ဝၼ်းတီႈ 1 ၾႅပ်ႊပိဝ်ႊရီႊ ၼႆႉ သိုၵ်းမၢၼ်ႈယိုတ်းဢႃႇၼႃႇ ၵုမ်းၵႅဝ်ဝၢၼ်ႈမိူင်းမႃး ၶွပ်ႈတဵမ် 5 ပီ။  မိူဝ်ႈတႄႇ ယိုတ်းမိူင်း ပၼ်ၵႂၢမ်းမၼ်ႈဝႃႈ  6 လိူၼ် ယေႈပီ တေၸတ်းပၼ်ပၢင်လိူၵ်ႈတင်ႈၼႆသေတႃႉ တိုတ်ႉၼူင်ႇ ယိုတ်ႈယၢဝ်း ထိုင်မႃးၶၢဝ်းတၢင်း ႁႃႈပီၸင်ႇၸတ်းလႆႈ။

ၸွမ်းၼင်ႇၶေႃႈၵႂၢမ်း တဵင်ႉသီႇၵျုၼ်ႊ ၽွင်းၶဵဝ်ၶိုၵ်ႉတွၼ်းမိူင်းၶႄႇ ၵဵဝ်ႇၵပ်းၵုၼ်ဢေႊသျိူဝ်ႊ တင်း ၸွမ်ႁၢၼ်ၸေႃႇမိၼ်းထုၼ်း ၽူႈၶၢၼ်ပၢၵ်ႇၸုမ်းသိုၵ်းမၢၼ်ႈ လၢတ်ႈဝႃႈ ၸွမ်းၼင်ႇမိူင်းၶႄႇ ၸွမ်ၸိုင်ႈ သျီႊၵျိင်ႉၽိင်ႊ တင်း ၸွမ်သိုၵ်းလူင်မိၼ်းဢွင်ႇလၢႆႇ လႆႈၸႂ်ၵၼ်သေ ႁဵတ်းၼႆၼၼ်ႉ ယင်းမၢႆထိုင်ဝႃႈ ပေႃးမိူင်းၶႄႇ ဢမ်ႇမိပ်ႇဢီးႁႂ်ႈႁဵတ်းပၢင်လိူၵ်ႈတင်ႈ ယင်းတေပႆႇပဵၼ်။

ပေႃးတူၺ်းငဝ်းလၢႆးၵေႃႈ လႅပ်ႈၶႂ်ႈၸတ်းယၢပ်ႇၸတ်းယဵၼ်းဝႆႉ ယွၼ်ႉဝႃႈ ၸႄႈဝဵင်းလႂ် ဢမ်ႇမီးၸုမ်းယိပ်း ၵွင်ႈၵၢင်ႇလုၵ်ႉၽိုၼ်ႉ ဢမ်ႇၶႂ်ႈမီးသေဝဵင်း လႄႈ လႆႈၸႅၵ်ႇႁဵတ်း 3 တွၼ်ႈ သေ ၸတ်းပၢင်လိူၵ်ႈတင်ႈ။ ၵမ်းၼိုင်ႈ 102 ဝဵင်း မိူင်းတႆး ပႃး 12 ဝဵင်း။ ၵမ်းထူၼ်ႈသွင် ၸတ်းႁဵတ်း 100 ဝဵင်း မိူင်းတႆးပႃး 17 ဝဵင်း ၵမ်းလိုၼ်း ဢၼ်ၸတ်းႁဵတ်းယဝ်ႉၵႂႃႇ မိူဝ်ႈဝၼ်းတီႈ 25/1/2026 ၼႆႉ ၸတ်းယူႇ 63 ဝဵင်း မိူင်းတႆးပႃးယူႇ 9 ဝဵင်း။

