တႄႇဢဝ်ဝၼ်းတီႈ 1 လိူၼ်ၾႅပ်ႉပိဝ်ႊရီႊ(လိူၼ်ၼႃႈ)ၼႆႉ မိူင်းမၢၼ်ႈ တေတႄႇတေႃႉသူင်ႇၶဝ်ႈၵၢပ်ႇ ၶၢႆပၼ်တီႈ မိူင်းထႆး၊ ၼႂ်းၶၢဝ်းတၢင်း 7 လိူၼ် (ဝၼ်းတီႈ 1 လိူၼ်ၾႅပ်ႉပိဝ်ႊရီႊ တေႃႇထိုင်ဝၼ်းတီႈ 31 လိူၼ်ဢေႃးၵၢတ်ႉသ်)ၼၼ်ႉ ၾၢႆႇမိူင်းထႆး တေဢမ်ႇၵဵပ်းၶွၼ်ႇ ဝႃႈၼႆ။
တႃႇတေတေႃႉသူင်ႇၶဝ်ႈၵၢပ်ႇၼၼ်ႉ တေၸႂ်ႉသဵၼ်ႈတၢင်းၼမ်ႉ တႃႈၵုင်ႈ – ၵုင်းထဵပ်ႈ၊ ၵေႃႇသွင် – ရၼွင်း လႄႈ တႃႈၶီႈလဵၵ်း – မႄႈသၢႆ။ သဵၼ်ႈတၢင်းၵၢၼ်ၵပ်းသိုပ်ႇၵႃႉၶၢႆလႅၼ်လိၼ် ထႆး-မၢၼ်ႈ သဵၼ်ႈတၢင်းၼမ်ႉ မျႃႉဝတီႇ မိူင်းယၢင်းၽိူၵ်ႇ ဢၼ်ယၢမ်ႈၸႂ်ႉတိုဝ်းမိူဝ်ႈပူၼ်ႉမႃးၼၼ်ႉတႄႉ ယၢမ်းလဵဝ် လႆႈၵိုတ်းယင်ႉဝႆႉ။
လုၵ်ႉတီႈၵၢၼ်တေႃႉသူင်ႇၶဝ်ႈၵၢပ်ႇ ၶၢႆဢွၵ်ႇၼွၵ်ႈမိူင်းသေ မိူင်းမၢၼ်ႈလႆႈငိုၼ်းၶဝ်ႈ ၵိုင်ႇငိုၼ်းဢမေႊရိၵၼ်ႊ တေႃႊလႃႊ 500 လၢၼ်ႉပၢႆ ၵူႈပီ။ သူၼ်ၶဝ်ႈၵၢပ်ႇတူဝ်ႈမိူင်းပတ်းပိုၼ်ႉ ၼႆႉ မီး 1 လၢၼ်ႉ ဢေႊၶိူဝ်ႊပၢႆ၊ ၶဝ်ႈၵၢပ်ႇဢၼ်ၽုၵ်ႇသွမ်ႈလႆႈမႃးၼၼ်ႉ တႃႇ 35% ဢဝ်ၸႂ်ႉတိုဝ်းၶိုၼ်းၼႂ်းမိူင်း၊ တႃႇ 65% သမ်ႉ သူင်ႇၶၢႆဢွၵ်ႇ ၼွၵ်ႈမိူင်း ဝႃႈၼႆ။
မိူဝ်ႈပီၵၢၼ်ငိုၼ်း 2023-2024 ၼၼ်ႉ မိူင်းမၢၼ်ႈလႆႈငိုၼ်းၶဝ်ႈတီႈ ၵၢၼ်ၵႃႉၶၢႆၶဝ်ႈၵၢပ်ႇ လူၺ်ႈသူင်ႇဢွၵ်ႇၶၢႆၼွၵ်ႈမိူင်း 500 လၢၼ်ႉ ဢမေႊရိၵၼ်ႊတေႃႊလႃႊ၊ ပီၵၢၼ်ငိုၼ်း 2024-2025 သမ်ႉလႆႈငိုၼ်း 400 လၢၼ်ႉ ဢမေႊရိၵၼ်ႊတေႃႊလႃႊလႄႈ ၼႂ်းပီၵၢၼ်ငိုၼ်း 2025-2026 ၼႆႉသမ်ႉ လႆႈငိုၼ်းၶဝ်ႈဝႆႉ 400 လၢၼ်ႉတေႃႊလႃႊပၢႆယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