မိူဝ်ႈၵၢင်လိူၼ်ၵျႅၼ်ႊၼိဝ်ႊရီႊၼႆႉ သိုၵ်းၵဝ်ႈၵၢင်ႉ (MNDAA) ၸိူဝ်းတူင်ႉၼိုင် ပၼ်ႇၵၢၼ်ၽွင်းငမ်းယူႇ ၼႂ်းၸႄႈဝဵင်းသႅၼ်ဝီ ပိုၼ်ၽၢဝ်ႇ ႁႂ်ႈၵူၼ်းမိူင်းၵိုတ်း ၵၢၼ်ၶၢႆၼိူဝ်ႉ၊ ၶၢႆပႃ ႁိုင် ၶၢဝ်းတၢင်း ၼိုင်ႈဝူင်ႈ တႃႇ 7 ဝၼ်း ၼႆယဝ်ႉ။
ႁႂ်ႈပဵၼ်ၵၢၼ်ယိူင်းၸူးၵူၼ်းသိုၵ်းၸိူဝ်းလူႉတၢႆၵႂႃႇ ၽွင်းၶဝ်ႈပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ၼၼ်ႉသေ ၸင်ႇဢွၵ်ႇၶေႃႈပူင် ၸီႉသင်ႇ ႁၢမ်ႈယႃႇႁႂ်ႈၵူၼ်းမိူင်းၵိၼ်ၼိူဝ်ႉၵိၼ်ပႃ လႄႈ ႁဵတ်းၵၢၼ်ၵႃႉၶၢႆ ၸွမ်းၼႂ်းၵၢတ်ႇ တင်ႈတႄႇ ဝၼ်းတီႈ 19-25 /01/2026 ဝႃႈၼႆ။
ၼၢင်းယိင်း ဢႃႇယု 30 ပၢႆ ၵူၼ်းမိူင်းၵေႃႉယူႇဝႆႉၼႂ်းဝဵင်းသႅၼ်ဝီ လၢတ်ႈၼႄတီႈၽူႈတွႆႇႁွၵ်ႈဝႃႈ “ထုင်းဢီႈသင်ၶဝ်ၵေႃႈဢမ်ႇႁူႉယဝ်ႉ။ ဢမ်ႇပၼ်ၶၢႆၼိူဝ်ႉၶၢႆပႃၶၢဝ်းတၢင်း 7 ဝၼ်းဝႃႇ။ ၵူၼ်းမိူင်းတႄႉ လူဝ်ႇၵိၼ်လူဝ်ႇယႅမ်ႉယူႇၵူႈဝၼ်းလူး။ ၵမ်ႈၽွင်ႈၵေႃႈ ဢွၼ်ၵၼ်ၵႂႃႇႁႃသိုဝ်ႉၸွမ်းႁိူၼ်း ဢဝ်ဢေႃႈ။ ၶဝ်ဢမ်ႇပၼ်ၶၢႆ၊ ဢမ်ႇပၼ်ၵိၼ်ၵေႃႈ ပိူၼ်ႈဢွၼ်ၵၼ်ၵႂႃႇလၵ်ႉ သိုဝ်ႉၵၼ်ၸွမ်းႁိူၼ်းသေ ႁဵတ်းၵိၼ်ယူႇ။ ပေႃးလၵ်ႉၵိၼ်၊ လၵ်ႉသိုဝ်ႉၶၢႆၵၼ် တေၺႃးတၢမ်ႇတေဢဝ်လိူင်ႈၼႆတႄႉ ဢမ်ႇငိၼ်းၼင်ႇၵဝ်ႇ” ဝႃႈၼႆ။
ၸွမ်းၼင်ႇၾိင်ႈၵိူဝ်းယမ် “ၽီ” ၸၢဝ်းၶိူဝ်းၶႄႇၵဝ်ႈၵၢင်ႉၶဝ်တႄႉ ယၢမ်ႈမီးၾိင်ႈ ႁဵတ်းၵၢၼ်လူႇတၢၼ်းပၼ် ၵူၼ်းၸိူဝ်းလူႉတၢႆၵႂႃႇၼၼ်ႉ လူၺ်ႈဢမ်ႇၵိၼ်ၼိူဝ်ႉဢမ်ႇၵိၼ်ပႃ ဢမ်ႇၶႃႈတူဝ်ၸႂ်သတ်းတၢႆ ၸိူဝ်းၼႆႉတႄႉ ယၢမ်ႈမီးမႃးယူႇၼႆ ၵူၼ်းမိူင်းၸၢဝ်းၶိူဝ်း ၶႄႇၵဝ်ႈၵၢင်ႉၵေႃႉယူႇဝႆႉၼႂ်းဝဵင်း သႅၼ်ဝီ လၢတ်ႈၼႄတီႈၽူႈတွႆႇႁွၵ်ႈ ၼင်ႇၼႆ။
