တွၼ်ႈတႃႇ ပၢင်လိူၵ်ႈတင်ႈ ၵမ်းထီႉသွင် ဢၼ်သိုၵ်းမၢၼ်ႈတေၸတ်းႁဵတ်း ၼႂ်းဝၼ်းတီႈ 11/1/2026 ဝၼ်းဢႃးတိတ်ႉတေမႃးၼႆႉ ၶွမ်ႊမသျိၼ်ႊပၢင်လိူၵ်ႈတင်ႈ တီႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း ႁၢင်ႈႁႅၼ်းယူႇ ၼႂ်းဢိူင်ႇၼႂ်းဝၢၼ်ႈ သိုၵ်းမၢၼ်ႈလႄႈ ပျီႇတူႉၸိတ်ႉ ထႅမ်ႁႅင်း သိုၵ်းဢဝ်ႁူမ်ႇလူမ်ႈဝႆႉ ။
တႄႇဢဝ်ဝၼ်းတီႈ 7/1/2026 ၼႆႉမႃး သိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း ထႅမ်ႁႅင်းသိုၵ်းၶဝ်မႃး တၢင်းဝၢၼ်ႈၼပၢၼ်းၵျီး ၼႄၶေႃႈဢၢင်ႈဝႃႈတႃႇဢဝ်ႁူမ်ႇလူမ်ႈ ဝႃႈၼႆ ။
ၼၢင်းယိင်းၼႂ်းပိုၼ်ႉတီႉလၢတ်ႈၽူႈတွႆႇႁွၵ်ႈဝႃႈ – “ ၶဝ်(သိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း) ထႅမ်ႁႅင်းသိုၵ်းယူႇသေႇသေႇ။ မိူဝ်ႈၽုၵ်ႈတေပဵၼ်ပၢင်လိူၵ်ႈတင်ႈလႄႈ ၶဝ်ၵေႃႈၶႅၼ်း ထႅမ်ႁႅင်း ၶဝ်ႈမႃး ဝႃႈတႃႇဢဝ်ႁူမ်ႇလူမ်ႈၼႆ ၊ ပေႃးထႅမ်ႁႅင်းသိုၵ်းမႃးၼိုင်ႈပွၵ်ႈၼႆႉ ၵႆႉမႃးယူႇတီႈၵျွင်း မုၼ်ႇၸဝ်ႈ ၸိူဝ်းၼႆႉ”- ဝႃႈၼႆ ။
ယၢမ်းလဵဝ်ၵေႃႈသိုၵ်းမၢၼ်ႈလႄႈ ပျီႇတူႉၸိတ်ႉထႅမ်ႁႅင်းသိုၵ်းၶဝ်ႈမႃး ပႂ်ႉဝႆႉၸွမ်းႁူင်းတွတ်ႈၶႅပ်း ၵၢင်ၸႂ် ၼႂ်းဝၢၼ်ႈၼႂ်းဢိူင်ႇ-ၼိုင်ႈတီႈႁႅင်းသိုၵ်းဢမ်ႇယွမ်း 20 ၵေႃႉ – ၵူၼ်းပိုၼ်ႉတီႈလၢတ်ႈၼင်ႇၼႆ။
ပေႃးသိုၵ်းမၢၼ်ႈၶဝ်ႈမႃးၼိုင်ႈၵမ်းၼႆ ၶၢၼ်းႁႂ်ႈၵူၼ်းမိူင်း ၵူၼ်းပိုၼ်ႉတီႈ ႁုင်ၶဝ်ႈၽၵ်းသူင်ႇပၼ်၊ ၶၢၼ်းၵူၼ်းဝၢၼ်ႈမႃးလုမ်းလႃးပၼ်လွင်ႈယူႇလွင်ႈၵိၼ်ၶဝ် ႁဵတ်းႁႂ်ႈ ၵူၼ်းပိုၼ်ႉတီႈယူႇယၢပ်ႇ ၵိၼ်းၸႂ် ဝႆႉဝႃႈၼႆ ။
