မိူဝ်ႈၼႆႉ ဝၼ်းတီႈ 11/01/2026 တႄႇယၢမ်းၵၢင်ၼႂ်ၸဝ်ႉ 6 မူင်း သိုၵ်းမၢၼ်ႈယိုတ်းမိူင်း တႄႇပိုတ်ႇႁူင်းပၼ် သဵင် ႁႂ်ႈၵူၼ်းမိူင်းၵႂႃႇပၼ်သဵင်ၵၢင်ၸႂ် (တွတ်ႈၶႅပ်းမႄး) ပွၵ်ႈၵမ်း 2 ၼႂ်း မိူင်းႁူမ်ႈတုမ်။

တီႈမိူင်းတႆးပတ်းပိုၼ်ႉ မိူင်းတႆးပွတ်းႁွင်ႇ ၸတ်း 2 ၸႄႈဝဵင်း၊ မိူင်းတႆးပွတ်းၸၢၼ်း ၸတ်း 9 ၸႄႈဝဵင်း၊ မိူင်း တႆးပွတ်းဢွၵ်ႇ ၸတ်း 6 ၸႄႈဝဵင်း ႁူမ်ႈသဵၼ်ႈမိူင်းတႆးပတ်းပိုၼ်ႉပဵၼ် 17 ၸႄႈဝဵင်း။

ပၢင်လိူၵ်ႈတင်ႈဢၼ်သိုၵ်းမၢၼ်ႈယိုတ်းမိူင်းၼမ်းၸတ်းၼႆႉ ၸႂ်ႉတိုဝ်းၶိူင်ႈၸၢၵ်ႈ MEVM သေ ႁႂ်ႈၵူၼ်းမိူင်း ၵႂႃႇသႂ်ႇသဵင်ၵၢင်ၸႂ်လႄႈ ၵူၼ်းမိူင်းၵမ်ႈၼမ် ဢမ်ႇမေႃတဵၵ်း၊ ဢမ်ႇႁူႉတီႈ ပွင်ႇ၊ ဢမ်ႇၶဝ်ႈၸႂ် လႄႈ ဢမ်ႇသူၼ်ၸႂ်ၼိူဝ်ပၢင်လိူၵ်ႈတင်ႈၼႆႉၼႆ ၵူၼ်းမိူင်းတႆးပွတ်းႁွင်ႇလၢတ်ႈ။

ၼုမ်ႇၸၢႆး ဢႃႇယု 40 ပီပၢႆ ၵေႃႉယူႇၼႂ်းဝဵင်းတၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ “တီႈၼႂ်းဝဵင်းတၢင်ႉယၢၼ်းၼႆႉ ၵူၼ်းၵႂႃႇ ပၼ်ၶႅပ်းမႄးဢေႇႁႅင်းၼႃႇ။ ၵူၼ်းဢၼ်တဵမ်ၸႂ်သေ ၵႂႃႇပၼ်မႄးၼႆႉမၼ်းဢမ်ႇမီး။ ဢမ်ႇလိူဝ်လႆႈၼႃႈၵႄႇသိပ်းႁိူၼ်း ၼႃႈၵႄႇပၢၵ်ႇႁိူၼ်းသေ ၵႂႃႇသႂ်ႇၵူၺ်း။ ဢမ်ႇလိူဝ်လႆႈ ၼႃႈဢူၵ်ႉၵထၶဝ်သေလႄႈ ၵႂႃႇပၼ်ၼၼ်ႉၵူၺ်း။ ၾၢႆႇမႄးယူင်ႇ ၶဝ် ၾၢႆႇၵေႃႇမသျိၼ်ႇၶဝ်တႄႉ ၵူဝ်ပိူၼ်ႈဢမ်ႇမႃးပၼ်ၼႆ ပၼ်ႁႅင်းဢီးၼိူဝ် ၾၢႆႇဢူၵ်ႉၶျူၵ်ႉယေး(ၾၢႆႇၽွင်းငမ်း)ၶဝ်ႁႄ သေႃႇၼႂ်းပွၵ်ႉယူႇတိၵ်းတိၵ်း- ဝႃႈႁႂ်ႈၵႂႃႇပၼ်မႄးၼႆၼၼ်ႉ ၼႃႇ” ဝႃႈၼႆ။

