ၸိူဝ်ႉၽၼ်း မူင်ႈမႅင်းတၢင်းပဵၼ် ၼၢဝ်ၶႆႈဝတ်းသႅၼ်းမႂ်ႇ A H3N2 ၽႄႈလၢမ်းဝႆႉ တီႈၼႂ်းမိူင်းထႆး၊ မူင်ႈမႅင်းသႅၼ်းၼႆႉ ၶႆႈတိုဝ်ဝႆႉလႄႈ ၵိၼ်ယႃႈယႃတၢၼ်ႇတၢၼ်ႇဢမ်ႇၸၢင်ႈႁၢႆလႆႈ ။ၵူၼ်းၸိူဝ်းတိတ်းၸပ်းတၢင်းပဵၼ် ၸၢင်ႈၼမ်ၶိုၼ်ႈမႃးၼႆ ပရေႃးၾႅတ်ႊသိူဝ်ႊ ၽူႈလူင်ႉလႅၼ်ႇ တီႈႁွင်ႈၵၢၼ်ၾၢႆႇပၢႆးယႃႈယႃ ၸၼ်ႉၸွမ်ၶျူႊလႃႊလူင်ႊၵွၼ်ႊ မိူင်းထႆး လၢတ်ႈပၼ်ၾၢင်ႉဝႆႉ ၼႂ်းဝၼ်းတီႈ 8 လိူၼ်ၵျႅၼ်ႊၼိဝ်ႊရီႊၼႆႉ ၼင်ႇၼႆ။

ၸွမ်းၼင်ႇၶေႃႈမုလ်းတီႈ ႁွင်ႈၵၢၼ်ၽွင်းလူင်ၾၢႆႇပၢႆးယူႇလီၵူၼ်းမိူင်းသေ မိူဝ်ႈပီၵၢႆၼႆႉ တီႈမိူင်းထႆး မီးၵူၼ်းတိတ်းၸပ်းတၢင်းပဵၼ် ၼၢဝ်ၶႆႈဝတ်း ၼမ်လိူဝ်ႁႅင်း။ မိူဝ်ႈႁူဝ်ပီ 2025 ၼၼ်ႉ ပဵၼ်မူင်ႈမႅင်းၸိူဝ်ႉၽၼ်း A H1N1 2009 A သေ ထိုင်မႃးၼႂ်းႁၢင်ပီ ၶိုၼ်းလႅၵ်ႈလၢႆႈပဵၼ်ၵႂႃႇၸိူဝ်ႉၽၼ်း H3N2။

ၽူႈလူင်ႉလႅၼ်ႇၶဝ်လၢတ်ႈဝႃႈ – ၸိူဝ်ႉၽၼ်း မူင်ႈမႅင်းတၢင်းပဵၼ် ၼၢဝ်ၶႆႈဝတ်းသႅၼ်းမႂ်ႇ A H3N2 ၼႂ်း K type ၼၼ်ႉ မီးႁႅင်းတေႃႇသူႈလႆႈ ယႃႈႁႄႉၵင်ႈ ဝႃႈၼႆ။

ၵွပ်ႈၼၼ်လႄႈ ႁူဝ်ၼပ်ႉၵူၼ်းတိတ်းၸပ်းတၢင်းပဵၼ် ၸၢင်ႈၼမ်ၶိုၼ်ႈမႃး။ ၵူၺ်းၵႃႈ တၢင်းပဵၼ်တေဢမ်ႇႁၢဝ်ႈႁႅင်းၶိုၼ်ႈမႃးလႄႈ သိုပ်ႇဢဝ်ယႃႈယႃႁႄႉၵင်ႈ တၢင်းပဵၼ်ၼၢဝ်ၶႆႈဝတ်း ၵႃႈၶၼ်ထုၵ်ႇ ဢၼ်ဢမ်ႇမီးၽွၼ်းတုမ်ႉယွၼ်ႈၼမ်လႄႈ ယႃႈၶႃႈမူင်ႈမႅင်း ဢၼ်ယၢမ်ႈၸႂ်ႉတိုဝ်းဝႆႉၸိူဝ်းၼၼ်ႉသေ ယူတ်းယႃၵႂႃႇမိူၼ်ၵဝ်ႇၵေႃႈ လႆႈယူႇ ၼႆယဝ်ႉ။