ဝၼ်းပၢင်လိူၵ်ႈတင်ႈၵမ်းသၢမ် ဝၼ်းတီႈ 25/1/2026 ၼႆႉ တီႈဝဵင်းၾၢႆၶုၼ် ၸိုင်ႈတႆးပွတ်းၸၢၼ်း မီးပႃႇတီႇသၢင်ႇသီႈဢၼ်လဵဝ် ၵူၺ်းလႄႈ ၵူၼ်းမိူင်းဢမ်ႇသူၼ်ၸႂ် တႃႇၵႂႃႇပၼ်ၶႅပ်းၵၢင်ၸႂ် ဝႃႈၼႆ ။
ၵူၼ်းၼုမ်ႇဝဵင်းၾၢႆၶုၼ်လၢတ်ႈၽူႈတွႆႇႁွၵ်ႈဝႃႈ – “ ဢမ်ႇမီးၵူၼ်းၵႂႃႇပၼ်သဵင်ၶႃႈ ၊ ၸိူဝ်းၵႂႃႇပၼ်သဵင် ၵေႃႈ ဢမ်ႇမီးတဵမ် 100 လူးၵွၼ်ႇ ၊ ဢမ်ႇမီးၽႂ်ၵႂႃႇပၼ်သဵင်ၵၢင်ၸႂ် ၊မီးလုၵ်ႈမေးသိုၵ်းမၢၼ်ႈ ၼႂ်းတပ်ႉၵူၺ်း ၊ ယွၼ်ႉမီးပႃႇတီႇဢၼ်လဵဝ်ၵူၺ်းလႄႈ ၵူၼ်းမိူင်းဢမ်ႇၵျိူၵ်ႈ ဢမ်ႇမီးၽႂ်ၵႂႃႇလိူၵ်ႈ”– ဝႃႈၼႆ ။
ယူႇတီႈ ပႃႇတီႇသၢင်ႇသီႈသေ တေၶဝ်ႈလိူၵ်ႈတင်ႈ တီႈဝဵင်းၾၢႆၶုၼ်ၼႆႉမီး 3 ၵေႃႉ ။ ၼေႃႇတႅၼ်းၽွင်းသၽႃးၵူၼ်းမိူင်း ပဵၼ် တေႃႇယီႇယီႇလၢႆႇ ၊ ၼေႃႇတႅၼ်းၽွင်းသၽႃးၸႄႈမိူင်း (FPTP) ပဵၼ်ၸၢႆးၵျေႃႇယိၼ်ႇ ၊ ၼေႃႇၽူႈတႅၼ်းၸၢဝ်းၶိူဝ်းဢယၢၼ်းပဵၼ် တေႃႇဢေးၶဵဝ်ႇၸိၼ်ႇ ။
ပၢင်လိူၵ်ႈတင်ႈၵမ်းၼႆႉ ၵူၼ်းမိူင်း ၾၢႆႇဢွၵ်ႇၼွင်မိူင်းပၢႆးလႄႈ ၸွမ်းဝၢၼ်ႈဢိူင်ႇ ဢၼ်မီး တၢင်းၼွၵ်ႈဝဵင်းတႄႉ ဢမ်ႇမီးသုၼ်ႇတွတ်ႈၶႅပ်းၵၢင်ၸႂ် ၊ ၵူၼ်းဢၼ်မီးသုၼ်ႇၵႂႃႇတွတ်ႈ ၶႅပ်းၵၢင်ၸႂ် ၼႆႉ ပဵၼ်ၼႂ်းပွၵ်ႉၼႂ်းဝဵင်းလႄႈ ႁိမ်းႁွမ်းတပ်ႉသိုၵ်းမၢၼ်ႈၸိူဝ်းၼၼ်ႉၵူၺ်း – ၵူၼ်းပိုၼ်ႉတီႈ လၢတ်ႈၼင်ႇၼႆ ။
တီႈဝဵင်းၾၢႆၶုၼ်ၼႆႉ ႁူင်းတွတ်ႈၶႅပ်းၵၢင်ၸႂ်မီး 12 တီႈ ။ ယွၼ်ႉမီးပႃႇတီႇသၢင်ႇသီႈ ဢၼ်လဵဝ်ၵူၺ်းလႄႈ ဢမ်ႇမီးလွင်ႈ သူၼ်းတုမ်သင်။ တေႃႇထိုင်ဝၼ်းမိူဝ်ႈၼႆႉ ၼွၵ်ႈဝဵင်းၼႂ်းဝဵင်းၵေႃႈ ယူႇယူႇ ၵႆႉလႆႈယိၼ်းသဵင်ၵွင်ႈသဵင်မၢၵ်ႇယူႇလႄႈ ႁဵတ်းႁႂ်ႈ ၵူၼ်းမိူင်းမႆႈၸႂ်လွင်ႈႁူမ်ႇလူမ်ႈဝႆႉ ဝႃႈၼႆ ။
