တီႈမိူင်းယွင်း ၸိုင်ႈတႆးပွတ်းဢွၵ်ႇၼႆႉ သိုၵ်းမၢၼ်ႈလွၵ်ႇငိုတ်ႈ ၵူၼ်းမိူင်း တႃႇၵႂႃႇသႂ်ႇၶႅပ်းၵၢင်ၸႂ် ဢၼ်သိုၵ်းမၢၼ်ႈတေၸတ်းႁဵတ်းၵမ်းထီႉသွင်ၼႆႉ ဝႃႈၼႆ ။

ဝၼ်းတီႈ 11/1/2026 ဝၼ်းတိတ်ႉ တေမႃးၼႆႉ သိုၵ်းမၢၼ်ႈတေၸတ်းႁဵတ်း ပၢင်လိူၵ်ႈတင်ႈ ၵမ်းထီႉသွင် ။  ပၢင်လိူၵ်ႈတင်ႈၵမ်းထီႉသွင်ၼႆႉ မိူင်းတႆးပွတ်းဢွၵ်ႇပဵၼ် 6 ၸႄႈဝဵင်း၊ မိူင်းတႆးပွတ်းၸၢၼ်း 9 ၸႄႈဝဵင်း လႄႈ မိူင်းတႆးပွတ်းႁွင်ႇ 2 ၸႄႈဝဵင်း ႁူမ်ႈသဵၼ်ႈ 17 ၸႄႈဝဵင်း   ။

ၵူၼ်းမိူင်းယွင်းလၢတ်ႈၽူႈတွႆႇႁွၵ်ႈဝႃႈ – “ၵူၼ်းမိူင်းဢမ်ႇသူၼ်ၸႂ် ဢမ်ႇၶႂ်ႈၵႂႃႇသႂ်ႇၶႅပ်းၵၢင်သေတႃႉ ဢွၼ်ၵၼ်မႆႈၸႂ် တေထူပ်းပၼ်ႁႃဝၢႆးလင်မၼ်း ၊ ၽႂ်ၵေႃႈဢမ်ႇၶႂ်ႈမီးပၼ်ႁႃသင် ၊ ပေႃးဢမ်ႇၵႂႃႇသႂ်ႇၶႅပ်းၵၢင်ၸႂ်ဢမ်ႇလႆႈၼႆ ၵၢင်ႉၵႄႇၵေႃႈလွၵ်ႇဝႆႉပႃးထႅင်ႈ ”– ဝႃႈၼႆ ။

ယွၼ်ႉၵူၼ်းလူင်ၾၢႆႇသိုၵ်းမၢၼ်ႈလွၵ်ႇငိုတ်ႈဝႆႉလႄႈ ၵၢင်ႉၵႄႇၼႂ်းဝဵင်းၼႂ်းပွၵ်ႉ ႁွင်ႉ လၢတ်ႈၵူၼ်းဝၢၼ်ႈ တႃႇၵႂႃႇသႂ်ႇၶႅပ်းၵၢင်ၸႂ် ဢမ်ႇသႂ်ႇဢမ်ႇလႆႈလၢတ်ႈဝႆႉၼင်ႇၼႆ ။

တီႈဝဵင်းမိူင်းယွင်းၼႆႉ မီးႁူင်းတွတ်ႈၶႅပ်ႈၵၢင်ၸႂ်တီႈလဵဝ် ပဵၼ်တီႈ ပၢင်ႇပိတ်ႉမၢၵ်ႇၼင်- လႆႈႁူႉၼင်ႇၼႆ ။  

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ လွၵ်ႇငိုတ်ႈဝႆႉလႄႈ ၵၢင်ႉၵႄႇၵေႃႈ ႁွင်ႉလၢတ်ႈ ၵူၼ်းဝၢၼ်ႈဝႆႉ ၊ ပေႃးဢမ်ႇမႃးသႂ်ႇၶႅပ်းၵၢင်ၸႂ်ၼႆႉ ဢမ်ႇလႆႈၼႆ ၊ ႁူင်းတွတ်ႈၶႅပ်းၵၢင်ၸႂ်ၵေႃႈ မီးတီႈလဵဝ်ၵူၺ်း ၊ လႆႈယိၼ်းဝႃႈၶႅပ်းၵၢင်ၸႂ်လူင်ႈၼႃႈၼႆႉ ပႃႇတီႇသၢင်ႇသီႈပႄႉပုၼ်ႈဝႆႉယဝ်ႉၼႆ ”– ဝႃႈၼႆ ။