ပၢင်လိူၵ်ႈတင်ႈ ၸတ်းယဝ်ႉၵႂႃႇ တင်း 3 ၵမ်းၼႆႉ ၵမ်ႈၼမ် ၸတ်းၼႂ်းတူဝ်ဝဵင်းၵူၺ်း။ ဝၢၼ်ႈၼွၵ်ႈ ၼႃးပၢင်ႇ ထုင်ႉဢိူင်ႇ ႁူၺ်ႈယွၼ်း ဢမ်ႇၸတ်းပၼ်ပၢင်လိူၵ်ႈတင်ႈလႆႈလႄႈ ၵူၼ်းမိူင်းၼပ်ႉႁူဝ်လၢၼ်ႉ သုမ်းသုၼ်ႇ လႆႈ ၸဝ်ႈၵဝ်ႇ။

ၸိူင်ႉႁိုဝ်ၵေႃႈ ပၢင်လိူၵ်ႈတင်ႈ ယဝ်ႉၵႂႃႇယဝ်ႉလႄႈ ၼႂ်းၶၢဝ်းတၢင်း 60 ဝၼ်း တိုၼ်းတေမီးမႃးလူင်ပွင်ၸိုင်ႈ  ထွတ်ႇသိူဝ်ႈၶူဝ်းသိုၵ်းမႃးသႂ်ႇသိူဝ်ႈၶူဝ်းၵူၼ်းႁိူၼ်း  ၶိုၼ်ႈပဵၼ်ၸွမ်ၸိုင်ႈဢမ်ႇႁၢင်ႉယဝ်ႉ။ ဢိင်ၼိူဝ်ၶႄႇ သူၼ်းဢီးသေ ၵၢတ်ႇငမ်းယဵၼ်ၵေႃႈ တေၸၢင်ႈၵိုၼ်းမႃးထႅင်ႈၵမ်းၼိုင်ႈယဝ်ႉ လႄႈ ႁႅင်းလၢတ်ႈၸႃ ၼႂ်းၵၢၼ်မိူင်း တေၸၢင်ႈပဵၼ်ႁိုဝ်မႃး။

သင်မိူင်းၶႄႇ ၼမ်းၼႃႈၸိုင် ဢၼ်တေၸၢင်ႈၵိုတ်းတိုၵ်း ၵမ်းတေမႃးၼႆႉ ၸၢင်ႈပႃး ၸုမ်းသိုၵ်းလွႆ တဢၢင်းပလွင်ႈ သိုၵ်းၶႄႇၵဝ်ႈၵၢင်ႉ ပႃးၸဵမ်ဝႃႉ – ပိူင်လူင် ၸုမ်းဢူၺ်း လီ ပွတ်းႁွင်ႇ 7 ၸုမ်း ဢၼ်ယူႇတႂ်ႈ FPNCC ၼၼ်ႉၸၢင်ႈၶဝ်ႈပႃးမႃး။

ၶၢဝ်းတၢင်း 5 ပီ ၸူဝ်ႈၸုမ်းသိုၵ်းမၢၼ်ႈ ယိုတ်းမိူင်းမႃးၼႆႉ ဢၼ်ဢဵၼ်ႁႅင်းယႂ်ႇမႃး ပဵၼ်ၸိူဝ်းၼႆႉ ၼႆၵေႃႈတေဢမ်ႇၽိတ်း။

ၼႂ်းၼၼ်ႉပႃးၸုမ်းသိုၵ်းတႆးပွတ်းႁွင်ႇ ၼႆသေတႃႉ –

(1) လႆႈႁူမ်ႈသိုၵ်းလွႆ တိုၵ်းသိုၵ်းတႆး ပွတ်းၸၢၼ်း ဢွၵ်ႇယၢၼ်မိူင်းတႆး ပွတ်းႁွင်ႇ လႄႈ ၼႂ်းၵႄႈ ၸိူဝ်ႉၸၢတ်ႈတႆး တၢင်းလၢႆ ဢမ်ႇပေႃးလႆႈၼႃႈ။

