တွၼ်ႈတႃႇၵၢၼ်ငမ်းယဵၼ် ဢၼ်ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄလ်ႊထရမ်ႉ ၶတ်းၸႂ်ၵေႃႇသၢင်ႈပၼ် ၵႄႈၵၢင်မိူင်းထႆး တင်း မိူင်းၵမ်ႊပေႃႊတီႊယိူဝ်ႊ တေမီးလွင်ႈၵႅၼ်ႇ ၶႅင် ၼႅၼ်ႈၼႃၼႆသေ ဢမေႊရိၵၼ်ႊ တေၵမ်ႉၸွႆႈပၼ်ငိုၼ်းတေႃႊလႃႊ တႃႇ 45 လၢၼ်ႉ ဝႃႈၼႆ။

တီႈၼႂ်းလိၵ်ႈပိုၼ်ၽၢဝ်ႇ ၵႅမ်ၽွင်းလူင်ၾၢႆႇၼွၵ်ႈမိူင်း မိူင်းဢမေႊရိၵၼ်ႊ ၵဵဝ်ႈလူၺ်ႈ ဢေးသျႃး ၸဵင်ႇၸၢၼ်းဝၼ်းဢွၵ်ႇၼၼ်ႉ ပႃးဝႆႉဝႃႈ – တႃႇလူင်ပွင်ၸိုင်ႈမိူင်းထႆး တင်း ၵမ်ႊပေႃႊတီႊယိူဝ်ႊ တေၶိုၼ်းတႄႇၽေႃႇၼမ်ႉၼႄတူဝ်ၶေႃႈတူၵ်းလူင်းလွင်ႈငမ်းယဵၼ် တီႈဝဵင်းၵႂႃႊလႃႊလမ်ႊပူႊ လႄႈ တႃႇၵူၼ်းမိူင်း ၼႂ်းပိုၼ်ႉတီႈ တေမီးလွင်ႈၵတ်းယဵၼ်ၼိမ်သဝ်းၼၼ်ႉ ဢမေႊရိၵၼ်ႊ တေသိုပ်ႇၸွႆႈထႅမ်ၵႂႃႇ ၼႆယဝ်ႉ။

ၼႂ်းဝၼ်းတီႈ 16 – 17 လိူၼ်ၵျႅၼ်ႊၼိဝ်ႊရီႊၼႆႉ ၵႅမ်ၽွင်းလူင်ၾၢႆႇၼွၵ်ႈမိူင်း မိူင်းဢမေႊရိၵၼ်ႊ တေႁူပ်ႉထူပ်းၵၼ်တင်း ၽူႈမီးၸၼ်ႉသုင်ၾၢႆႇမိူင်းထႆး တင်း မိူင်းၵမ်ႊပေႃႊတီႊ ယိူဝ်ႊ တီႈဝဵင်းၵုင်းထဵပ်ႈ မိူင်းထႆးလႄႈ ဝဵင်းၾၼွႆႊပိၼ်ႊ မိူင်းၶမဵၼ်။ တေဢုပ်ႇၵုမ်ၵၼ် တႃႇလွင်ႈႁူမ်ႇလူမ်ႈလႄႈ တႃႇတေယုၵ်ႉမုၼ်းၵၢၼ်ပၢႆးမၢၵ်ႈမီး ၼႂ်းပိုၼ်ႉတီႈ ဢိၼ်ႊတူဝ်ႊ – ပၸိၾိၵ်ႉ ၼႆယဝ်ႉ။

ၽွင်းပၢၼ်ၸွမ်ၸိုင်ႈထရမ်ႉၼႆႉ မီးလွင်ႈလူတ်းယွမ်းပႅတ်ႈငိုၼ်းၵမ်ႉၸွႆႈ တူဝ်ႈလုမ်ႈၾႃႉသေတႃႉ ၼႂ်းၶၵ်ႉတွၼ်ႈၸိူဝ်းၼႆႉတႄႉ တေၸွႆႈထႅမ်ၵႂႃႇ – ဝႃႈၼႆ။

