ၶႃႈႁၢပ်ႇၵၢၼ်ၶုၼ်တႂ်ႈသိုၵ်းမၢၼ်ႈယိုတ်းမိူင်း ၸိူဝ်းတူင်ႉၼိုင်ပၼ်ႇၵၢၼ်ၽွင်းငမ်းယူႇ ၼႂ်းဝဵင်းတူၼ်ႈတီး လႄႈ ဝဵင်းၼမ်ႉၸၢင် ပႂ်ႉၸွမ်းသဵၼ်ႈတၢင်းလူင် ၼႂ်းပွၵ်ႉၼႂ်းဢိူင်ႇသေ တီႉ ၺွပ်းရူတ်ႉၵႃးၸိူဝ်းဢမ်ႇမီးဝႂ်ပဵၼ်တၢင်းၵၢၼ်ၼၼ်ႉ ႁိုင်မွၵ်ႈ 8 လိူၼ်ပၢႆ ႁၢၼ်ႉထိုင်ယၢမ်းလဵဝ်ၵေႃႈ ပႆႇၵိုတ်းလႄႈ ႁဵတ်းႁႂ်ႈၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ၵႂႃႇမႃးယၢပ်ႇၽိုတ်ႇ ၼႆ ယဝ်ႉ။

ဝၼ်းတီႈ 17-18/01/2026 ၶၢဝ်းတၢင်းသွင်ဝၼ်းၼႆႉ ၾၢႆႇၸဝ်ႈၼႃႈတီႈပလိၵ်ႈသိုၵ်းမၢၼ်ႈ ပႂ်ႉၼႂ်းၵၢင်ဝဵင်းၼမ်ႉၸၢင်သေ တီႉၺွပ်းဢဝ်ရူတ်ႉၵႃး ၸိူဝ်းဢမ်ႇမီးဝႂ်လၢႆႊသိၼ်ႊ လႆႈၵႂႃႇ ဢမ်ႇယွမ်း 30 လမ်း ဝႃႈၼႆ။

ယွၼ်ႉပလိၵ်ႈပႂ်ႉၵူတ်ႇထတ်းႁၢဝ်ႈႁႅင်းၸွမ်းသဵၼ်ႈတၢင်းလႄႈ ႁဵတ်းႁႂ်ႈၵူၼ်းမိူင်းပိုၼ်ႉတီႈ ဢမ်ႇႁတ်းဢွၵ်ႇတႃႈဢွၵ်ႇတၢင်း ၵႂႃႇမႃးၼႂ်းဝဵင်းတေႉတေႉဝႃႈဝႃႈ ၼႆယဝ်ႉ။

ၼၢင်းယိင်းၵေႃႉယူႇဝႆႉၼႂ်းဝဵင်းၼမ်ႉၸၢင်လၢတ်ႈၼႄတီႈၽူႈတွႆႇႁွၵ်ႈဝႃႈ –“ မိူဝ်ႈၵၢင်ၼႂ်တႄႉၶဝ်တီႉၵၢင်ဝဵင်းၼႆႉ ၊ ဝၢႆးဝၼ်းၼႆႉတႄႉၶဝ်ၵႂႃႇပႂ်ႉတီႈတၢင်းၼႃႈႁူင်းပလိၵ်ႈ ၊ ၼႂ်းၶၢဝ်း တၢင်း 2 ဝၼ်းၵူၺ်း တီႉလႆႈ 30 ပၢႆၶႃႈၼႃႇ။ ၵူၼ်းၸွမ်းတၢင်းၼႆႉပေႃးဢမ်ႇမီးၵူၼ်းၵႂႃႇၵူၼ်းမႃးသင် ယဵၼ်ဝႆႉသီႇသီႇ ၊ ၽႂ်ၵေႃႈဢမ်ႇႁတ်းၵႂႃႇလႂ် ပေႃးၺႃးတီႉပႃးၵႂႃႇၵေႃႈ ဢမ်ႇထုတ်ႇ ဢဝ်ၶိုၼ်းလႆႈ”-ဝႃႈၼႆ ။

