သိုၵ်းမၢၼ်ႈ ၸတ်းပၢင်လိူၵ်ႈတင်ႈ ႁွပ်ႈၼိုင်ႈယဝ်ႉတူဝ်ႈၵႂႃႇ မိူဝ်ႈႁၢင်ပီ 2025 ၼႆႉသေ ၶိုၼ်းတေၸတ်းထႅင်ႈႁွပ်ႈသွင် ။ ၵူၼ်းၸိူဝ်းထတ်းသၢင်ႁၼ်ဝႃႈ ပၢင်လိူၵ်ႈတင်ႈၼႆႉ ပဵၼ်ၽႅၼ်ၵၢၼ်သိုၵ်းမၢၼ်ႈ တႃႇယူႇလွတ်ႈ မီးဢႃႇၼႃႇ ၵႂႃႇထႅင်ႈ ၵူၺ်း ၼႆၵေႃႈမီး ။ ၸိူဝ်းလၢတ်ႈဝႃႈ လႆႈၶိုပ်ႈဢဝ်ၶိုပ်ႈ လႆႈသွၵ်ႇဢဝ်သွၵ်ႇၼႆသေ ၶဝ်ႈၵႃႈၸွမ်းလွၵ်းၸိူင်း သိုၵ်းမၢၼ်ႈ ၵေႃႈ မီးမိူၼ်ၵၼ် ။ ၽွၼ်းပၢင်ႈပၢင်လိူၵ်ႈတင်ႈ တေတုမ်ႉယွၼ်ႈၸိုင်ႈမိူင်းၸိူင်ႉႁိုဝ် ပႆႇႁူႉတင်းပိုၵ်းသေတႃႉ ။ ၸိူဝ်းပဵၼ်ၵူၼ်းမိူင်းတႄႉ လႆႈသုၵ်ႉၸွမ်း လႆႈၵႂင်ၸႂ်ၸွမ်းဢမ်ႇႁၢင်ႉ ။ ၸိူဝ်းၺႃးတူတ်ႈတၢမ်ႇယွၼ်ႉဢမ်ႇႁၼ်လီၼိူဝ် ပၢင်လိူၵ်ႈတင်ႈ ၵေႃႈၼမ်။ သိုၵ်းမၢၼ်ႈလၢတ်ႈတႄႉ ဢဝ်သဵင်ၵၢင်ၸႂ်ၵူၼ်းမိူင်းဝႃႈ ၵူၺ်းသမ်ႉ ပၢၵ်ႈပႅတ်ႈ ၵၢင်ၸႂ် ၵူၼ်းမိူင်းသေ သိုပ်ႇႁဵတ်းၼင်ႇၵႃႈၶဝ်ၶႂ်ႈၸတ်းပွင်ၼၼ်ႉၵူၺ်း ။ တေသိုပ်ႇ မီးႁိုဝ် ပဵၼ်ႁိုဝ်ၼႆၼၼ်ႉ ၸၢႆးသႂ်ၸိုၼ်ႈမိူင်း တေႁၢႆးငၢၼ်းၼႄပၼ်ၵႂႃႇၶႃႈဢေႃႈ။

ပေႃးမႃးတူၺ်း သဵၼ်ႈဢၼ်သိုၵ်းမၢၼ်ႈပိုၼ်ၽၢဝ်ႇဝႆႉတႄႉ ပၢင်လိူၵ်ႈတင်ႈႁွပ်ႈၼိုင်ႈၼႆႉ ပႃႇတီႇသၢင်ႇသီႈ လႆႈတီႈယူႇပဵၼ်ထီႉၼိုင်ႈဝႆႉ။ ၼႂ်းႁွပ်ႈၼိုင်ႈၼႆႉ ပႃႇတီႇသၢင်ႇသီႈ ပေႉလႆႈဝႆႉ တီႈသၽႃးတႅၼ်းၽွင်းၵူၼ်မိူင်း 97 တီႈ ၊ သၽႃးၸိူဝ်ႉၸၢတ်ႈ 11 တီႈ ၊ သၽႃးၸႄႈမိူင်းလႄႈၸႄႈတိူင်း 28 တီႈ ၼႆယူႇ။

