ရူတ်ႉၵႃးတၢင်ႇႁႅင်းၵၢၼ်ၼွၵ်ႈမိူင်းလမ်းၼိုင်ႈ ပၢႆႈၵိတ်ႉလၢၼ်ႇသိုၵ်းထႆးသေ ႁေႃႈလတ်း တီႈဝဵင်းမႄႈသွတ်ႇ လႅၼ်လိၼ် ထႆး-မၢၼ်ႈ၊ ပလိၵ်ႈထႆး လိုပ်ႈလမ်းတီႉၺွပ်း၊ ရူတ်ႉၵႃးၼၼ်ႉ ပဵၼ်ၽေးၵိုင်ႉၵၢင်ႉပိၼ်ႈၶွမ်ႈၵၢင်တၢင်း၊ ႁႅင်းၵၢၼ်ၼွၵ်ႈမိူင်း 6 ၵေႃႉ ၺႃးၸဝ်ႈၼႃႈတီႈထႆး တီႉၺွပ်းလႆႈ ဝႃႈၼႆ။
လိူင်ႈၼႆႉ ပဵၼ်ၵႂႃႇမိူဝ်ႈဝႃး ဝၼ်းတီႈ 19 လိူၼ်ထူၼ်ႈၼိုင်ႈ ဝၼ်းၸၼ် ယၢမ်းဝၢႆးဝၼ်း။ ရူတ်ႉ Ford Ranger သီလမ် လမ်းၼိုင်ႈ ဢမ်ႇယွမ်းၵိုတ်းတီႈၵိတ်ႉလၢၼ်ႇ ပလိၵ်ႈထႆးပႂ်ႉသေ ႁေႃႈလတ်းၵႂႃႇ၊ ဝၢႆးၼၼ်ႉ ပဵၼ်ၽေးၵိုင်ႉၵၢင်ႉၽႃႇၺႃး ရူတ်ႉတၢင်ႇလမ်းသေ ပိၼ်ႈၶွမ်ႈ။ ၸဝ်ႈၵႃးတႄႉ ပဵၼ်ၵူၼ်းထႆး၊ တၢင်ႇမႃး ႁႅင်းၵၢၼ်ၵူၼ်းမိူင်းမၢၼ်ႈ 6 ၵေႃႉ၊ ပဵၼ်ၵူၼ်းၸၢႆး 2ၵေႃႉလႄႈ ၵူၼ်းယိင်း 4ၵေႃႉ။ ၼႂ်းၼၼ်ႉမၢတ်ႇၸဵပ်း 3ၵေႃႉ၊ ၵေႃႉၼိုင်ႈ မၢတ်ႇၸဵပ်းႁၢဝ်ႈႁႅင်းဝႆႉ ဝႃႈၼႆ။
လိူဝ်ၼၼ်ႉ ၵူၼ်းႁေႃႈရူတ်ႉၶိူင်ႈ ဢၼ်ၺႃးရူတ်ႉၵႃး ႁေႃႈၽႃႇသႂ်ႇၼၼ်ႉၵေႃႈ မၢတ်ႇၸဵပ်းၸွမ်းလႄႈ လႆႈႁၢမ်သူင်ႇႁူင်းယႃဝႆႉ။
ယၢမ်းလဵဝ် ႁႅင်းၵၢၼ်ၼွၵ်ႈမိူင်း ၶဝ်ႈမိူင်းထႆးလူၺ်ႈဢမ်ႇမႅၼ်ႈတၢင်းၵၢၼ်ၼႆႉ ၼမ်ၶိုၼ်ႈမႃးႁႅင်း။ ယွၼ်ႉၼၼ် ၽူႈမီးပုၼ်ႈၽွၼ်းၵူႈမူႇၵူႈၸုမ်း ႁႂ်ႈထႅမ်ႁႅင်းၵူတ်ႇထတ်းႁႅင်းၵၢၼ် တီႈလႅၼ်လိၼ်ၵူၺ်းဢမ်ႇၵႃး ႁႂ်ႈၶဝ်ႈၵူတ်ႇထတ်းပႃးၼႂ်းႁူင်းၵၢၼ် တီႈဝဵင်းလူင်ပႃးၼႆ ၸုမ်းလူင်ပွင်ၸိုင်ႈမိူင်းထႆး ဢွၵ်ႇၶေႃႈပိုၼ်ၽၢဝ်ႇဝႆႉ မိူဝ်ႈဝၼ်းတီႈ 15 လိူၼ်ထူၼ်ႈၼိုင်ႈၼႆႉ ၼင်ႇ ၼႆ။
ဝၢႆးလင်ၼၼ်ႉ ႁႅင်းၵၢၼ်ၼွၵ်ႈမိူင်း ဢိၵ်ႇပႃး ႁႅင်းၵၢၼ်ၵူၼ်းမိူင်းမၢၼ်ႈ ၺႃးၸဝ်ႈၼႃႈတီႈထႆး ၵူတ်ႇထတ်းတီႉၺွပ်းဢဝ်လိူင်ႈ ၼမ်မႃးႁႅင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