ဝၼ်းတီႈ 9/1/2026 သိုၵ်းယၢင်းလႄႈ PDF ႁူမ်ႈၵၼ်ၶဝ်ႈတိုၵ်းပိုတ်းယိုဝ်းတပ်ႉပၢင်သဝ်းသိုၵ်းမၢၼ်ႈ ၼိူဝ်သဵၼ်ႈတၢင်းၵဝ်ႇ တႃႈလိူဝ်ႇ- တႃႈၵုင်ႈ လႄႈ ၼႂ်းဝဵင်းတေႃးၵျွႆးဢိၼ်း (ဝဵင်းတႆး ထုင်ႉပဵင်း) တင်းမူတ်းယိုတ်းလႆႈ 14 တီႈဝႃႈၼႆ။
လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG ပိုၼ်ၽၢဝ်ႇဝႃႈ သိုၵ်းယၢင်းလႄႈ PDF ၶဝ်ႈယိုတ်း လုမ်းၽွင်းငမ်းၶွင်ၸုမ်းသိုၵ်းမၢၼ်ႈ၊ ႁူင်းပလိၵ်ႈလႄႈ လုမ်းၶွမ်ႊမသျိၼ်ႊပၢင်လိူၵ်ႈတင်ႈၸိူဝ်းၼႆႉသေ ၽဝ်ပႅတ်ႈပႃးတင်းလုမ်းလႄႈ တင်းၶိူင်ႈၸၢၵ်ႈဢိၵ်ႇရူတ်ႉၵႃးဢိၵ်ႇၶိူင်ႈၶူဝ်းၸႂ်ႉသွႆၸိူဝ်းၼႆႉ ဝႃႈၼႆ။
တီႈပၢင်တိုၵ်းတီႈဝဵင်းတေႃးၵျွႆးဢိၼ်းၼၼ်ႉ ၾၢႆႇတၢင်းသိုၵ်းမၢၼ်ႈၵေႃႈဢဝ်ၶိူင်ႈမိၼ်သိုၵ်းမႃးယိုဝ်းၸွႆႈလႄႈ ပၢင်တိုၵ်းၼႆႉဢမ်ႇပဵၼ်ႁိုင်သေတႃႉ ပဵၼ်ဝႆႉႁၢဝ်ႈႁႅင်း-ၼႆ ၵူၼ်းပိုၼ်ႉတီႈလၢတ်ႈၼင်ႇၼႆ။
တပ်ႉသိုၵ်းမၢၼ်ႈ ၶမရ 307 ဢၼ်ပၵ်းတီႈဝဵင်းပႄးၼွႆႇၵူင်း (ယၢၼ်ၵႆၵၼ်တင်းတေႃးၵျွႆးဢိၼ်းမွၵ်ႈ 2 လၵ်း) လႄႈ ၶမယ 439 ဢၼ်ပၵ်းတပ်ႉတီႈ ဝဵင်းၵၺုတ်ႉၵုၼ်း ၼၼ်ႉၵေႃႈ ယိုဝ်းၵွင်ႈလူင်မႃးၸွႆႈ။
ဝၢႆး PDF ၶဝ်ယိုတ်းလႆႈဝဵင်းတေႃးၵျွႆးဢိၼ်းတင်းဝဵင်းယဝ်ႉ ဢမ်ႇႁိုင်လၢႆၸူဝ်ႈမူင်းၵူၺ်းၵေႃႈ ၶဝ်ၶိုၼ်းထွႆထွၼ်ဢွၵ်ႇၵႂႃႇယူႇတၢင်းၼွၵ်ႈဝဵင်းဝႆႉ။ ယွၼ်ႉပိူဝ်ႈသိုၵ်းမၢၼ်ႈဢဝ်ၶိူင်ႈမိၼ်မႃးယိုဝ်းၸွႆႈဢမ်ႇထၢတ်ႇ ။ ၵူၼ်းမိူင်းတင်းဝဵင်းၵေႃႈလႆႈပၢႆႈၽေးသိုၵ်းဝႆႉသေ သဵၼ်ႈတၢင်းရူတ်ႉၵႃးၵေႃႈထုၵ်ႇသင်ႇပိၵ်ႉဝႆႉ ဢမ်ႇပၼ်ရူတ်ႉၵႃးၵႂႃႇမႃး ဝႃႈၼႆ။