သိုၵ်းမၢၼ်ႈ တင်း ပလိၵ်ႈ လႄႈ ၶႃႈႁၢပ်ႇၵၢၼ်ၶုၼ် ၼႂ်းႁွင်ႈၵၢၼ်လူင်ပွင်ၸိုင်ႈၶဝ် ႁူမ်ႈၵၼ်ပႂ်ႉယၢမ်း ဢဝ်ႁူမ်ႇလူမ်ႈ ၸွမ်းႁိမ်းႁွမ်း တူင်ႇတၢင်ႇႁူင်းပၼ်သဵင် ၵူႈတီႈ ၼႂ်းမိူင်းတႆးပတ်းပိုၼ်ႉ ။

ၼႂ်းၸႄႈဝဵင်းတၢင်ႉယၢၼ်းၼႆႉ မီးပႃႇတီႇၵၢၼ်မိူင်း သၢမ်ၸုမ်းၶဝ်ႈလိူၵ်ႈတင်ႈ။ ပဵၼ်ပႃႇတီႇသၢင်ႇသီႈ (USDP)၊ ပႃႇတီႇသိူဝ်ၽိူၵ်ႇ (SNDP) လႄႈ ပႃႇတီႇဝႃႉ (WNP) ၼႆသေတႃႉ ၵူၼ်းမိူင်းပိုၼ်ႉတီႈတႄႉ လၢမ်းၶၢတ်ႈဝႆႉဝႃႈ ၸုမ်းတေဢွင်ႇပေႉၼႆႉ ပဵၼ်ပႃႇတီႇသၢင်ႇသီႈၵူၺ်းၼႆ ထတ်းသၢင်လၢတ်ႈၼႄဝႆႉၼင်ႇၼႆ။

“ပေႃးႁဝ်းမႃးတူၺ်းၼႆတႄႉ သၢင်ႇသီႈတေဢဝ်ၶႅပ်းၵၢင်ၸႂ်လူင်ႈၼႃႈႁႄ ပေႉၵႂႃႇၵူၺ်း။ ယွၼ်ႉသင်ၼႆ ကြိုတင်မဲ ၼႆႉ ၶဝ်ဢဝ်ၸွမ်းယူင်ႉသၢင်ႈတပ်ႉသိုၵ်းၶဝ်ဝႃႈ။ တဵမ်ဢမ်ႇတဵမ် ၵေႃႈ ၶဝ်ၼပ်ႉဢဝ်တဵမ်တိၵ်းတိၵ်း။ မၢင်တပ်ႉမီးၶွၵ်ႇမၼ်းလၢႆလၢႆၵူၺ်း ၶဝ်သမ်ႉၸႂ်ႉၵၼ်မႃးတွတ်ႈပၼ်ၵၼ်ႁႂ်ႈမၼ်းတဵမ်။ လိူဝ်ၼၼ်ႉၶဝ်သမ်ႉၶိုၼ်းဢဝ်ႁႅင်းၵူၼ်း ဢၼ်ဝႃႈ (လှုပ် ရှား) ၵူၼ်းၸိူဝ်းၶၢႆႉတပ်ႉၵႂႃႇမႃးၶဝ်ၼၼ်ႉႁႄ ဢဝ်သဵၼ်ႈမၢႆၵႂႃႇပၼ်တီႈၶွမ်ႊမသျိၼ်ႊထႅင်ႈ။ ၵွပ်ႈၼၼ်ႉ သၢင်ႇသီႈၵူၺ်းတေပေႉ။ မိူၼ်ၼင်ႇ ပႃႇတီႇသိူဝ်ၽိူၵ်ႇ လႄႈဝႃႉ တႄႉ ၵေႃႈ ယွၼ်ႉၵူၼ်းမိူင်းဢၼ်သူၼ်ၸႂ်ၼိူဝ်ပၢင်လိူၵ်ႈတင်ႈၼႆႉဢေႇလႄႈ တေဢမ်ႇပေႃးၶႄႉၶဝ်လႆႈ။ ထႅင်ႈလွင်ႈၼိုင်ႈၶဝ်သမ်ႉၸႂ်ႉၶိူင်ႈၸၢၵ်ႈႁႄ ပၼ်မႄး။ ၶိူင်ႈၸၢၵ်ႈဢၼ်ၶဝ်ပၼ်ၼႆႉ ၵူၼ်းမိူင်းၼႆႉ ပေႃးဝႃႈမီးၼိုင်ႈႁဵင်ၵေႃႉၼႆႉ ဢၼ်ႁူႉလွင်ႈၶိူင်ႈၸၢၵ်ႈၶဝ်ၼၼ်ႉ မီးမွၵ်ႈ 100 ၵေႃႉၵူၺ်း။ ပေႃးၶဝ်ၼဵၵ်းယဝ်ႉၼႆ ဢွၵ်ႇတီႈလႂ်ၼႆ မၢင်ၵေႃႉၶဝ်ယင်းတေဢမ်ႇႁူႉၵွၼ်ႇ ၼေႃႈ။ ၵူၼ်းၵမ်ႈၼမ်ၼႆႉ ဢမ်ႇႁူႉဝႃႈ တဵၵ်းပၼ်ပႃႇတီႇလႂ်မႃးၼႆ ၶဝ်ဢမ်ႇႁူႉၵွၼ်ႇ။”