“ဢၼ်သိုၵ်းၵဝ်ႈၵၢင်ႉၶဝ် ႁၢမ်ႈဢၼ်ႇပၼ်သိုဝ်ႉၶၢႆ ၼိူဝ်ႉ၊ ပႃ ၵူႈသႅၼ်းသႅၼ်းၸွမ်းၼႂ်းၵၢတ်ႇၼႆႉ ၶဝ်ယိူင်းတႃႇ တေလူႇပၼ်ၵူၼ်းၸိူဝ်းလူႉတၢႆၵႂႃႇ ၽွင်းပၢင်တိုၵ်းၼၼ်ႉတင်းသဵင်ႈၼႆ ၶႃႈဝႃႇ။ ၼႂ်းၾိင်ႈၶႄႇၵဝ်ႈၵၢင်ႉ ဢၼ်ၵိူဝ်းယမ် ၶဵင်ႇၽီၼၼ်ႉတႄႉ မီးၾိင်ႈၸိူင်ႉၼႆဝႆႉယူႇဢေႃႈ” ၼႆယဝ်ႉ။
ၸႄႈဝဵင်းသႅၼ်ဝီၼႆႉ ပဵၼ်ဝဵင်းၸဝ်ႈၾႃႉ ဢၼ်ၸိုဝ်ႈသဵင်လိုဝ်းလင်ၵိုၵ်းပိုၼ်း မိူင်းတႆးဝဵင်းၼိုင်ႈသေ မီးၸၢဝ်းၶိူဝ်းလၢႆၽႃႇသႃႇယူႇႁူမ်ႈသဝ်းၸွမ်းၵၼ်ဝႆႉသေတႃႉ သုၼ်ႇယႂ်ႇတႄႉ ၽူႈဢုပ်ႉပိူင်ႇၽွင်းငမ်းဝဵင်းၶဝ် ၵူႈပၢၼ်ပၢၼ် ၸႂ်ႉလၢႆးတၢင်းၽႃႇသႃႇၵိူဝ်းယမ် ပုတ်ႉထၽႃႇသႃႇသေ ပၼ်ႇၵၢၼ်ၽွင်းငမ်းဝဵင်းမႃး။
ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃးၼႆႉ ၸႄႈဝဵင်းသႅၼ်ဝီ တူၵ်းယူႇတႂ်ႈၵၢၼ်ၽွင်းငမ်း သိုၵ်းၵဝ်ႈၵၢင်ႉ (MNDAA) ႁၢၼ်ႉတေႃႇထိုင်ယၢမ်းလဵဝ် ႁိုင်ၶၢဝ်းတၢင်းမွၵ်ႈ 2 ပီပၢႆ။
တႃႇသိုၵ်းမၢၼ်ႈတေၵုမ်းၵမ်ဢဝ်လႆႈၶိုၼ်း ၸႄႈဝဵင်းသႅၼ်ဝီတင်းသဵင်ႈၼၼ်ႉ မိူင်းၶႄႇယူႇၵၢင်ၸွႆႈႁႂ်ႈတင်း သွင်ၾၢႆႇ ဢုပ်ႇဢူဝ်းငူပ်ႉငီႉ ၵႄႈလိတ်ႈပၼ်ႁႃယူႇလၢႆပွၵ်ႈလၢႆၵမ်းသေတႃႉ ဢမ်ႇဢွင်ႇမၢၼ်မႃးသေၵမ်း။
ဝဵင်းသႅၼ်ဝီၼႆႉ ပဵၼ်မႃးပိုၼ်ႉတီႈ လမ်ႇလွင်ႈၵၢၼ်ၵႃႉၶၢႆ မိူင်းၶႄႇ-မိူင်းမၢၼ်ႈၵူၺ်းဢမ်ႇၵႃး ပဵၼ်သဵၼ်ႈတၢင်း လႄႈ ၵိဝ်ႇၽႄ ဢၼ်တိတ်းတေႃႇၵၼ်တင်း လၢၼ်ႇလႅၼ်လိၼ်ၶျိၼ်ႊသူၺ်ႇႁေႃႇ လႄႈ လၢၼ်ႇၵၢၼ်ၵႃႉၶၢႆ လႅၼ်လိၼ် တီႈဝဵင်းမူႇၸေႊ မိူင်းတႆးပွတ်းႁွင်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