ၸၢႆးမွင်ႇတဵင်းလၢႆႇ ဢႃယု 29 ပီ ၵူၼ်းဝၢၼ်ႈသူပ်းသၢႆမႂ်ႇ ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ ႁၢႆၵႂႃႇလႆႈ 5-6  ဝၼ်း ယင်းပႆႇႁၼ်တူဝ်ၶိုၼ်း ။

မိူဝ်ႈဝၼ်းတီ 24 /1/2025 ဝၢႆးဝၼ်း 2 မူင်း ၸၢႆးမွင်ႇတဵင်းလၢႆႇ လၢတ်ႈဝႃႈ တေဢွၵ်ႇၵႂႃႇလႄႇၵမ်းၼိုင်ႈၼႆသေ ဢွၵ်ႇႁိူၼ်းၵႂႃႇ  ဢမ်ႇပွၵ်ႇမႃးၶိုၼ်းထိုင်ဝၼ်းမိူဝ်ႈၼႆႉ ၵူၼ်းႁိူၼ်းဢမ်ႇလႆႈတင်းၵပ်းသိုပ်ႇလႄႈဢွၼ်ၵၼ် မႆႈၸႂ်ဝႆႉႁၢဝ်ႈႁႅင်း ဝႃႈၼႆ ။

ၸၢႆးမွင်ႇတဵင်းလၢႆႇၼႆႉ မီးတၢင်းပဵၼ်ရူၵ်ႈသိုမ်းသဝ်ႉ (တၢင်းပဵၼ်သဝ်ႈမွင် / တၢင်းပဵၼ်ပၢႆးၸႂ် ) မႃးၶၢဝ်းတၢင်း 7 – 8 ပီယဝ်ႉ။ လႆႈၵိၼ်ယႃႈယႃ ပၢႆးၸႂ်ၼၼ်ႉၵူႈဝၼ်း။ ယၢမ်းလဵဝ်သမ်ႉႁၢႆၵႂႃႇ 4-5 ဝၼ်းယဝ်ႉၸိူင်ႉၼႆ ႁဵတ်းႁႂ်ႈၵူၼ်းတီႈႁိူၼ်းပဵၼ်ဢၼ် မႆႈၸႂ်တႄႉတႄႉ ဝႃႈၼႆ ။

ပီႈဢၢႆႈ  ၸၢႆးမွင်ႇတဵင်းလၢႆႇလၢတ်ႈတီႈၽူႈတွႆႇႁွၵ်ႈဝႃႈ -“ၼွင်ႉၸၢႆးၶႃႈၼႆႉ ပဵၼ်တၢင်းပဵၼ် ရူၵ်ႈသိုမ်းသဝ်ႉ ( တၢင်းပဵၼ်ပၢႆးၸႂ် ) လႆႈၵိၼ်ယႃၵူႈဝၼ်း ၊ ဢမ်ႇၵိၼ်ဢမ်ႇလႆႈ – ႁဵတ်းၼႆၶႃႈၼေႈ။  တလဵဝ်ၼႆႉ ပဵၼ်ပိူၼ်ႈႁွင်ႉၵႂႃႇႁႃႉ ၊ မၼ်းပႆၵႂႃႇႁင်းၵူၺ်းမၼ်းႁႃႉၵေႃႈ ဢမ်ႇႁူႉၶႃႈ။   ဝၼ်းမၼ်းႁၢႆၼၼ်ႉ  သိုၵ်းမၢၼ်ႈတင်ႈလၢၼ်ႇၸွမ်းတႃႈၸွမ်းတၢင်းလၢႆတီႈ ။ ပိူၼ်ႈၵူတ်ႇထတ်းၵူၼ်းၵႂႃႇမႃးဢေႃႈဝၼ်းၼၼ်ႉ။ ဢၼ်မႆႈၸႂ်ၼႆႉ ၵူဝ်ပိူၼ်ႈထၢမ်မၼ်း လၢတ်ႈဢမ်ႇႁူႉလိူင်ႈသေ ၵူဝ်ပိူၼ်ႈတီႉမၼ်းၵႂႃႇၸိူင်ႉၼၼ်ၶႃႈၼေႈ။  ”-ဝႃႈၼႆ ။

 ဝၼ်းတီႈ 24/1/2026 ၼၼ်ႉမီးၵူၼ်းၸုမ်းၼိုင်ႈပူၵ်ႉၼႃႈပူၵ်ႉတႃ ၶဝ်ႈတီႉၺွပ်း ၸဝ်ႈႁၢၼ်ႉ  ၶၢႆၶိူင်ႈၶူဝ်းၵေႃႇသၢင်ႈ လႄႈ  လႅၵ်ႈငိုၼ်း ထႆး- မၢၼ်ႈ-ၶႄႇ တီႈပွၵ်ႉသၼ်သၢႆး ၵ ၼၼ်ႉလႄႈ  ပလိၵ်ႈမၢၼ်ႈ ပႂ်ႉၵူတ်ႇထတ်းၵူၼ်းၵႂႃႇမႃး ၸွမ်းတႃႈၸွမ်းတၢင်း ႁၢဝ်ႈႁႅင်း ၊ ၸင်ႇဝႃႈ ၸၢႆးမွင်ႇတဵင်းလၢႆႇႁၢႆၵႂႃႇၼၼ်ႉၵေႃႈ  ၵူဝ်ပဵၼ်သိုၵ်းမၢၼ်ႈတီႉၺွပ်းၵႂႃႇ ၵူၺ်းယဝ်ႉ ၵူၼ်းႁိူၼ်းလၢတ်ႈၼင်ႇၼႆ။

