ပၢင်တိုၵ်း သိုၵ်းမၢၼ်ႈယိုတ်းမိူင်း တင်း ၸုမ်းလုၵ်ႉၽိုၼ်ႉ တီႈလႅၼ်လိၼ် တႆး – ယၢင်းလႅင်ၼႆႉ တိုၵ်ႉသိုပ်ႇပဵၼ်ဝႆႉၶိူဝ်းယႂ်း၊ ၵူၼ်းပိုၼ်ႉတီႈ ဢၼ်ပၢႆႈၽေးၵႂႃႇသေႃႉယူႇဝႆႉ ၼႂ်းထိူၼ်ႇၼႂ်းၶိူဝ်း၊ တၢင်ႇတီႈတၢင်ႇဝဵင်းၼၼ်ႉ ပႆႇၸၢင်ႈပွၵ်ႈႁိူၼ်းၶိုၼ်း။
ပူၼ်ႉမႃး ၼႂ်းဝၼ်းတီႈ 26/11/2025 ဝၼ်းပုတ်ႉၼႆႉ သိုၵ်းမၢၼ်ႈႁူမ်ႈတင်းပျီႇတူႉၸိတ်ႉပဢူဝ်းသေ ထူဝ်းသိုၵ်းၼႂ်းပိုၼ်ႉတီႈလႅၼ်လိၼ် ၾၢႆၶုၼ် – ပၢင်လွင်း ၼႂ်းၸိုင်ႈတႆးပွတ်းၸၢၼ်း။
လႆႈပိုတ်းယိုဝ်းၵၼ်တင်းၸုမ်းသိုၵ်း KNDF -ၸုမ်းလုၵ်ႉၽိုၼ်ႉသိုၵ်းမၢၼ်ႈၼႂ်းပိုၼ်ႉတီႈ ႁၢဝ်ႈႁႅင်း။ ၾၢႆႇသိုၵ်းမၢၼ်ႈ ၸႂ်ႉပႃးၶိူင်ႈတရူၼ်ႊ ၶိူင်ႈၵွင်ႈလူင်ၸိူဝ်းၼႆႉသေ ပွႆႇမၢၵ်ႇယိုဝ်းတိုၵ်း။ ၽွင်းပၢင်တိုၵ်းၼၼ်ႉ သွင်ၾၢႆႇ မီးလွင်ႈမၢတ်ႇၸဵပ်းလူႉတၢႆသေတႃႉ ႁူဝ်ယွႆႈတႄႉ ဢမ်ႇမီးၽႂ်ယိုၼ်ယၼ်။
မိူၼ်ၼႆ ၼႂ်းၸႄႈဝဵင်း တီႈမူၵ်းသိူဝ် မိူင်းယၢင်းလႅင် ဢၼ်မီးၸမ်လႅၼ်လိၼ်ၸိုင်ႈတႆးပွတ်းၸၢၼ်းၼၼ်ႉၵေႃႈ သိုၵ်းမၢၼ်ႈထူဝ်းသိုၵ်းၶဝ်ႈသေ ပဵၼ်ပၢင်တိုၵ်းၵၼ်ဝႆႉတင်း ၸုမ်းႁူမ်ႈႁွမ်းသိုၵ်းယၢင်းလႅင်။ ၵၢင်ၶမ်ႈၵၢင်ၶိုၼ်း ယင်းမီးလွင်ႈပိုတ်းယိုဝ်းၵၼ်ႁၢဝ်ႈႁႅင်း။
ၵူၼ်းပၢႆႈၽေးသိုၵ်းၼပ်ႉႁူဝ်ႁဵင်ၵေႃႉ ဢမ်ႇၸၢင်ႈပွၵ်ႈၶိုၼ်းႁိူၼ်းယေး။ ယၢမ်းလဵဝ်သမ်ႉ ပဵၼ်ၶၢဝ်းၵတ်းႁႅင်းလႄႈ ယၢပ်ႇၽိုတ်ႇၽႃႈႁူမ်ႇၶူဝ်းၼွၼ်းတင်း တႃႇၶူဝ်းၶွင်ၵိၼ်ယႅမ်ႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