ပၢင်ပွႆးၶႅင်ႇၼၢင်းႁၢင်ႈလီ ၸၢႆးႁၢင်ႈလဝ်း တီႈပွႆးၶၢဝ်းၵတ်း ဝဵင်းၵဵင်းမႂ်ႇၸိုင်ႈထႆး ပီ 2026 ၼၼ်ႉ ယိင်းသၢဝ်တႆး လႄႈ ၸၢႆးမၢဝ်ႇၸၢဝ်းၶိူဝ်း လီႇသူႇ လႆႈႁပ်ႉသူးထီႉ 1 ၵႂႃႇ ၼႆယဝ်ႉ။
ပၢင်ပွႆးလိူၵ်ႈၼၢင်းသၢဝ် ဢၼ်ႁၢင်ႈလီ လႄႈ မီးၼမ်ႉၵတ်ႉၵိုင်ႇငၢမ်ႇပဵၼ် ၼၢင်းငၢမ်း ဝဵင်းၵဵင်းမႂ်ႇၼၼ်ႉ ၸတ်းႁဵတ်းၵႂႃႇ မိူဝ်ႈဝၼ်းတီႈ 16/01/2026 ယၢမ်းၵၢင်ၶမ်ႈသေ ယိင်းသၢဝ်တႆး ၸိုဝ်ႈႁွင်ႉ ၼွင်ႉၼမ်ႉၽိုင်ႈ น้ำผึ้ง กานต์ธีรา เตชะภัทรธนากุล ဢႃႇယု 25 ပီ ပဵၼ်ၵူၼ်းတႆးယူႇတၢင်း ၵဵင်းႁၢႆး ဝႃႈၼႆ။
တီႈပၢင်ပွႆးၶႅင်ႇၼၢင်းငၢမ်း ၽွင်းၶၢဝ်းၵတ်းဝဵင်းၵဵင်းမႂ်ႇ ပီ 2026 ၼႆႉတႄႉ ၼၢင်းသၢဝ်တႆး ၼမ်ႉၽိုင်ႈ ဢဝ်တၢင်းၽႃႇသႃႇၵႂၢမ်းလၢတ်ႈတႆးသေ တူင်ႉတၵ်ႉ ၽူႈပၼ်ႁႅင်းတင်းသဵင်ႈယဝ်ႉ တွပ်ႇလၢတ်ႈၶိုၼ်းၶေႃႈထၢမ် တီႈ ၽူႈပၼ်မၢႆဝၢၵ်ႈ ၼႂ်းၶမ်ႈၶိုၼ်းၼၼ်ႉၵႂႃႇဝႃႈ “တၢင်းႁၢင်ႈလီဝဵင်းၵဵင်းမႂ်ႇၼႆႉ ဢမ်ႇၸႂ်ႈဝႃႈပဵၼ်မႃးယွၼ်ႉၸၢဝ်းၶိူဝ်းၼိုင်ႈၶိူဝ်းၵူၺ်း။ ဝဵင်းၵဵင်းမႂ်ႇၼႆႉ ႁၢင်ႈလီလႄႈ လီယူႇ လီယၵ်ႉယဵမ်ႈ ယွၼ်ႉမီးၶိူဝ်းၵူၼ်းလၢၵ်ႇလၢႆ ယူႇသဝ်းၸွမ်းၵၼ်ဝႆႉ။ ၼႂ်းၶိူဝ်းၵူၼ်းလၢၵ်ႇလၢႆၼႆႉ မီးပိူင်ၾၢင် လွင်ႈလၢၵ်ႇလၢႆး ႁင်းၽႂ်မၼ်းယူႇယဝ်ႉလႄႈ တေ ဢဝ်ၶေႃႈပိူင်ႈၵၼ်ၸိူဝ်းၼၼ်ႉသေ ပိူင်းၼႄႁႂ်ႈဝဵင်းၵဵင်းမႂ်ႇ ပေႃးလိုဝ်းလင်ၵႂႃႇ တူဝ်ႈလုမ်ႈၾႃႉ” ၼႆယဝ်ႉ။
