တႄႇၼႂ်းႁူဝ်လိူၼ်ၵျႅၼ်ၼိဝ်ႊရီႊမႃးၼႆႉ ၵၢင်ႉၵႄႇၼႂ်းပွၵ်ႉၼႂ်းယွမ် လူင်းၵဵပ်းငိုၼ်းၵူၼ်းမိူင်း တႃႇၸၢင်ႈၵူၼ်းၵႂႃႇႁၢပ်ႇၵၢၼ်သိုၵ်း ၸုပ်ႈ 21 ၼႂ်းၸိုင်ႈတႆးပွတ်းၸၢၼ်းလၢႆလၢႆဝဵင်း ။

တီႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်းၼႆႉ တႄႇႁၢင်လိူၼ် ၵျႅၼ်ၼိဝ်ႊရီႊၼႆႉ ၵၢင်ႉၵႄႇ လူင်းၵဵပ်းငိုၼ်းၵူၼ်းမိူင်း တႃႇၸၢင်ႈၵူၼ်းၵႂႃႇႁၢပ်ႇၵၢၼ်သိုၵ်း တွၼ်ႈတႃႇ ၸုပ်ႈ 21 ၼိုင်ႈႁိူၼ်း 5 မိုၼ်ႇထိုင် 3 မိုၼ်ႇ ပျႃး ဝႃႈၼႆ ။ 

ၵူၼ်းၸၢႆးဢႃယု 30 ယူႇဝဵင်းၼမ်ႉၸၢင် လၢတ်ႈၽူႈတွႆႇႁွၵ်ႈဝႃႈ -“ တေသူင်ႇလိၵ်ႈၸူးထိုင်ႁိူၼ်းသေ တေႁွင်ႉၵူၼ်းၵႂႃႇႁၢပ်ႇၵၢၼ်သိုၵ်းၼႆဢေႃႈ ၊ ပေႃးၵူၼ်းဢမ်ႇၶႂ်ႈၵႂႃႇ တေလႆႈၵႂႃႇငီႉၵၼ်တၢင်း ၵၢင်ႉၵႄႇ ၼႂ်းပွၵ်ႉ ၊ ပေႃးၵၢင်ႉၵႄႇႁႃၵူၼ်းဢမ်ႇလႆႈၵေႃႈ လႆႈယိၼ်းဝႃႈ တေၸၢင်ႈတီႈတၢင်းမိူင်းမၢၼ်ႈၼႆ ။ ၼိုင်ႈၵေႃႉလႂ် ပၢၵ်ႇသႅၼ် ၼႆ တလဵဝ်ၼႆႉၵၢင်ႉၵႄႇလူင်းၵဵပ်းငိုၼ်းၵူႈႁိူၼ်း”- ဝႃႈၼႆ ။

ဝဵင်းၼမ်ႉၸၢင်ၼႆႉ ဢၼ်ထုၵ်ႇၶၢၼ်းၵႂႃႇႁဵတ်းသိုၵ်းမၢၼ်ႈၼႆႉ ပွၵ်ႉၼိုင်ႈလႄႈ ပွၵ်ႉၼိုင်ႈဢမ်ႇမိူၼ်ၵၼ်။ မိူၼ်ၼင်ႇ ပွၵ်ႉ 5 ပွၵ်ႉ 3 သမ်ႉ ၾၢႆႇသိုၵ်းမၢၼ်ႈ သူင်ႇလိၵ်ႈၸူးသေ ၶၢၼ်းၵူၼ်းၵႂႃႇႁၢပ်ႇၵၢၼ်သိုၵ်း။ မၢင် ပွၵ်ႉသမ်ႉ သိုၵ်းမၢၼ်ႈ သင်ႇႁႂ်ႈၵဵပ်းငိုၼ်းၼႂ်းပွၵ်ႉသေ ႁႃၸၢင်ႈၵူၼ်းသူင်ႇပၼ် တႃႇၾိုၵ်းၵၢၼ်သိုၵ်းဢဝ် ႁဵတ်းႁႂ်ႈၵူၼ်းပိုၼ်ႉတီႈယူႇယၢပ်ႇၵိၼ်းၸႂ် – ၵူၼ်းပိုၼ်ႉတီႈလၢတ်ႈၼင်ႇၼႆ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၶဝ်လူင်းၵဵပ်းငိုၼ်းၼႆႉ ၼိုင်ႈပွၵ်ႉလႄႈ ၼိုင်ႈပွၵ်ႉ ဢမ်ႇမိူၼ်ႇၵၼ် မၢင်ပွၵ်ႉ လႆႈပၼ် 2 မိုၼ်ႇ ထိုင် 6 မိုၼ်ႇ ဢမ်ႇမီးၵေႃႈလႆႈပၼ်ယူႇဢေႃႈ ၊ မၢင်ႁိူၼ်း ၶၢႆၵိၼ်ၶေႈၵိၼ်ၽိုၼ်းၼၼ်ႉၼမ်ႉတႃၽၢၼ်ပေႃးတူၵ်း ၵူၼ်းၵဵပ်းငိုၼ်းဢမ်ႇၽွင်ႈလႆႈလိူဝ်တင်းၼိူဝ်ၸီႉသင်”- ဝႃႈၼႆ ။