ဝဵင်းယႂႃႇငၢၼ်ႇ (ဝၢၼ်ႈငႂ်ႈ)ၼႆႉ ပႃးၼႂ်းပၢင်လိူၵ်ႈတင်ႈၵမ်းထီႉသွင် ။ မီးပႃႇတီႇၶဝ်ႈၶေႉၶဵင်ႇ 5 ဢၼ် ၊ ပႃႇတီႇထၼူႉ (DNDP) ၊ ပႃႇတီႇသၢင်ႇသီႈ (USDP) လႄႈ ပႃႇတီႇပဢူဝ်း (PNO) ၊ ပႃႇတီႇ ၽွမ်ႉႁူမ်ႈၸၢဝ်းၶိူဝ်း (တသၺ) ပႃႇတီႇဢွၼ်ၼမ်းၵူၼ်းမိူင်း (PPP) ၸိူဝ်းၼႆႉ။ ႁူင်းတွတ်ႈ ၶႅပ်းၵၢင်ၸႂ် မီး 40 ႁူင်း။ ဝဵင်းဝၢၼ်ႈငႂ်ႈၼႆႉ ၼႂ်းဝဵင်းမီး 3 ပွၵ်ႉလႄႈ ဢိူင်ႇသမ်ႉမီး 29 ဢိူင်ႇ မၢင်ႇဢိူင်ႇၵေႃႈမီးႁူင်းတွတ်ႈၶႅပ်းၵၢင်ၸႂ်ၼိုင်ႈႁူင်း ပေႃးဢိူင်ႇယႂ်ႇသမ်ႉ မီး 2 ႁူင်း လႆႈႁူႉၼင်ႇၼႆ ။
တၢင်းဢိူင်ႇ ၼပၢၼ်းၵျီး ဝၢၼ်ႈမိၼ်းပလွင်ႇ ၸိူဝ်းၼႆႉထူပ်းၽေးပၢင်တိုၵ်းမႃးႁၢဝ်ႈႁႅင်း။ သိုၵ်းမၢၼ်ႈၵႆႉထႅမ်ႁႅင်းသိုၵ်းၶဝ်ႈမႃးၼႂ်းဝၢၼ်ႈသေ တီႉၺွပ်းၵူၼ်းဝၢၼ်ႈ၊ မၢင်ဝၢၼ်ႈၵေႃႈၺႃးသိုၵ်းမၢၼ်ႈၽဝ်ဝၢၼ်ႈ တေႃႇထိုင်ယၢမ်းလဵဝ် ငဝ်းလၢႆးၵၢၼ်သိုၵ်းပႆႇၼိမ်သဝ်း။
ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ငဝ်းလၢႆးၸိူင်ႉၼႆ ယူႇတီႈပႃႇတီႇၸိူဝ်းၼၼ်ႉၵေႃႈ ၶဝ်တေဢမ်ႇပေႃးႁတ်းလူင်းသူၼ်းတုမ်တႄႉတႄႉ ၊ တီႈယႂႃႇငၢၼ်ႇၼႆႉမီးပႃႇတီႇထၼူႉပႃးလႄႈ ဢမ်ႇမီးတင်းလိူၵ်ႈ ဢမ်ႇၸၢင်ႈပၼ်သင်ၵေႃႈ တေဢွၼ်ၵၼ်ပၼ်ႁႅင်း ပႃႇတီႇၸၢဝ်းၶိူဝ်း ၸဝ်ႈၵဝ်ႇၵူၺ်း ၊ ပႃႇတီႇထၼူႉတီႈယႂႃႇငၢၼ်ႇၼႆႉတႄႉ ႁႅင်းယႂ်ႇဝႆႉဢေႃႈ”- ဝႃႈၼႆ ။