ၼႂ်းၵႃး 30 လမ်းဢၼ်ပလိၵ်ႈၸိူဝ်းယူႇတႂ်ႈဢႃႇၼႃႇသိုၵ်းမၢၼ်ႈတီႉၺွပ်းၵႂႃႇၼၼ်ႉ ပႃးၵႃးမေႃသွၼ် ၶႃႈႁၢပ်ႇၵၢၼ်ၶုၼ် တီႈဝဵင်းၼမ်ႉၸၢင်ၵႂႃႇလမ်းၼိုင်ႈသေ လႆႈပၼ်ငိုၼ်း 10 သႅၼ်ပျႃးယဝ်ႉ ၸင်ႇထုတ်ႇဢွၵ်ႇမႃးၶိုၼ်းလႆႈ ၼႆယဝ်ႉ ။

လိူဝ်ၼၼ်ႉ တီႈဝဵင်းတူၼ်ႈတီးၵေႃႈ ပလိၵ်ႈသိုၵ်းမၢၼ်ႈ ပႂ်ႉၵူတ်ႇထတ်း တီႈသဵၼ်ႈတၢင်း သီႇယႅၵ်ႈ ၾႆးၶဵဝ် ၾႆးလႅင် ၼႂ်းၵၢင်ဝဵင်းလႄႈ ၸွမ်းၵဵတ်ႉလၢၼ်ႇ တၢင်းၶဝ်ႈဝဵင်းဢွၵ်ႇဝဵင်းတူၼ်ႈတီးၶိုၼ်း ႁၢဝ်ႈႁႅင်း။ ပေႃးပဵၼ်ရူတ်ႉၵႃးဢမ်ႇမီးဝႂ်လၢႆႊသိၼ်ႊ လႄႈ ၵူၼ်းဢမ်ႇမီးဝႂ်ၶပ်းရူတ်ႉၵႃး ၸိူဝ်းၼႆႉ ယိုတ်းဢဝ်ၵႂႃႇၵမ်းသိုဝ်ႈ ဢမ်ႇပၼ်ထုၵ်ႇၶိုၼ်း ဝႃႈၼႆ။

ၼၢင်းယိင်းၵေႃႉယူႇဝႆႉၼႂ်းဝဵင်းတူၼ်ႈတီး လၢတ်ႈၼႄတီႈၽူႈတွႆႇႁွၵ်ႈဝႃႈ -“ ဢမ်ႇမီးဝႃႈၶဝ်တီႉတီႈလႂ်တႄႉတႄႉ ၊ ဝၼ်းၼိုင်ႈလႄႈ ဝၼ်းၼိုင်ႈၵေႃႈဢမ်ႇမိူၼ်ၵၼ် ။ မိူဝ်ႈဝႃး မိူဝ်း သိုၼ်းၼႆႉ ၵႃးတႆးၵေႃႉၶႃႈ ပႃးၵႂႃႇလမ်းၼိုင်ႈ ပဵၼ်ၵႃး Crown ၊ လိူၼ်ပူၼ်ႉမႃးၼႆႉၵေႃႈ ၺႃးတီႉၵႂႃႇ။ ၵႃးလမ်းၼၼ်ႉ တိုၵ်ႉသိုဝ်ႉမႃးလၢႆဝၼ်းၵူၺ်း လႆႈသိုဝ်ႉမႃးပဵၼ် 500 သႅၼ်ပျႃးပၢႆၼႆႉ ဢမ်ႇလႆႈ ၶိုၼ်း ၊ ၶဝ်ယိုတ်းပႅတ်ႈ ။ ႁႃထုတ်ႇၶိုၼ်းၵေႃႈဢမ်ႇလႆႈ ပေႃးဢမ်ႇမီးၵူၼ်းႁူႉၸၵ်း ၵူၼ်းလူင်ၼႂ်း ၶဝ်ၸိူဝ်းၼႆႉ ထၢင်ႇတႄ တေဢမ်ႇလႆႈ ၊ တီႈတူၼ်ႈတီႈၼႆႉ လၢႆႊသိၼ်ႊရူတ်ႉၵႃးၼႆႉ တီႉဢမ်ႇယဝ်ႉဢမ်ႇတူဝ်ႈလႆႈ ႁိုင်ၼႃႇယဝ်ႉ ”- ဝႃႈၼႆ ။