သိုၵ်းမၢၼ်ႈယိုတ်းမိူင်းၼႆႉ ဢဝ်ၶေႃႈဢၢင်ႈဝႃႈ တႃႇႁႂ်ႈဝၢၼ်ႈမိူင်းၵတ်းယဵၼ်၊ မီးလွင်ႈၼိမ်တဵင်ႈၼႆသေ ႁူၺ်းသူၼ်းဢဝ်ပႃႇတီႇၵၢၼ်မိူင်းၸိူဝ်းထွမ်ႇဢဝ်ၵႂၢမ်း၊ ၶေႃႈပူင်မၼ်းသေ ၸတ်းႁဵတ်းပၢင်လိူၵ်ႈတင်ႈ ႁႂ်ႈပေႃးလႆႈ ၼႂ်းၵႄႈၵူၼ်းမိူင်းႁူပ်ႉတၢင်းယၢပ်ႇၵူႈလွင်ႈ ယွၼ်ႉပၢင်တိုၵ်းသိုၵ်းသိူဝ် ပတ်းပိုၼ်ႉၸိုင်ႈမိူင်း။

ၸွမ်းၼင်ႇပၵ်းပိူင်ၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈ မိူင်းႁူမ်ႈတုမ် မီးဝႆႉၼၼ်ႉ ၼႂ်းဝၼ်းပၢင်လိူၵ်ႈတင်ႈ ၼႆႉ ၽူႈလႂ်ၽႂ်သေဢမ်ႇဝႃႈ တိုၼ်းတေဢမ်ႇလႆႈ ႁဵတ်းလွင်ႈတူင်ႉၼိုင် ဢၼ်ပဵၼ်မိူၼ်ၾၢင်ႁၢင်ႈၵၢၼ်သူၼ်း တုမ် ၼႂ်းဝၢင်းႁူင်းပၼ်သဵင် လႄႈ ပိုၼ်ႉတီႈဢမ်ႇႁၢင်ႇဢမ်ႇၵႆႁူင်းပၼ်သဵင် ဝႃႈၼႆ။

