼမ်လိူဝ်ပိူၼ်ႈသုတ်း ဝႃႈၼႆ။
ၼႂ်းပီ 2025 ၼၼ်ႉၵူၺ်း ၵူၼ်းမိူင်းႁူမ်ႈတုမ်ၸိူဝ်းလႆႈယၢၼ်ပၢႆႈဢွၵ်ႇႁိူၼ်းယေးဝၢၼ်ႈမိူင်း မီးယူႇ 54000 ၵေႃႉပၢႆ ။ ၼႂ်းၼၼ်ႉႁူဝ်ၼပ်ႉၼၢင်းယိင်း မီးယူႇ 31000 ၵေႃႉပၢႆ ။ ပဵၼ်ၼၢင်းယိင်း လႄႈ လုၵ်ႈဢွၼ်ႇ ၸိူဝ်းယူႇၼႂ်းမိူင်းတႆး၊ မိူင်းယၢင်းလႅင်၊ တိူင်းပႃႇၵိူဝ်၊ တိူင်းၸႄႈၵႅင်း လႄႈ တိူင်းတၼၢဝ်းသီသေ ၶဝ်ၸိူဝ်းၼႆႉလႆႈႁူပ်ႉၽေးၶဵၼ် လႆႈတေႃႇသူႈၵၢၼ်ၵႄႈလိတ်ႈပၼ်ႁႃယူႇ ၸွမ်းလႅၼ်လိၼ် ဝႃႈၼႆ။
လိူဝ်ၼၼ်ႉ ပီ 2025 ၼႆႉ ၵၢၼ်ပေႉၵိၼ်လူလၢႆ ၸႅၵ်ႇယႅၵ်ႈယိင်း/ၸၢႆး မီးယူႇ 209 လိူင်ႈ ၼႂ်းၼၼ်ႉ ပႃးၵၢၼ်လူလၢႆတင်းၵႃႇမယိင်းၸၢႆး 145 လိူင်ႈ။ ၵၢၼ်ၵႃႉၶၢႆၵူၼ်း လႄႈ ၵၢၼ်မိပ်ႇငႅၼ်းတဵၵ်းတဵင် ႁႂ်ႈတႄႇၼႃႈႁိူၼ်း ၵူပ်ႉၵူႈၵၼ်ၼႆႉ ယင်းတိုၵ်ႉသိုပ်ႇပဵၼ်ယူႇ ဢမ်ႇထၢတ်ႇဢမ်ႇဝၢႆး ၼႆယဝ်ႉ။
ၵၢၼ်ပေႉၵိၼ်လူလၢႆၼၢင်းယိင်း လႄႈ လွင်ႈႁုၵ်းႁၢႆႉတင်းသဵင်ႈဢၼ်ပဵၼ်မႃးၸိူဝ်းၼႆႉ ပဵၼ်မႃးယွၼ်ႉ သိုၵ်းမၢၼ်ႈယိုတ်းသိမ်းဢဝ်ဢႃႇၼႃႇၸိုင်ႈမိူင်းလိပ်းလိပ်းလႅင်လႅင်သေ လွင်ႈဢဝ်ပၵ်းပိူင်ႁူမ်ႇငမ်းၼိူဝ်ၵၼ် ၵေႃႈ လူတ်းလူမ်ႉလူင်းၵႂႃႇၵမ်းသိုဝ်ႈ။ လိူင်ႈၸိူဝ်းၼႆႉတင်းသဵင်ႈ သိုၵ်းမၢၼ်ႈၶတ်းၸႂ်ၸတ်းပၢင်လိူၵ်ႈတင်ႈပွမ် မႃးႁူမ်ႇလပ်ႉပႅတ်ႈတင်းသဵင်ႈယူႇၼႆ – ၸုမ်းၼၢင်းယိင်းမိူင်းမၢၼ်ႈ WLB ထတ်းသၢင်လၢတ်ႈဝႆႉပႃးၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