မိူဝ်ႈၼႆႉဝၼ်းတီႈ 29/1/2026 ယၢမ်းၵၢင်ၼႂ် ၶၼ်ၶမ်းလုမ်ႈၾႃႉ ၼိုင်ႈဢွၼ်ႊသ်လႂ် ထိုင်ၵႂႃႇ 5,531 တေႃႊလႃႊ၊ ၶၼ်ၶမ်းၼႂ်းမိူင်းႁူမ်ႈတုမ် ၼိုင်ႈၵျၢပ်ႈလႂ် ထိုင်ၵႂႃႇ ႁိမ်းႁွမ်း 120 သႅၼ်ပျႃး ၼႆယဝ်ႉ။

ၵႃႈၶၼ်ၶမ်းၼႂ်းမိူင်းႁူမ်ႈတုမ်ၼႆႉ ယၢမ်းလဵဝ် ၼိုင်ႈၵျၢပ်ႈ (ဢၼ်မီးၼမ်ႉၼၵ်း 16 ပႄး) ၼႆႉ မီးယူႇ 11,550,000 ပျႃး (ၼႆႉပဵၼ်ၵႃႈၶၼ်ၸဝ်ႈႁၢၼ်ႉၶဝ်ၶၢႆ) ၊ ပေႃးပဵၼ်ၶၼ်ၸဝ်ႈႁၢၼ်ႉ ႁပ်ႉသိုဝ်ႉသမ်ႉ မီးယူႇ 11,510,000 ပျႃး။ ၼႂ်းၶၢဝ်းတၢင်း ၶမ်ႈၶိုၼ်းလဵဝ်ၵူၺ်း ပုင်ႈၶိုၼ်ႈၵႂႃႇမွၵ်ႈ 8 သႅၼ်ပျႃး ၼႆယဝ်ႉ။

မိူဝ်ႈဝႃးဝၼ်းတီႈ 28/1/2026 ယၢမ်းၵၢင်ၼႂ် ၶၼ်ၶမ်းလုမ်ႈၾႃႉ ၼိုင်ႈဢွၼ်ႊသ် မီးယူႇ 5,243 တေႃႊလႃႊ။ ၶၼ်ၶမ်းၼႂ်းမိူင်းႁူမ်ႈတုမ် ၼိုင်ႈၵျၢပ်ႈလႂ် မီးယူႇ 10,870,000 ပျႃး (ၼႆႉပဵၼ်ၵႃႈၶၼ်ၸဝ်ႈႁၢၼ်ႉၶဝ်ၶၢႆ) ၊ ပေႃးပဵၼ် ၶၼ်ၸဝ်ႈႁၢၼ်ႉၶဝ်သိုဝ်ႉသမ်ႉ မီးယူႇ 10,830,000 ပျႃး ၼႆယဝ်ႉ။

ဝၼ်းတီႈ 27/1/2026 ယၢမ်းတၢမ်းၶမ်ႈၼၼ်ႉသမ်ႉ ၶၼ်ၶမ်းၼိုင်ႈၵျၢပ်ႈၼႆႉ ယင်းတိုၵ်ႉမီး 10,650,000 ၵူၺ်းသေ ဝၼ်းလဵဝ်ၵူၺ်းၵိုင်ႉၵၢင်ႉၶိုၼ်ႈၵႂႃႇ 2 သႅၼ်ပျႃး ၼႆယဝ်ႉ။

တီႈၼႂ်းဝူင်းၵၢၼ်လွၵ်းၵၢတ်ႇၵႃႉၶၢႆၶမ်း ၼႂ်းမိူင်းထႆးတႄႉ ယၢမ်းၵၢင်ၼႂ်ၸဝ်ႉၼႆႉ ပိုတ်ႇၵႃႈၶၼ်ဝႆႉ ၼိုင်ႈၿၢတ်ႇ (ဢၼ်မီး 15 ၵရမ်ႊ) ၼႆႉ 82,200 ၿၢတ်ႇ၊ ပုင်ႈၶိုၼ်ႈမႃး 3,700 ၿၢတ်ႇ ဝႃႈၼႆ။

ၶၼ်ၶမ်းၼႆႉၼႂ်းမိူင်းထႆးၵေႃႈ ၶိုၼ်ႈၸွမ်းငဝ်းလၢႆးၵႃႈၶၼ်ၶမ်းလုမ်ႈၾႃႉယူႇၵူႈၶၢဝ်းယၢမ်း မိူၼ်ၵၼ်တင်း ၼႂ်းမိူင်းႁူမ်ႈတုမ် (မိူင်းမၢၼ်ႈ)။

ဢိင်ၼိူဝ်ၶၼ်ၶမ်းပုင်ႈၶိုၼ်ႈယူႇၵူႈမိုဝ်ႉၵူႈဝၼ်းၼႆႉသေ လွင်ႈၵေႃႇၵၢၼ်ႁၢႆႉ လွင်ႈလွၵ်ႇလႅၼ်ၵိၼ်ၵၼ်ၵေႃႈ ၸၢင်ႈမီးလႆႈၵူႈၶၢဝ်းလႄႈ ပီႈၼွင်ႉတႆးၸိူဝ်းယိပ်းၶမ်းဝႆႉႁိုဝ်ႉဢမ်ႇၼၼ် ၸိူဝ်းတေသိုဝ်ႉတေၶၢႆၶမ်းႁိုဝ်ႉ ၸိူဝ်းၼႆႉၵေႃႈႁႂ်ႈဢွၼ်ၵၼ်ၾၢင်ႉယႂ်ႇၼမ်သေၵမ်း – ၸုမ်းၸွႆႈထႅမ်ႁႅင်းၵၢၼ်ယၢၼ်မိူင်း ဝဵင်းၵဵင်းမႂ်ႇမိူင်းထႆး လၢတ်ႈဝႆႉၼင်ႇၼႆ။