မိူဝ်ႈၼႆႉ ဝၼ်းတီႈ 25 လိူၼ်ၵျႅၼ်ႊၼိဝ်ႊရီႊ သိုၵ်းမၢၼ်ႈယိုတ်းမိူင်းၸတ်းႁဵတ်းပၢင်လိူၵ်ႈတင်ႈ ပွၵ်ႈၵမ်း 3 ၼႂ်းမိူင်းႁူမ်ႈတုမ် တႃႇ 63 ၸႄႈဝဵင်းသေ တၢမ်တူဝ်မိၼ်းဢွင်ႇလၢႆႇ ၸွမ် ၸိၵ်းသိုၵ်းမၢၼ်ႈယိုတ်းမိူင်း ၵေႃႉလူင်းၵႂႃႇၵူတ်ႇထတ်းတူၺ်း ၸွမ်းႁူင်းပၼ်သဵင် ၼႂ်းၸႄႈဝဵင်းမၢၼ်းတလေး မိူင်းမၢၼ်ႈထုင်ႉပဵင်း။

ၽွင်းလူင်းၵူတ်ႇထတ်းတူၺ်း ၸွမ်းႁူင်းပၼ်သဵင်ၼႂ်းဝဵင်းမၢၼ်းတလေး (ဝဵင်းလိူဝ်ႇ) ၼၼ်ႉ မိၼ်းဢွင်ႇလၢႆႇ တွပ်ႇလၢတ်ႈၵႂႃႇတီႈၸုမ်းသိုဝ်ႇၶၢဝ်ႇ ဢၼ်ပဵၼ်ၶွၼ်ႉတဝ်ႉၶွင်သိုၵ်းမၢၼ်ႈၼၼ်ႉဝႃႈ “ၵၢၼ်တီႈၵူၼ်းဢမ်ႇၵႂႃႇ ပၼ်သဵင်ၵၢင်ၸႂ်ၼၼ်ႉ မီးယူႇသွင်တွၼ်ႈ။ တွၼ်ႈၼိုင်ႈတႄႉ – ဢမ်ႇမီးၸႂ်ၶႂ်ႈလိူၵ်ႈၽႂ်လႄႈ ၸင်ႇဢမ်ႇၵႂႃႇသႂ်ႇ ပၼ်ၶႅပ်းၵၢင်ၸႂ်။ ထႅင်ႈသႅၼ်းၼိုင်ႈသမ်ႉ မႆႈၸႂ်လွင်ႈႁူမ်ႇလူမ်ႈလႄႈ ဢမ်ႇမႃးပၼ်။ ပၢင်လိူၵ်ႈတင်ႈၼႆႉ ၽႂ်ၶႂ်ႈမၵ်းမၼ်ႈဢမ်ႇမၵ်းမၼ်ႈၵေႃႈယဝ်ႉ ႁဝ်းတႄႉဢမ်ႇသူၼ်ၸႂ်” ဝႃႈၼႆ။

မိူဝ်ႈၼႆႉ ပဵၼ်ဝၼ်းဢၼ်သိုၵ်းမၢၼ်ႈဢွၼ်ၼမ်းၸတ်းပၢင်လိူၵ်ႈတင်ႈ ၵမ်းသၢမ် (ၵမ်းလိုၼ်းသုတ်း) ။ ၼႂ်းမိူင်းတႆးၵေႃႈ လႆႈၸတ်းႁဵတ်းပၢင် လိူၵ်ႈတင်ႈၵႂႃႇထႅင်ႈ တႃႇ 9 တီႈ ပဵၼ်ၼႂ်းၸႄႈဝဵင်းသီႇပေႃႉ၊ ဝဵင်းၵျွၵ်ႉမႄး၊ ဝဵင်းမၢၵ်ႇမၢင်၊ ဝဵင်းမိူင်းၼၢႆး၊ ဝဵင်းၾၢႆၶုၼ်၊ ဝဵင်းပၢင်လွင်း၊ ဝဵင်းမိူင်းသူႈ၊ ဝဵင်းယွင်ႁူၺ်ႈ လႄႈ ဝဵင်းၵေးသီး ၸဵမ်ၸိူဝ်းၼႆႉ။

