မိူဝ်ႈၼႆႉ ဝၼ်းတီႈ 14 လိူၼ်ထူၼ်ႈၼိုင်ႈ ၶၢဝ်းယၢမ်းၵၢင်ၼႂ် 9မူင်း ႁၢဝ်းလဵၵ်းၶရဵၼ်ႊဢၼ်တိုၵ်ႉၵေႃႇသၢင်ႈ ယၢတ်ႇတူၵ်းတဵင်သႂ်ႇ ၼိူဝ်သဵၼ်ႈတၢင်းရူတ်ႉၾႆးလႄႈ ထႅဝ်ရူတ်ႉၾႆး တီႈ ၼၶွၼ်ႊရတ်ႉၶျသီႊမႃႊ မိူင်းထႆး၊ ၵူၼ်းတၢႆ 20 ပၢႆ မၢတ်ႇၸဵပ်းထႅင်ႈမွၵ်ႈ 40 ၵေႃႉ ဝႃႈၼႆ။

ၽွင်းမိူဝ်ႈရူတ်ႉၾႆး တိုၵ်ႉႁေႃႈမႃးၼိူဝ်သဵၼ်ႈတၢင်း ၵုင်းထဵပ်ႈ – ပၢၼ်ႉထၼုၼ်ႊၶူတ်း ၼႂ်းၸႄႈတွၼ်ႈသီၶိဝ်ႉၼၼ်ႉ ႁၢဝ်းလဵၵ်းၶရဵၼ်ႊ ၵိုင်ႉၵၢင်ႉယၢတ်ႇတူၵ်းသႂ်ႇၼိူဝ်သဵၼ်ႈတၢင်း၊ ရူတ်ႉၾႆးၵေႃႈ မႃးၽႃႇၺႃးႁၢဝ်ႈႁႅင်းသေ ထိုင်တီႈၾႆးမႆႈ၊ ဝၢႆးၼၼ်ႉ ႁၢဝ်းလဵၵ်းၶရဵၼ်ႊလႄႈ သဝ်ဢုတ်ႇ ၵူၼ်ႇတဵင်သႂ်ႇပႃးထႅဝ်ရူတ်ႉၾႆးထႅင်ႈလႄႈ ႁဵတ်းႁႂ်ႈၵူၼ်းၶီႇရူတ်ႉၾႆးမႃးၸွမ်း လႆႈမၢတ်ႇၸဵပ်းလူႉတၢႆၼမ် ဝႃႈၼႆ။

ၼႂ်းရူတ်ႉၾႆးၼၼ်ႉ မီးၵူၼ်းၶီႇမႃးၸွမ်း 195 ၵေႃႉ။ တေႃႇထိုင်ၶၢဝ်းယၢမ်း ၵၢင်ဝၼ်းတဵင်ႈၼႆႉ မီးၵူၼ်းလူႉတၢႆ 22 ၵေႃႉ၊ မၢတ်ႇၸဵပ်းထႅင်ႈ မွၵ်ႈ 40 ၵေႃႉ၊ ၽူႈမီးပုၼ်ႈၽွၼ်းၶဝ် လႆႈၸွႆႈသူင်ႇဝႆႉတီႈႁူင်းယႃ မႁႃႊရတ်ႉ ၼၶွၼ်ႊ ရတ်ႉၶျသီႊမႃႊ လႄႈ ႁူင်းယႃတီႈၸမ်ၸိူဝ်းၼၼ်ႉ ဝႃႈၼႆ။

ၶူင်းၵၢၼ်ၵေႃႇသၢင်ႈသဵၼ်ႈတၢင်းရူတ်ႉၾႆးလႅၼ်ႈဝႆးၼႆႉ တႄႇမႃးၸဵမ်မိူဝ်ႈပီ 2017 သေ ၶဝ်ႈပႃးဝႆႉၼႂ်းၽႅၼ်ၵၢၼ် သဵၼ်ႈတၢင်းလႅၼ်ႈဝႆး မိူင်းထႆး – မိူင်းၶႄႇ HSR တွၼ်ႈၼိုင်ႈ။ သဵၼ်ႈတၢင်းရူတ်ႉၾႆးၼႆႉ လုၵ်ႉတီႈဝဵင်းလူင်ၵုင်းထဵပ်ႈ တေၵပ်းသိုပ်ႇတင်းမိူင်းလၢဝ်းသေ ဢၢၼ်းတေၵွင်ႉၸူး ဝဵင်းၶုၼ်ႊမိင်ႊ မိူင်းၶႄႇ ၼႂ်းပီ 2028၊ လိူဝ်ၼၼ်ႉ ပဵၼ်ၽႅၼ်ၵၢၼ်လူင် ၶွင်မိူင်းၶႄႇ Belt and Road ဝႃႈၼႆ။

ယွၼ်ႉသင်လႄႈ ႁၢဝ်းလဵၵ်းၶရဵၼ်ႊဢၼ်တိုၵ်ႉၵေႃႇသၢင်ႈ ယၢတ်ႇတူၵ်းမႃးဢၼ်ဝႃႈၼၼ်ႉတႄႉ ၸဝ်ႈၼႃႈတီႈထႆး တိုၵ်ႉၵူတ်ႇထတ်းဝႆႉ။