ၸုမ်းၵူၼ်းၼုမ်ႇ ဝဵင်းၾၢႆၶုၼ် လၢတ်ႈၽူႈတွႆႇႁွၵ်ႈဝႃႈ- “ၼႂ်းဝၼ်းတီႈ 23 ၼၼ်ႉ တၢင်းၾၢႆႇတူၵ်းဝဵင်းမိူင်းပၢႆးၼၼ်ႉ ပဵၼ်ပၢင်တိုၵ်းၵၼ် ယူႇၼႆ ၊ မိူဝ်ႈဝႃးၵေႃႈ တိုၵ်ႉလႆႈယိၼ်းသဵင်ၵွင်ႈသဵင်မၢၵ်ႇယူႇဢေႃႈ”-ဝႃႈၼႆ ။
ပၢင်လိူၵ်ႈတင်ႈ ပွၵ်ႈၵမ်း 3 ၼႆႉ မိူင်းႁူမ်ႈတုမ်ပတ်းပိုၼ်ႉ တေၸတ်းႁဵတ်း ၼႂ်းမိူင်းတႆး ပႃး 9 ၸႄႈဝဵင်း ပဵၼ် ၸႄႈဝဵင်းမၢၵ်ႇမၢင်၊ ၸႄႈဝဵင်းပၢင်လွင်း၊ ၸႄႈဝဵင်းယွင် ႁူၺ်ႈ၊ ၸႄႈဝဵင်းၾၢႆၶုၼ်၊ ၸႄႈဝဵင်းမိူင်းၼၢႆး၊ ၸႄႈဝဵင်းၵေးသီး၊ ၸႄႈဝဵင်းမိူင်းသူႈ၊ ၸႄႈဝဵင်းသီႇပေႃႉ လႄႈ ၸႄႈဝဵင်းၵျွၵ်ႉမႄး ။
ပၢင်လိူၵ်ႈတင်ႈ 3 ၸုပ်ႈ 3 ၵမ်းၼႆႉ ၼႂ်းမိူင်းႁူမ်ႈတုမ်ပတ်းပိုၼ်ႉ 330 ၸႄႈဝဵင်းၼႆႉ သိုၵ်းမၢၼ်ႈၸတ်းႁဵတ်း 263 ဝဵင်းၵူၺ်း။ မိူၼ်ၼင်ႇတီႈဝဵင်းၾၢႆၶုၼ်ၼႆႉၵေႃႈ သိုၵ်းမၢၼ်ႈၸတ်းႁဵတ်းပၢင်လိူၵ်ႈတင်ႈၼႂ်းၵႄႈ ပၢင်တိုၵ်းသိုၵ်းသိူဝ်။ မိူၼ်ၼင်ႇၼႂ်းၸႄႈဝဵင်းၵျွၵ်ႉမႄးသမ်ႉ ဢမ်ႇၸၢင်ႈၸတ်းၵူႈဢိူင်ႇ ၵူႈပွၵ်ႉ။ ၵူၼ်းတင်းလုမ်ႈၾႃႉ (ၼွၵ်ႈလိူဝ်ၵူၼ်းၵမ်ႉထႅမ်သိုၵ်းမၢၼ်ႈ) ႁၼ်ထိုင်ဝႃႈ ပဵၼ်ပၢင်လိူၵ်ႈတင်ႈဢမ်ႇၽဵင်ႇပဵင်းပဵၼ်ထမ်း ဝႃႈၼႆသေတႃႉ ၸွမ်းၸိၵ်းသိုၵ်းမၢၼ်ႈမိၼ်းဢွင်ႇလၢႆႇတႄႉလၢတ်ႈတီႈ ဝဵင်းလိူဝ်ႇ မိူဝ်ႈၼႆႉ 25/01/2026 ဝႃႈ “ၽႂ်ၶႂ်ႈမၵ်းမၼ်ႈဢမ်ႇမၵ်းမၼ်ႈၵေႃႈယဝ်ႉ ႁဝ်းဢမ်ႇသူၼ်ၸႂ်” – ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