တႆးၼႆႉ ပဵၼ်ၵူၼ်းၵိုၵ်းပိုၼ်း၊ တႆးၼႆႉ ပဵၼ်ၵူၼ်းၶိူဝ်းယႂ်ႇ ပဵၼ်ၸၢဝ်းၶိူဝ်းၵိုၵ်းလုမ်ႈၾႃႉၼႆသေ တႆးၼင်ႇၵၼ်ၵႆႉတူၵ်ႇ တၵ်ႉလၢတ်ႈဢုပ်ႇဢဝ်ၵုင်ႇမုၼ်မႃး ၸဵမ်ပူႇပၢၼ်မွၼ်ႇ ။ ထိုင်ၵၢပ်ႈပၢၼ်မႂ်ႇၼႆႉၵေႃႈ တိုၵ်ႉသူင်မိုတ်ႈမၵ်ႉ သိူဝ်းလူၼ်း ၸွမ်းပိုၼ်းၵဝ်ႇၵေႃႈမီးၼမ်။ မၢင်ၸိူဝ်းယွင်ႇပိုၼ်းလၢႆလၢႆ ဢမ်ႇၶိုင်သင်ၵေႃႈမီး၊ မၢင်ၸိူဝ်းၵေႃႈ ယုၵ်ႉမုၼ်း ၾိင်ႈထုင်း ၸဝ်ႈၵဝ်ႇသေ သိုပ်ႇတႅမ်ႈပိုၼ်း ႁႂ်ႈၵိုၵ်းလုမ်ႈၾႃႉၵႂႃႇထႅင်ႈၵေႃႈမီး ။

မိူၼ်ၼင်ႇ ပွတ်းတၢင်းဝဵင်းၵဵင်းတွင်း ၸိုင်ႈတႆး ပွတ်းၸၢၼ်းၼႆႉၵေႃႈ မီးၾိင်ႈၸတ်းပၢင်ပွႆးၶုၵ်ႉထူပ်းၶုၼ်သၢမ်လေႃး ၼၢင်းဢူဝ်းပဵမ်ႇ ။ ၼင်ႇႁိုဝ် ၵူၼ်းၼမ် ပေႃးတေ ႁူႉၸၵ်းၾိင်ႈထုင်းတႆးလႄႈ လွင်ႈမိူင်းတႆး မႃးထႅင်ႈၼမ် ။ ၵူၺ်းၵႃႈ မၢင်ပွၵ်ႈမၢင်ၵမ်း ယုၵ်ႉၾိင်ႈႁိုဝ် တဵၵ်းၾိင်ႈၶိုၼ်း ၼႆၼၼ်ႉ ၵူၼ်းမိူင်းၶမ်ၸႂ်ဝႆႉ ။ ယွၼ်ႉဝႃႈ ပီၼႆႉ ၼႂ်းပၢင်ပွႆး ၵိုၵ်းပႃး ပၢင်တေႃႇလွင်းဝႃႈၼႆ ။

ၵူၼ်းမိူင်းၵဵင်းတွင်း ႁူမ်ႈၵၼ် ၸတ်းပၢင်ၶုၵ်းထူပ်း ဝၼ်းၵိူတ်ႇပိုၼ်းၸိူင်းႁၵ်ႉ ၶုၼ်သၢမ်လေႃး ၼၢင်းဢူဝ်ႈပဵမ်ႇ ၶွပ်ႈတဵမ် 1013 ပီ တီႈဝၢၼ်ႈပႃႇသႃ ဝဵင်းၵဵင်းတွင်း ၸႄႈဝဵင်းမိူင်းၼၢႆး ၸိုင်ႈတႆးပွတ်းၸၢၼ်း ။

ဝၼ်းတီႈ 15 – 20 /01/2026 လိူၼ်ၵမ်လွင်ႈ 13 ၶမ်ႈ ထိုင်လိူၼ်သၢမ်မႂ်ႇသၢမ်ၶမ်ႈၼႆႉ ၵေႃလိၵ်ႈလၢႆးလႄႈ ၾိင်ႈငႄႈ တႆးဢိၵ်ႇၵူၼ်းမိူင်းၵဵင်းတွင်းႁူမ်ႈၵၼ်ၸတ်းႁဵတ်း ပၢင်ပွႆးဝၼ်းၵိူတ်ႇၶုၼ်သၢမ်လေႃး ပွၵ်ႈၵမ်း 18 တီႈဝၢၼ်ႈပႃႇသႃ ၵိင်ႇၸႄႈဝဵင်း ၵဵင်းတွင်း ၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။