ပေႃးပဵၼ်ရူတ်ႉၶိူင်ႈၸိူဝ်းဢမ်ႇမီးၶႅပ်းမၢႆရူတ်ႉ ၊ ဢမ်ႇတိုဝ်းမၢၵ်ႇႁူဝ်ရူတ်ႉ လႄႈ ဢမ်ႇမီးမၢၼ်ႇၸမ်ႈ ရူတ်ႉၸိူဝ်းၼႆႉၵေႃႈ ၺႃးတီႉၺွပ်းၵႂႃႇသေ လႆႈပၼ်ငိုၼ်း ႁႃႈမိုၼ်ႇထိုင် ၼိုင်ႈသႅၼ်ပျႃးယဝ်ႉ ၸင်ႇထုတ်ႇဢဝ်မႃးလႆႈၶိုၼ်း ၼႆယဝ်ႉ။

ယွၼ်ႉပလိၵ်ႈသိုၵ်းမၢၼ်ႈလိုပ်ႈလမ်းတီႉၺွပ်းၶၢဝ်းတၢင်းႁိုင်ၼႃႇလႄႈ ႁဵတ်းႁႂ်ႈ ၵူၼ်းၶၢႆၽၵ်းယိူဝ်ႈၼၢင်းၶဵဝ် ယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉ ဝႃႈၼႆ ။

ၼၢင်းယိင်းၵေႃႉၶၢႆၽၵ်းၶဵဝ်ယူႇၼႂ်းၵၢတ်ႇလူင် ဝဵင်းတူၼ်ႈတီးလၢတ်ႈၼႄတီႈၽူႈတွႆႇႁွၵ်ႈဝႃႈ -“ ယွၼ်ႉပိူၼ်ႈၶဝ်ပႂ်ႉၺွပ်းၸိူင်ႉၼႆၼႆႉ ပေႃးၵၢင်ၼႂ်မႃးလႆႈလုၵ်ႉၵႂႃႇၵၢတ်ႇၸဝ်ႉၸဝ်ႉ ၽွင်းၶဝ်ပႂ်ႇဢွၵ်ႇတီႉၼၼ်ႉ ၊ ၵၢင်ၶမ်ႈၵေႃႈ မိူဝ်းၶမ်ႈၶမ်ႈ လႆႈႁဵတ်းၼၼ်ဢဝ်ဢေႃႈ ၊ ပေႃးမိူဝ်းၵၢင်ၶမ်ႈတႄႉမီးၽေးယူႇသေတႃႉ ဢမ်ႇၸၢင်ႈႁဵတ်းႁိုဝ်ယဝ်ႉၶႃႈ”- ဝႃႈၼႆ ။

ၾၢႆႇၼိုင်ႈၵေႃႈ တီႈဝဵင်းတူၼ်ႈတီးၼႆႉ သိုၵ်းမၢၼ်ႈတမ်းမၢႆမီႈ ဢၼ်ဢမ်ႇဢွၵ်ႇတၢင်းၼွၵ်ႈလႆႈ ၶၢဝ်းၵၢင် ၶမ်ႈၵၢင်ၶိုၼ်း မႃႊသျႄႊလေႃႊ ၸဵမ်မိူဝ်ႈသိုၵ်းမၢၼ်ႈတႄႇယိုတ်းဢႃႇၼႃႇ ၸိုင်ႈမိူင်းမႃးၼၼ်ႉ ႁၢၼ်ႉတေႃႇထိုင်ယၢမ်းလဵဝ် သိုၵ်းပႆႇလူတ်းယွၼ်ႇပူတ်းပၼ်ၶိုၼ်း။

