သိုၵ်းၵဝ်ႈၵၢင်ႉ ဝဵင်းသႅၼ်ဝီ မိူင်းတႆးပွတ်းႁွင်ႇ ႁွင်ႉဢဝ်ပေႃႈလဵင်ႉ ၸဝ်ႈငိုၼ်းသႃး ၸၢဝ်းၶႄႇ ၶဝ်ႈမႃးႁဵတ်းၵၢၼ်ပၢႆးမၢၵ်ႈမီးၼႂ်းၸႄႈဝဵင်းသႅၼ်ဝီသေ ၸႂ်ႉဢႃႇၼႃႇသိုၵ်း တဵၵ်းယိုတ်း ဢဝ်တီႈလိၼ်ၵူၼ်းဝၢၼ်ႈၵူၼ်းသူၼ် ပိူဝ်ႈတႃႇပၼ် ပေႃႈလဵင်ႉလၢဝ်းပၢၼ်းၶႄႇၶဝ် ႁဵတ်းသူၼ်ၽုၵ်ႇသွမ်ႈၵူၺ်ႈ (တစ်သျှူးဌက်ပျော) ဝႃႈၼႆ။
ၼႂ်းႁူဝ်ပီ 2026 ၵၢင်လိူၼ်ၵျႅၼ်ႊၼိဝ်ႊရီႇၼႆႉ သိုၵ်းၶႄႇၵဝ်ႈၵၢင်ႉ လႄႈ လၢဝ်းပၢၼ်းၶႄႇၶဝ် ဢဝ်ၶိူင်ႈၸၢၵ်ႈ ဢၼ်ၸႂ်ႉတိုဝ်းၼႂ်းၵၢၼ်တီႇၽဵဝ်ႈပႃႇထိူၼ်ႇ၊ သူၼ်ႁႆႈၼႃး မႃးထုၺ်လိၼ် ယႃႉပႃႇထိူၼ်ႇ၊ တႅပ်းမႆႉၼႂ်းလဝ်ႇ တီႈၽုၵ်ႇသွမ်ႈ ဢွင်ႈၵူၼ်းမိူင်း ဝၢၼ်ႈပၢင်ၽၢတ်ႇ လႄႈ ဝၢၼ်ႈမိူင်းလီ ဢိူင်ႇမိူင်းလီ ၸႄႈဝဵင်းသႅၼ်ဝီ ၼႆယဝ်ႉ။
ၵူၼ်းမိူင်းၵေႃႉယူႇၼႂ်းဢိူင်ႇမိူင်းလီ ၸႄႈဝဵင်းသႅၼ်ဝီၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈဝၼ်းတီႈ 12/1/2026 သိုၵ်းၵဝ်ႈၵၢင်ႉ ႁွင်ႉဢဝ် တင်းလၢဝ်းပၢၼ်းၶေႇ ဢဝ်ပႃးၵႃး၊ ပႅၵ်ႉၽူဝ်း၊ လူဝ်ႇတႃႇ၊ ၶျဵင်းသေႃး ၸိူဝ်းၼႆႉ မႃးတႅပ်းတႅပ်းၵိုတ်ႈၵိုတ်ႈပႃႇမႆႉႁဝ်းႁႄ ထုၺ်ပႃးလိၼ်မၼ်းပႅတ်ႈ။ ၶဝ်ဢၢၼ်းၽုၵ်ႇၵူၺ်ႈ ႁဵတ်းသူၼ် (တူႇၼႂ်းဢိူင်ႇမိူင်းလီ ၸႄႈဝဵင်းသႅၼ်ဝီၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈဝၼ်းတီႈ 12/1/2026 သိုၵ်းၵဝ်ႈၵၢင်ႉ ႁွင်ႉဢဝ် တင်းလၢဝ်းပၢၼ်းၶေႇ ဢဝ်ပႃးၵႃး၊ ပႅၵ်ႉၽူဝ်း၊ လူဝ်ႇတႃႇ၊ ၶျဵင်းသေႃး ၸိူဝ်းၼႆႉ မႃးတႅပ်းတႅပ်းၵိုတ်ႈၵိုတ်ႈပႃႇမႆႉႁဝ်းႁႄ ထုၺ်ပႃးလိၼ်မၼ်းပႅတ်ႈ။ ၶဝ်ဢၢၼ်းၽုၵ်ႇၵူၺ်ႈ ႁဵတ်းသူၼ် (တစ်သျှူးဌက်ပျော) ဝႃႈၼႆဢေႃႈ။ ဝၼ်းတီႈ 16/1/2026 ႁဝ်းၵူၼ်းဝၢၼ်ႈဢွၼ်ၵၼ်ၵႂႃႇလၢတ်ႈဝႃႈ ၼႆႉပဵၼ်လိၼ်ႁဝ်း ယႃႇပေႁဵတ်း ပဵၼ်တီႈႁဝ်းႁဵတ်းၵိၼ်၊ ပဵၼ်လဝ်ႇႁဝ်းၼႆၵေႃႈ သိုၵ်းၵဝ်ႈၵၢင်ႉၼႆႉဢမ်ႇထွမ်ႇ။ ၶဝ်တွပ်ႇၶိုၼ်းဝႃႈ သူယႃႇပေမႃးလၢတ်ႈ ဢမ်ႇၶႂ်ႈငိၼ်း။ မိူဝ်ႈမၢၼ်ႈယူႇၵေႃႈ မၢၼ်ႈသိမ်းသူ။ မိူဝ်ႈလဵဝ်ႁဝ်းပဵၼ်ဢၸူဝ်းယမၼ်းဢိူဝ်ႈ ႁဝ်းၶႂ်ႈႁဵတ်းသင်တီႈလႂ်ၵေႃႈ ႁဝ်းႁဵတ်းလႆႈဢိူဝ်ႈ ၼႆႁင်းႁဝ်းၶႃႈဢေႃႈ။ မိူဝ်ႈဝႃး ဝၼ်းတီႈ 29/1/2026 ၼႆႉၵေႃႈ ႁဝ်းၵူၼ်းဝၢၼ်ႈၶိုၼ်းၵႂႃႇတီႈဢၼ်ၶဝ်တီႇၶဝ်ၽဵဝ်ႈၼၼ်ႉႁႄ ၵႂႃႇႁေႉၵႂႃႇႁၢမ်ႈၶဝ်ၵေႃႈ ဢမ်ႇထွမ်ႇႁဝ်း ၶဝ်တိုၵ်ႉဝႃႈႁင်းႁဝ်းၸိူင်ႉၼၼ်ယူႇတိၵ်းတိၵ်းဢေႃႈ။ တေလႆႈႁဵတ်း ၸိူင်ႉႁိုဝ်ၵေႃႈပေႃးဢမ်ႇႁူႉယဝ်ႉၶႃႈဝႃႈ” ၼႆယဝ်ႉ။
လႆႈႁူႉဝႃႈ ၼင်လိၼ်၊ ပႃႇထိူၼ်ႇ ၸိူဝ်းသိုၵ်းၵဝ်ႈၵၢင်ႉၶဝ် ႁွင်ႉဢဝ်လၢဝ်းပၢၼ်းၶႄႇသေ ၵႂႃႇထုၺ်၊ ၵႂႃႇတီႇၽဵဝ်ႈ တႃႇႁဵတ်းသူၼ်ၵူၺ်ႈၼၼ်ႉ မီးမွၵ်ႈ 100 ဢေႊၶိူဝ်ႊ၊ ပဵၼ်ၼင်လိၼ်ၵူၼ်းဝၢၼ်ႈပၢင်ၽၢတ်ႇ လႄႈ ဝၢၼ်ႈမိူင်းလီ ႁဵတ်းၵၢၼ်ၽုၵ်ႇသွမ်ႈ လႆႈပိုင်ႈတႃႇၼႃႈဝၢၼ်ႈတႃသူၼ်ႁင်းၽႂ်မၼ်း ၼႆယဝ်ႉ။
