သိုၵ်းမၢၼ်ႈယိုတ်းမိူင်း ႁၢင်ႈႁႅင်း တႃႇတေတိူဝ်းၵဵပ်းၵူၼ်းသိုၵ်းမႂ်ႇထႅင်ႈ ဝၢႆးပၢင်လိူၵ်ႈတင်ႈ ၵမ်းထီႉသွင် ၵမ်းထီႉသၢမ်ၼႆႉ ဝႃႈၼႆ။
ပေႃးဝၼ်းတီႈ 10 လိူၼ်ထူၼ်ႈသွင် လိူၼ်တေမႃးၼႆႉ လွင်ႈသိုၵ်းမၢၼ်ႈဢွၵ်ႇပၵ်းပိူင် ၵူၼ်းမိူင်းတေလႆႈႁဵတ်းသိုၵ်း ၼႆသေ တဵၵ်းၶၢၼ်းၵဵပ်းဢဝ်ၵူၼ်းမိူင်း သူင်ၾိုၵ်းၵၢၼ်သိုၵ်းၼႆႉ တဵမ်သွင်ပီယဝ်ႉ။ ၸွမ်းၼင်ႇပၵ်းပိူင်မီးဝႆႉၼၼ်ႉၸိုင် ၸုပ်ႈထီႉၼိုင်ႈ ၸိူဝ်းၶဝ်ႈႁဵတ်းသိုၵ်း ၼႂ်းတပ်ႉသိုၵ်းမၢၼ်ႈတဵမ်သွင်ပီယဝ်ႉလႄႈ တပ်ႉသိုၵ်းတေလႆႈပွႆႇဢွၵ်ႇၶိုၼ်း။
ၵူၺ်းၵႃႈ မိူဝ်ႈၵၢင်ပီ 2025 တီႈပၢင်ၵုမ်လွင်ႈငမ်းယဵၼ် ဢၼ်ၸတ်းႁဵတ်းတီႈၼေႇပျီႇတေႃႇၼၼ်ႉ မီးၵူၼ်းႁၢႆးငၢၼ်းၼႄ တႃႇတေၵိုတ်း လွင်ႈၵဵပ်းသိုၵ်းမႂ်ႇ၊ ၶေႃႈၼႆႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ဢမ်ႇယွမ်းႁပ်ႉၼႆ ၵူၼ်းၸမ်ၸႂ်တင်းတပ်ႉသိုၵ်းမၢၼ်ႈၵေႃႉၼိုင်ႈ လၢတ်ႈ။
ယၢမ်းလဵဝ် ဢိင်ၼိူဝ်ၸတ်းပၢင်လိူၵ်ႈတင်ႈသေ သိုၵ်းမၢၼ်ႈၵဵပ်းဢဝ်ဝႆႉ သဵၼ်ႈမၢႆမုင်ႉႁေႃႁိူၼ်း။ ၼႂ်းႁိူၼ်း မီးၵူၼ်းလၢႆၵေႃႉဢၼ်ဝႃႈၼၼ်ႉ လႆႈသဵၼ်ႈမၢႆၵႂႃႇယဝ်ႉလႄႈ ၵူၼ်းမိူင်းလၢႆလၢႆတီႈမႆႈၸႂ် ၵူဝ်သိုၵ်းမၢၼ်ႈ တဵၵ်းၶၢၼ်းၵဵပ်းသိုၵ်းထႅင်ႈ။
ပၵ်းပိူင် ၵူၼ်းမိူင်းတေလႆႈႁဵတ်းသိုၵ်းၼႆႉ ၸွမ်ၸိၵ်းသိုၵ်း တၢၼ်းသူၺ်ႇ တိုတ်ႉၸၼ်ဝၢင်းၽႅၼ်မႃး ၸဵမ်မိူဝ်ႈ ဝၼ်းတီႈ 4 လိူၼ်ၼူဝ်ႊဝႅမ်ႊပိူဝ်ႊ ပီ 2010။ ၵူၺ်းၵႃႈ ၽွင်းပၢၼ်ၼၼ်ႉ ဢမ်ႇလႆႈၸႂ်ႉတိုဝ်းပၵ်းပိူင်ၼႆႉ။
ဝၢႆးသိုၵ်းမၢၼ်ႈယိုတ်းမိူင်း ၸုမ်းလုၵ်ႉၽိုၼ်ႉလေႃႇတိုၵ်းသိုၵ်းမၢၼ်ႈႁၢဝ်ႈႁႅင်းသေ ထိုင်တီႈလႆႈပွႆႇၽႃႈ ဝဵင်းၼိုင်ႈယဝ်ႉဝဵင်းၼိုင်ႈ။ ၼႂ်းဝၼ်းတီႈ 10 လိူၼ်ထူၼ်ႈသွင် ပီ 2024 သိုၵ်းမၢၼ်ႈ ၸင်ႇတႄႇၸႂ်ႉတိုဝ်းပၵ်းပိူင် ၵူၼ်းမိူင်းတေလႆႈႁဵတ်းသိုၵ်းၼႆႉသေ တဵၵ်းၶၢၼ်းၵဵပ်းဢဝ်ၵူၼ်းၼုမ်ႇ ၸဵမ်ယိင်းၸဵမ်ၸၢႆး။
ၸွမ်းၼင်ႇၼႂ်းပၵ်းပိူင်မၵ်းမၼ်ႈဝႆႉၼၼ်ႉ ၼိုင်ႈၸုပ်ႈလႂ် ၵဵပ်းဢဝ် 5000ၵေႃႉ၊ ၶၢဝ်းတၢင်း 2ပီၼႆႉ တပ်ႉသိုၵ်းမၢၼ်ႈ လႆႈႁႅင်းသိုၵ်းမႂ်ႇ 1သႅၼ်ၵေႃႉ။
ဝၢႆးလင် သိုၵ်းမၢၼ်ႈၸႂ်ႉတိုဝ်း ပၵ်းပိူင်ၵဵပ်းသိုၵ်းၼႆႉ ၵူၼ်းၼုမ်ႇၵမ်ႈၼမ် ဢွၼ်ၵၼ်ငိူင်ႉပၢႆႈဢွၵ်ႇမိူင်း တေႃႇထိုင်ယၢမ်းလဵဝ် ဢမ်ႇပႆႇပွၵ်ႈၶိုၼ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