မိူဝ်ႈဝၼ်းတီႈ 22/01/2026 ယၢမ်းၵၢင်ၶမ်ႈ သိုၵ်းမၢၼ်ႈၸႂ်ႉတိုဝ်းႁိူဝ်းမိၼ်တိုၵ်း ပွႆႇမၢၵ်ႇသႂ်ႇ တီႈဝၢၼ်ႈၵေႃးၵျႃႇ (ကောဂျာ) ၾၢႆႇတူၵ်းဝဵင်းမၢၼ်ႈမေႃႇ ၸႄႈမိူင်းၶၢင် မၢၵ်ႇတူၵ်းတႅၵ်ႇသႂ်ႇၺႃးႁိူၼ်းၵူၼ်းမိူင်း ဢၼ်တိုၵ်ႉၸတ်းပၢင်ၸႃႉယူႇၼၼ်ႉလႄႈႁဵတ်းႁႂ်ႈ ၵူၼ်းမႃးလူႇမႃးၸွႆႈ တၢႆ 20 ၵေႃႉသေ မၢတ်ႇၸဵပ်း 40 ပၢႆ ။

ၼႂ်းဝဵင်းမၢၼ်ႈမေႃႇၼႆႉသိုၵ်းမၢၼ်ႈ တင်း သိုၵ်းၶၢင် (KIA) ပိုတ်းယိုဝ်းၵၼ်ဝႆႉႁၢဝ်ႈႁႅင်းဝႃႈၼႆသေတႃႉ ၸွမ်းဝၢၼ်ႈဢိူင်ႇၸိူဝ်းမီးၾၢႆႇၼွၵ်ႈဝဵင်း ဢွင်ႈတီႈ သိုၵ်းမၢၼ်ႈၵႂႃႇပွႆႇမၢၵ်ႇသႂ်ႇၼၼ်ႉသမ်ႉ ဢမ်ႇမီးပၢင်တိုၵ်း။

ပဵၼ်တီႈၵူၼ်းပၢႆႈၽေးသိုၵ်းယူႇသဝ်းဝႆႉလႄႈ ၵူၼ်းၸိူဝ်းလူႉတၢႆမၢတ်ႇၸဵပ်းၵႂႃႇၼၼ်ႉ ပႃးလုၵ်ႈဢွၼ်ႇ၊ ၼၢင်းယိင်းတင်းၼမ် ဝႃႈၼႆ။

ၸဝ်ႈသိုၵ်းလူင် ၼေႃႇပူႇ ၽူႈၶၢၼ်ပၢၵ်ႇတပ်ႉသိုၵ်းၶၢင် KIA တွပ်ႇလၢတ်ႈတီႈသိုဝ်ႇၶၢဝ်ႇဝႆႉဝႃႈ “မၢၵ်ႇတူၵ်းသႂ်ႇ ႁိူၼ်းၵူၼ်းမိူင်း ဢၼ်တိုၵ်ႉၸတ်းတႃႇႁႅၼ်းလူႇတၢၼ်းပၼ်ၵူၼ်းတၢႆတဵမ် 7 ဝၼ်း၊ မိူဝ်ႈလဵဝ်ၼႆႉၸိူဝ်းမၢတ်ႇ ၸဵပ်းၵေႃႈ သူင်ႇၵႂႃႇႁူင်းယႃသေ ယူတ်းယႃတူဝ်ဝႆႉ။ ၵမ်ႈၽွင်ႈၵေႃႈတမ်ႉပႆႇႁူႉတူဝ်ၶိုၼ်း။ မၢင်ၸိူဝ်းၵေႃႈတၢႆ ထင်တီႈ၊ ၵမ်ႈၽွင်ႈၵေႃႈၵႂႃႇသဵင်ႈတီႈႁူင်းယႃ။ တီႈၼၼ်ႉၼႆႉ မီးၵူၼ်းပၢႆႈၽေးၼႆၶဝ်ႁူႉယူႇၸဵမ်ပိုင်းယဝ်ႉ။ ၶဝ်တင်ႈၸႂ်မႃးပွႆႇၵူၺ်း” ၼႆယဝ်ႉ။

ၼႂ်းၵူၼ်းမၢတ်ႇၸဵပ်း 40 ၵေႃႉပၢႆၼႆႉ ၵူၼ်းၸိူဝ်းမၢတ်ႇၸဵပ်းၵႂႃႇႁၢဝ်ႈႁႅင်းသေ လႆႈမႆႈၸႂ်ႁႅင်းဝႆႉ မီးမွၵ်ႈ 6 ၵေႃႉ ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ၾၢႆႇသိုၵ်းမၢၼ်ႈယိုတ်းမိူင်းတႄႉ ဢမ်ႇပိုၼ်ၽၢဝ်ႇဢွၵ်ႇမႃးပဵၼ်တၢင်းၵၢၼ်သင်သေ လွင်ႈ။

ၸွမ်းၼင်ႇလိၵ်ႈၵိၼ်ၵႅၼ်ႇ ၵျီႊၼီႊဝႃႊ ၶွၼ်ႊဝႅၼ်ႊသျိၼ်ႊတႄႉ – ၵူၼ်းမိူင်း ၸိူဝ်းဢၼ် သိုၵ်းဢမ်ႇထုၵ်ႇလီလႆႈယိုဝ်းလႃးလႃး ၊ ၸိူဝ်းထုၵ်ႇလႆႈလွင်ႈၵႅတ်ႇၵင်ႈတႄႉပဵၼ်- လုၵ်ႈ ဢွၼ်ႇလႄႈၵူၼ်းမိူင်းၸိူဝ်းဢမ်ႇၶဝ်ႈပႃးၼႂ်းပၢင်တိုၵ်း၊ ၵူၼ်းဢၼ်ထုၵ်ႇၵုမ်းၶင်၊ ၵူၼ်းမၢတ်ႇၸဵပ်းလႄႈ ဢမ်ႇယူႇလီ၊ ၽူႈႁၢပ်ႇၵၢၼ်ပၢႆးယူႇလီ လႄႈၸုမ်းပရႁိတ – ဝႃႈၼႆဝႆႉ။