မိူဝ်ႈလိူၼ်မၢတ်ႊၶျ် ပီ 2025 ပူၼ်ႉမႃးၼၼ်ႉၵေႃႈ သိုၵ်းၵဝ်ႈၵၢင်ႉၼႆႉ ႁွင်ႉၵူၼ်းဝၢၼ်ႈ ၼႂ်းၸႄႈဝဵင်းသႅၼ်ဝီ ႁဵတ်းပၢင်ၵုမ်သေ လၢတ်ႈႁႂ်ႈၶၢတ်ႈဢွင်ႈတီႈသူၼ်ပၼ်ၶဝ် တႃႇႁဵတ်းသူၼ်ၵူၺ်ႈ။ သင်ဢမ်ႇၶၢတ်ႈပၼ်ၸိုင် တေၺႃးယိုတ်းသိမ်းဢဝ်ၵႂႃႇလၢႆလၢႆၼႆ ယၢမ်ႈလွၵ်ႇငိုတ်ႈဝႆႉၼင်ႇၼႆ။
ဢိင်ၼိူဝ်လွင်ႈၼႆႉ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇတိတ်းတေႃႇ ၽူႈၶၢၼ်ပၢၵ်ႇ တပ်ႉသိုၵ်းၵဝ်ႈၵၢင်ႉၵေႃႈ ဢမ်ႇလႆႈ။
ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ယဝ်ႉၼႆႉ သိုၵ်းၵဝ်ႈၵၢင်ႉ ႁူမ်ႈတင်း ၸုမ်းသိုၵ်းဢူၺ်းလီၶဝ် သေၵုမ်းၵမ်ဝႆႉ ၸႄႈဝဵင်းသႅၼ်ဝီတင်းသဵင်ႈ တင်ႈတႄႇ ၼႂ်းၵၢင်ပီ 2024 တေႃႇထိုင် ပီ 2026 ယၢမ်းလဵဝ်ၼႆႉ။
တင်ႈတႄႇႁၢင်ပီ 2025 တေႃႇ ႁူဝ်ပီ 2026 ၼႆႉ သိုၵ်းၵဝ်ႈၵၢင်ႉ ၼႅတ်ႈႁိပ်ႈၶပ်းၶိုင်ႁဵတ်းၵၢၼ်ၵေႃႇသၢင်ႈ ဢၼ်မႂ်ႇၸွမ်းၼႂ်းဝဵင်း လႄႈ ၶၢင်ႈသဵၼ်ႈတၢင်းလူင် ႁၢႆးဝေး သႅၼ်ဝီ – မူႇၸေႊ၊ သႅၼ်ဝီ – ၵၢတ်ႇၵဝ်ႇ (လၢဝ်ႇၵၢႆး)- ၶျိင်ႊသူၺ်ႇႁေႃႇ ၸဵမ်ၸိူဝ်းၼႆႉ ႁႂ်ႈပႅၵ်ႇႁူပႅၵ်ႇတႃ။
ၼႂ်းၶၢဝ်းတၢင်းသိုၵ်းၵဝ်ႈၵၢင်ႉၶဝ် ၵုမ်းၵမ်ဝဵင်းသေ ပၼ်ႇၵၢၼ်ၽွင်းငမ်းဝဵင်းသႅၼ်ဝီၼႆႉ ဢဝ်ၶေႃႈဢၢင်ႈသႃႈ ႁဵတ်းၵၢၼ်ႁုၼ်ႈမုၼ်းၶိုၼ်ႈယႂ်ႇ ပူၵ်းပွင်ၶိုၼ်းဝဵင်းၼႆသေ ၵူၼ်းမိူင်း ၺႃးၶၢၼ်း ၵႂႃႇၶဝ်ႈႁၢပ်ႇၵၢၼ်သိုၵ်း၊ ၺႃးတဵၵ်းႁႂ်ႈၶၢတ်ႈ လႄႈ ၶၢႆတီႈလိၼ် ဢွင်ႈတီႈၽုၵ်ႇသွမ်ႈပၼ်တီႈ လၢဝ်းပၢၼ်းၶႄႇ ၶဝ်ၵႂႃႇတင်းၼမ် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