ၸုမ်းဢမ်ႇႁူႉၾၢႆႇၸုမ်းၼိုင်ႈ ၶဝ်ႈယိုဝ်းၵူၼ်းဝၢၼ်ႈၼႂ်းဝၢၼ်ႈပၢင်လူင် ၸေႈဝဵင်းၼမ်ႉတူႈ။ ၵူၼ်းဝၢၼ်ႈမၢတ်ႇၸဵပ်း 2 ၵေႃႉ သူင်ႇတူဝ်ယူတ်းယႃတီႈႁူင်းယႃသီႇပေႃႉ။
ဝၼ်းတီႈ 01/09/2018 ယၢမ်းၵၢင်ၶမ်ႈ မွၵ်ႈ 7:30 မူင်းၼၼ်ႉ မီးၸုမ်းဢမ်ႇႁူႉၾၢႆႇၶဝ်ႈယိုဝ်း ၼႂ်းဝၢၼ်ႈပၢင်လူင် ဢိူင်ႇပၢင်လူင် ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ၵူၼ်းဝၢၼ်ႈတိုၼ်ႇသၢၼ်ႈလႅၼ်ႈပၢႆႈ။ ၽွင်းၼၼ်ႉ လုင်းၸၢႆးၸၢမ်ႇထုၼ်း တင်း ၸၢႆးမူဝ် 2 ၵေႃႉ ၺႃး မၢၵ်ႇၵွင်ႈ မၢတ်ႇၸဵပ်းလိူဝ်ႁႅင်း။
ၸၢႆးလၢဝ်သႅင် ၽူႈၼမ်းၼႂ်းပႃႇတီႇႁူဝ်သိူဝ် SNLD ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်လႆႈႁူႉတႄႉ ယၢမ်းၵၢင်ၶမ်ႈမွၵ်ႈ 7:30 မူင်းၼၼ်ႉယဝ်ႉ ယွၼ်ႉသဵင်ၵွင်ႈတႅၵ်ႈၼႂ်းဝၢၼ်ႈသေ ၵူၼ်းဝၢၼ်ႈတူၵ်းၸႂ် သမ်ႉဢွၼ် ၵၼ်တိုၼ်ႇသၢၼ်ႈလႅၼ်ႈပၢႆႈ။ မၢၵ်ႇၵွင်ႈတိူဝ်ႉၺႃး တီႈၼႃႈဢူၵ်း လုင်းၸၢႆးၸၢမ်ႇထုၼ်း ပဵၼ်ဢၼ်လီမႆႈၸႂ်၊ ၸၢႆးမူဝ်သမ်ႉ တိူဝ်ႉၺႃး တီႈမိုဝ်းၾၢႆႇၶႂႃ ” ဝႃႈၼႆ။
ၸုမ်းၸွႆႈထႅမ်ၵူၼ်းထူပ်းၽေး ၸႄႈဝဵင်းသီႇပေႃႉ ဢဝ် လုင်းၸၢႆးၸၢမ်ႇထုၼ်း တင်း ၸၢႆးမူဝ် တၢင်ႇလူတ်ႉၵႃး သူင်ႇႁူင်းယႃ ၸႄႈဝဵင်းသီႇ ပေႃႉ ယၢမ်းၵၢင်ၶိုၼ်း 10:30 မူင်း ၸင်ႇႁွတ်ႈၽႅဝ် ဝႃႈၼႆ။
လိူဝ်ၼၼ်ႉ မိူဝ်ႈဝၼ်းတီႈ 1 ယၢမ်းၵၢင်ၶိုၼ်း 10:30 မူင်း ဝၼ်းလဵဝ်ၵၼ်ၼၼ်ႉၵူၺ်း ၵူၼ်းဝၢၼ်ႈပၢင်လူင် ဢိူင်ႇပၢင် လူင် ၸႄႈဝဵင်း ၼမ်ႉတူႈ ဢွၼ်ၵၼ်ပၢႆႈၽေးသိုၵ်း ႁွတ်ႈၽႅဝ်ဝႆႉတီႈ ဝတ်ႉဢွင်ႇမင်ႇၵလႃႇၽူဝ်းတေႃႇ ၸႄႈဝဵင်းသီႇ ပေႃႉ ႁူမ်ႈၵၼ်မီး 193 ၵေႃႉ ဝႃႈၼႆ။
ၸၢႆးလၢဝ်သႅင် လၢတ်ႈဝႃႈ တေႃႈလဵဝ် ႁဝ်းၶႃႈ ၸုမ်းပႃႇတီႇႁူဝ်သိူဝ်လႄႈ ၸုမ်းၸွႆႈထႅမ်ၵူၼ်းထူပ်းၽေး ႁူမ်ႈၵၼ် ႁၢင်ႈႁႅၼ်း ပႂ်ႉႁပ်ႉၵူၼ်းပၢႆႈၽေးသိုၵ်း တေႁွတ်ႈမႃးၽႅဝ်ထႅင်ႈ တီႈဝတ်ႉၽူဝ်းတေႃႇ မွၵ်ႈႁူဝ်ၵူၼ်း 50- 60 ။ လိူဝ်ၼၼ်ႉ တီႈမၢၼ်ႈလီ ၵေႃႈ ၵူၼ်းပၢႆႈၽေး ႁွတ်ႈထိုင်မီးဝႆႉ” ဝႃႈၼႆ။
