တူဝ်တႅၼ်းၶိုၵ်ႉတွၼ်းၸၢတ်ႈၸိုင်ႈလုမ်ႈၾႃႉ ၵဵဝ်ႇလူၺ်ႈသုၼ်ႇလႆႈၵူၼ်းမိူင်းမၢၼ်ႈလၢတ်ႈတီႈသိုဝ်ႇၶၢဝ်ႇ DVBဝႃႈ ပၢင်လိူၵ်ႈတင်ႈဢၼ်သိုၵ်းမၢၼ်ႈဢွၼ်ၼမ်းၸတ်းႁဵတ်းၼႆႉ ပဵၼ်ပၢင်လိူၵ်ႈတင်ႈဢၼ်ပွမ် ၊ သိုၵ်းမၢၼ်ႈႁၢင်ႈႁႅၼ်းႁဵတ်းဝႆႉတႃႇၶဝ်ဢွင်ႇပေႉလူၼ်ႉႁိုၵ်းလူၼ်ႉၾင်ႇလႄႈ လုမ်ႈၾႃႉဢမ်ႇထုၵ်ႇလီယွမ်းႁပ်ႉ ဝႃႈၼႆ။

တူဝ်တႅၼ်းၶိုၵ်ႉတွၼ်းၸၢတ်ႈၸိုင်ႈလုမ်ႈၾႃႉ တွမ်ႊ ဢႅၼ်ႊၻရူႊ လၢတ်ႈၵႂႃႇမိူဝ်ႈဝၼ်းတီႈ 23/01/2026 ဝႃႈ ပၢင်လိူၵ်ႈတင်ႈၵမ်းၼႆႉ သိုၵ်းမၢၼ်ႈလႄႈပႃႇတီႇဢၼ်ၸမ်ၸႂ်ဢူၺ်းလီၵၼ်တင်းၶဝ်ၵူၺ်းႁဵတ်းတႃႇႁႂ်ႈဢွင်ႇပေႉပၢင်လိူၵ်ႈတင်ႈဝႆႉယဝ်ႉ။

ဢၼ်ပဵၼ်ၸုမ်းတူင်ႉၼိုင်တႃႇ ၻီႊမူဝ်ႊၶရေႊသီႊလႄႈ လူင်ပွင်ၸိုင်ႈၵူၼ်းမိူင်း ဢၼ်ၼၢင်းဢွင်ႇသၢၼ်းၸုၵျီႇဢွၼ်ႁူဝ်ၼၼ်ႉတႄႉ သိုၵ်းမၢၼ်ႈ တီႉၺွပ်းယဵတ်ႈၶွၵ်ႈသေ ယိုတ်းဢဝ်ဢႃႇၼႃႇၸိုင်ႈမိူင်း လူၺ်ႈၵူၼ်းမိူင်းဢမ်ႇတဵမ်ၸႂ် ယွမ်းႁပ်ႉ ။ လွင်ႈၼႆႉ သိုၵ်းမၢၼ်ႈဢမ်ႇသူၼ်ၸႂ်သေ တႃႇႁႂ်ႈလုမ်ႈၾႃႉယွမ်းႁပ်ႉၼၼ်ႉ သိုၵ်းမၢၼ်ႈၼႅတ်ႈၶိုင်ၸတ်းပၢင်လိူၵ်ႈတင်ႈႁႂ်ႈပဵၼ် ၊ ႁႂ်ႈဢွင်ႇမၢၼ် ။ ၼင်ႇႁိုဝ်တေဢမ်ႇမီးၵူၼ်းယႃႉၵဝ်းၼၼ်ႉၵေႃႈသိုၵ်းမၢၼ်ႈ ႁဵတ်းဢွၵ်ႇမၢႆမီႈပၵ်းပိူင် ဢၼ်ယိုတ်ႈယုၼ်လႆႈသေ ၸၢင်ႈသႂ်ႇႁူဝ်ၶေႃႈတီႉၺွပ်းလႆႈၵူႈလၢႆး- ယၢမ်းလဵဝ်ၵေႃႈၶိုင်ပွင်တႃႇၸတ်းပၢင်လိူၵ်ႈတင်ႈၵမ်းသၢမ်ယူႇယဝ်ႉ မၼ်းၸၢႆးလၢတ်ႈၼင်ႇၼႆ။

ပၢင်လိူၵ်ႈတင်ႈ ဢၼ်ယဝ်ႉမႃး 2 ၵမ်းၼၼ်ႉၵေႃႈသိုၵ်းမၢၼ်ႈ လွၵ်ႇငိုတ်ႈတဵၵ်းတဵင်ၵူၼ်းမိူင်း ဢမ်ႇၵႂႃႇပၼ်သဵင်ၵၢင်ၸႂ်ဢမ်ႇလႆႈ၊ ၼင်ႇႁိုဝ်ၵူၼ်းမိူင်းတေၵူဝ်ၼၼ်ႉၵေႃႈ လွၵ်ႇငိုတ်ႈလူၺ်ႈလၢႆးၵူႈမဵဝ်းမဵဝ်း – ဝႃႈၼႆ။