ၼႂ်းပၢင်ပွႆးၼႆႉ မီးပၢင်တၢၼ်းၶဝ်ႈၼမ်ႉတၢင်းၵိၼ်ထိုင်သင်ၶၸဝ်ႈ၊ ပၢင်မူၼ်ႈၸႂ်တၢင်းၵႃႈၾိင်ႈထုင်း၊ ၽဵင်းၵႂၢမ်းပၢၼ် ၵဝ်ႇပၢၼ်မႂ်ႇ ၸိူဝ်းၼႆႉ၊ လိူဝ်ၼၼ်ႉမီးၽူႈႁွင်ႉၵႂၢမ်းၸိုဝ်ႈသဵင်ယႂ်ႇ ဢၼ်မႃးလူၺ်ႈ ၼမ်ႉၸႂ် ၵေႃႈမီး ဝႃႈၼႆ။

ယိူင်းဢၢၼ်း ဢၼ်ၸတ်းပၢင်ပွႆးၼႆႉ ႁႂ်ႈပဵၼ်ၵၢၼ်ႁဵတ်းတႃႇၼတၢင်းလီၼႃးမုၼ် ၸႅၵ်ႇဝၢၵ်ႈၵုသူလ် ၸူးထိုင်ဝိၺၢၼ်ႇ ၶႂၼ်ငဝ်း ၶုၼ်သၢမ်လေႃးလႄႈ ၼၢင်းဢူဝ်ႈပဵမ်ႇ။ ႁႂ်ႈပီႈၼွင်ႉတႆးတီႈၸမ်တီႈၵႆ လႆႈမႃး ႁူပ်ႉထူပ်းမိုတ်ႈၵိုဝ်းၸမ်ၸႂ်ၵၼ်၊ ႁႂ်ႈမၢဝ်ႇသၢဝ်တႆးမေႃႁၵ်ႉၵၼ် မၼ်ႈၵႅၼ်ႇၼႅၼ်ႈၼႃ ၊ ႁႂ်ႈႁၵ်ႉၵၼ် မိူၼ်ၼင်ႇၶုၼ်သၢမ်လေႃး လႄႈ ၼၢင်းဢူဝ်ႈပဵမ်ႇ ဝႃႈၼႆ။
ပိုၼ်းၶုၼ်သၢမ်လေႃး ၼၢင်းဢူဝ်ႈပဵမ်ႇ ၼႆႉ သ ၶ ႁ ႁိုဝ် ၸဝ်ႈသႅင်ၸိုၼ်ႈ ၽူႈထတ်းလိၵ်ႈ ၸုမ်းၶၢဝ်ႇၽူႈတွႆႇႁွၵ်ႈ (သဵင်ႈၵမ်) ယၢမ်ႈတႅမ်ႈဝႆႉဝႃႈ – ၸွမ်းၼင်ႇၸဝ်ႈပၢႆးပိုၼ်း လၢႆလၢႆၸဝ်ႈ မွၵ်ႇလၢတ်ႈ တႅမ်ႈဝႆႉ ၼၼ်ႉ လိူၼ်သၢမ်မႂ်ႇ 3 ၶမ်ႈ ၊ ပဵၼ်ဝၼ်း ၶုၼ်သၢမ်လေႃး + ၼၢင်းဢူဝ်ႈပဵမ်ႇ ၊ ဢဝ်ႁဵတ်း ဝၼ်းတၢင်း ႁၵ်ႉတႆး ၵေႃႈလႆႈ ။ ၶိူဝ်းတႆးဢမ်ႇတၢပ်ႈယိူင်ႈႁဵတ်းၸွမ်းၾိင်ႈ ထုင်းဝၼ်း တၢင်း ႁၵ်ႉ ၶွင်မိူင်းဝၼ်းတူၵ်း (ဝၼ်းဝႃႊလဵၼ်ႊထၢႆႊ) လိူၼ်ၾႅပ်ႊၿိဝ်ႊရီႊ 14 ဝၼ်း ၵူႈပီၼၼ်ႉ – ၼႆယဝ်ႉ ။