ဢၼ်ပေႉလႆႈတီႈယူႇဝႆႉထူၼ်ႈသွင်တႄႉ ပဵၼ် ပႃႇတီႇ တစည တိုင်းရင်းသား စည်းလုံးညီညွှတ်ရေးပါတီ ။ ၼႂ်းမိူင်းတႆး ၵေႃႈ တေႃႈၼၼ် ပႃႇတီႇသၢင်ႇသီႈ ၵိၼ်ၶၢတ်ႇပေႉဝႆႉတင်းပိုၵ်း ။ ဢၼ်ဢဝ်ၸိုဝ်ႈၸၢဝ်းၶိူဝ်းသေ လိူၵ်ႈတင်ႈၸိူဝ်း ၼၼ်ႉၵေႃႈ လႆႈတီႈယူႇဢိတ်းဢွတ်းၵူၺ်း ပႆႇတႅပ်းတတ်းလႆႈဝႃႈ ၸွင်ႇတေထိုင်ၼႂ်းသၽႃးႁႃႉ ဢမ်ႇထိုင်။

ၵူၼ်းမိူင်းပတ်းပိုၼ်ႉၸိုင်ႈမိူင်း ဢၼ်ၵႂႃႇၶဝ်ႈႁူမ်ႈတွတ်ႈသဵင်ပၼ်ၼႆႉ မီး 52.13 % ၼႆ သိုၵ်းမၢၼ်ႈပိုတ်ၽၢဝ်ႇဝႆႉ ဝႃႈၼႆသေတႃႉ မၢင်ဢွင်ႈတီႈ သင်ဝႃႈ ၵူၼ်းၵေႃႉလႂ်ဢမ်ႇၵႂႃႇတွတ်ႈၵေႃႈ သိုၵ်းမၢၼ်ႈၶိုင်လၢႆး တွတ်ႈတႅၼ်း ပၼ်ၵၼ်ၵေႃႈ ယင်းမီးၼႆ ၵူၼ်းမိူင်းတႆးပွတ်းႁွင်ႇၵေႃႉၼိုင်ႈလၢတ်ႈ။

ပၢင်လိူၵ်ႈတင်ႈၼႆႉ သိုၵ်းမၢၼ်ႈတဵၵ်းႁႂ်ႈၵူၼ်းမိူင်းၵႂႃႇတွတ်ႈလူၺ်ႈဢမ်ႇတဵမ်ၸႂ်သေ ၶႂ်ႈၸတ်းၸိူင်ႉႁိုဝ်ၵေႃႈၸတ်း ၊ လိူဝ်ၼၼ်ႉသမ်ႉပၢႆ ၶဵင်ႈၶႅင်ပၵ်းပိူင်ပၢင်လိူၵ်ႈတင်ႈ တႃႇၵမ်ၵိၼ်းၵူၼ်းမိူင်းထႅင်ႈ။
ၶၢဝ်းသိုၵ်းမၢၼ်ႈၶိုင်ပွင်တႃႇပၢင်လိူၵ်ႈတင်ႈယူႇၶိူဝ်းယႂ်းၼႆႉ ၵူၼ်းမိူင်းၵမ်ႈၼမ်ၵေႃႈ ဢမ်ႇႁၼ်လီၸွမ်း ယွၼ်ႉဝႃႈ ဝၢၼ်ႈ ဢိူင်ႇ ဝဵင်း ဢၼ်ၺႃးမၢၵ်ႇလူင်ပွႆႇသႂ်ႇသေ ပႆႇလႆႈၵုမ်းပႆႇလႆႈပူၵ်းပွင်ၵိုတ်းထႅင်ႈတင်းၼမ် ။ ၸႂ်ၵူဝ်ႁႄၵူၼ်းမိူင်း ယင်းပႆႇႁၢႆ သမ်ႉမႃးၸတ်းပၢင်လိူၵ်ႈတင်ႈလႄႈ ၽႂ်ၵေႃႈႁၼ်ဝႃႈ မၼ်းဢမ်ႇၸႂ်ႈပၢင်လိူၵ်ႈတင်ႈဢၼ်မူတ်းသႂ်။

