ဝၼ်းတီႈ 11/01/2026 မိူဝ်ႈၼႆႉ သိုၵ်းမၢၼ်ႈ ၼမ်းၸတ်း ပၢင်လိူၵ်ႈတင်ႈၵမ်းထိသွင် ပွတ်းတၢင်းမိူင်းတူၼ်ၼႆႉ ႁူင်းတွတ်ႈၶႅပ်းၵၢင်ၸႂ် မီး 58 ႁူင်း ၼႂ်းၼၼ်ႉ မၢင်ႁူင်း ပႃႇတီႇသိူဝ်ၽိူၵ်ႇလႆႈၶႅပ်းၵၢင်ၸႂ်ၼမ် ဝႃႈၼႆ။
ၵူၼ်းမိူင်းတူၼ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ႁူင်းတွတ်ႈၶႅပ်းၵၢင်ၸႂ် တီႈသႃလႃးၵၢင်ဝဵင်းၼႆႉတႄႉ ပႃႇတီႇသိူဝ်ၽိူၵ်ႇ လႆႈၼမ်သေပိူၼ်ႈၼႆဢေႃႈ။ ၵူၺ်းၵႃႈ ပေႃးႁူမ်ႈၵၼ် တင်းၸႄႈဝဵင်းမႃးတႄႉ ပႃႇတီႇသၢင်ႇသီႈၵူၺ်းလႅပ်ႈတေပေႉ ယွၼ်ႉဝႃႈ ပီႈၼွင်ႉတႆးတၢင်းၼႆႉ ဢမ်ႇမီးသုၼ်ႇ လႆႈပၼ်သဵင်ၸေးၵေႃႉမၼ်း ။ၼိုင်ႈႁိူၼ်းလႂ် လႆႈတွတ်ႈ 2 ၵေႃႉ 3 ၵေႃႉၵူၺ်း ။ ပေႃးပဵၼ်ၸၢဝ်းတၢင်ႇဢၼ်တႄႉ ပိူၼ်ႈဝၢင်းၶပ်းၵၼ်မႃးတွတ်ႈ ” – ဝႃႈၼႆ။
ပွတ်းတၢင်းဝဵင်းပုင်ႇပႃႇၶႅမ် ၸႄႈဝဵင်မိူင်းတူၼ်ၼႆႉ ႁူင်းတွတ်ႈၶႅပ်းၵၢင်ၸႂ်တႃႇၸၢဝ်းၶိူဝ်းဝႃႉ မီး 2 ႁူင်း ႁႅင်းၵူၼ်းၸၢဝ်းဝႃႉ ဢၼ်မႃးတွတ်ႈမၼ်း ဢမ်ႇယွမ်း 2 မိုၼ်ႇၵေႃႉ ။ ၵမ်ႈၼမ် ၺႃးႁႅင်းဢီးသေမႃးတွတ်ႈလႄႈ ၶဝ်တေမႃးၽဵင်ႇၵၼ်လိူဝ်သေၸၢဝ်းၶိူဝ်းတၢင်ႇဢၼ် ၼႆ ၵူၼ်းပိုၼ်ႉတီႈလၢတ်ႈ ။
တီႈမိူင်းတူၼ်ၼႆႉ ႁူဝ်ၼပ်ႉၵူၼ်းမီးသုၼ်ႇတွတ်ႈၶႅပ်းၵၢင်ၸႂ်မီးယူႇ 31697 ၵေႃႉ သိုၵ်းမၢၼ်ႈပိုၼ်ၽၢဝ်ႇဝႆႉၼင်ႇၼႆသေတႃႉ ၸၢဝ်းတႆးသမ်ႉ ဢၼ်ပႃးသဵၼ်ႈတႃႇတွတ်ႈၶႅပ်းၵၢင်ၸႂ် တေမီးမွၵ်ႈ 8 ႁဵင်ၵေႃႉ ၵူၺ်း၊ ၸၢဝ်းမၢၼ်ႈ ၸၢဝ်းလႃးႁူႇလႄႈလီႇသူး ပႃးၸဵမ်ၸၢဝ်းၶိူဝ်းလၢႆဢၼ်သမ်ႉ မီး 1 မိုၼ်ႇၵေႃႉၵူၺ်း ၵူၼ်းပိုၼ်ႉတီႈလၢတ်ႈၼင်ႇၼႆ။
ၵမ်ႈၼမ် ၸၢဝ်းၶိူဝ်းၸိူဝ်းဢမ်ႇၸႂ်ႈတႆးတႄႉ တိုၼ်းပၼ် ႁႅင်းပႃႇတီႇသၢင်ႇသီႈမႃးတႃႇသေႇ ၼႆ ၵူၼ်းပိုၼ်ႉတီႈ ဢၼ်ယၢမ်ႈတူင်ႉၼိုင်ၼႂ်း ပႃႇတီႇၵၢၼ်မိူင်းၵေႃႉၼိုင်ႈ လၢတ်ႈၼင်ႇၼႆ ။
မိူင်းတူၼ်ၼႆႉ တေမီး ပႃႇတီႇသိူဝ်ၽိူၵ်ႇ ၊ ပႃႇတီႇသၢင်ႇသီႈလႄႈ ပႃႇတီႇႁူင်းၶဝ်ႈ (တစည ) ၶဝ်ႈၶႄႉၶႅင်ႇဝႆႉ ၼႂ်းပၢင်လိူၵ်ႈတင်ႈႁွပ်ႈသွင် ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