ပိုၼ်းၸိူင်းၶုၼ်သၢမ်လေႃး ၼၢင်းဢူဝ်ႈပဵမ်ႇၼႆႉ ၸိုဝ်ႈယႂ်ႇလိုဝ်းလင် ၼႂ်းဢပုမ်ႇတႆးႁူဝ်ၼိုင်ႈ ။ ယႂ်းႁိုၼ် ၽိုၼ်ပပ်ႉၶုၼ် သၢမ်လေႃးၵဵင်းတွင်းၼႆႉ ယၢမ်ႈတွၼ်ႉငိၼ်းဝႃႈ ၶူးမေႃလိၵ်ႈ တႆး ၼၢင်းၶမ်းၵူႇ (လုၵ်ႈယိင်းၸဝ်ႈၵၢင်းသိူဝ်) ပဵၼ်ၵေႃႉတႅမ်ႈဝႆႉ ။ ပဵၼ်ပိုၼ်းၸိူင်းတၢင်းႁၵ်ႉသဝ်ႈမွင်ၽူဝ်မၢဝ်ႇမေးသၢဝ် မိူင်းၼိူဝ်မိူင်းတႂ်ႈ တၢႆၽၢတ်ႇၵၼ် ၊ သမ်ႉလႆႈ ႁၼ်ပႃး လွင်ႈယူႇ သဝ်းၵိၼ်သၢင်ႈ ၊ ၾိင်ႈႁိတ်ႈႁွႆး တႆးမိူဝ်ႈ ႁူဝ်ပၢၵ်ႇပီပူၼ်ႉမႃး ။

ပၢင်ပွႆးဢၼ်ၸတ်းပီၼႆႉ ဢၼ်လၢၵ်ႇလၢႆးတႄႉ သမ်ႉပႃးမႃး ပၢင်တေႃႇပၢင်လွင်း ။ ဢဝ်ၶေႃႈဢၢင်ႈဝႃႈ တႃႇလႆႈငိုၼ်းၵွင်ၵၢင်ၼႆသေ ၵေႃႇမတီႇၾၢႆႇၸတ်းပၢင်ပွႆး ပၼ်ၶႂၢင်ႉၸဝ်ႈတႅင်ႇပၢင်လွင်းမႃး ပိုတ်ႇ – ၵူၼ်းပိုၼ်ႉတီႈလၢတ်ႈ။

ၼႂ်းပၢင်ပွႆးၶုၼ်သၢမ်ႇလေႃးၼႆႉ မီးၸၢတ်ႈသႅင်းပၢၼ်ႇၵဝ်ႇ ၊ ပၢင်လဝ်ႇမူၼ်ႈပၢၼ်မႂ်ႇ ၸိူဝ်းၼႆႉယူႇသေတႃႉ ၵွပ်ႈမီးပၢင်တေႃႇလွင်းလႄႈ ႁဵတ်းႁႂ်ႈၵူၼ်းမႃးပွႆးသူၼ်ၸႂ်ဢေႇသေ ၵမ်ႈၼမ် ၶဝ်ႈၼႂ်းပၢင်တေႃႇပၢင်လွင်း ႁဵတ်းႁႂ်ႈ ပိူင်ၾၢင်ပွႆး ငၢႆးမိူၼ် ပၢင်တေႃႇလွင်းပႅတ်ႈၵူၺ်းၼႆ ၵူၼ်းၶဝ်ႈႁူမ်ႈပၢင်ပွႆးၵေႃႉၼိုင်ႈလၢတ်ႈတၢင်းႁၼ်ထိုင်ၼင်ႇၼႆ –

ပေႃး ပဵၼ်လႆႈတႄႉ ႁဝ်းဝႃႈ ပႆႇပႃးပၢင်တေႃႇလွင်းၼႆႉလီဢေႃႈ ။ ပႆႇပႃးပၢင်လွင်းၼႆႉၵေႃႈ မၼ်းတေႁၢင်ႈလီတႃႇ ပိုၼ်းတႆးႁဝ်းၶႃႈၼၼ်ႉၶႃႈၼႃႇၼေႃႈ။ ၶုၼ်သၢမ်လေႃးၼႆ မၼ်းၸိုဝ်ႈသဵင်ယႂ်ႇၼႂ်းပိုၼ်းတႆးႁဝ်းၵေႃႈလႆႈဝႃႈ။ မီးပၢင်မူၼ်သိူဝ်းယူႇ မီးၸၢတ်ႈသႅင်းတႆးယူႇၵေႃႈ ၽႂ်ဢမ်ႇတူၺ်းယဝ်ႉ။ၵႂႃႇၶွၼ်ႈတီႈပၢင်တေႃႇလွင်းၼၼ်ႉမူတ်း ။ ၵူၼ်းတူၺ်းပၢင်ႁွင်ႉၵႂၢမ်း ပေႃးဢမ်ႇၶႂ်ႈမီးၽႂ်ယဝ်ႉ