ၾၢႆႇသိုၵ်း PDF တႄႉလၢတ်ႈဝႃႈ ၶဝ်တီႉဝႆႉ ပလိၵ်ႈမၢၼ်ႈလႄႈ ၵူၼ်းလမ်ႇလွင်ႈၼႂ်းတေႃးၵျွႆးဢိၼ်းလၢႆလၢႆၵေႃႉ ၼၼ်ႉၵေႃႈၶိုၼ်းၵူတ်ႇထတ်းသေ ပွႆႇပၼ်ၶိုၼ်းယဝ်ႉဝႃႈၼႆ။
ဝဵင်းတေႃးၵျွႆးဢိၼ်းၼႆႉ တႆးၼႂ်းပိုၼ်ႉတီႈႁွင်ႈဝႃႈ ဝဵင်းၼွင်ၵႂၢႆးထိူၼ်ႇ။ မီးၼႂ်းၸႄႈဝဵင်းၵျွၵ်ႉတၶႃး တိူင်းပႃႇၵိူဝ်၊ မီးၾၢႆႇၸၢၼ်းဝဵင်းၽိဝ်းမွၵ်ႈ 16 လၵ်း ပဵၼ်ပီႈၼွင်ႉတႆး ယူႇသဝ်း။ လွင်ႈယူႇသဝ်းၵိၼ်သၢင်ႈလႄႈၾိင်ႈငႄႈၾိင်ႈထုင်းၵေႃႈ တိုၵ်ႉပဵၼ်လၢႆးတႆး ပႆႇပိူင်ႈ။ႁူဝ်ၼပ်ႉၵူၼ်းဝဵင်းတေႃးၵျွႆးဢိၼ်းမီး 14000 ပၢႆ။ ၼႂ်းၼၼ်ႉၶိုင်ႈပၢႆၼႆႉပဵၼ်တႆး။
ႁွင်ႈၵၢၼ်ၾၢႆႇပွင်ႇၶၢဝ်ႇ MOD ၶွင်လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ ပိုၼ်ၽၢဝ်ႇလၢတ်ႈဝႆႉပႃးဝႃႈ ပၢင်တိုၵ်းသၢပ်ႇၼမ်ႉၸိတ်ႉတွင်း တိူင်းပႃႇၵိူဝ်ၵမ်းၼႆႉ ၾၢႆႇသိုၵ်းမၢၼ်ႈတၢႆ 50 ပၢႆ မၢတ်ႇၸဵပ်းတင်းၼမ် ၊ ယိုတ်းလႆႈပႃးမၢၵ်ႇၵွင်ႈၸိုၼ်းယၢမ်းလႄႈၶိူင်ႈၵွင်ႈၵၢင်ႇတင်းၼမ်။ ယၢမ်းလဵဝ်ၵေႃႈယူႇတီႈ NUG သူင်ႇႁႅင်းသိုၵ်းၶဝ်ႈၵူတ်ႇထတ်းၼႂ်းပိုၼ်ႉတီႈၼႂ်းၵႄႈ ဝဵင်းၺွင်ႇလေးပိၼ်ႇလႄႈ ပဵင်းသလူပ်ႉ (မီးၾၢႆႇတၢင်းၸၢၼ်းတေႃးၵျွႆးဢိၼ်း) ဢၼ်မီးၼိူဝ်သဵၼ်ႈတၢင်း တႃႈၵုင်ႈ-ဝဵင်းလိူဝ်ႇၼၼ်ႉယူႇ -ဝႃႈၼႆ။
ဢၢင်ႈဢိင်-BBC
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