ပၢင်လိူၵ်ႈတင်ႈ ပွၵ်ႈၵမ်း 2 ဢၼ်သိုၵ်းမၢၼ်ႈယိုတ်းမိူင်း ၸတ်းႁဵတ်းၵႂႃႇဝၼ်းတီႈ 11/1/2026 ၼႆႉ တီႈၼႂ်းၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း ပႃႇတီႇထၼူႉ ဢွင်ႇပေႉ တင်းသၢမ်တီႈ ဝႃႈၼႆ။
ဝဵင်းယႂႃႇငၢၼ်ႇ (ဝၢၼ်ႈငႂ်ႈ)ၼႆႉ ပႃးၼႂ်းပၢင်လိူၵ်ႈတင်ႈၵမ်းထီႉသွင် ။ မီးပႃႇတီႇ 5 ဢၼ်ၶဝ်ႈၶေႉၶဵင်ႇ ၊ ပႃႇတီႇထၼူႉ (DNDP) ၊ ပႃႇတီႇသၢင်ႇသီႈ (USDP) လႄႈ ပႃႇတီႇပဢူဝ်း (PNO) ၊ ပႃႇတီႇ ၽွမ်ႉႁူမ်ႈၸၢဝ်းၶိူဝ်း (NUP) ပႃႇတီႇဢွၼ်ၼမ်းၵူၼ်းမိူင်း (PPP) ၸိူဝ်းၼႆႉ။
ၼေႃႇၽူႈတႅၼ်းပႃႇတီႇထၼူႉ တီႈဝဵင်းယႂႃႇငၢၼ်ႇၼႆႉပဵၼ် တေႃႇမႃႇလႃႇသၢၼ်း ပဵၼ်ၼေႃႇတႅၼ်းၽွင်းသၽႃးၸိူဝ်ႉၸၢတ်ႈ ၊ ဢူးလူႇၸေႃႇ ၼေႃႇတႅၼ်းၽွင်းသၽႃးၵူၼ်းမိူင်း လႄႈ ၼေႃႇတႅၼ်းၽွင်းသၽႃးမိူင်းတႆး ပဵၼ် ဢူးတဵင်းတၢၼ်းထုၼ်း ။
ၼၢင်းယိင်းၽူႈတူင်ႉၼိုင် သုၼ်ႇလႆႈၵူၼ်းတီႈဝဵင်းယႂႃႇငၢၼ်ႇလၢတ်ႈၽူႈတွႆႇႁွၵ်ႈဝႃႈ -“တိုၵ်ႉလႆႈႁူႉမိူဝ်ႈၼႆႉ ႁူဝ်ၶမ်ႈၵူၺ်း ၊ တီႈဝဵင်းယႂႃႇငၢၼ်ႇၼႆႉ ၼေႃႇတႅၼ်းၽွင်း ပႃႇတီႇထၼူႉ ပေႉတင်းသၢမ်တီႈ ၊ မိူဝ်ႈပၢင်လိူၵ်ႈတင်ႈၵမ်းဢွၼ်တၢင်းၵေႃႈ ယၢမ်ႈဢွင်ႇပေႉမႃးယူႇသေတႃႉ ဢမ်ႇပေႉတင်းသၢမ်တီႈၸိူင်ႉၼႆ ၊ တလဵဝ်ၼႆႉ ဢမ်ႇလိူဝ်လႆႈတေလႆႈသႂ်ႇၼႆသေၵႃႈလႆၵႂႃႇသႂ်ႇပၼ်ၵူၺ်း။ ၾၢႆႇၼိုင်ႈၵေႃႈ ဢမ်ႇၶႂ်ႈပၼ်ပႃႇတီႇသၢင်ႇသီႈပေႉ ၼၼ်ႉၼႃႇ”- ဝႃႈၼႆ ။
ဝၼ်းတွတ်ႈၶႅပ်းၵၢင်ၸႂ်ၼၼ်ႉ သိုၵ်းမၢၼ်ႈသမ်ႉၵႂႃႇပႂ်ႉတီႈပွၵ်ႉ/ဝၢၼ်ႈ ဢၼ်မီးႁူင်းတွတ်ႈၶႅပ်းၵၢင်ၸႂ် ၼိုင်ႈတီႈဢမ်ႇယွမ်း 20 ၵေႃႉ – ၼႆၼၼ်ႉ ပဵၼ်လွင်ႈလွၵ်ႇငိုတ်ႈၵူၼ်းမိူင်းလူၺ်ႈတၢင်းဢွမ်ႈ။ ႁဵတ်းႁႂ်ႈၵူၼ်းမိူင်းၵူဝ်ႁႄသေ ၵႃႈလႆႈၵႂႃႇပၼ်သဵင်ၵၢင်ၸႂ်- ၵူၼ်းႁဵတ်းၵၢၼ်မိူင်းမိူင်းတႆး လၢတ်ႈၼင်ႇၼႆ။
ႁူင်းတွတ်ႈ ၶႅပ်းၵၢင်ၸႂ် တီႈဝဵင်းယႂႃႇငၢၼ်ႇၼႆႉ မီး 40 ႁူင်း။ ဝဵင်းယႂႃႇငၢၼ်ႇ (ဝၢၼ်ႈငႂ်ႈ) ၼႆႉ ၼႂ်းဝဵင်းမီး 3 ပွၵ်ႉလႄႈ ဢိူင်ႇသမ်ႉမီး 29 ဢိူင်ႇ မၢင်ႇဢိူင်ႇၵေႃႈမီးႁူင်းတွတ်ႈၶႅပ်းၵၢင်ၸႂ်ၼိုင်ႈႁူင်း ပေႃးဢိူင်ႇယႂ်ႇသမ်ႉ မီး 2 ႁူင်း ။
မိူၼ်ၼင်ႇ တီႈဝဵင်းၵၢတ်ႇလေႃႉ ၸိုင်ႈတႆးပွတ်းၸၢၼ်းတႄႉ ပႃႇတီႇ ထၼူႉၶဝ်လိူၵ်ႈတင်ႈ ယူႇသေတႃႉ ယွၼ်ႉၶႅပ်းၵၢင်ၸႂ်လူင်ႈၼႃႈလႄႈ သုမ်းပႃႇတီႇသၢင်ႇသီႈၵႂႃႇ ဝႃႈၼႆ ။
သဵၼ်ႈမၢႆ ၶႅပ်းမႄး တီႈဝဵင်းၵၢတ်ႇလေႃႉ ပႃႇတီႇသၢင်ႇသီႈ (USDP) လႆႈ 29476 သေ ပႃႇတီႇထၼူႉ (DNDP) 28174 လႄႈ ပႃႇတီႇပဢူဝ်း PNO လႆႈၶႅပ်းမႄး 27183 ၼႆယဝ်ႉ ။
ပႃႇတီႇထၼူႉ (DNDP) ဢွင်ႇပေႉတီႈဝဵင်းယႂႃႇငၢၼ်ႇယူႇသေတႃႉ မိူၼ်ၼင်ႇ ဝဵင်းၼွင်ၶဵဝ် ၊ တူၼ်ႈတီး ၊ ပၢင်လႃႈ ၊ ဢွင်ႇပၢၼ်း ၊ ၵၢတ်ႇလေႃႉ ၸိူဝ်းၼႆႉတႄႉ သုမ်းပႃႇတီႇ သၢင်ႇသီႈ ယွၼ်ႉၶႅပ်းၵၢင်ၸႂ်လူင်ႈၼႃႈ ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