ဢိင်ၼိူဝ်လွင်ႈၼႆႉသေ ၸိူဝ်းတႅမ်ႈတၢင်ႇထတ်းသၢင် သၢၼ်ၶတ်းလွင်ႈပၢင်လိူၵ်ႈတင်ႈ ၼိူဝ်ၼႅင်ႈသိုဝ်ႇ ၸိူဝ်းၼႆႉၵေႃႈၼမ် ။
သိုၵ်းမၢၼ်ႈသမ်ႉ ဢဝ်ပိူင်မၢႆမီႈပၢင်လိူၵ်ႈတင်းၸိုင်ႈမိူင်းႁဵတ်းၼႃႈတိူဝ်ႈသေ မၢပ်ႇၼႄးၵူၼ်းမိူင်းဝႃႈ ၵူၼ်းၵေႃႇၵၢၼ်ႁၢႆႉ ၵူၼ်းယႃႉၵဝ်းပၢင်လိူၵ်ႈတင်ႈၼႆသေ သွၵ်ႈႁႃတီႉၺွပ်းၵုမ်းၶင်။ၵူၼ်းမိူင်းၺႃးတီႉၺွပ်း တင်းမူတ်းမီးၵႂႃႇ 335 ၵေႃႉယဝ်ႉၼႆ ၵေႃႇမတီႇငဝ်ႈငုၼ်း ၾၢႆႇၵုမ်းၵမ်လွင်ႈႁူမ်ႇလူမ်ႈ ၼႂ်းၶၢဝ်းယၢမ်းၸတ်းႁဵတ်းပၢင်လိူၵ်ႈတင်ႈၼၼ်ႉ ၵဵပ်းၶေႃႈမုလ်းပိုၼ်ၽၢဝ်ႇဝႆႉၼင်ႇၼႆ။
တေႃႇထိုင်ဝၼ်းတီႈ 5/1/2026 ၼႆႉ ၼႂ်းတိူင်းလႄႈ ၸႄႈမိူင်းၵူႈတီႈတီႈ ၵူၼ်းၸိူဝ်းၺႃးတီႉၺွပ်းဢဝ်လိူင်ႈဝႆႉ မီး 335 ၵေႃႉ ၼႂ်းၼၼ်ႉပဵၼ် ၸၢႆး 275 ၵေႃႉလႄႈ ယိင်း 60 ၵေႃႉ ၼႆ သိုၵ်းမၢၼ်ႈပိုၼ်ၽၢဝ်ႇၼႂ်းပၢင်ၵုမ် ၵမ်းထူၼ်ႈ 6 တီႈ ၼေႇပျီႇတေႃႇ ဢၼ်ၸတ်းႁဵတ်းၵႂႃႇၼႂ်းဝၼ်းတီႈ 6/1/2026 တႃႇႁူမ်ႇလူမ်ႈ ပၢင်လိူၵ်ႈတင်ႈ ၼၼ်ႉၵႂႃႇၼင်ႇၼႆ။

မိူဝ်ႈဢွၼ်တၢင်းတႄႉ သိုၵ်းမၢၼ်ႈပၵ်းတႃႇတူၺ်းၼိူဝ်ၵူၼ်းဢၼ်ထတ်းသၢင်လွင်ႈပၢင်လိူၵ်ႈတင်ႈၵူၺ်း ဝၢႆးၼႆႉ ၶဝ်လႆႈပၵ်းတႃတူၺ်းပႃး ၵူၼ်းၸိူဝ်းယႃႉပၢႆႉသူၼ်းတုမ်ပႃႇတီႇ ၼႂ်းပိုၼ်ႉတီႈလႂ်တီႈၼၼ်ႈပႃးၼႆ ၵူၼ်းၸိူဝ်းၸမ် ၶွမ်ႊမသျိၼ်ႊပၢင်လိူၵ်ႈတင်ႈသိုၵ်းမၢၼ်ႈ လၢတ်ႈတီႈသိုဝ်ႇယႂ်ႇ ဝႆႉၼင်ႇၼႆ။
ၼႂ်းဢၼ် သိုၵ်းမၢၼ်ႈ တီႉၺွပ်းဝႆႉၼၼ်ႉ ပႃးသႅၼ်းၵူၼ်းၼုမ်ႇ လႄႈ ပႃးၵူၼ်းၼႂ်းၵၢၼ်ပၢႆးမွၼ်း ၸိူဝ်းၼႆႉ မွၵ်ႈ 15 ၵေႃႉ ။ ပၼ်တၢမ်ႇၶွၵ်ႈ 9 ပီ ထိုင် 49 ပီ လူးၵွၼ်ႇဝႃႈၼႆ။

