ဢိင်ၼိူဝ် ဝၢၼ်ႈမိူင်းတူဝ်ၵဝ်ႇ ဢမ်ႇၵတ်းယဵၼ် ႁႃၵိၼ်လဵင်ႉတွင်ႉယၢပ်ႇသေ ၵူၼ်းမိူင်းတႆး ၶၢႆႉၸူးမိူင်းထႆးယူႇၵူႈပီပီ ။ မွင်းဝၢၼ်ႈမိူင်းၵတ်းယဵၼ်ႁိၼ်ႉၼွၼ်းၸင်ႇၶိုၼ်းပွၵ်ႈၼႆသေတႃႉ ထိုင်ယၢမ်းလဵဝ် ပႆႇၸၢင်ႈပွၵ်ႈ ။ပေႃးတူၺ်း ၸႄႈတွၼ်ႈၵဵင်းမႂ်ႇ ၸိုင်ႈထႆးၼႆႉ ၵူၼ်းတႆးမီးၼပ်ႉႁူဝ်သႅၼ် ။ ၸိူဝ်းပဵၼ်သႅၼ်းႁုၼ်ႈမႂ်ႇၵေႃႈ မၢင်ၸိူဝ်းသၢင်ႈၸိုဝ်ႈလီ မၢင်ၸိူဝ်းသၢင်ႈၸိုဝ်ႈလူႉ။ ၵူၼ်းၼုမ်ႇၸိူဝ်းၶတ်းၸႂ်ဝႄႈၵၢၼ်မိူၵ်ႈမႂ်ႈၵေႃႈ ယင်းတိုၵ်ႉမီး။

မိူၼ်ၼင်ႇ ၸုမ်းၵူၼ်းၼုမ်ႇတႆးၸိူဝ်းသူင်လဵၼ်ႈႁႅင်းၶဝ် ႁွင်ႉႁူၺ်းၵူၼ်းၼုမ်ႇၵူႈတူင်ႇတၢင်ႇ ၸိူဝ်းလုၵ်ႉမိူင်းတႆး ႁိုဝ်ဢမ်ႇၼၼ် ၵူၼ်းမိူင်း ႁူမ်ႈတုမ်မၢၼ်ႈမႃးၸိူဝ်းၼၼ်ႉ ဢွၼ်ၵၼ်ၼမ်းၸတ်း ပၢင်ၶႄႉၶႅင်ႇပိတ်ႉမၢၵ်ႇၼင်ၵေႃႈမီး ။ ၶဝ်လၢတ်ႈဝႃႈ တႃႉႁႃၵေႃႇၵၢၼ်ႁၢႆႉ ၽိူဝ်ႇတႃႉမႃးၶႄႉၶႅင်ႇၼမ်ႉၵတ်ႉၾၢႆႇလဵၼ်ႈမၢၵ်ႇၼင်ၵၼ်တေတိူဝ်းမီးၽွၼ်းလီ ဝႃႈၼႆယူႇ ။

လိူၼ်ၾႅပ်ႊပိဝ်ႊရီႊ ဝၼ်းတီႈ 7 ပီ 2026 ၼႆႉ ဝၼ်းၸိူဝ်ႉၸၢတ်ႈၸိုင်ႈတႆး တေထူၼ်ႈထိုင် 79 ပီယဝ်ႉလႄႈ တႆးၵူႈတီႈၵူႈလႅၼ် မႅၼ်ႈၽွင်း ဢွၼ်ၵၼ်ႁၢင်ႈႁႅၼ်းတႃႇၸတ်းပၢင်ၶွၼ်ႈတုမ်ဢၼ်တေပဵၼ်တီႈမၢႆတွင်းၽႂ်မၼ်း။
တႃႇပဵၼ်တီႈမၢႆတွင်းဝၼ်းၸိူဝ်ႉၸၢတ်ႈၸိုင်ႈတႆးၵေႃႈပိူင်ၼိုင်ႈ တႃႇႁႂ်ႈၵူၼ်းၼုမ်ႇပေႃးတေၵၢင်းယၢၼ်ယႃႈမဝ်းၵမ် လႄႈ ဝႄႈႁဵတ်းၵၢၼ်မိူၵ်ႈမႂ်ႈၵေႃႈပိူင်ၼိုင်ႈၼႆသေ ၵူၼ်းၼုမ်ႇတႆးၼႂ်းၵဵင်းမႂ်ႇ ဢွၼ်ႁူမ်ႈၵၼ်ႁၢင်ႁႅၼ်း တႃႇၸတ်း ပၢင်ၶႄႉၶႅင်ႇ ပိတ်ႉမၢၵ်ႇၼင်ၵၼ် ၼႂ်းဝၼ်းတီႈ 8 ဢၼ်တေထိုင်ၼႆႉ ။

