ဝၼ်းတီႈ 14/1/2026 ဝၼ်းမိူဝ်ႈၼႆႉ ၶၼ်ၶမ်းမိူင်းမၢၼ်ႈ မိူင်းတႆးပုင်ႈၶိုၼ်ႈသုင်ႁႅင်း ၼိုင်ႈၵျၢပ်ႈ 98 သႅၼ်ပၢႆ 7 မိုၼ်ႇပျႃး ပဵၼ်ဢၼ်ၶိုၼ်ႈသုင်မႃး ၸမ်တေထိုင် 100 သႅၼ်ပျႃးယဝ်ႉ။
ၼႂ်းဝၼ်းသုၵ်းဝူင်ႈပူၼ်ႉမႃးၼႆႉ ၶၼ်ၶမ်း သုင်သုတ်းယဝ်ႉတီႈ 94 သႅၼ်ပျႃး။ ႁိုင်ၶၢဝ်းတၢင်း 4 ဝၼ်းၵူၺ်း ထိုင်မႃးဝၼ်းဢၢင်းၵၢၼ်းဝူင်ႈၼႆႉ ၵိုင်ႉၵၢင်ႉပုင်ႈၶိုၼ်ႈ 4 သႅၼ်ပျႃး ပဵၼ်ၵႂႃႇ 98 သႅၼ်ပျႃး။ ၵူၼ်းၵႃႉၶမ်း မိူင်းမၢၼ်ႈတႄႉလၢတ်ႈဝႃႈ ၶၼ်ၶမ်းလုမ်ႈၾႃႉၵေႃႈၶိုၼ်ႈ ၼိုင်ႈဢွၼ်ႊသ် 4600 ၻေႃႊလႃႊ မိူင်းထႆးၵေႃႈၶိုၼ်ႈ ၼိုင်ႈဝၢတ်ႇထိုင် 68800 ဝၢတ်ႇ ၸမ်တေထိုင် 70000 ယဝ်ႉ။ ၵူၺ်းၵႃႈပေႃးတူၺ်းၶိုၼ်းပိုၼ်းတႄႉ ပေႃးဝႃႈ ၶၼ်ၶမ်းလုမ်ႈၾႃႉ ၵိုတ်းယဝ်ႉ ဢမ်ႇၶိုၼ်ႈထႅင်ႈယဝ်ႉၼႆသေတႃႉ ၶၼ်ၶမ်းမိူင်းမၢၼ်ႈဢမ်ႇတွၼ်ႉယွမ်းလူင်းၶိုၼ်းသေပွၵ်ႈ – ဝႃႈၼႆ။
ၶၼ်ၶမ်းဢမ်ႇၼိမ်ၼႆႉပဵၼ်ယွၼ်ႉ ငဝ်းလၢႆးၵၢၼ်မိူင်းၵၢၼ်သိုၵ်းမိူင်းဢမေႊရိၵၼ်ႊဢမ်ႇၼိမ်သဝ်း၊ ပဵၼ်ယွၼ်ႉၶၼ်ငိုၼ်းၻေႃႊလႃႊတူၵ်း၊ ပဵၼ်ယွၼ်ႉယေးငိုၼ်းလူတ်းယွၼ်ႇၶီႈၻွၵ်ႇငိုၼ်း- ၼႆ သိုဝ်ႇၶၢဝ်ႇပၢႆးမၢၵ်ႈမီးလုမ်ႈၾႃႉထတ်းသၢင်ႈတႅမ်ႈတၢင်ႇၼင်ႇၼႆ။
ယွၼ်ႉၼၼ်လႄႈၶၼ်ၶမ်း တီႈမိူင်းမၢၼ်ႈၵေႃႈၼႂ်းၶၢဝ်းတၢင်း 6 လိူၼ်ၼႆႉ လုၵ်ႉတီႈၼိုင်ႈၵျၢပ်ႈ 80 သႅၼ်ပျႃးသေယၢမ်းလဵဝ် ပုင်ႈၶိုင်ႈထိုင် 98 သႅၼ်ပျႃး။ ပဵၼ်ဢၼ်ၶိုၼ်ႈဝႆးသုတ်းၵိုၵ်းပိုၼ်း ဝႃႈၼႆ။
သင်တႅၵ်ႈၼိူင်းၵၼ်တင်း မိူဝ်ႈဝၼ်းတီႈ 6 လိူၼ်ၵျႅၼ်ႊၼိဝ်ႊရီႊၼႆႉၸိုင် ၶၢဝ်းတၢင်းဝူင်ႈလဵဝ် ၶၼ်ၶမ်း ၶိုၼ်ႈမႃး 3 သႅၼ်ပၢႆ။
ၵူၼ်းၵႃႉၶၢႆၶမ်းၵေႃႉၼိုင်ႈလၢတ်ႈဝႃႈ – လွင်ႈဢမေႊရိၵၼ်ႊ လႅၵ်ႈလၢႆႈပေႃႇလသီႇၼႆႉ ႁဵတ်းႁႂ်ႈ ငဝ်းလၢႆးၼႂ်းလုမ်ႈၾႃႉ ဢမ်ႇၼိမ်သဝ်း။ ၶၼ်ၶမ်းလုမ်ႈၾႃႉလႄႈ ၼႂ်းမိူင်းၵေႃႈဢမ်ႇၼိမ် ၶိုၼ်ႈလူင်းဝႆး။ ယွၼ်ႉၼၼ်လႄႈ ႁႂ်ႈဢွၼ်ၵၼ်ဝႆႉသတိသေ သိုဝ်ႉၶၢႆၵၼ်ၵႂႃႇ ဝႃႈၼႆ။
ၾၢႆႇၼိုင်ႈၵေႃႈ ယွၼ်ႉဢမေႊရိၵၼ်ႊ တင်း ဢီႊရၼ်ႊ ၶဵင်ႈၶႅင်ၵၢၼ်သိုၵ်းၵၼ်၊ မီးၶၢဝ်ႇလိုဝ်းဢွၵ်ႇမႃးဝႃႈ Jerome Powell ႁူဝ်ပဝ်ႈယေးငိုၼ်းငဝ်ႈငုၼ်း (Federal Reserve) မိူင်းဢမေႊရိၵၼ်ႊ ၺႃးၵူတ်ႇထတ်းၸႅတ်ႈထၢမ်ၼႆလႄႈ ၸင်ႇႁဵတ်းႁႂ်ႈၶၼ်ၶမ်းလုမ်ႈၾႃႉ ပုင်ႈၶိုၼ်ႈသုင်မႃး။
လိူဝ်ၼၼ်ႉ ယွၼ်ႉငဝ်းလၢႆးယၢမ်းလဵဝ်သေ ၵူၼ်းလူင်းတိုၼ်းလၢင်းတူဝ်ႈလုမ်ႈၾႃႉၶဝ် ဢွၼ်ၵၼ်ၶၢႆႉမႃးၾၢႆႇၶမ်း တၢင်းၼမ်တၢင်းလၢႆလႄႈ ႁဵတ်းႁႂ်ႈၶၼ်ၶမ်းလုမ်ႈၾႃႉတိူဝ်းၶိုၼ်ႈသုင်မႃးထႅင်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