တႃႇတွတ်ႈၶႅပ်းၵၢင်ၸႂ်ၼႆႉ ၵၢင်ႉၵႄႇလႄႈ ႁွင်ႈၵၢၼ်ၾၢႆႇၽွင်းငမ်းၵူႈလွင်ႈ ၸႂ်ႉဢဝ်မၢႆၾၢင် မႃးသႂ်ႇၶႅပ်းၵၢင်ၸႂ်တီႈ ႁူင်းႁဵၼ်းဢၼ်မီးၼႂ်းပိုၼ်ႉတီႈသေ ၊ ႁွင်ႈၵၢၼ်ၾၢႆႇပၢႆးပၺ်ၺႃ( မေႃသွၼ် / ၶူးသွၼ် ) ဢဝ်ပုၼ်ႈၽွၼ်း ပႂ်ႉႁူင်းတွတ်ႈ ၶႅပ်းၵၢင်ၸႂ်ဝႆႉ – ၵူၼ်းပိုၼ်ႉတီႈလၢတ်ႈ ။
လိူဝ်ၼၼ်ႉဢမ်ႇၵႃး ယူႇတီႈၵၢင်ႉၵႄႇၼႂ်းပွၵ်ႉၼႂ်းဝၢၼ်ႈၵေႃႈ လွၵ်ႇငိုတ်ႈတဵၵ်းၸႂ်ႉ ၵူၼ်းပိုၼ်ႉတီႈ ၵႂႃႇသႂ်ႇၶႅပ်းၵၢင်ၸႂ် ဢမ်ႇသႂ်ႇဢမ်ႇလႆႈ ။ ၵူၺ်းၵႃႈ ၶႅပ်းၵၢင်ၸႂ်လူင်ႈၼႃႈတႄႉ ဢမ်ႇလူင်းၵဵပ်း။ သမ်ႉပၢႆႈလၢတ်ႈၵူၼ်းဝၢၼ်ႈဝႃႈ – ၵူၼ်းဢႃယု 60 ပၢႆ ဢမ်ႇတၢပ်ႈလူဝ်ႇမႃး တွတ်ႈၶႅပ်းၵၢင်ၸႂ် ဝႃႈၼႆပႃး – ၵူၼ်းပိုၼ်ႉတီႈလၢတ်ႈၼင်ႇၼႆ။
ပၢင်လိူၵ်ႈတင်ႈ ၵမ်းထီႉသွင်ၼႆႉ ၸႄႈဝဵင်းၸိူဝ်းတေလႆႈၸတ်းႁဵတ်းပၢင်လိူၵ်ႈတင်ႈ ၼႂ်းမိူင်းတႆး ပဵၼ် 17 ၸႄႈဝဵင်း။ မိူင်းတႆးပွတ်းၸၢၼ်း ပဵၼ်ၸႄႈဝဵင်းယႂႃႇငၢၼ်ႇ၊ ၸႄႈဝဵင်းသီႇသႅင်ႇ၊ ၸႄႈဝဵင်း ၵၢတ်ႇလေႃႉ၊ ၸႄႈဝဵင်းလွၵ်ႉၸွၵ်ႇ၊ ၸႄႈဝဵင်းၵုၼ်ႁဵင်၊ ၸႄႈဝဵင်းမိူင်းပၼ်ႇ၊ ၸႄႈဝဵင်းမွၵ်ႇမႂ်ႇ၊ ၸႄႈဝဵင်းမိူင်းၵိုင် ၊ ၸႄႈဝဵင်းလၢႆးၶႃႈ ပဵၼ် 9 ၸႄႈဝဵင်း ။
ၼႂ်းမိူင်းတႆးပွတ်းဢွၵ်ႇသမ်ႉပဵၼ် ၸႄႈဝဵင်းမိူင်းၶၢၵ်ႇ၊ ၸႄႈဝဵင်းမိူင်းတူၼ်၊ ၸႄႈဝဵင်းမိူင်းယွင်း၊ ၸႄႈဝဵင်းမိူင်းယၢင်း၊ ၸႄႈဝဵင်းမိူင်းပဵင်း၊ ၸႄႈဝဵင်းမိူင်းၽျၢၵ်ႈ 6 ၸႄႈဝဵင်း။ ၼႂ်းမိူင်းတႆးပွတ်းႁွင်ႇ သမ်ႉပဵၼ် ၸႄႈဝဵင်းတၢင်ႉယၢၼ်း၊ ၸႄႈဝဵင်းမိူင်းယႆ 2 ၸႄႈဝဵင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