မိူဝ်ႈလဵဝ် ဢၼ်ၵူၼ်းၼုမ်ႇတႆးတီႈၵဵင်းမႂ်ႇ ဢွၼ်ၵၼ်ၽွတ်ႈပဵၼ်ၸုမ်း မီးဝႆႉ 16 ၸုမ်း ။ ယၢမ်းလဵဝ် မႅၼ်ႈၽွင်း ႁၢင်ႈႁႅၼ်းတူဝ် ၾိုၵ်းၼမ်ႉၵတ်ႉၽႂ်မၼ်းဝႆႉ ဝႃႈၼႆ ။
ၼင်ႇႁိုဝ် ၵူၼ်းၼုမ်ႇၸိူဝ်းမႃးပိတ်ႉမၢၵ်ႇၼင် တေမီးႁႅင်းၸႂ်လႄႈသင် ၼင်ႇႁိုဝ်တေပဵၼ် ၵၢၼ်ယုၵ်ႉယွင်ႈ ၼမ်ႉၸႂ်ၵၼ်ၼၼ်ႉလႄႈသင် ၵူၼ်းၼုမ်ႇၸိူဝ်းသူင်ပိတ်ႉမၢၵ်ႇၼင် ၸင်ႇဢွၼ်ၵၼ် ႁႃငိုၼ်းၵွင်ၵၢင်သေ ႁၢင်ႈႁႅၼ်းဝႆႉတႃႇတွၼ်ႈသူးရၢင်းဝလ်းပၼ် ၸုမ်းပိတ်ႉမၢၵ်ႇၼင် ၼႆယူႇ ။

သူးရၢင်းဝလ်းၼႆႉ ႁၢင်ႈႁႅၼ်းဝႆႉပႃး သူးထီႉၼိုင်ႈ ထိုင် ထီႉသၢမ် ။ ၵၢင်ၸႂ်ၵူၼ်းၼုမ်ႇၸိူဝ်းတေမႃးၶဝ်ႈၶႄႉၶႅင်ႇတႄႉ ဢွၼ်ၵၼ်လၢတ်ႈဝႃႈ ဢၼ်တေမႃးပိတ်ႉမၢၵ်ႇၼင်ၼႆႉ လွင်ႈပေႉလွင်ႈသုမ်းၼၼ်ႉ ဢမ်ႇလွင်ႈယႂ်ႇ ၊ ပိူင်လူင် လူဝ်ႇမီးၼမ်ႉၸႂ်လဵၼ်ႈႁႅင်းလႄႈမေႃၽွမ်ႉႁူမ်ႈ ၼႆ ၸၢႆးၵွင်ၶိူဝ်းလႅင်း ၽူႈၼမ်းထိမ်းပိတ်ႉမၢၵ်ႇၼင် လၢတ်ႈၼႄဝႆႉၼင်ႇၼႆ –