တီႈဝဵင်းၼမ်ႉၸၢင်ၼႆႉ ၵွၼ်ႇၼႃႈၼၼ်ႉ ယူႇတီႈ ပလိၵ်ႈသိုၵ်းမၢၼ်ႈ လမ်းႁႃတီႉၺွပ်း ၵူၼ်းၵိၼ် လဝ်ႈၵိၼ်ယႃႈသေ ဢဝ်သူင်ႇတႃႇႁၢပ်ႇၵၢၼ်သိုၵ်းၵူၺ်း။ ယၢမ်းလဵဝ် ယွၼ်ႉဢမ်ႇမီးၵူၼ်းၵႂႃႇလႄႈ ၵၢင်ႉၵႄႇ လႄႇႁႃႁူၺ်းၵူၼ်းတၢင်းမိူင်းမၢၼ်ႈထုင်ႉပဵင်းမႃးတၢင်ႇ ။ ၼိုင်ႈၵေႃႉၼႆႉ လႆႈၸၢင်ႈထိုင် ၼိုင်ႈပၢၵ်ႇသႅၼ်ပျႃး ။

ၵွပ်ႈၼႆ ၵူၼ်းပိုၼ်ႉတီႈ ဢွၼ်ၵၼ်ပၢႆႈ ယၢၼ်ႁိူၼ်းယေးတီႈယူႇ။ တႃႇတေလွတ်ႈၼၼ်ႉ ၵမ်ႈၼမ်ၵႂႃႇႁဵတ်းပျီႇတူႉၸိတ်ႉ – ၵူၼ်းပိုၼ်ႉတီႈ လၢတ်ႈၼင်ႇၼႆ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၼိုင်ႈဝဵင်းၼႆႉၶဝ်ယွၼ်း ထိုင် 15 ၵေႃႉ ၊ၼႂ်းၼၼ်ႉ မွၵ်ႈ   7 ထိုင် 9 ၵေႃႉၼႆႉ ၶဝ်ၸၢင်ႈတင်း တူင်ႈပဵင်းမႃး  ၊ မၢင်ၵေႃႉၼႆႉ ၶဝ်ယွၼ်း 50-60 သႅၼ် ၵၢင်ႉၵႄႇၼႂ်းပွၵ်ႉသမ်ႉ လူင်းၵဵပ်းငိုၼ်းတႃႇ 100 သႅၼ် ၊ မၢင်ပွၵ်ႉလႆႈပၼ် 110 သႅၼ် ၊ ပေႃးဢမ်ႇလႆႈၵူၼ်းၼႆႉ တေသူင်ႇလိၵ်ႈႁွင်ႉၵႂႃႇႁၢပ်ႇၵၢၼ်သိုၵ်း” – ဝႃႈၼႆ ။

မိူၼ်ၼင်ႇၼႆ တီႈဝဵင်းတူၼ်ႈတီးၵေႃႈ တႄႇလိူၼ်ၵျႅၼ်ႊၼိဝ်ႊရီႊ ၼႆႉမႃး ၵၢင်ႉၵႄႇလူင်းၵဵပ်းငိုၼ်းတႃႇၵမ်ႉၸွႆႈၵူၼ်းၵႂႃႇႁၢပ်ႇၵၢၼ်သိုၵ်း ၸုပ်ႈ21 ။  ၵူၼ်းဢၼ်ဢမ်ႇပႃးသဵၼ်ႈၸိုဝ်ႈ တႃႇႁၢပ်ႇၵၢၼ်သိုၵ်းၼၼ်ႉၵေႃႈ လႆႈပၼ်ငိုၼ်း တႃႇၵမ်ႉၸွႆႈ ၵူၼ်းၵႂႃႇႁၢပ်ႇၵၢၼ်သိုၵ်း ။  ပွၵ်ႉၼိုင်ႈလႄႈပွၵ်ႉၼိုင်ႈ လႆႈပၼ်ဢမ်ႇမိူၼ်ၵၼ်။ မၢင်ပွၵ်ႉ လႆႈ ပၼ် 5 မိုၼ်ႇပျႃး ၊ မၢင်ပွၵ်ႉ လႆႈပၼ် 7 မိုၼ်ႇပျႃး ။