လိူဝ်ၼၼ်ႉ မိၼ်းဢွင်ႇလၢႆႇယင်းသိုပ်ႇလၢတ်ႈၵႂႃႇထႅင်ႈဝႃႈ – ၼႂ်းပၢၼ်လူင်ပွင်ၸိုင်ႈမႂ်ႇဢၼ်တေမႃးၼႆႉ တေႁဵတ်းႁႂ်ႈၸိုင်ႈမိူင်းၶိုၼ်ႈယႂ်ႇမႂ်ႇသုင် မီးလွင်ႈၵတ်းယဵၼ်ၼိမ်တဵင်ႈသေ ႁဵတ်းႁႂ်ႈၶိုတ်းတၼ်းလုမ်ႈၾႃႉၵႂႃႇလႆႈ။ ပေႃးၵူၼ်းမိူင်းၶဝ်ႈႁူမ်ႈတူင်ႉၼိုင်ၸွမ်းၸင်ႇ ၸိုင်ႈမိူင်းၼွၵ်ႈၶဝ်ၵေႃႈ တေလႆႈႁူႉၸွမ်း ငဝ်းလၢႆးပိူင်ပဵၼ်တေႉမီးတေႉ ၼႂ်းၸိုင်ႈမိူင်း။ လွင်ႈၼႆႉလမ်ႇလွင်ႈတေႉတေႉ – ဝႃႈၼႆ။

ပၢင်လိူၵ်ႈတင်ႈဢၼ်သိုၵ်းမၢၼ်ႈၼမ်းၸတ်းယူႇၼႂ်းမိူင်းႁူမ်ႈတုမ်ယၢမ်းလဵဝ်ၼႆႉ ၼႂ်းမိူင်းႁူမ်ႈတုမ် 330 ဝဵင်းၼႆႉသိုၵ်းမၢၼ်ႈၸတ်းႁဵတ်းၵႂႃႇ 263 ဝဵင်းၵူၺ်း ဢမ်ႇပႃးတင်းမူတ်း။ ၾၢႆႇသိုၵ်းမၢၼ်ႈ လႄႈ ပႃႇတီႇၵၢၼ်မိူင်းၸိူဝ်းၶဝ်ႈၸွမ်းပၢင်လိူၵ်ႈတင်ႈၶဝ်တႄႉ ပိုတ်ႇပၢၵ်ႇလၢတ်ႈဝႃႈ လွင်ႈယႂ်ႇတႃႇဝၢၼ်ႈမိူင်း လႄႈ ၵူၼ်းမိူင်းတေႉတေႉၼႆယူႇ။

ၵူၺ်းၵႃႈ ပႃႇတီႇၵၢၼ်မိူင်း ၸိူဝ်းယူႇၾၢႆႇၶတ်းၶၢၼ်ႉ ၸုမ်းသိုၵ်းမၢၼ်ႈ လႄႈ ႁူဝ်ပဝ်ႈၸုမ်းဢႃႊသီႇယႅၼ်ႊတႄႉ ပိုတ်ႇပၢၵ်ႇလၢတ်ႈဝႃႈ ပၢင်လိူၵ်ႈတင်ႈၼႆႉ ဢမ်ႇမီးလွင်ႈၽဵင်ႇပဵင်း လႄႈ ဢမ်ႇမီးလွင်ႈပူင်ႇသႂ်ႇ။ ၵွပ်ႈၼၼ် ဢမ်ႇယွမ်းႁပ်ႉ လႄႈ ဢမ်ႇၸၢင်ႈၵမ်ႉထႅမ်ဝႃႈ ပၢင်လိူၵ်ႈတင်ႈၼႆႉ ပဵၼ်ထမ်း ဝႃႈၼႆ။