ၼႂ်းဝၼ်းတီႈ 16 လိူၼ်ၵျႅၼ်ႊၼိဝ်ႊရီႊၼႆႉ ယေးငိုၼ်းငဝ်ႈငုၼ်း (ပႁူဝ်ႇပၢၼ်ႇ) တႂ်ႈသိုၵ်းမၢၼ်ႈယိုတ်းမိူင်းပိုၼ်ၽၢဝ်ႇဝႃႈ လႆႈပိၵ်ႉဢိုတ်းဝႆႉ ဢၵွင်ႉယေးငိုၼ်း ၵူၼ်းၸိူဝ်းႁဵတ်းၵၢၼ်လႅၵ်ႈငိုၼ်းၼွၵ်ႈမိူင်း ဢမ်ႇၶဝ်ႈတၢင်းၵၢၼ် တႃႇ 1342 ၵေႃႉ ဝႃႈၼႆ။
တွၼ်ႈတႃႇတေၵုမ်းလႆႈ ၶၼ်ငိုၼ်းတေႃႊလႃႊ ၼႂ်းလွၵ်းၵၢတ်ႇၵႃႉၶၢႆလႅၵ်ႈငိုၼ်းမိူင်းမၢၼ်ႈၼႆသေ ယေးငိုၼ်းငဝ်ႈငုၼ်း (ပႁူဝ်ႇပၢၼ်ႇ) တႂ်ႈသိုၵ်းမၢၼ်ႈ ၸင်ႇတိူဝ်းၶဵင်ႈၶႅင်မႃးၼိူဝ် ၵူၼ်းၸိူဝ်းႁဵတ်းၵၢၼ်လႅၵ်ႈငိုၼ်းၼွၵ်ႈမိူင်းၶဝ် ႁၢဝ်ႈႁႅင်း။
ၸွမ်းၼင်ႇၶေႃႈပိုၼ်ၽၢဝ်ႇ ယေးငိုၼ်းငဝ်ႈငုၼ်း (ပႁူဝ်ႇပၢၼ်ႇ) သေ ၾၢႆႇၽူႈမီးပုၼ်ႈၽွၼ်းၶဝ် လႆႈပၵ်းတႃပႂ်ႉတူၺ်း ၵူတ်ႇထတ်းၼႃႈလိၵ်ႈ Facebook page 1200 ပၢႆ၊ လႆႈပိၵ်ႉ ဢိုတ်းပႅတ်ႈ ဢၵွင်ႉယေးငိုၼ်း ၵူၼ်းၸိူဝ်းၵဵဝ်ႇၶွင်ႈၸွမ်း page ၸိူဝ်းၼၼ်ႉသမ်ႉ 1300 ၵေႃႉပၢႆ။
လိူဝ်ၼၼ်ႉ လႆႈဢဝ်လိူင်ႈတၢင်းၽိတ်း ၵူၼ်း 234 ၵေႃႉ ၸိူဝ်းႁဵတ်းၵၢၼ်သိုဝ်ႉၶၢႆငိုၼ်း USDT ၼိူဝ်ဢွၼ်ႊလၢႆႊ၊ မၢႆယေးငိုၼ်း 600 ပၢႆလႄႈ Mobile Wallet 200 ပၢႆ ဢၼ်ၵဵဝ်ႇၶွင်ႈ ၸွမ်းၵူၼ်းၸိူဝ်းၼၼ်ႉၵေႃႈ လႆႈပိၵ်ႉဢိုတ်းဝႆႉ ဝႃႈၼႆ။
ယေးငိုၼ်းငဝ်ႈငုၼ်း (ပႁူဝ်ႇပၢၼ်ႇ) တႂ်ႈသိုၵ်းမၢၼ်ႈပၼ်ၾၢင်ႉဝႆႉဝႃႈ ၵူၼ်းၸိူဝ်းႁဵတ်းၵၢၼ်သိုဝ်ႉၶၢႆလႅၵ်ႈငိုၼ်းၼွၵ်ႈမိူင်း လူၺ်ႈဢမ်ႇမႅၼ်ႈတၢင်းၵၢၼ်ၼၼ်ႉ တေသိုပ်ႇဢဝ်လိူင်ႈၵႂႃႇ ၸွမ်းၼင်ႇပၵ်းပိူင်မၢႆမီႈ မီးဝႆႉ။ ၾၢႆႇၼိုင်ႈၵေႃႈ ၼင်ႇႁိုဝ်ၶၼ်လႅၵ်ႈငိုၼ်းတေၼိမ်ၼၼ်ႉ လႆႈဢဝ်ငိုၼ်းတေႃႊလႃႊ ဢွၵ်ႇၶၢႆဝႆႉတၢင်းၼမ် ဝႃႈၼႆ။
ပိူင်လူင်မၼ်း တႃႇၸႂ်ႉတိုဝ်းၼႂ်းၶၵ်ႉတွၼ်ႈလမ်ႇလွင်ႈ မိူၼ်ၼင်ႇ ၵၢၼ်ၵပ်းသိုပ်ႇ၊ ၼမ်ႉမၼ်းၵိၼ် လႄႈ ၼမ်ႉမၼ်းၸိူဝ်ႉၾႆး(ၼမ်ႉမၼ်းၸၢၵ်ႈ)ၼႆသေ မိူဝ်ႈပီၵၢၼ်ငိုၼ်း 2024 – 2025 ၼၼ်ႉ လႆႈဢဝ်ငိုၼ်းတေႃႊလႃႊ ဢွၵ်ႇၶၢႆပၼ် တႃႇ 3 ပီႊလီႊယၼ်ႊပၢႆ။ မိူၼ်ၼႆ ၼႂ်းပီၵၢၼ်ငိုၼ်း 2025 – 2026 (တေႃႇထိုင်ဝၼ်းတီႈ 15 လိူၼ်ၵျႅၼ်ႊၼိဝ်ႊရီႊ)ၼႆႉ လႆႈဢဝ်ငိုၼ်းတေႃႊလႃႊဢွၵ်ႇၶၢႆဝႆႉထႅင်ႈ 3 ပီႊလီႊယၼ်ႊပၢႆ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