မိူင်းၼႆႉတႄႉၵေႃႈ ယႃႈမဝ်းၵမ်တႄႉ ဢမ်ႇပေႃးၵႃႈႁိုဝ် ၊ ၵူၼ်းၼုမ်ႇတႆးႁဝ်းၶႃႈၼႆႉ ၾၢႆႇယႃႈမဝ်းၵမ်တႄႉ ဢမ်ႇပေႃးဢွၼ်ၵၼ်ၵႂႃႇၵႃႈႁိုဝ်။ ၵူၺ်းၵႃႈ ၵႂႃႇၾၢႆႇလႂ်လႃႇၼႆၸိုင် ၵႂႃႇပဵၼ်ၵုမ်ႇပဵၼ်ၸုမ်းဝႆးရုၼ်ႉၶဝ်ၸိူဝ်းၼႆႉ ၵုမ်ႇသၢင်ႈပၼ်ႁႃပိူၼ်ႈဝႃႇ ၼႆၸိူဝ်းၼႆႉ။ သင်ဝႃႈ ႁူၺ်းၵူၼ်းၼုမ်ႇမႃးပိတ်ႉမၢၵ်ႇၼင်ၼႆ ယူဝ်ၾၢႆႇပုၼ်ႉၵေႃႈ တေလူတ်းယွမ်းၽွင်ႈၼႆ။ၼွၵ်ႈၶၢဝ်းယၢမ်းႁဵတ်းၵၢၼ်ၼၼ်ႉ ႁႂ်ႈၶဝ်လႆႈမႃးသဵင်ႈၶၢဝ်းယၢမ်းၸွမ်းလွင်ႈပိတ်ႉမၢၵ်ႇၼင်။တေမီးၽွၼ်းလီႁေ ၊ တေလႆႈမိုတ်ႈၵိုဝ်းၵၼ် ၊ တေလႆႈမေႃၶဝ်ႈၸူးၽူႈယႂ်ႇၵူၼ်းလူင်ၶဝ်ၽွင်ႈႁေၼႆ ၽွၼ်းလီမၼ်းတႄႉ တေမီးၸိူင်ႉၼၼ်

ပၢင်ၶႄႉၶႅင်ႇပိတ်ႉမၢၵ်ႇၼင်ၼႆႉ သင်မီးၶၢဝ်းယၢမ်းတႄႉ ၸတ်း 2-3 ဝၼ်းတေတိူဝ်းသၢင်ႇထုၵ်ႇၼႆသေတႃႉ ၵမ်ႈၼမ် ၵူၼ်းၼုမ်ႇၸိူဝ်းတေမႃးၶဝ်ႈပိတ်ႉသမ်ႉ မၢင်ၸိူဝ်းၶၢတ်ႇၵၢၼ်ဢမ်ႇလႆႈ ၊ မၢင်ၸိူဝ်းလူဝ်ႇၶိုၼ်ႈႁဵၼ်း ၸိူဝ်းၼႆႉလႄႈ ၸင်ႇဢွၼ်ၵၼ် တႅပ်းတတ်း တေၶႄႉၶႅင်ႇႁႂ်ႈယဝ်ႉတူဝ်ႈၼႂ်းဝၼ်းလဵဝ် ၼႆယူႇ။

ဝၼ်းတီႈ 08/02/2026 ၼႆႉ ၶၢဝ်းတၢင်း 9 မူင်း တေတႄႇပိုတ်ႇပၢင် တီႈပၢင်ႇပိတ်ႉမၢၵ်ႇၼင် Dream Star Academy ၸႄႈဝဵင်းသၼ်သၢႆး ၸႄႈတွၼ်ႈၵဵင်းမႂ်ႇ ၸိုင်ႈထႆး ။ ၼႂ်းၶပ်းမၢႆၼၼ်ႉ တေမီး ၽူႈယႂ်ႇၵူၼ်းလူင် ၸိူဝ်းတေမႃးပဵၼ်ၼႃႈ ပဵၼ်တႃပၼ်ႁႅင်းၵူၼ်းၼုမ်ႇ တေမွၵ်ႇလၢတ်ႈၶေႃႈၵႂၢမ်းပိုတ်ႇပၢင်လႄႈသင် လႄႈ ၶူၼ်ႉၶိုၼ်း ပိုၼ်းပဵၼ်မႃး ဝၼ်းၸိူဝ်ႉ ၸၢတ်ႈ ၸိုင်ႈတႆး ၸိူဝ်းၼႆႉ ဝႃႈၼႆ။