ပွတ်းတၢင်း ထုင်ႉႁၢႆးယႃႈ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ၸိူဝ်းၼႆႉၵေႃႈ သိုၵ်းမၢၼ်ႈ ထႅင်ႈႁႅင်း ပၵ်းတႃ ပႂ်ႉတူၺ်း ၵူၼ်းမိူင်းၸိူဝ်းသၢၼ်ၶတ်းပၢင်လိူၵ်ႈတင်ႈ ၵွပ်ႈဝႃႈ ၵမ်းၵမ်းမီးၵူၼ်းယႃႉပၢႆႉ ယႃႉမိၵ်ႈမၢႆလူဝ်ႇၵူဝ်ႇပႃႇတီႇ ဢၼ်ပူၵ်းတင်ႈသူၼ်းတုမ်ဝႆႉၸိူဝ်းၼၼ်ႉ ၼႆၵူၼ်းပိုၼ်ႉတီႈလၢတ်ႈၼင်ႇၼႆ။

ယႃႇဝႃႈ ၵူၼ်းဝၢၼ်ႈ ၵူၼ်းမိူင်းၵူၺ်းဢၼ်ဢမ်ႇႁၼ်လီၸွမ်း တေႃႈၼင်ႇ ပႃႇတီႇ ဢၼ်ၶဝ်ႈပၢင်လိူၵ်ႈတင်ႈၸွမ်း – ဢၼ်ၵမ်ႈၼမ်ႁၼ်ထိုင်ဝႃႈ ၶဝ်ၶီႇႁိူဝ်းလမ်းလဵဝ်ၵၼ်ၼၼ်ႉ ယင်းမီးပၼ်ႁႃၵၼ်။
မိူဝ်ႈတႄႇမၼ်း သိုၵ်းမၢၼ်ႈဝႃႈ သဵၼ်ႈမၢႆတႅၼ်းၽွင်းဢၼ်ဢွင်ႇပေႉပၢင်လိူၵ်ႈတင်ႈႁွပ်ႈၼိုင်ႈၼႆႉ တေပႆႇပိုၼ်ၽၢဝ်ႇဢွၵ်ႇၼႆသေတႃႉ မီးပႃႇတီႇ ၸိူဝ်းဢၼ်ၶဝ်ႈလိူၵ်ႈတင်ႈ ဢွၵ်ႇသဵင်လၢတ်ႈၸႃ လွင်ႈငမ်းငဝ်းၼိူဝ်ပၢင်လိူၵ်ႈတင်ႈမႃးၼမ်လႄႈ ၸင်ႇပိုၼ်ၽၢဝ်ႇဢွၵ်ႇမႃးၶိူဝ်းယႂ်း ။

ပေႃးၼပ်ႉၶဵတ်ႇပၢင်လိူၵ်ႈတင်ႈႁွပ်ႈၼိုင်ႈၼႆႉသေၼပ်ႉသွၼ်ႇ တႅၼ်းၽွင်းသၽႃးၸိူဝ်ႉၸၢတ်ႈၼႆႉ တေလႆႈမီး 11 ၵေႃႉၵူၺ်းသေတႃႉ ၵမ်းလိုၼ်းပိုၼ်ၽၢဝ်ႇဢွၵ်ႇမႃးပဵၼ် 32 ၵေႃႉ ၵွပ်ႈဝႃႈ ပၢင်လိူၵ်ႈတင်ႈ ၼႂ်းၸႄႈမိူင်းၶျၢင်းလႄႈမိူင်းရၶၢႆႇ ၸတ်းႁဵတ်းယဝ်ႉတူဝ်ႈယဝ်ႉဝႃႈၼႆ။