ၼႂ်းငိုၼ်းဢၼ်တေၵမ်ႉၸွႆႈ 45 လၢၼ်ႉ တေႃႊလႃႊၼၼ်ႉ တႃႇ 15 လၢၼ်ႉ ပဵၼ်တွၼ်ႈတႃႇ လွင်ႈၼိမ်သဝ်းၸွမ်းလႅၼ်လိၼ်လႄႈ တႃႇပူၵ်းပွင်ပၼ်ၵူၼ်းမိူင်းၼႂ်းပိုၼ်ႉတီႈ၊ 10 လၢၼ်ႉ တေႃႊလႃႊသမ်ႉ ပဵၼ်တွၼ်ႈတႃႇ တေၽဵဝ်ႈသိမ်းမၢၵ်ႇမႅင်းၾင်လိၼ် ၶိူင်ႈၸႂ်ႉၶူဝ်းသိုၵ်းၸိူဝ်းၸၢင်ႈတႅၵ်ႇ၊ ဢၼ်ၵိုတ်းလိူဝ်ထႅင်ႈ 20 လၢၼ်ႉတေႃႊလႃႊသမ်ႉ ပိူဝ်ႈတႃႇၽဵဝ်ႈမူၺ်ႉၸုမ်းၵျႃႊၽျႅၼ်ႉလႄႈ ယႃႈမဝ်းၵမ်ၸိူဝ်းၼႆႉ ၼႆယဝ်ႉ။

ယွၼ်ႉၵူၼ်းမိူင်းဢမေႊရိၵၼ်ႊ လႆႈပဵၼ်တူဝ်ယိူဝ်ႇၸုမ်းၵျႃႊၽျႅၼ်ႉ ၸိူဝ်းပၵ်းသဝ်းၼႂ်းပိုၼ်ႉတီႈ ၵုၼ်ဢေးသျႃးၸဵင်ႇၸၢၼ်းဝၼ်းဢွၵ်ႇလႄႈ ၸုမ်းလူင်ပွင်ၸိုင်ႈထရမ်ႉ ၸင်ႇတိူဝ်းပၵ်းၸႂ်မႃး ၼႂ်းၵၢၼ်ၽဵဝ်ႈမူၺ်ႉၸုမ်းၵျႃႊၽျႅၼ်ႉ ၼႆယဝ်ႉ။

မိူဝ်ႈပူၼ်ႉမႃးၼႂ်းႁၢင်လိူၼ်ဢွၵ်ႉထူဝ်ႊပိူဝ်ႊ ပီ 2025 ၼၼ်ႉ ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ် ထရမ်ႉ လႄႈတင်း ၸွမ်ၽွင်းလူင်မိူင်းမလေးသျႃး ဢႅၼ်ႊၼဝႃႊ ဢီႊပရႃႊႁိၼ်ႊ ၶဝ်ႈၵႄႈၵၢင်ငူပ်ႉငီႉပၼ်သေ ထႆး တင်း ၵမ်ႊပေႃႊတီႊယိူဝ်ႊ လႆႈၵိုတ်းတိုၵ်းၵၼ်။ ၵူၺ်းၵႃး ဝၢႆးလင်ၼၼ်ႉဢမ်ႇႁိုင် ထိုင်မႃးၼႂ်းလိူၼ်တီႊသႅမ်ႊပိူဝ်ႊ သွင်ၾၢႆႇပဵၼ်ပၢင် တိုၵ်းၵၼ်ၸွမ်းလႅၼ်လိၼ်ႁၢဝ်ႈႁႅင်းၶိုၼ်း။

တီႈၼႂ်းပၢင်တိုၵ်းၼၼ်ႉ ၸႂ်ႉပႃးႁိူဝ်းမိၼ်တိုၵ်း၊ ၶိူင်ႈၵွင်ႈလူင်ၸိူဝ်းၼႆႉသေ ပိုတ်းယိုဝ်းၵၼ် ၵူၼ်းမိူင်း တၢႆ 100 ပၢႆ၊ လႆႈပၢႆႈၽၢတ်ႇႁိူၼ်းယေးတီႈယူႇ 5 သႅၼ်ပၢႆ။