တွမ်ႊဢႅၼ်ႊတရူႊ လၢတ်ႈထႅင်ႈဝႃႈ – ၽွင်းသိုၵ်းမၢၼ်ႈထွတ်ႈၶူဝ်းသိုၵ်း ၼုင်ႈၶူဝ်းၵူၼ်းႁိူၼ်းသေ ဢၢၼ်းၸႂ်ႉ ဢႃႇၼႃႇၽွင်းငမ်းဝၢၼ်ႈမိူင်း လွၵ်ႇလႅၼ်ၽၢမ်းတႃလုမ်ႈၾႃႉယူႇၸိူင်ႉၼႆၼႆႉ လူင်ပွင်ၸိုင်ႈ ၵူႈမိူင်းမိူင်းၼႂ်းလုမ်ႈၾႃႉ ထုၵ်ႇလီသၢၼ်ၶတ်းပၢၵ်ႇပႅတ်ႈသိုၵ်းမၢၼ်ႈ ဢမ်ႇထုၵ်ႇလီဝႆႉၼၵ်းႁဵတ်းၵေႃႉသိုၵ်းမၢၼ်ႈလႃးလႃး ဝႃႈၼႆ။

ၼွၵ်ႈလိူဝ်ၼၼ်ႉမၼ်းၸၢႆးၸီႉၸမ်ႈပိူင်းၼေပႃးထႅင်ႈဝႃႈ – ပၢင်လိူၵ်ႈတင်ႈၵမ်းၼႆႉ သိုၵ်းမၢၼ်ႈ ဢဝ်ၶိူင်ႈမိၼ်သိုၵ်းပွႆႇမၢၵ်ႇသေ လိုပ်ႈၵူၼ်းမိူင်းၶဝ်ႈႁူင်းပၼ်သဵင်ၵၢင်ၸႂ်ၵူၺ်း ။ ၵွပ်ႈၼႆလႄႈ ၽွၼ်းၵၢၼ်ပၢင်လိူၵ်ႈတင်ႈၵမ်းၼႆႉ ၽႂ်ဢမ်ႇထုၵ်ႇလီယွမ်းႁပ်ႉ။ ပေႃးဢမ်ႇၼၼ်တႄႉ ၵူႈၸိုင်ႈမိူင်းၼႂ်းလုမ်ႈၾႃႉၼႆႉ တေထုၵ်ႇသိုၵ်းမၢၼ်ႈပၼ်ႇႁူဝ်လဵၼ်ႈၵူၺ်း။ သင်ဝႃႈ ယွမ်းႁပ်ႉမၵ်းမၼ်ႈၽွၼ်းၵၢၼ်ပၢင်လိူၵ်ႈတင်ႈၼႆႉၸိုင် ၵူၼ်းမိူင်းမၢၼ်ႈၵေႃႈ ယိင်းၶႅၼ်းတေၵိၼ်းၸႂ်လိူဝ်ၼႆႉထႅင်ႈ၊ ငဝ်းလၢႆးလွင်ႈၵိၼ်းၽၢၼ်ၶၢၼ်ၸႂ် တေၼႃႇလိူဝ်ၼႆႉထႅင်ႈ – ဝႃႈၼႆ။

ၼွၵ်ႈလိူဝ်ယႃႇႁႂ်ႈယွမ်းႁပ်ႉပၢင်လိူၵ်ႈတင်ႈၼႆႉယဝ်ႉ မၼ်းၸၢႆးယင်းၾၢင်ႉပႃးထႅင်ႈဝႃႈ – ၸိုင်ႈမိူင်းၸိူဝ်းပၼ် လွင်ႈၵမ်ႉထႅမ်ၶိူင်ႈၵွင်ႈၵၢင်ႇလႄႈၼမ်ႉမၼ်းၸၢၵ်ႈၸူး သိုၵ်းမၢၼ်ႈၵေႃႈ ႁႂ်ႈပွင်ႇၸႂ်လွင်ႈမိူၵ်ႈလိူင်းသိုၵ်းမၢၼ်ႈသေ ႁႂ်ႈၵိုတ်းယိုတ်းလွင်ႈၵမ်ႉၸွႆႈသေၵမ်း -ဝႃႈၼႆဝႆႉ။

ၵူၼ်းမိူင်းမၢၼ်ႈၼႆႉ လွင်ႈၶဝ်ဢမ်ႇၵျိူၵ်ႈဢမ်ႇလူဝ်ႇသိုၵ်းမၢၼ်ႈၼၼ်ႉၶဝ်ၵေႃႈဢွၵ်ႇၼႄၵၢင်ၸႂ်သၢၼ်ၶတ်းသိုၵ်းမၢၼ်ႈႁတ်းႁတ်းႁၢၼ်ႁၢၼ် ၊ ၺႃးသိုၵ်းမၢၼ်ႈတီႉၺွပ်း ႁဵတ်းႁၢႆႉၶႃႈႁႅမ်တၢႆယူႇၵေႃႈ ၸိူဝ်းၵိုတ်းၼၼ်ႉဢမ်ႇၵူဝ်ဢမ်ႇႁႄ- ၸိူဝ်းၼႆႉလုမ်ႈၾႃႉထုၵ်ႇလီႁၼ်ထိုင်ၵၢင်ၸႂ်ၸိူဝ်းၶဝ် ၊ လုမ်ႈၾႃႉဢမ်ႇထုၵ်ႇလီမၵ်းမၼ်ႈပၼ်တီႈယူႇသိုၵ်းမၢၼ်ႈဢၼ်မိူၵ်ႈလိူင်းယဝ်ႉၼႆ တွမ်ႊဢႅၼ်ႊတရူႊလၢတ်ႈၵႂႃႇပႃးၼင်ႇၼႆ။