ၵွပ်ႈၼႆသင်ဝႃႈ ၺႃးတီႉၸွမ်းတၢင်း ယၢမ်းၵၢင်ၶမ်ႈၵၢင်ၶိုၼ်းၸိုင် တႃႇတေလွတ်ႈၶိုၼ်းၼႆႉ ပဵၼ်ဢၼ်ယၢပ်ႇၽိုတ်ႇတႄႉတႄႉၼႆ – ၼၢင်းယိင်း ၵူၼ်းၶၢႆၶူဝ်းတီႈဝဵင်းတူၼ်ႈတီးလၢတ်ႈ ၼင်ႇၼႆ။

ၵဵဝ်ႇလူၺ်ႈၵၢၼ်တီႉၺွပ်းရူတ်ႉၵႃးၼၼ်ႉသေ သိုၵ်းမၢၼ်ႈပိုၼ်ၽၢဝ်ႇပဵၼ်တၢင်းၵၢၼ်ဝႆႉဝႃႈ ပေႃး မီးလၢႆႊသိၼ်ႊ ရူတ်ႉၶိူင်ႈသေ ဢမ်ႇဢဝ်ပႃးၸပ်းတူဝ်ၵႂႃႇၸွမ်းၼႆႉတေလႆႈပၼ်ငိုၼ်း 3 မိုၼ်ပျႃး ၊ ပေႃးဢမ်ႇမီးလၢႆႊသိၼ်ႊသင်သေလွင်ႈသမ်ႉ တေၺႃးမၢပ်ႇမႂ်ငိုၼ်း 1 သႅၼ်ပျႃး လႄႈ တူတ်ႈတၢမ်ႇၶွၵ်ႈ 1 လိူၼ် ၊ ပေႃးဢမ်ႇမီး မၢႆရူတ်ႉ ၸပ်းရူတ်ႉၶိူင်ႈ၊ ၵႃးဝႆႉသမ်ႉ တေၺႃးဢဝ်လိူင်ႈ လူၺ်ႈမၢႆမီႈ မတ်ႉတႃ 84(ၵ) ၊ 94 ၊ တူတ်ႈတၢမ်ႇၶွၵ်ႈၶင် 3 လိူၼ် လႄႈ ငိုၼ်း 3 သႅၼ်ပျႃး ဝႃႈၼႆ ။

မိူဝ်ႈဝၼ်းတီႈ 2 လိူၼ်မေႊ ပီ2025 ပူၼ်ႉမႃးၼႆႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ၸီႉသင် ႁႂ်ႈၵူတ်ႇထတ်းရူတ်ႉၵႃး ၸိူဝ်းဢမ်ႇမီးမၢႆၾၢင် (လၢႆႊသိၼ်ႊ) ၼႆလႄႈ ၶႃႈႁၢပ်ႇၵၢၼ် ၶုၼ်ၾၢႆႇၵဵဝ်ႇၶွင်ႈ လိုပ်ႈလၢမ်းတီႉၺွပ်းရူတ်ႉၵႃးၵူၼ်းမိူင်း ပတ်းပိုၼ်ႉမိူင်းႁူမ်ႈတုမ်။ ၼႂ်းမိူင်းတႆးၵေႃႈ မိူၼ် ၼင်ႇ ဝဵင်းဢွင်ႇပၢၼ်း ၊ တူၼ်ႈတီး ၊ ယွင်ႁူၺ်ႈ ၊ လွၵ်ႉၸွၵ်ႇ ၊ သီႇသႅင်ႇ ၊ ပၢင်လွင်း ၊ ပၢင်လူင် ၊ ၼမ်ႉၸၢင် ၸိူဝ်းၼႆႉၵေႃႈၺႃးၵူတ်ႇထတ်းႁၢဝ်ႈႁႅင်း ၼႆယဝ်ႉ။