ၼႂ်းပၢင်ပွႆးၼႆႉ မီးမၢၵ်ႇၵိင်ႈလွႆ 12 – 13 ပၢင် ၊ မီး လေးၵွင်ႇၵျိၼ်ႇ ၊ ၽၢႆႉၵိဝ်း လၢႆပၢင် လႄႈမီးပႃး မိူၼ်ၼင်ႇ ၵူင်းပၼ်ႇၸၢမ်းသုၼ်ႇ လၢႆသႅၼ်း ၼၼ်ႉၵေႃႈ ၸၢင်ႈၼပ်ႉပႃးဝႃႈ ပဵၼ်ပၢင်တေႃႇလွင်းယူႇ ။ ၵူၼ်းမႃးလဵၼ်ႈၵေႃႈ မီးသၢမ်ပၢၼ်ၸဵတ်းသႅၼ်း ပႃးသင်ၶၸဝ်ႈလူးၵွၼ်ႇ ။ ၵမ်ႈၼမ် ၸဝ်ႈတႅင်ႇမၼ်းတႄႉ လုၵ်ႉထုင်ႉပၢင်ႇလႅင်းသႂ် ၸႄႈဝဵင်းၼမ်ႉၸၢင်မႃး ၼႆ ၵူၼ်းပိုၼ်ႉတီႈသိုပ်ႇလၢတ်ႈၼင်ႇၼႆ ။

ၸွမ်းၼင်ႇ ၶပ်ႉမၢႆတႄႉ ပၢင်ပွႆးၼႆႉ ယဝ်ႉတူဝ်ႈၼႂ်းဝၼ်းတီႈ 20/01/2026 ၊ ယဝ်ႉၼႂ်း လိူၼ်သၢမ်မႂ်ႇ 3 ၶမ်ႈၼႆႉ ယဝ်ႉသေတႃႉ ၸဝ်ႈပၢင်တေႃႇလွင်းၶဝ် ပႆႇၶႂ်ႈၵိုတ်းလႄႈ ယွၼ်းယိုတ်ႈၶၢဝ်းယၢမ်းထႅင်ႈ 2 ဝၼ်း ဝႃႈၼႆ ။

ၵၢၼ်တေႃႇလွင်းၼႆႉ ၸၢင်ႈႁဵတ်းႁႂ်ႈ ၾိင်ႈယၢမ်ႈၵူၼ်းပိုၼ်ႉတီႈလူႉသေဢမ်ႇၵႃး ၊ ပီဢွၼ်ပီၵၢႆၵေႃႈ ၸိူဝ်းရူတ်ႉၶိူင်ႈႁၢႆၵေႃႈ ယၢမ်ႈမီးမႃးလႄႈ ပေႃးမီးၵူၼ်းလွင်းသုမ်းမႃး ၵူဝ်မီးၸႂ်ၶႂ်ႈလၵ်ႉၶႂ်ႈၸူၼ်ၵၼ် ။ ပၢင်တေႃႇလွင်းၼႆႉ ဢမ်ႇထုၵ်ႇလီပၼ်ႁႅင်းၵၼ်ၼႆ ၵူၼ်းၵဵင်းတွင်းၵေႃႉၼိုင်ႈ သိုပ်ႇလၢတ်ႈပၼ်ၾၢင်ႉၼင်ႇၼႆ။

ဝဵင်းၵဵင်းတွင်းၼႆႉ ယူႇၼႂ်းၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း လူင်ပွင်ၸိုင်ႈမၢၼ်ႈ ယုၵ်ႉပဵၼ် ၵိင်ႇၸႄႈဝဵင်း မိူဝ်ႈပီ 2010 ။