ပၢင်ႇပိတ်ႉမၢၵ်ႇၼင် ဢၼ်ၵူၼ်းၼုမ်ႇတႆး တေဢွၼ်ၶဝ်ႈၶႄႉၶႅင်ႇပိတ်ႉၼႆႉ ပဵၼ်ပၢင်ႇၽူႊသႄႊ Futsal ၵူၺ်းလႄႈ ၼိုင်ႈထိမ်ႊၼႆႉ တေၸၢင်ႈၶဝ်ႈပိတ်ႉလႆႈ ၵမ်း 7 ၵေႃႉ ၊ ၼႂ်းၼိုင်ႈထိမ်ႊၼၼ်ႉ ပေႃးၼပ်ႉပႃး ၵူၼ်းၵႅမ်မၼ်းတႄႉ မီးဝႆႉ 13 ထိုင် 20 ၵေႃႉ ။ ပေႃးဝႃႈ 16 ၸုမ်းၼႆၵေႃႈ ႁူမ်ႈသဵင်ႈ ၵူၼ်းၼုမ်ႇ တေမီးထိုင် 100 ပၢႆ ။ လၢတ်ႈလႆႈဝႃႈ ၵၢၼ်ပိတ်ႉမၢၵ်ႇၼင်ၼႆႉ ပေႃးဝႆႉ ၵႃႈၶၼ် တေၸၢင်ႈၶွၼ်ႈတုမ်လႆႈၵူၼ်းၼုမ်ႇဝႄႈလႆႈယႃႈမဝ်းၵမ် ။
ၸၢႆးၵွင်ၶိူဝ်းလႅင်း ၽူႈၼမ်းထိမ်းပိတ်ႉမၢၵ်ႇၼင် လၢတ်ႈၼႄဝႆႉၼင်ႇၼႆ –

ၼမ်ႉၵတ်ႉၵူၼ်းၼုမ်ႇၼႆႉ ၵေႃႉၼိုင်ႈလႄႈ ၵေႃႉၼိုင်ႈတႄႉ တေဢမ်ႇမိူၼ်ၵၼ်။မၢင်ၵေႃႉ တေၶႅၼ်ႇၾၢႆႇပၢႆးပၺ်ႇၺႃႇ ၊ ၾၢႆႇပၢႆးလိၵ်ႈတႄႉတႄႉ။မၢင်ၵေႃႉၵေႃႈ တေၶႅၼ်ႇပႃးလွင်ႈလဵၼ်ႈဢဵၼ်ႁႅင်း ၸိူဝ်းၼႆႉ။ ၵူၼ်းၸိူဝ်းဢမ်ႇလႆႈမီး တိုဝ်ႉတၢင်း လႆႈလဵၼ်ႈႁႅင်းလီလီမိူဝ်ႈၶိုၼ်ႈႁဵၼ်းၼၼ်ႉ မိူၼ်ၼင်ႇ မိူင်းမၢၼ်ႈၼႆၵေႃႈ ၸိူဝ်းဢမ်ႇလႆႈမီးတိုဝ်ႉတၢင်း ၵႂႃႇၽႅဝ်ၼႂ်းၸုမ်းဢၼ်လူင်ပွင်ၸိုင်ႈၸတ်းပၼ် ( အားကာ သိပ္ပံ ) ၸိူဝ်းၼႆႉၼၼ်ႉ ။ သင်ဝႃႈ လႆႈမႃးၶဝ်ႈႁူမ်ႈပိတ်ႉ မၢၵ်ႇၼင် ၼႆ သင်ၶဝ်ႈမီးၼမ်ႉၵတ်ႉၶိုၼ်ႈမႃး ၸၢင်ႈၵႂႃႇၶဝ်ႈႁူမ်ႈၼႂ်းထိမ်းၵူၼ်းထႆးၶဝ်လႆႈ ပေႃးၶတ်းၸႂ်ၵေႃႈ ၸၢင်ႈသၢင်ႈလႆႈၸိုဝ်ႈသဵင်လီသေ ပဵၼ်ၵၢၼ်ႁႃၵိၼ်လဵင်ႉတွင်ႉလႆႈလူးၵွၼ်ႇ ။ၸင်ႇၼၼ် ၶႂ်ႈႁႂ်ႈၵူၼ်းၼုမ်ႇတႆးႁဝ်း မီးၼမ်ႉၵတ်ႉၸိူင်ႉၼၼ်လႄႈ ၸင်ႇၶႂ်ႈႁႂ်ႈမီးပၢင်ၶႄႉၶႅင်ႇမၢၵ်ႇၼင်ၸိူင်ႉၼႆ