ၼၢင်းသၢဝ်တႆး ၼမ်ႉၽိုင်ႈၼႆႉ ပေႃႈမႄႈပဵၼ်ၸၢဝ်းၶိူဝ်းတႆး ဢၼ်လုၵ်ႉတၢင်းမိူင်းတႆး ၶၢႆႉမႃးယူႇၼႂ်းမိူင်းထႆး လႄႈ မၼ်းၼၢင်းဢမ်ႇမီးဝႂ်ၵိူတ်ႇတီႈမိူင်းထႆး။ ၵူၺ်းၵႃႈ ယူႇၼႂ်းမိူင်းထႆးၸဵမ်ၵေႃႉလဵၵ်ႉလႄႈ မီးသုၼ်ႇလႆႈႁဵၼ်း သွၼ်ဢဝ်လိၵ်ႈလၢႆး တီႈႁူင်းႁဵၼ်းပရႁိတ ၼႂ်းဝဵင်းၵဵင်းႁၢႆး ၸိုင်ႈထႆး ၼႆယဝ်ႉ။
မိူဝ်ႈပီ 2019 ၽွင်းမၼ်းၼၢင်းပဵၼ်လုၵ်ႈႁဵၼ်းၸၼ်ႉသုင် ထုၵ်ႇလိူၵ်ႈပဵၼ် တူဝ်တႅၼ်း ၵူၼ်းမိူင်းထႆးသေ ၵႂႃႇၶဝ်ႈၶႅင်ႇၵၢၼ်ၶူင်သၢင်ႈပၢႆးသၢႆႊၵူႈၸိုင်ႈမိူင်း တီႈမိူင်းဢမေႇရိၵၼ်ႊသေတႃႉ ယွၼ်ႉဢမ်ႇၸႂ်ႈၵူၼ်းဢၼ် ယိပ်းဝႆႉ မၢႆၾၢင်ထႆးသေ ဢမ်ႇၸၢင်ႈႁဵတ်းပပ်ႉၶၢမ်ႈမိူင်းပဵၼ်တၢင်းၵၢၼ်။ ၵူၺ်းၵႃႈ ၽွင်းၼၼ်ႉ ၾၢႆႇႁွင်ႈၵၢၼ် ၵူတ်ႇထတ်းၶဝ်ႈဢွၵ်ႇၵူၼ်းမိူင်းထႆး ႁပ်ႉႁွင်းႁဵတ်းပၼ် ပပ်ႉၶၢမ်ႈမိူင်းၸူဝ်ႈၶၢဝ်းသေတႃႉ ၾၢႆႇမိူင်းဢမေႇရိၵၼ်ႊ ဢမ်ႇယွမ်းႁပ်ႉတွၵ်ႇပၼ်ဝီႇၸႃႇမၼ်းၼၢင်း။
လွင်ႈၼမ်ႉၵတ်ႉတၢင်းၶႅၼ်ႇမၼ်းၼၢင်းလႄႈ ပၼ်ႁႃဢၼ်မၼ်းၼၢင်းလႆႈႁူပ်ႉၼၼ်ႉ ၶၢဝ်ႇလိုဝ်းလင်ၵႂႃႇ ၼႂ်းမိူင်းထႆးပတ်းပိုၼ်ႉသေ ဢွၼ်ၵၼ်တုၵ်းယွၼ်းတီႈလူင်ပွင်ၸိုင်ႈ ႁႂ်ႈမၼ်းၼၢင်းလႆႈပဵၼ်ၵူၼ်းထႆး တဵမ်တဵမ်။ ၵွပ်ႈၼၼ် ၾၢႆႇႁွင်ႈၵၢၼ်ၽွင်းငမ်း လႄႈ ၵၢၼ်ၵူတ်ႇထတ်းၵူၼ်းၶဝ်ႈဢွၵ်ႇမိူင်းၶဝ် ထတ်းထွင်ၶေႃႈမုၼ်းသေ ႁဵတ်းပၼ်မၢႆၾၢင် ယွမ်းႁပ်ႉမၼ်းၼၢင်းပဵၼ်ၵူၼ်းထႆး လူၺ်ႈပၵ်းပိူင်ၾိင်ႈမိူင်း မတ်ႉတႃ 2551 (7/2) ။
ယွၼ်ႉၼၼ် ပွၵ်ႈၼၼ်ႉ မၼ်းၼၢင်း မီးသုၼ်ႇလႆႈႁူမ်ႈၸွမ်း ၵူၼ်းၼုမ်ႇမိူင်းထႆးသေ ၵႂႃႇၶႅင်ႇၵၢၼ်ၶူင်သၢင်ႈပၢႆး သၢႆႊ မိူင်းဢမေႇရိၵၼ်ႊ (Intel International Science and Engineering Fair 2019 (Intel ISEF) ၸႂ်ႉ တိုဝ်းလၢႆးတၢင်းၵၢၼ်ထိင်းသိမ်းၸိူဝ်ႉၾၼ်းၶဝ်ႈသေ ၶဝ်ႈၶႅင်ႇ လႆႈႁပ်ႉသူး ထီႉသွင်မႃး ၼႆယဝ်ႉ။
