ဝၼ်းတီႈ 25/01/2026 မိူဝ်ႈၼႆႉ ပၢင်လိူၵ်ႈတင်ႈႁွပ်ႈ 3 ဢၼ်သိုၵ်းမၢၼ်ႈၼမ်းၸတ်း ၊ ႁူင်းတွတ်ႈၶႅပ်းၵၢင်ၸႂ် ၼႂ်းတပ်ႉမၢၼ်ႈ တီႈမိူင်းၼၢႆး 3 ႁူင်း တွတ်ႈၸဵဝ်းယဝ်ႉဝႆးတေၵူႈတီႈ ဝႃႈၼႆ။

ၵူၼ်းပိုၼ်ႉတီႈလၢတ်ႈတီႈ ၽူႈတွႆႇႁွၵ်ႈဝႃႈ – “ တီႈၼႂ်းတပ်ႉတႄႉ ၵူၼ်းၶဝ်မီးၵႃႈႁိုဝ်ၵေႃႈ မႃးတွတ်ႈပၼ်တဵမ်တဵမ်ယဝ်ႉ ။ တင်း 3 ႁူင်းၼႆႉ သိူဝ်ၽိူၵ်ႇလႆႈ 17 မႄး ၊ ဢၼ်ပေႉတႄႉႁူႉပဵၼ် ပႃႇတီႇသၢင်ႈသီႈၼၼ်ႉယဝ်ႉ ၼႂ်းတပ်ႉတႄႉ ” – ဝႃႈၼႆ။

တပ်ႉမၢၼ်ႈဢၼ်မီးၼႂ်းမိူင်းၼၢႆး မိူၼ်ၼင်ႇ ၶလယ 248  ၊ ၶမယ 518 လႄႈ ဢမတ တပ်ႉၵွင်ႈလူင် 363 ၸိူဝ်းၼႆႉ မီးႁူင်းတွတ်ႈသဵင် ၼိုင်ႈတပ်ႉလႂ်ၼိုင်ႈႁူင်း ။ ၶလယ 248  ၵူၼ်းတွတ်ႈမီး 360 ၵေႃႉ ၊ ၶမယ 518 မီး 383 ၵေႃႉ  တပ်ႉၵွင်ႈလူင် မီး 130 ၵေႃႉ ၼႆ ၵူၼ်းပိုၼ်ႉတီႈလၢတ်ႈ။

မိူင်းၼၢႆးၼႆႉ  ႁူင်းတွတ်ႈသဵင် တင်းသဵင်ႈမီး 39 ႁူင်း ၼပ်ႉပႃးၼႂ်းၵဵင်းတွင်း ။ သဵၼ်ႈၸိုဝ်ႈၵူၼ်းမီးသုၼ်ႇ တွတ်ႈသဵင် မီး 28387 ၵေႃႉ။

ၽွင်းတႅမ်ႈၶၢဝ်ႇၼႆႉၵူၺ်းၵေႃႈ မႅၼ်ႈၽွင်း ၵူၼ်းမိူင်းတိုၵ်ႉလႆၵႂႃႇ တွပ်ႈၶႅပ်းၵၢင်ၸႂ်ယူႇ ယွၼ်ႉဝႃႈ ၺႃးသိုၵ်းမၢၼ်ႈ သင်ႇႁႂ်ႈမႃးၵူႈႁိူၼ်းယဝ်ႉ ၼႆ ၵူၼ်းပိုၼ်ႉတီႈသိုပ်ႇလၢတ်ႈၼင်ႇၼႆ ။

ပၢင်လိူၵ်ႈတင်ႈ ႁွပ်ႈ 3 ၼႆႉ ၼႂ်းမိူင်းတႆး ပႃး 9 ဝဵင်း –  သီႇပေႃႉ ၵျွၵ်ႉမႄး မၢၵ်ႇမၢင် ၵေးသီး မိူင်းသူႈ ၾၢႆၶုၼ် မိူင်းၼၢႆး ပၢင်လွင်း လႄႈ ယွင်ႁူၺ်ႈ ။