တွၼ်ႈတႃႇပၢင်လိူၵ်ႈတင်ႈ ပွၵ်ႈၵမ်းသၢမ် တေမႃးၼႆႉ ပႃႇတီႇသၢင်ႇသီႈ (USDP ) ဢဝ်ၶဝ်ႈၼမ်ႉတၢင်းၵိၼ်သေ သမ်ႉပေႃး သူၼ်းတုမ်ႁူၺ်းႁွင်ႉယူႇသေတႃႉ ၵူၼ်းမိူင်းသီႇပေႃႉ ဢမ်ႇသူၼ်ၸႂ် ဝႃႈၼႆ ။
မိူဝ်ႈဝႃးဝၼ်းတီႈ 7/1/2025 ယၢမ်းၵၢင်ၼႂ် ပႃႇတီႇသၢင်ႇသီႈ ဢဝ်ၶဝ်ႈၼမ်ႉတၢင်းၵိၼ်သေ ၵႂႃႇႁူပ်ႉ ၵူၼ်းမိူင်း တီႈႁူင်းႁဵၼ်း ဝၢၼ်ႈမႂ်ႇၵုၼ်ၸၢင်ႈလဵၵ်း ဢိူင်ႇတႃႈတေႈ ၼႂ်းၸႄႈဝဵင်းသီႇပေႃႉ ။
ပႃႇတီႇသၢင်ႇသီႈ ဢဝ်ၶဝ်ႈသၢၼ် 3 ပေႇ ၊ ၼမ်ႉမၼ်း သၢမ်ၶၼ်ႁႃႈၵျၢပ်ႈ ၊ ထူဝ်ႇလိူင် လႄႈ ပႃႁႅင်ႈပႃၼဝ်ႈ မႃးၸႅၵ်ႇပၼ်ၵူၼ်းဝၢၼ်ႈတႃႈတႄႈ တႃႇၵူၼ်း 250 ၵေႃႉ သေလၢတ်ႈၼႄပႃး လၢႆးတွတ်ႈၶႅပ်းၵၢင်ၸႂ် ဝႃႈၼႆ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ တီႈတႃႈတေႈ ပႃႇတီႇသၢင်ႇသီႈ လူင်းမႃးသူၼ်းတုမ်ၵူၼ်းမိူင်း ၵေႃႈဝႃႈလႆႈ ၊ မႃးတူၺ်းၵူၼ်းဝၢၼ်ႈဢၼ်ၵိၼ်းၸႂ်သေ ၸႅၵ်ႇၶဝ်ႈသၢၼ်သၢမ်ပေႇ ၊ ၼမ်ႉမၼ်း ၊ ပႃႁႅင်ႈ ပႃၼဝ်ႈ ၸိူဝ်းၼႆႉ ၊ ၵူၼ်းဝၢၼ်ႈတႄႉ ပေႃးဝႃႈၸႂ်ႉၵႂႃႇၶိုၼ်ႈပၢင်ၵုမ်ၼႆၵေႃႈ ၵႂႃႇသေၸိူင်ႉၼၼ်ၵူၺ်းၵေႃႈ ၽႂ်ဢမ်ႇပေႃးၵႃႈႁိုဝ် ဢမ်ႇသူၼ်ၸႂ်သင်”- ဝႃႈၼႆ ။
မိူၼ်ၼင်ႇၼႆ ဝၼ်းတီႈ 6/1/2025 ယၢမ်းၵၢင်ၼႂ် ပႃႇတီႇသိူဝ်ၽိူၵ်ႇလူင်းသူၼ်းတုမ် လၢတ်ႈၼႄ လၢႆးတွတ်ႈၶႅပ်းၵၢင်ၸႂ် တီႈၼႂ်းဢိူင်တႃႈတေႈ မီးၵူၼ်းၶဝ်ႈႁူမ်ႈ 300 ၵေႃႉပၢႆ ။ ဢိူင်ႇတႃႈတေႈၼႆႉ လင်ႁိူၼ်းမီး 480 လင် ႁူဝ်ၵူၼ်းႁူမ်ႈ 1607 