ဝၢႆးလင်ၼၼ်ႉ မၼ်းၼၢင်း လႆႈပဵၼ်တူဝ်တႅၼ်း လုၵ်ႈဢွၼ်ႇၵူၼ်းႁၢမ်းၸိုင်ႈမိူင်း ၼႂ်းဢေးသျႃႊသေ ၶဝ်ႈႁူမ်ႈ ဢုပ်ႇဢူဝ်း လွင်ႈၵၢၼ်ႁုၼ်ႈမုၼ်း လႄႈ ပၼ်ႁႃ လုၵ်ႈဢွၼ်ႇၵူၼ်းႁၢမ်းၸိုင်ႈမိူင်း ဢၼ်ၸုမ်းၸၢတ်ႈၸိုင်ႈ လုမ်ႈၾႃႉ UNHCR ၸတ်းၼၼ်ႉ။
ၼၢင်းသၢဝ်တႆး ၸိုဝ်ႈႁွင်ႉ ၼမ်ႉၽိုင်ႈၼႆႉ လႆႈႁပ်ႉၸုမ်ႈၶူး ပၢႆးသၢႆႊၾၢႆႇမေႃယႃ တီႈၸၼ်ႉၸွမ်လူင်ၵဵင်းမႂ်ႇသေ ႁဵတ်းလွင်ႈတူင်ႉၼိုင်ၸွႆႈထႅမ်ၵၢၼ် ၼႂ်းႁွင်ႈၵၢၼ်ၾၢႆႇယႃႈယႃပၢႆးသၢႆႊဝဵင်းၵဵင်းမႂ်ႇ တႂ်ႈၵုမ်းၵၢၼ် ႁွင်ႈၵၢၼ်ၾၢႆႇပၢႆးယူႇလီၵူၼ်းမိူင်း Medical technologists သေ ႁဵတ်းသၢင်ႈၶူင်းၵၢၼ် Dare to do your dream ပိူဝ်ႈတႃႇၸွႆႈထႅမ်လုၵ်ႈဢွၼ်ႇႁၢမ်း ၸိုင်ႈမိူင်းယူႇ ၼႆယဝ်ႉ။
လိူဝ်ၼၼ်ႉ ယၢမ်းလဵဝ် မၼ်းၼၢင်းသိုပ်ႇၶိုၼ်ႈႁဵၼ်းဝႆႉထႅင်ႈ တႃႇလႆႈႁပ်ႉၸုမ်ႈၶူး Master of Public Administration ယူႇ။ ယွၼ်ႉၾၢင်ႁၢင်ႈတူဝ်ၶိင်းမၼ်းႁၢင်ႈလီငၢမ်းတႃ ၵူၼ်း တင်းၼမ်လႄႈ ၸင်ႇလႆႈႁပ်ႉၸုမ်ႈၶူး ၼၢင်းငၢမ်း ဝဵင်းၵဵင်းမႂ်ႇ ပီ 2026 ၼႆယဝ်ႉ။
မိူဝ်ႈပူၼ်ႉမႃး ပီ 2023 ၼၼ်ႉၵေႃႈ ၼၢင်းသၢဝ်တႆး ၼမ်ႉၽိုင်ႈၼႆႉ ယၢမ်ႈလႆႈႁပ်ႉၸုမ်ႈၶူးၼၢင်းငၢမ်းထႆး Miss Universe Thailand 2023 သေ သိုပ်ႇၵႂႃႇၶဝ်ႈၶႅင်ႇ ၼႂ်းပၢင်ပွႆးၼၢင်း ငၢမ်းၵူႈၸိုင်ႈမိူင်းထႅင်ႈ။ ၽွင်းၼၼ်ႉ မၼ်းၼၢင်းလႆႈၶဝ်ႈပႃးထိုင် ၼႂ်းၸၼ်ႉၵူၼ်းပၼ်ႁႅင်းၼမ်သုတ်း Top 20 ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