တီႈဝဵင်းဝၢၼ်ႈငႂ်ႈၼႆႉ သိုၵ်းမၢၼ်ႈၶဝ်ႈဝၢၼ်ႈ ၶဝ်ႈဝဵင်းမႃးမိူဝ်ႈလႂ်ၵေႃႈ ၵၢင်ႉၵႄႇၺႃးၶႃႈတၢႆတႃႇသေႇ ၊ မိူဝ်ႈဝၼ်းတီႈ 22/1/2026 ၼႆႉၵေႃႈ    ပူႇၵႄႇ ဝၢၼ်ႈမျေႇၼီႇၵူင်း (မြေနီကုန်း) ၊ ဢိူင်ႇဢလႄႇၶျွင်ႇ ၸႄႈဝဵင်းဝၢၼ်ႈငႂ်ႈ ထုၵ်ႇၶႃႈႁႅမ်တၢႆ ႁဵတ်းႁႂ်ႈသိုၵ်းမၢၼ်ႈ ႁႅၼ်းသိုၵ်းသွၵ်ႈတဝ် ႁိမ်းႁွမ်းဝၢၼ်ႈ   ပဵၼ်ပၢင်တိုၵ်းၵၼ်တင်း ၸုမ်းသိုၵ်းထၼူႉ။

ဝၢႆး ပူႇၵႄႇ ထုၵ်ႇၶႃႈႁႅမ်ယဝ်ႉ သိုၵ်းမၢၼ်ႈပႂ်ႉၵူတ်ႇထတ်းတၢင်းၶဝ်ႈတၢင်းဢွၵ်ႇဝၢၼ်ႈ ႁၢဝ်ႈႁႅင်းသေ ၼႂ်းဝၼ်းတီႈ 23/1/2026 ယၢမ်းၵၢင်ၼႂ် 8 မူင်း သိုၵ်းမၢၼ်ႈတင်း ၸုမ်းလုၵ်ႉၽိုၼ်ႉ ပဵၼ်ပၢင်တိုၵ်း တီႈသဵၼ်ႈတၢင်းလူင် ဢၼ်မီးၼႂ်းၵႄႈ ဝၢၼ်ႈဢလႄႇၶျွင်ႇ (အလယ်ချောင်) လႄႈ ဝၢၼ်ႈမျေႇ ၼီႇၵူင်း(မြေနီကုန်း)  ၼႆယဝ်ႉ ။

ၽူႈၶၢၼ်ပၢၵ်ႇ ၸုမ်းသိုၵ်းထၼူႉ DSNDA လၢတ်ႈတီႈၽူႈတွႆႇႁွၵ်ႈဝႃႈ- “ လႆႈယိၼ်းဝႃႈၶဝ် (ၸုမ်းလုၵ်ႉၽိုၼ်ႉ ) ႁၢင်ႈၵၢင်မၢၵ်ႇသႂ်ႇတီႈၵႃးသေ ပဵၼ်ပၢင်တိုၵ်းၵၼ်ၵမ်းၼိုင်ႈ ၾၢႆႇတၢင်းသိုၵ်းမၢၼ်ႈ မီးၵူၼ်းမၢတ်ႇၸဵပ်းယူႇ ၊ ထိုင်တလဵဝ် ၾၢႆႇသိုၵ်းမၢၼ်ႈ ၶဝ်ၵူတ်ႇထတ်း ၵူၼ်းၵႂႃႇမႃးႁၢဝ်ႈႁႅင်း ”– ဝႃႈၼႆ ။

ပူႇၵႄႇဝၢၼ်ႈမျေႇၼီႇၵူင်းဢၼ်ထုၵ်ႇၶႃႈႁႅမ်ၼၼ်ႉ ၸိုဝ်ႈႁွင်ႉ လုင်းမိၼ်ႉထေး ဢႃယု 60 ပၢႆ ထိုင်ဝၼ်းမိူဝ်ႈၼႆႉ ဢမ်ႇႁူႉဝႃႈၸုမ်းလႂ်ၶႃႈႁႅမ်ၵႂႃႇဝႃႈၼႆ ။

ၼၢင်းယိင်းၵူၼ်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ မိူဝ်ႈဝႃးၼႆႉ ၵၢင်ႉၵႄႇတၢင်း ဝၢၼ်ႈမျေႇၼီႇၵူင်း  ၺႃးယိုဝ်း  ၶႃႈႁႅမ်ထႅင်ႈ ၊ ဝၢႆးၼၼ်ႉသိုၵ်းမၢၼ်ႈတင်း ၸုမ်းလုၵ်ႉၽိုၼ်ႉ ပဵၼ်ပၢင်တိုၵ်းၵၼ်ၵမ်းၼိုင်ႈ ၊ ဢဝ်မၢၵ်ႇလူင် ပိုတ်းယိုတ်းၵၼ် ၊ တလဵဝ်ရူတ်ႉဝႃႇ ၵႃးဝႃႇ ဢမ်ႇပၼ်လတ်းၶၢမ်ႈၵႂႃႇမႃး ။  ၸိူဝ်းၶဝ်ၵူတ်ႇထတ်းႁၢဝ်ႈႁႅင်း ”– ဝႃႈၼႆ ။