ၼင်ႇႁိုဝ် ၵူၼ်းတႆးၸိူဝ်းမႃး ပၵ်းသဝ်းဝႆႉတီႈၵဵင်းမႂ်ႇ ဢၼ်သူင်လဵၼ်ႈမၢၵ်ႇၼင်ၸိူဝ်းၼႆႉ ပေႃးတေမီးဢွင်ႈတီႈ ႁူမ်ႈႁႅင်းၵၼ်လႄႈသင် ၊ သင်ဝႃႈ ပဵၼ်မူႇပဵၼ်ၵေႃယဝ်ႉၵေႃႈ ၼင်ႇႁိုဝ် တေမေႃႁၵ်ႉသႃလွင်ႈၽွမ်ႉႁူမ်ႈ ၸိူဝ်းၼႆႉၵႂႃႇလႄႈသင်ၼၼ်ႉ လူဝ်ႇမီးၸုမ်းဢၼ်ပၼ်ႁႅင်းၵမ်ႉယၼ်ယူႇၼႆ _ ၸၢႆးသႅင်ဝၼ်း ၽူႈဢၼ်တေဢွၼ်ၼမ်း ၸတ်းပၢင်ပိတ်ႉမၢၵ်ႇၼင် တီႈ Dream Star Academy ၼၼ်ႉ လၢတ်ႈၼင်ႇၼႆ ။

ၼင်ႇႁိုဝ် တေပဵၼ်ႁႅင်းၸႂ်ၵူၼ်းပိတ်ႉမၢၵ်ႇၼင်ၼၼ်ႉ ၵူၼ်းၼုမ်ႇၸိူဝ်းၼမ်းၸတ်းပၢင်ပိတ်ႉမၢၵ်ႇၼင် လႆႈၽိတ်ႈမွၵ်ႇႁွင်ႉဝႆႉပႃး ၽူႈတူင်ႉၼိုင်ၼႂ်းၸုမ်းတူင်ႇၵူၼ်းလၢႆၸုမ်းၶဝ်ႈႁူမ်ႈၵမ်ႉထႅမ် ၼႂ်းၼၼ်ႉ ပႃးၸုမ်းၵေႃသိုဝ်ႇၶၢဝ်ႇတႆး ဢၼ်ၸုမ်းသိုဝ်ႇၶၢဝ်ႇၽူႈတွႆႇႁွၵ်ႈၶဝ်ႈပႃးဝႆႉၼၼ်ႉ ၸုမ်းၼိုင်ႈ ။

ၸုမ်းပိတ်ႉမၢၵ်ႇၼင်တီႈၵဵင်းမႂ်ႇ ဢၼ်ပီႈၼွင်ႉတႆးၶဝ်ႈႁူမ်ႈပႃးၼႆႉ လိူဝ်သေမီးၸုမ်းၼႆႉယဝ်ႉ မီးဝႆႉထႅင်ႈၸုမ်းၼိုင်ႈ ဢၼ်မီးၸိုဝ်ႈၸုမ်းဝႆႉဝႃႈ ၵူၼ်းၼုမ်ႇတႆးၵဵင်းမႂ်ႇ Tai Youth CM ။ ၸုမ်းၼႆႉၵေႃႈ တႄႇမီးမႃး ၸဵမ်မိူဝ်ႈ ပီ 2001 ၊ ပီၵၢႆ 2025 ၼႆႉ ၸင်ႇၸတ်းပီၵွၼ်ငိုၼ်းယဝ်ႉတူဝ်ႈ ။ ပီၼႆႉၵေႃႈ ႁၢင်ႈႁႅၼ်းၸတ်းပၢင်ၶႄႉၶႅင်ႇမၢၵ်ႇၼင်ႇယူႇ မိူၼ်ၵၼ် ။ ၸုမ်းပိတ်ႉမၢၵ်ႇၼင် ၵူၼ်းၼုမ်ႇတႆးၵဵင်းမႂ်ႇ Tai Youth CM ဢွၼ်ၼမ်းၸတ်းၼၼ်ႉတႄႉ ဢမ်ႇၸႂ်ႈၵူၼ်းမိူင်းတႆးၵူၺ်း ထိမ်ႊၵူၼ်းထႆးၸိူဝ်းၼႆႉၵေႃႈ ႁပ်ႉၶဝ်ႈၶႄႉၶႅင်ႇၸွမ်း ဝႃႈၼႆ။