ၵူၼ်းမိူင်းႁူမ်ႈတုမ်မၢၼ်ႈ 16 ၵေႃႉ ဢၢၼ်းလုၵ်ႉတီႈမိူင်းထႆးသေ ၶၢမ်ႈၶဝ်ႈၵႂႃႇႁဵတ်းၵၢၼ် တီႈၼႂ်း မိူင်းၵမ်ႊပေႃႊတီႊယိူဝ်ႊၼၼ်ႉ ၺႃးၸဝ်ႈၼႃႈတီႈထႆးတီႉၺွပ်းလႆႈ ႁိမ်းလႅၼ်လိၼ် ဝႃႈၼႆ။
ၸဝ်ႈၼႃႈတီႈထႆး ႁၼ်မႅၼ်ႈၸိူဝ်းၶဝ်ပဵၼ်ၸုမ်းသေ ပႆတၢင်းလတ်းၶၢမ်ႈၵႂႃႇၼႂ်းသူၼ်ၽုၵ်ႇသွမ်ႈလႄႈ ၸင်ႇလႆႈႁွင်ႉထၢမ်ၵူတ်ႇထတ်း။ ၸိူဝ်းၶဝ်ပဵၼ်ၵူၼ်းမိူင်းမၢၼ်ႈ ၼႂ်းတိူင်းမၼ်းတလေး၊ ဢမ်ႇမီး ပပ်ႉၶၢမ်ႈမိူင်း၊ ဢမ်ႇမီးဝတ်းဝႂ်သင်လႄႈ ၸင်ႇလႆႈတီႉၺွပ်းတူဝ်ၶဝ်ဝႆႉ ၼႆယဝ်ႉ။
ၵူၼ်းမိူင်းႁူမ်ႈတုမ်မၢၼ်ႈၸိူဝ်းၼၼ်ႉလၢတ်ႈဝႃႈ – ၶဝ်လႆႈႁၼ်လိၵ်ႈႁွင်ႉၵၢၼ် တီႈၼိူဝ်ဢွၼ်ႊလၢႆႊ။ လူဝ်ႇၵူၼ်းႁဵတ်းၵၢၼ်ပတ်းၽဵဝ်ႈ ၼိုင်ႈလိူၼ်တေလႆႈငိုၼ်း 500 တေႃႊလႃႊၼႆလႄႈ ၸင်ႇလႆႈၵပ်းသိုပ်ႇ တႃႇၵႂႃႇႁဵတ်းၵၢၼ်။ ၽွင်းၼၼ်ႉ မီးၵူၼ်းၸၢႆးထႆးၵေႃႉၼိုင်ႈ လႄႈ ၼၢင်းယိင်းမိူင်းမၢၼ်ႈၵေႃႉၼိုင်ႈလၢတ်ႈဝႃႈ – တေႁပ်ႉသူင်ႇပၼ်ထိုင် တီႈမိူင်းၵမ်ႊပေႃႊတီႊယိူဝ်ႊၼႆသေ ဢဝ်ၵႃးလမ်းၼိုင်ႈမႃးႁပ်ႉၵႂႃႇသူင်ႇဝႆႉပၼ် တီႈလႅၼ်လိၼ်။ ၸိူဝ်းၶဝ်လႆႈပၼ်ငိုၼ်း ၼိုင်ႈၵေႃႉ 12000 ဝၢတ်ႇ ဝႃႈၼႆ။
မိူဝ်ႈၸုမ်းၶဝ် ၺႃးၸဝ်ႈၼႃႈတီႈပလိၵ်ႈထႆး တီႉၺွပ်းၼၼ်ႉ ၶဝ်သွင်ၵေႃႉတႄႉပၢႆႈလွတ်ႈဝႆႉ။ ၵူၼ်းမိူင်းႁူမ်ႈတုမ်မၢၼ်ႈ 16 ၵေႃႉ ၸိူဝ်းၺႃးတီႉၺွပ်းဝႆႉၼၼ်ႉ ၸဝ်ႈၼႃႈတီႈထႆးၶဝ် တေဢဝ်လိူင်ႈၵႂႃႇ ၸွမ်းၼင်ႇပၵ်းပိူင်ဝၢၼ်ႈမိူင်းမီး ၼႆယဝ်ႉ။
မိူၼ်ၼႆ ပူၼ်ႉမႃးလၢႆဝၼ်းၼႆႉၵူၺ်း တီႈၸႄႈဝဵင်းမႄႈသွတ်ႇ လႅၼ်လိၼ် ထႆး-မၢၼ်ႈၼၼ်ႉၵေႃႈ တီႉၺွပ်းလႆႈႁႅင်းၵၢၼ်ၵူၼ်းမိူင်းမၢၼ်ႈ 42 ၵေႃႉ ၶဝ်ႈမိူင်းထႆးလူၺ်ႈဢမ်ႇမႅၼ်ႈ တၢင်းၵၢၼ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