ပဵၼ်ၼမ်ႉမိုဝ်းၽႂ်မႃးၶႃႈႁႅမ်တၢႆၼႆ ဢမ်ႇႁူႉလႆႈတႅတ်ႈတေႃးသေတႃႉ –  သိုၵ်းမၢၼ်ႈၼႆႉတႃႇႁဵတ်း ႁႂ်ႈၵူၼ်းမိူင်းၸင်းၸုမ်းလုၵ်ႉၽိုၼ်ႉ တႃႇၸုမ်းလုၵ်ႉၽိုၼ်ႉ တေဢမ်ႇလႆႈတၢင်းၵမ်ႉၸွႆႈ တီႈၵူၼ်းမိူင်းၼၼ်ႉ မေႃၸႂ်ႉလွၵ်းလၢႆးႁဵတ်းသၢင်ႈမႃးတႃႇသေႇ။ ၵွပ်ႈၼႆ ပဵၼ်ၽႂ်ၶႃႈႁႅမ်- ယွၼ်ႉသင်ၼႆ ပႆႇၸၢင်ႈယိုၼ်ယၼ် – ၵူၼ်းပိုၼ်ႉတီႈလၢတ်ႈၼင်ႇၼႆ။

ၵဵဝ်ၵပ်းလွင်ႈၼႆႉ ၽူႈၶၢၼ်ပၢၵ်ႇ ၸုမ်းသိုၵ်းထၼူႉ DSNDA လၢတ်ႈတီႈၽူႈတွႆႇႁွၵ်ႈဝႃႈ-“ၸုမ်းလႂ်ၶႃႈႁႅမ်ၵႂႃႇဢၼ်ဝႃႈၼၼ်ႉတႄႉဢမ်ႇပႆႇလႆႈႁူႉ ၊ ပေႃးတုမ်ႉတိုဝ်ႉ ၵူၼ်းပိုၼ်ႉတီႈ ၼမ်မႃးၼႆ  ႁဝ်းၶႃႈၵေႃႈ တေလႆႈၶိုင်ပွင်ယူႇသေလွင်ႈလွင်ႈ”– ဝႃႈၼႆ ။

ၸူဝ်ႈသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ တီႈဝဵင်းယႂႃႇငၢၼ်ႇၼႆႉ ၵၢင်ႉၵႄႇ ၵွၼ်းဢိူင်ႇ  ၵမ်းၵမ်းၺႃးၶႃႈႁႅမ်တၢႆ၊  ပေႃးပႃးၵမ်းၼႆႉ မီး 7 ပွၵ်ႈယဝ်ႉ၊  ဢမ်ႇႁူႉပဵၼ်ၽႂ် ၸုမ်းလႂ်လူင်းမိုဝ်းၶႃႈႁႅမ်တၢႆ။  

ယွၼ်ႉၵူၼ်းမိူင်း တင်း ၵၢင်ႉၵႄႇ ၵႆႉထုၵ်ႇၶႃႈႁႅမ်လႄႈ ၵူၼ်းမိူင်းဢမ်ႇႁတ်း ၵႂႃႇမႃးလွတ်ႈလႅဝ်း။ ဢမ်ႇႁတ်းႁဵတ်းၵၢင်ႉၵႄႇၽူႈယႂ်ႇၵူၼ်းလူင်ဝၢၼ်ႈ ၊ ဢမ်ႇႁတ်းဢွၼ်ၼမ်းႁဵတ်း လွင်ႈတူင်ႉၼိုင် ၼႂ်းဝၢၼ်ႈၼႂ်းသူၼ်သင်သေလွင်ႈ- ၵူၼ်းပိုၼ်ႉတီႈလၢတ်ႈ ။

တီႈဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) ၼႆႉ မီးၸုမ်းတပ်ႉသိုၵ်းထၼူႉ DPLA ၊ ၸုမ်းသိုၵ်းလုၵ်ႉၽိုၼ်ႉ ၵျဵဝ်းၽိဝ်ႇ ၊ ၸုမ်းသိုၵ်းထၼူႉ DSNDA ၶဝ်တူင်ႉၼိုင်ယူႇသဝ်းဝႆႉၵူၺ်းဢမ်ႇၵႃး ပျီႇတူႉ ၸိတ်ႉပဢူဝ်း PNO တင်း သိုၵ်းမၢၼ်ႈၵေႃႈ ၵႆႉထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၼႂ်းဝဵင်း ၼႆယဝ်ႉ။