ဢူးထိၼ်ႇၵျေႃႇဢေး ၽူႈလူင်ႉလႅၼ်ႇသၽႃးလႄႈ ပၢင်လိူၵ်ႈတင်ႈ လၢတ်ႈတီႈ BBC ဝႃႈ –

“ မိူင်းၶျၢင်းၼႆႉ ၶဵတ်ႇပၢင်လိူၵ်ႈတင်ႈ မၵ်းမၼ်ႈမီးဝႆႉတီႈလဵဝ်ၵူၺ်း သမ်ႉတေလႆႈလိူၵ်ႈဢဝ် တႅၼ်းၽွင်း 6 ၵေႃႉ။ ၼႂ်းမိူင်းရၶၢႆႇသမ်ႉၶဵတ်ႇပၢင်လိူၵ်ႈတင်ႈ မီး 2 တီႈ ၊ တီႈလႂ် လႆႈလိူၵ်ႈဢဝ်တႅၼ်းၽွင်း 3 ၵေႃႉ။ ဝဵင်း ဢၼ်သိုၵ်းမၢၼ်ႈၶဝ်ၸတ်းပၢင်လိူၵ်ႈတင်ႈလႆႈ ၼႂ်းသွင်ၸႄႈမိူင်းၼႆႉ ၼႂ်းႁွပ်ႈၼိုင်ႈၵူၺ်း ယဝ်ႉတူဝ်ႈၵႂႃႇယဝ်ႉလႄႈ ၸင်ႇဝႃႈ တူၵ်းလူင်းပဵၼ်ၽွၼ်းပၢင်ႈပၢင်လိူၵ်ႈတင်ႈၵမ်းၼႆႉၵႂႃႇယဝ်ႉ။ ပေႃးပၢင်လိူၵ်ႈတင်ႈ ယဝ်ႉၵႂႃႇ တင်း 3 ၵမ်းယဝ်ႉတႄႉ သၽႃးၸိူဝ်ႉၸၢတ်ႈၼႆႉ တေလႆႈမီး 157 တီႈ။ သၽႃးၵူၼ်းမိူင်း 265 တီႈ ။ သင်ဝႃႈ ၶဝ်ဢဝ်ႁႅင်းသိုၵ်းၶဝ်ထႅမ်ဝႆႉၼႂ်းသၽႃးမိူၼ်ၵဝ်ႇၵေႃႈ ၼႂ်းသၽႃးၼႆႉ တီႈၼင်ႈတဵမ် ႁူဝ်ပၢၵ်ႇ 88 % ။ ဢွင်ႈတီႈၵမ်ႈၼမ် ဢမ်ႇၸၢင်ႈၸတ်းပၢင်လိူၵ်ႈတင်ႈသေတႃႉ သင်ၶဝ်ၽိူမ်ႉထႅမ် တႅၼ်းၽွင်းမၼ်းသႂ်ႇၼႂ်းသၽႃးၼႆၵေႃႈ တေပၼ်ႇၵၢၼ်ၵႂႃႇလႆႈ။ ၵူၺ်းၵႃႈ တေဢမ်ႇၸၢင်ႈမၵ်းမၼ်ႈဝႃႈ မၼ်းတႅၼ်းသဵင်ၵူၼ်းမိူင်းလႆႈတင်းပိုၵ်း တႃႇမၵ်းမၼ်ႈပဵၼ်တၢင်းၵၢၼ်တေယၢပ်ႇ”