ပွၵ်ႉဢၼ် လႆႈသႂ်ႇငိုၼ်းၼမ်သုတ်းတီႈဝဵင်းတူၼ်ႈတီးၼႆႉ   ပဵၼ်ပွၵ်ႉ လၢၼ်းမတေႃႇ ၊  သူၺ်ႇတွင်ႇ (ရွှေတောင်) ၊ မဵဝ်ႉမ( မြို့မ )  ၊ ၵၢၼ်ႇဢွၵ်ႉ ( ကန်အောက် ) ၊ ပျီႇတေႃႇသႃႇ ( ပြည်တော်သာ) ၊ ပွၵ်ႉပႃႇမႆႉ ( သစ်တော ) ၊ ပွၵ်ႉၼမ်ႉၵတ်း ( ရေအေးကွင်း ) ၸိူဝ်းၼႆႉ ၊ ၸိူဝ်းၶဝ်လႆႈပၼ်ငိုၼ်းမႃးၼႆႉ မီးမွၵ်ႈ 2 ပီယဝ်ႉ ဝႃႈၼႆ။

တႄႇမိူဝ်ႈႁူဝ်လိူၼ် ၵျႅၼ်ႊၼိဝ်ႊရီႊမႃး ၵၢင်ႉၵႄႇၼႂ်းဢိူင်ႇဝၢၼ်ႈၽြႃးၽိူၵ်ႇ ဝဵင်းပၢင်လွင်းၵေႃႈ ၺႃးသိုၵ်းမၢၼ်ႈလွၵ်ႇငိုတ်ႈလႄႈ လႆႈႁႃၵူၼ်းၵႂႃႇႁၢပ်ႇၵၢၼ်သိုၵ်းမၢၼ်ႈ တႃႇ ၸုပ်ႈ 21 ပၼ်ၵူၺ်းဢမ်ႇၵႃး ႁႂ်ႈၵဵပ်းပၼ်ငိုၼ်းတီႈၵူၼ်းမိူင်း ၼိုင်ႈႁိူၼ်းလႂ် 1 မိုၼ်ႇပျႃး ၼႆယဝ်ႉ ။

ၵူၼ်းၸၢႆးဢႃယု 30 ပီ ၵေႃႉယူႇဝဵင်းပၢင်လွင်းလၢတ်ႈၽူႈတွႆႇႁွၵ်ႈဝႃႈ – “ပီၼႆႉ ၶၼ်ၶူဝ်းၵုၼ်ႇၵေႃႈ ၵႃႈၵူႈမဵဝ်း။ မၢၵ်ႇၶိူဝ်သူမ်ႈ ၊ ၽၵ်းမီႇႁေႃ ဢၼ်ၵူၼ်းဝၢၼ်ႈၽုၵ်ႇသမ်ႉဢမ်ႇလႆႈၶၼ်မၼ်းၶႅမ်ႉ ၊ ၶၢဝ်းၼႆႉပဵၼ်ၶိင်ႇႁႅင်ႈလႄႈ ႁဵတ်းၵၢၼ်ၵေႃႈ ဢမ်ႇမီးၵူၼ်းႁွင်ႉၶႃႈ ၊ ႁႃၵိၼ်လဵင်ႉတွင်ႉယၢပ်ႇၼႃႇ ။ သိုၵ်းပဢူဝ်း ၊ သိုၵ်းမၢၼ်ႈသမ်ႉ ၵဵပ်းၶွၼ်ႇၵူႈလိူၼ်ၸိူင်ႉၼႆဢေႃႈ ၊ ပေႃး ဢမ်ႇသႂ်ႇတေမႃးတီႉၺွပ်း ထိုင်ႁိူၼ်းၼႆဢေႃႈ” ဝႃႈၼႆ ။

ၸဵမ်မိူဝ်ႈသိုၵ်းမၢၼ်ႈ ၵဵပ်းသိုၵ်းမႃး ၸုပ်ႈၼိုင်ႈပုၼ်ႉၵေႃႈ ၶဝ်ယၢမ်ႈပိုၼ်ၽၢဝ်ႇ လၢတ်ႈဝႃႈ တႃႇလူလွမ် ပႂ်ႉဢဝ်လွင်ႈႁူမ်ႇလူမ်ႈ ၼႂ်းဢွင်ႈတီႈၽႂ်မၼ်းၵူၺ်း ဝႃႈၼႆသေတႃႉ ထုၵ်ႇသူင်ႇၸူးၼႃႈသိုၵ်းသေ လူႉတၢႆမႃးၵေႃႈ မီးမႃးၼမ်။ ယၢမ်းလဵဝ် ပဵၼ်ၸုပ်ႈထီႉ 21 ယဝ်ႉ ။