သိုၵ်းလူင်ပွင်ၸိုင်ႈမၢၼ်ႈ ၵူတ်ႇထတ်း ၵူၼ်းမိူင်းတင်း သိုၵ်း RCSS ဢၼ်တူင်ႉၼိုင်ၵႂႃႇမႃး တၢင်းပွတ်း မိူင်းတူၼ်- ပုင်ႇပႃႇ ၶႅမ်ၼၼ်ႉ ႁၢဝ်ႈႁႅင်း ႁဵတ်းႁႂ်ႈၵူၼ်းမိူင်း ထူပ်းလွင်ႈယၢပ်ႇၽိုတ်ႇ ဝႃႈၼႆ။
တႄႇဢဝ် ဝၼ်းတီႈ 19-26/08/2018 သိုၵ်းလူင်ပွင်ၸိုင်ႈမၢၼ်ႈ တပ်ႉၶလယ 65 ပႂ်ႉၵူတ်ႇထတ်း ၵူၼ်းမိူင်းတင်း သိုၵ်း RCSS/ SSA ဢၼ်တူင်ႉၼိုင်တၢင်းပွတ်းတွၼ်ႈၼၼ်ႉ တီႈလွႆဢႃႇလူး ၼႂ်းၵႄႈမိူင်းတူၼ် – ပုင်ႇပႃႇၶႅမ် ၼႂ်းၸႄႈ ဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆး ပွတ်းဢွၵ်ႇၶူင်း ဝႃႈၼႆ။
ၸၢႆးလူင် ၵူၼ်းမိူင်းတူၼ် လၢတ်ႈတီႈၽူႈတွႆႇႁွၵ်ႈဝႃႈ “ သိုၵ်းမၢၼ်ႈ တႄႇၵူတ်ႇထတ်းႁၢဝ်ႈႁႅင်းမႃး မိူဝ်ႈဝၼ်းတီႈ 19 တေႃႇထိုင် 26 ။ ၼႂ်းဝၼ်းတီႈ 23 ၼၼ်ႉ ၶႂ်ႈဝႃႈၶဝ်ၵူတ်ႇထတ်းႁၢဝ်ႈႁႅင်း၊ ၶဝ်ဢၢင်ႈဝႃႈတႄႉ ၵူတ်ႇထတ်းယႃႈမဝ်းၵမ်၊ သိုၵ်းတႆးလႄႈ ဢိၵ်ႇထႅင်ႈလၢႆလၢႆလွင်ႈ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈတပ်ႉသိုၵ်း RCSS/SSA ၼႃႈလိၼ်သိုၵ်းမၢႆ 2 မွၵ်ႇထိုင်ၵၢင်ႉၵႄႇ ၼႂ်းပိုၼ်ႉတီႈ တေႁဵတ်း ပၢင်ၵုမ်တီႈၼႃႈလိၼ်သိုၵ်းမၢႆ 2 ၼႆလႄႈ ယူႇတီႈသိုၵ်းမၢၼ်ႈ လႆႈႁူႉၶၢဝ်ႇသေ ပႂ်ႉၵူတ်ႇထတ်း ၵူၼ်းမိူင်း တင်း သိုၵ်း RCSS ၵႂႃႇမႃးႁၢဝ်ႈႁႅင်း ဝႃႈၼႆ။
ၸၢႆးလူင် လၢတ်ႈဝႃႈ “ သိုၵ်းမၢၼ်ႈ လႅပ်ႈလႆႈၶၢဝ်ႇ တီႈၵူၼ်းမိူင်း ပွင်ႇၸူးၶဝ် လွင်ႈဝႃႈသိုၵ်း RCSS ႁွင်ႉ ၵႄႇၵၢင်ႉ တႃႇၶိုၼ်ႈပၢင်ၵုမ် ၼႂ်းဝၼ်းတီႈ 23 ၼၼ်ႉ။ ယွၼ်ႉၼၼ် သိုၵ်းမၢၼ်ႈၶဝ် ၸင်ႇပႂ်ႉၵူတ်ႇထတ်းႁၢဝ်ႈႁႅင်း တီႈတၢင်းၶိုၼ်ႈၸူးၼႃႈလိၼ်သိုၵ်း RCSS မၢႆ 2 တင်းသွင်တီႈလူးၵွၼ်ႇ၊ တေႃႈလဵဝ်တႄႉ ၵႂႃႇမႃးလႆႈၶိုၼ်းမိူၼ် ၵဝ်ႇယူႇ ဢမ်ႇပေႃးၵူတ်ႇထတ်းႁၢဝ်ႈႁႅင်း မိူၼ်မိူဝ်ႈပူၼ်ႉမႃး” ဝႃႈၼႆ။
ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ၼႆႉ ပဵၼ်ၸုမ်းဢၼ်လူင်းလၢႆးမိုဝ်းလိၵ်ႈႁူမ်ႈမၢႆ ၵိုတ်းတိုၵ်းတူဝ်ႈမိူင်း NCA ဝႆႉသေ ၵႆႉၵႆႉၺႃးသိုၵ်းလူင်ပွင်ၸိုင်ႈမၢၼ်ႈၼႄး ပူၼ်ႉပႅၼ်ၼႃႈလိၼ်သေတူင်ႉၼိုင်ၼႆသေ ႁႅၼ်းသိုၵ်းလေႃႇတိုၵ်းမႃး လၢႆပွၵ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