ပၢင်လိူၵ်ႈတင်ႈၵမ်းၼႆႉ ပႃႇတီႇၵၢၼ်မိူင်း ဢၼ်ၶဝ်ႈလိူၵ်ႈတင်ႈၼႆႉ တင်းမူတ်း မီး 92 ပႃႇတီႇ ။ ၼွၵ်ႈလိူဝ်ၼႆႉ ပႃႇတီႇ လူင် ဢၼ်ၶဝ်ႈၶေႉပၢင်လိူၵ်ႈတင်ႈ 3 ဢၼ် ပႃးတင်းပႃႇတီႇသိူဝ်ၽိူၵ်ႇ ႁူမ်ႈၵၼ်တႅမ်ႈလိၵ်ႈယိုၼ်ႈ ထိုင်ၸွမ် ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ- လွင်ႈၶႅပ်းၵၢင်ၸႂ်လူင်ႈၼႃႈ ဢမ်ႇပူင်ႇသႂ်။ ပၢင်လိူၵ်ႈတင်ႈၵမ်းထိ 1 ၼႆႉ ယွၼ်ႉၶႅပ်းၵၢင်ၸႂ်လူင်ႈၼႃႈသေ ပႃႇတီႇသၢင်ႇသီႈဢွင်ႇပေႉၵူႈတီႈတီႈ – ၼႆၸိူဝ်းၼႆႉ။ မီးၶၢဝ်ႇယႂ်ႇဢွၵ်ႇဝႆႉဝႃႈ ပၢင်လိူၵ်ႈတင်ႈၵမ်းၼႆႉယင်းပႆႇယဝ်ႉတူဝ်ႈ ပႃႇတီႇမၢင်ဢၼ်ယင်းၶႂ်ႈထွႆထွၼ် – ၼႆလူးၵွၼ်ႇ။

လွင်ႈၼႆႉ လုင်းၸၢႆးဢၢႆႈပဝ်း ႁူဝ်ပဝ်ႈပႃႇတီႇသိူဝ်ၽိူၵ်ႇတႄႉ လၢတ်ႈတီႈၽူႈတွႆႇႁွၵ်ႈ တင်းၵႂၢမ်းမၢၼ်ႈဝႆႉဝႃႈ – “ ၶႅပ်းသဵင်လူင်ႈၼႃႈၼႆႉ ၽႂ်တွတ်ႈဢမ်ႇတွတ်ႈ ႁဝ်းဢမ်ႇႁူႉ ။ ၼႂ်းပိူင်လိူၵ်ႈတင်ႈၼၼ်ႉ တႅမ်ႈဝႆႉဝႃႈ ပေႃးမီးၶႅပ်းသဵင်လူင်ႈၼႃႈၼႆ တေလႆႈဢဝ်သဵၼ်ႈမၼ်းပႃႉဝႆႉၼႃႈႁူင်းတွတ်ႈသဵင်ၼႆလူး ။ ၼႆႉသမ်ႉ ဢမ်ႇႁၼ်သင်ၸွမ်း ။ ၼေႃႇတႅၼ်းၽွင်းႁဝ်းၵေႃႈ ဢမ်ႇလႆႈယူႇၸွမ်းမိူဝ်ႈပၼ်သဵင်လူင်ႈၼႃႈၼၼ်ႉ။ ယွၼ်ႉၼၼ်ဢမ်ႇႁူႉ။ ပေႃးမိူၼ်ၼႆ မၼ်းဢမ်ႇမီးလွင်ႈပူင်ႇသႂ် ။ ပေႃးပွၵ်ႈၵမ်းသွင် ၵမ်းသၢမ်မႃး ႁႂ်ႈမီးလွင်ႈပူင်ႇသႂ်သေၵမ်း ” – ဝႃႈၼႆ ။

