မိူဝ်ႈဝႃး ဝၼ်းတီႈ 12 လိူၼ်ထူၼ်ႈၼိုင်ႈ ယၢမ်းၵၢင်ၶမ်ႈ ၼၢင်းယိင်းၵေႃႉၼိုင်ႈ ထုၵ်ႇႁႅမ်တၢႆ ၽွင်းၵႂႃႇလဵင်ႉဝူဝ်း တီႈၾၢႆႇတူၵ်းဝဵင်းတီႈမူၵ်းသိူဝ် မိူင်းယၢင်းလႅင်၊ ပဵၼ်ၸုမ်းလႂ် ၽႂ်ၵေႃႉႁႅမ်တၢႆဢၼ်ဝႃႈၼၼ်ႉ ပႆႇမီးၽႂ်ယိုၼ်ယၼ်။

ၼၢင်းယိင်းၵေႃႉၼၼ်ႉပဵၼ် မပၢႆႇ (မပိုင်) ဢႃယု 45 ပီ ယူႇတီႈဝၢၼ်ႈ ဢၼ်မီးၾၢႆႇတူၵ်းဝဵင်းတီႈမူၵ်းသိူဝ် မိူင်းယၢင်းလႅင်။ မိူဝ်ႈဝႃးၵၢင်ၼႂ် မွၵ်ႈ 11 မူင်းၼႆႉ ၵႂႃႇလဵင်ႉဝူဝ်းၼႆႉသေ ဢွၵ်ႇႁိူၼ်းၵႂႃႇ။ ၵၢင်ဝၼ်းမွၵ်ႈ 2မူင်းပၢႆၼႆႉ လၢတ်ႈတေႃႇမႃးၵူၼ်းတီႈႁိူၼ်းၵမ်းၼိုင်ႈ။ ဝၢႆးၼၼ်ႉ တေႃႇထိုင်ၵၢင်ၶမ်ႈၵေႃႈ ဢမ်ႇႁၼ်ပွၵ်ႈမႃးၶိုၼ်းလႄႈ ပီႈၼွင်ႉၵူၼ်းႁိူၼ်း ဢွၼ်ၵၼ်ၸွမ်းသွၵ်ႈႁႃ။

ၶၢဝ်းယၢမ်းၵၢင်ၶိုၼ်း 10 မူင်းပၢႆ ၵႂႃႇထူပ်းႁၼ်ၶၢပ်ႈတူဝ်မၼ်းၼၢင်း တီႈယၢၼ်ၵႆဝၢၼ်ႈ မွၵ်ႈ 1လၵ်း။ တီႈၶေႃး၊ တီႈပုမ်လႄႈ မိုဝ်းမၼ်းၼၢင်းၼၼ်ႉ ၺႃးမိတ်ႈတႅင်းဝႆႉ လၢႆလၢႆၵမ်းသေ လူႉတၢႆဝႆႉ၊ ၾူၼ်းမၼ်းၼၢင်းၵေႃႈ ႁၢႆဝႆႉ ဝႃႈၼႆ။

ဢိင်ၼိူဝ်လွင်ႈၼႆႉသေ ၼင်ႇႁိုဝ်တေတီႉၺွပ်းဢဝ်လိူင်ႈလႆႈ ၵေႃႉပူၼ်ႉပႅၼ်ၼၼ်ႉ ၽူႈမီးပုၼ်ႈၽွၼ်းၼႂ်းပိုၼ်ႉတီႈ တိုၵ်ႉလမ်းသွၵ်ႈႁႃဝႆႉ။ မိူၼ်ၼႆ တိုၵ်းသူၼ်းဝႆႉပႃးၵူၼ်းမိူင်းပိုၼ်ႉတီႈ ႁႂ်ႈႁူမ်ႈမိုဝ်းၸွႆႈႁႃၵၼ်ၼႆ ၸုမ်းသိုၵ်းယၢင်းလႅင် PKPF ပိုၼ်ၽၢဝ်ႇတိုၵ်းသူၼ်းဝႆႉ ၼင်ႇၼႆ။