ၵူၺ်းၵႃႈ ၽွင်းၵူၼ်းမိူင်းၸႄႈဝဵင်းလွၵ်ႉၸွၵ်ႇၵႂႃႇပၼ်သဵင်ယူႇၼၼ်ႉ မီးၵူၼ်းၸုမ်းၼိုင်ႈၵႂႃႇၸႅၵ်ႇပၼ် ၼမ်ႉ၊ တၢင်းၵိၼ်တၢင်းယႅမ်ႉ တီႈၵူၼ်းမိူင်းၸိူဝ်းၵႂႃႇပၼ်သဵင်။ လွင်ႈၼႆႉ ၸွင်ႇထုၵ်ႇလီပဵၼ် လႄႈ ၸွင်ႇၽိတ်းမၢႆမီႈ ၾိင်ႈမိူင်း ပၢင်လိူၵ်ႈတင်ႈၼႆ ၽူႈတႅၼ်းၽွင်း ပႃႇတီႇဢၼ်ၶတ်းၶၢၼ်ႉ သိုၵ်းမၢၼ်ႈ ထတ်းသၢင်လၢတ်ႈၼႄဝႆႉ ၼင်ႇၼႆ။

“သင်ဝႃႈ ၵူၼ်းၸိူဝ်းဢၼ်ၸႅၵ်ႇၼၼ်ႉ ၸပ်းၽၢၵ်ႇဝႆႉၼႆ မၼ်းၽိတ်းပိူင်ႈယဝ်ႉ။ ၼႆႉမၼ်းၶႂ်ႈၵႂႃႇၵဵဝ်ႇၵပ်းဢၼ်ဝႃႈ ၵၢၼ်ႁူၺ်းသူၼ်းၼၼ်ႉယဝ်ႉၶႃႈ။ ၼႂ်းဝၼ်းလိူၵ်ႈတင်ႈၼႆႉမီးပိူင်ဝႆႉဝႃႈ တေဢမ်ႇလႆႈႁဵတ်းၵၢၼ်ႁူၺ်းသူၼ်းယဝ်ႉၶႃႈၼႃႇ။ သင်ဝႃႈမီးၵၢၼ်ၸႅၵ်ႇၶဝ်ႈၼမ်ႉတၢင်းၵိၼ်ၼႂ်းဝၢင်းႁူင်းပၼ်သဵင်ၼႆ လူဝ်ႇႁူႉၵူၺ်းဝႃႈ ၸုမ်းဢၼ်ၸႅၵ်ႇၼၼ်ႉ ပဵၼ်ဢၼ်လႂ်။ ၼႆႉမၼ်းၸၢင်ႈပဵၼ်ဢၼ်ႁူၺ်းႁွင်ႉၵူၼ်းၵေႃႈပဵၼ်လႆႈ။”

ပၢင်လိူၵ်ႈတင်ႈၼႆႉ ၵူႈၾၢႆႇ၊ ၵူႈမူႇၵူႈၸုမ်းဢမ်ႇမီးသုၼ်ႇၶဝ်ႈႁူမ်ႈပႃးတူင်ႉၼိုင်ႁဵတ်းသၢင်ႈၸွမ်း တေႉတေႉဝႃႈဝႃႈ ႁႂ်ႈပေႃးၶဝ်ႈထိုင်လႆႈလိုၵ်ႉၼၼ်ႉလႄႈ ၽူႈလူင်ႉလႅၼ်ႇၵၢၼ်မိူင်း လႄႈ ၵူၼ်းမိူင်းၵမ်ႈၼမ် ဢွၼ်ၵၼ်ထတ်းသၢင်ဝႃႈ “ပၢင်လိူၵ်ႈတင်ႈၼႆႉ ဢမ်ႇမီးလွင်ႈၽဵင်ႇပဵင်းလႄႈ ဢမ်ႇယုမ်ႇယမ်လႆႈႁူဝ်ပၢၵ်ႇတဵမ်” ၼႆယဝ်ႉ။

ၵူၺ်းၵႃႈပၢင်လိူၵ်ႈတင်ႈၵမ်းထိၼိုင်ႈ ဢၼ်ႁဵတ်းၵႂႃႇမိူဝ်ႈဝၼ်းတီႈ 28/12/2026 ၼၼ်ႉတႄႉ သိုၵ်းမၢၼ်ႈပိုၼ်ၽၢဝ်ႇဝႆႉဝႃႈ ၸတ်းႁဵတ်းၵႂႃႉၼႂ်း 102 ၸႄႈဝဵင်း။ ၵူၼ်းမႃးပၼ်သဵင်ၵၢင် ၸႂ်မီး 52.13 % ဝႃႈၼႆ။