 ဢမ်ႇၼၼ် သင်ဝႃႈၽႂ်ၸဝ်ႈလႂ် ႁူပ်ႉႁၼ် ၸၢႆးမွင်ႇတဵင်းလၢႆႇၵေႃႈ ၶႅၼ်းတေႃႈႁႂ်ႈၵပ်းသိုပ်ႇၸူး မၢႆၾူၼ်း – 09421217627  သေ ပွင်ႇၶၢဝ်ႇပၼ်သေၵမ်းၼႆ ၵေႃႉပဵၼ်ပီႈဢၢႆႈ လၢတ်ႈၼင်ႇၼႆ။

ၵူၼ်းမုင်ႉႁေႃႁိူၼ်း ၸၢႆးမွင်ႇတဵင်းလၢႆႇ လၢတ်ႈၽူႈတွႆႇႁွၵ်ႈဝႃႈ -“ႁၢႆၵႂႃႇတီႈသူပ်းသၢႆ ၊ တီႈၼိူဝ်ထၢတ်ႈလွႆယူၼ်း မၼ်းၵႆႉဢွၵ်ႇၵႂႃႇလႄႇတီႈလွႆၼၼ်ႉတႃႇသေ ဢွၼ်ၵၼ်ၵႂႃႇၸွမ်းႁႃမၼ်း ၵေႃႈဢမ်ႇႁၼ်။ ထူဝ်းႁႃၵေႃႈ ဢမ်ႇလႆႈ  ။ သၢႆတိုၼ်းဢမ်ႇၶဝ်ႈ ။ ထိုင်ဝၼ်းမိူဝ်ႈၼႆႉယဝ်ႉၶႃႈ ”-ဝႃႈၼႆ ။

တီႈၼႂ်းႁၢင်လိူၼ် ၵျႅၼ်ႊၼိဝ်ႊရီႊၼႆႉမႃး ၼႂ်းၶၢဝ်းတၢင်းဝူင်ႈလဵဝ် ၵူၼ်းဝဵင်းတႃႈၶီႈလဵၵ်း ယူႇပွၵ်ႉသၼ်သၢႆး  2 ၵေႃႉ ၺႃးတီႉၺွပ်း ယွၼ်းၵႃႈထုတ်ႇတူဝ် ဢၢၼ်ႇႁူဝ်လၢၼ်ႉဝၢၼ်ႇ ။

ငဝ်းလၢႆးဝၢၼ်ႈမိူင်းဢမ်ႇလီၸိူင်ႉၼႆႉ လုၵ်ႈဢွၼ်ႇၸၢႆး လုၵ်ႈဢွၼ်ႇယိင်းၵေႃႈ မီးၽေးၼမ်၊ ၵႆႉႁၢႆ ၼႃႇ၊ ၽေးလၵ်ႉၵူၼ်း ၵႃႉၶၢႆၵူၼ်း ႁူၺ်းႁွင်ႉၵႂႃႇႁဵတ်းၵၢၼ်ၵျႃႊၽျႅၼ်ႉ၊ တီႉၺွပ်း ၵႂႃႇၾိုၵ်း ၵၢၼ်သိုၵ်း ၸဵမ် ၸိူဝ်းၼႆႉ။ ၵွပ်ႈၼႆ  ယူႇတီႈပေႃႈမႄႈၽူႈၵုမ်းတူၺ်းသေ ႁႂ်ႈၾၢင်ႉ လုၵ်ႈၽႂ်လၢင်းမၼ်းလီလီ- ၵူၼ်းပိုၼ်ႉတီႈလၢတ်ႈ ။

ဝဵင်းတႃႈၶီႈလဵၵ်းၼႆႉ ၸွမ်းၼင်ႇပဵၼ်ဝဵင်းတိတ်းၸပ်းလႅၼ်လိၼ်လႄႈ ၵူၼ်းမိူင်းတၢင်ႇတီႈသီႇလႅၼ် မႃးယူႇသဝ်းၼမ်၊ ပၢင်တေႃႇလွင်း၊ ယႃႈမဝ်းၵမ်လႄႈ ဢွင်ႈတီႈလဵၼ်ႈၵဵမ်ႊ ဢွၼ်ႊလၢႆႊၵေႃႈ မီးၼမ်။

လိူဝ်ၼၼ်ႉ ၵူၼ်းယိပ်းၵွင်ႈ ယိပ်းမိတ်ႈယိပ်းလႅဝ်း ပႂ်ႉၸူၼ်ႁဵတ်းႁၢႆႉၶႃႈႁႅမ်ၵၼ်တၢႆၵေႃႈ မီးၼမ်လိူင်ႇ၊ ယူႇတီႈၸဝ်ႈၼႃႈတီႈ ပလိၵ်ႈ သိုၵ်းမၢၼ်ႈ ဢမ်ႇဢဝ်ပုၼ်ႈၽွၼ်းပၼ်လႆႈႁႂ်ႈ ထိုင်တီႈ။