ၵေႃႉ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ပၢင်လိူၵ်ႈတင်ႈပွၵ်ႈၼႆႉ ႁဵတ်းသင်လႄႈ ၵူၼ်းဢမ်ႇသူၼ်ၸႂ်ၼႆ မၼ်းတိုၼ်းမီးၽႅၼ်ဝႆႉယဝ်ႉ ဝႃႈပႃႇတီႇသၢင်ႇသီႈ တိုၼ်းတေပေႉၼႆ။ ၵူၼ်းမိူင်းၵေႃႈႁူႉၵၼ်ယူႇ လွင်ႈၶဵင်ႇတႃႉ လွင်ႈဢၼ်လီတိုၼ်ႇတဵၼ်ႈတွၼ်ႈတႃႇပၢင်လိူၵ်ႈတင်ႈဢၼ်ၼႆႉဢမ်ႇမီးသင် ။ ဢမ်ႇလီတိုၼ်ႇတဵၼ်ႈသင်ၸွမ်းသင် ဢမ်ႇလီသူၼ်ၸႂ် ႁူႉၵၼ်ဝႆႉယူႇယဝ်ႉ ဝႃႈၽႂ်တေပေႉၼႆ”- ဝႃႈၼႆ ။
ပၢင်လိူၵ်ႈတင်ႈ ၵမ်းသၢမ်ၼႆႉ ဢၼ်ၶဝ်ႈၶေႉၶဵင်ႇတီႈ ဝဵင်းသီႇပေႃႉ မီးပႃႇတီႇသွင်ဢၼ် ။ ပဵၼ်ပႃႇတီႇ သၢင်ႇသီႈ ( USDP ) လႄႈ ပႃႇတီႇ သိူၵ်ၽိူၵ်ႇ (SNDP) ဝႃႈၼႆ ။
ပၢင်လိူၵ်ႈတင်ႈ ပွၵ်ႈၵမ်း 3 ၼႆႉ မိူင်းႁူမ်ႈတုမ်ပတ်းပိုၼ်ႉ တေၸတ်းႁဵတ်း 63 ၸႄႈဝဵင်း ၼႂ်းမိူင်းတႆး ပႃး 9 ၸႄႈဝဵင်း ပဵၼ် ၸႄႈဝဵင်းမၢၵ်ႇမၢင်၊ ၸႄႈဝဵင်းပၢင်လွင်း၊ ၸႄႈဝဵင်းယွင် ႁူၺ်ႈ၊ ၸႄႈဝဵင်းၾၢႆၶုၼ်၊ ၸႄႈဝဵင်းမိူင်းၼၢႆး၊ ၸႄႈဝဵင်းၵေးသီး၊ ၸႄႈဝဵင်းမိူင်းသူႈ၊ ၸႄႈဝဵင်းသီႇပေႃႉ လႄႈ ၸႄႈဝဵင်းၵျွၵ်ႉမႄး ။
သိုၵ်းမၢၼ်ႈၼႆႉ ၸတ်းႁဵတ်းပၢင်လိူၵ်ႈတင်ႈၸုမ်ႇၵူႈ ၼႂ်းမိူင်းႁူမ်ႈတုမ်ပတ်းပိုၼ်ႉၵႂႃႇ သၢမ်ၸုပ်ႈ။ ၸုပ်ႈၼိုင်ႈ ၸတ်းႁဵတ်း ဝၼ်းတီႈ 28 လိူၼ်တီႊသႅမ်ႊပိူဝ်ႊ ပီ 2025၊ ၸုပ်ႈသွင် ပဵၼ်ဝၼ်းတီႈ 11 လိူၼ်ၵျႅၼ်ႊၼိဝ်ႊရီႊ ပီ 2026 ၊ ၸုပ်ႈသၢမ်ပဵၼ်ဝၼ်းတီႈ 25 လိူၼ်ၵျႅၼ်ႊၼိဝ်ႊရီႊ ပီ 2026 ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