ၽွၼ်းပၢင်ႈပၢင်လိူၵ်ႈတင်ႈ တေပဵၼ်မႃးၸိူင်ႉႁိုဝ်တႄႉတႄႉၼႆ ၽႂ်ပႆႇၸၢင်ႈဝႃႈသေတႃႉ ဢၼ်ၵူၼ်းမိူင်းလႆႈႁူႉ လႆႈႁၼ်ၸွမ်းသမ်ႉဢေႇႁႅင်းလႄႈ ဢမ်ႇမီးလွင်ႈပူင်ႇသႂ် ။ တေႃႈၼင်ႇ ၸုမ်းပႃႇတီႇၼင်ႇၵၼ် ဢမ်ႇႁူႉပိူင်လိူၵ်ႈတင်ႈဢၼ်သိုၵ်းမၢၼ်ႈၸတ်းႁႂ်ႈလူင်ႉလႅင်း။
လွင်ႈၼႆႉ ဢိၼ်ႊတရူႊ ၾၢႆႇသုၼ်ႇလႆႈသုၼ်ပဵၼ်ၸၢတ်ႈၸိုင်ႈလုမ်ႈၾႃႉ ထတ်းသၢင်လၢတ်ႈဝႃႈ – “ ၸဝ်ႈဢႃႇၼႃႇသိုၵ်းမၢၼ်ႈၶဝ်ၼႆႉ မိူၼ်ႁဵပ်းယဝ်ႉ ။ ႁဵပ်းၼႆႉ ပဵၼ်သႅၼ်းဢၼ်ဢွၵ်ႇတီႈတၼ် တီႈငိုပ်း တီႈဢမ်ႇမီးသၢႆလႅင်း။ သိုၵ်းမၢၼ်ႈၶဝ်ၵေႃႈ ၵျိုၵ်ႈၼႂ်းလပ်းသိင်ႇၵူၺ်း။ တႃႇၶဝ်တေယူႇလူင်ႉလႅင်းပူင်ႇသႂ်ၼႆႉ ယၢပ်ႇၼႃႇ။ဝၢႆးပၢင်လိူၵ်ႈတင်ႈၵေႃႈ တေမိူၼ်ၼၼ်ၵူၺ်း။ ၵူၺ်းၵႃႈ လွင်ႈဢၼ်ဝႃႈ ၶဝ်ႈယူႇၼႂ်းလပ်းသိင်ႇယူႇၼႆၼၼ်ႉ ႁဝ်းတေၶတ်းၸႂ်ႁဵတ်းႁႂ်ႈတင်းၼမ်ႁူႉႁၼ်ၵႂႃႇၵူၺ်း” – ဝႃႈ ၼႆႈ။
ပၢင်လိူၵ်ႈတင်ႈဢၼ်ယဝ်ႉတူဝ်ႈၵႂႃႇဝၼ်းတီႈ 28/12/2025 ၼႆႉ ပႃႇတီႇၸိူဝ်းတေၶဝ်ႈပၢင်လိူၵ်ႈတင်ႈ ၼႂ်းမိူင်းတႆးၼႆႉ ပဵၼ်ပႃႇတီႇသၢင်ႇသီႈ (USDP) ၊ ပႃႇတီႇသိူဝ်ၽိူၵ်ႇ (SNDP) ၊ ပႃႇတီႇၵူၼ်းမိူင်း (PPP)၊ ပႃႇတီႇ PP ၸဵမ်ၸိူဝ်းၼႆႉဝႃႈၼႆသေတႃႉ ဢၼ်လၵ်းလၵ်းပႃႇတီႇလူင်တႄႉ တေမီးသွင်ပႃႇတီႇ ပႃႇတီႇသၢင်ႇသီႈ လႄႈ ပႃႇတီႇသိူဝ်ၽိူၵ်ႇ ။

သဵၼ်ႈမၢႆ ပႃႇတီႇ ဢၼ်ဢွင်ႇပေႉၸိူဝ်းၼႆႉ ပေႃးပၢင်လိူၵ်ႈတင်ႈ ပႆႇယဝ်ႉတူဝ်ႈတင်းမူတ်းတႄႉ သိုၵ်းမၢၼ်ႈ တေပိုၼ်ၽၢဝ်ႇဝႆႉ သဵၼ်ႈၸိုဝ်ႈတႅၼ်းၽွင်းသၽႃးၵူၼ်းမိူင်း (FPTP ) လႄႈ တႅၼ်းၽွင်းသၽႃးၸႄႈမိူင်းၸႄႈတိူင်း (FPTP ) ၵူၺ်း။ တႃႇသၽႃးၸိူဝ်ႉၸၢတ်ႈ (FPTP )လႄႈ ဢၼ်ဢဝ် ပိူင် PR သေ လိူၵ်ႈတင်ႈတႄႉ ဝၢႆးယဝ်ႉတူဝ်ႈသဵင်ႈယဝ်ႉ ၸင်ႇတေႁူႉသဵၼ်ႈမၢႆလႆႈဝႃႈၼႆ။

ပၢင်လိူၵ်ႈတင်ႈ ႁွပ်ႈသွင်ၼႆႉ တေၸတ်းၼႂ်းဝၼ်းတီႈ 11/01/2026 ဝၼ်းဢႃးတိတ်ႉၼႆလႄႈ ပႂ်ႉသိုပ်ႇတူၺ်းငဝ်းလၢႆးမၼ်းထႅင်ႈၶႃႈၼေႃႈ ……….။