(2) ႁူမ်ႈသိုၵ်းလွႆသေ ဝႆႉဢူၺ်းလီပဵၼ်ယႂ်ႇ ၼႆသေတႃႉ သိုၵ်းလွႆၵေႃႈယဝ်ႉ သိုၵ်းၵဝ်ႈၵၢင်ႉၵေႃႈယႃႇ ဢမ်ႇၼပ်ႉသွၼ်ႇပဵၼ်ဢူၺ်းလီတႃႇႁူမ်ႈမိုဝ်းၵၼ်။ ၶတ်းၶႃ လိုပ်ႈႁေႃႈ ၸိူဝ်းၶဝ် ပေႃးဢမ်ႇလႆႈ ပၵ်းတပ်ႉယူႇ ၼႂ်းဝဵင်းသႅၼ်ဝီ ၼမ်ႉၶမ်း ႁႂ်ႈထွၼ်သိုၵ်းဢွၵ်ႇလၢႆလၢႆပိုၼ်ႉတီႈ။ ၶေႃႈၵႂၢမ်း “ၵႃးပေႃးတႅတ်ႉ”  သမ်ႉပေႃးၵိုၵ်းပိုၼ်း။

(3) လိူဝ်ၼၼ်ႉ ယင်းမီးထႅင်ႈ ပၼ်ႁႃ ယႃႈမဝ်းၵမ်လႄႈ ၵျႃႊၽျႅၼ်ႉ။ တၢင်ႇၸုမ်းတႄႉ တၼ်းဝၵ်ႉဢဝ် ပဵၼ်ၶိူင်ႈမိုဝ်း တွၼ်ႈတႃႇပၢႆးမိူင်း ပၢႆးၵၢၼ်သိုၵ်း သေတိုၵ်းဢဝ်ပိုၼ်ႉတီႈ – ႁၢင်ႈႁႅၼ်းဝႆႉထႃႈ တႃႇပဵၼ် တိုဝ်ႉ တၢင်း ၵၢၼ်မိူင်း မိူဝ်းၼႃႈ။

ၼႂ်းလုတ်ႉတေႃႇ သၽႃး ဢၼ် USDP သၢင်ႇသီႇ တင်းသိုၵ်းမၢၼ်ႈ သုမ်ႇငမ်းဝႆႉၼၼ်ႉ ၽူႈတႅၼ်းၸိူဝ်း ထုၵ်ႇလိူၵ်ႈတင်ႈ လႄႈ ၸိူဝ်းလၢၵ်ႈတင်ႈၵႂႃႇ တေႁဵတ်းသင်လႆႈ တေႁတ်းႁဵတ်းသင် ။

သင်ၶႄႇ မိပ်ႇဢီး ႁႂ်ႈၵိုတ်းတိုၵ်းမႃး မိူင်းတႆးပွတ်းႁွင်ႇ ၸၢင်ႈမိူၼ်ႁိုဝ်ၵႂႃႇ။ ၾၢႆႇသိုၵ်းမၢၼ်ႈ ယိုတ်းမိူင်းတႄႉ ယွၼ်ႉၶႄႇတင်းၶဝ်မၢႆဝႃႈ လိူၵ်ႈတင်ႈမႃး ပဵၼ်တၢင်းၵၢၼ်လႄႈ မိူၼ်တၢင်းလႆႈ ဝႂ်လၢႆႊသႅၼ်ႊ ပွႆႇမၢၵ်ႇသႂ်ႇ ဝတ်ႉဝႃးႁိူၼ်းၵူၼ်း လႄႈ တေပဵၼ် လူင်ပွင်ၸိုင်ႈလႆႈလၢႆႊသႅၼ်ႊၶႃႈၵူၼ်း ၵႂႃႇထႅင်ႈၵူၺ်းႁိုဝ် ။

တႄႇဢဝ်ၼႆႉၵႂႃႇ ထုၵ်ႇလီပိုၼ်ႉပွႆႇပႅတ်ႈ ၽွၼ်းပၢင်ႈသုၼ်ႇတူဝ် ၽႂ်မၼ်းသေ ထိုင်ၶၢဝ်းၸုမ်းႁွင်ႇၸၢၼ်း တႂ်ႈၼိူဝ်ႁူမ်ႈႁႃတၢင်း ၶွၼ်ႈႁႅင်းၵၼ် ၶၢမ်ႈပူၼ်ႉႁႂ်ႈလႆႈယဝ်ႉ။

သဵင်ၶဝ်ႇႁွၵ်ႈ

1/2/2026