ပႃႇတီႇၶဝ်ႈလိူၵ်ႈတင်ႈ တီႈဝဵင်းမိူင်းယွင်းၼႆႉ မီး5 ဢၼ် ။ ပဵၼ် ပႃႇတီႇသၢင်ႇသီႈ (USDP)  ၊ ပႃႇတီႇသိူဝ်ၽိူၵ်ႇ (SNDP) ၊ ပႃႇတီႇဢွၼ်ၼမ်းၵူၼ်းမိူင်း (PPP) ၊ ပႃႇတီႇၵၢၼ်ၽွမ်ႉႁူမ်ႈၸၢဝ်းၶိူဝ်း (NUP) လႄႈ ပႃႇတီႇမုၼ်းလႅင်းၶိုၼ်ႈယႂ်ဢႃးၶႃႇ  ၼႆယဝ်ႉ ။

မိူဝ်ႈဝႃးဝၼ်းတီႈ 6/1/2026 ၼႆ သိုၵ်းမၢၼ်ႈပိုၼ်ၽၢဝ်ႇလၢတ်ႈဝႆႉဝႃႈ တွၼ်ႈတႃႇ ပၢင်လိူၵ်ႈတင်ႈၵမ်းသွင် တေဢွင်ႇမၢၼ်ၼၼ်ႉ လႆႈၸတ်းႁဵတ်းပၢင်ၵုမ်တီႈ ႁူင်းႁေႃပလႃႉမိၼ်းထိၼ်ႇ ႁွင်ႈၵၢၼ်ၾၢႆႇဢုပ်ႉပိူင်ႇၵူႈလွင်ႈ ဢၼ်မီးၼႂ်းၸႄႈဝဵင်းမိူင်းယွင်းၵႂႃႇ ဝႃႈၼႆ ။

တီႈဝဵင်းမိူင်းယွင်းၼႆႉ လိူဝ်သေ သိုၵ်းမၢၼ်ႈလႄႈ တပ်ႉပႂ်ႉလႅၼ်လိၼ်ယဝ်ႉ တပ်ႉသိုၵ်းဢူၺ်းလီ တီႊမူဝ်ႊၶရႅတ်ႊတိၵ်ႊၸိူဝ်ႉၸၢတ်ႈ (NDAA) လႄႈ ၶွင်ႊသီႊဢဝ်ၶိုၼ်းၸိုင်ႈတႆး (RCSS) ၸိူဝ်းၼႆႉၵေႃႈ တူင်ႉၼိုင်ယူႇသဝ်းဝႆႉ ဝႃႈၼႆ ။

ၸႄႈဝဵင်းၸိူဝ်းတေလႆႈၸတ်းႁဵတ်းပၢင်လိူၵ်ႈတင်ႈ ၼႂ်းမိူင်းတႆး တႃႇ 17 ၸႄႈဝဵင်းၼႆႉ ပဵၼ်ၸႄႈဝဵင်းယႂႃႇငၢၼ်ႇ၊ ၸႄႈဝဵင်းသီႇသႅင်ႇ၊ ၸႄႈဝဵင်းၵၢတ်ႇလေႃႉ၊ ၸႄႈဝဵင်းမိူင်းၶၢၵ်ႇ၊ ၸႄႈဝဵင်းမိူင်းပဵင်း၊ ၸႄႈဝဵင်းမိူင်းၽျၢၵ်ႈ၊ ၸႄႈဝဵင်းလွၵ်ႉၸွၵ်ႇ၊ ၸႄႈဝဵင်းတၢင်ႉယၢၼ်း၊ ၸႄႈဝဵင်းမိူင်းယႆ၊ ၸႄႈဝဵင်းၵုၼ်ႁဵင်၊ ၸႄႈဝဵင်းမိူင်းတူၼ်၊ ၸႄႈဝဵင်းမိူင်းယွင်း၊ ၸႄႈဝဵင်းမိူင်းယၢင်း၊ ၸႄႈဝဵင်းမိူင်းပၼ်ႇ၊ ၸႄႈဝဵင်းမွၵ်ႇမႂ်ႇ၊ ၸႄႈဝဵင်းမိူင်းၵိုင် လႄႈ ၸႄႈဝဵင်းလၢႆးၶႃႈ ၸဵမ်ၸိူဝ်းၼႆႉ။

မိူၼ်ၼင်ႇၼႆ တီႈဝဵင်းမိူင်းတူၼ်ၵေႃႈ တွၼ်ႈတႃႇပၢင်လိူၵ်ႈတင်ႈၼႆသေ ၶွမ်ႊမသျိၼ်ႊပၢင်လိူၵ်ႈတင်ႈ  ၸႅၵ်ႇၵူၼ်းႁၢင်ႈႁႅၼ်းတႃႇတေၵႂႃႇပႂ်ႉႁူင်းတွတ်ႈၶႅပ်းၵၢင်ၸႂ်သေဢမ်ႇၵႃး  ဢဝ်ၵႃးသေႃႇလၢတ်ႈၵူၼ်းမိူင်း ၼႂ်းပွၵ်ႉၼႂ်းဝဵင်း ႁႂ်ႈၵႂႃႇတွတ်ႈၶႅပ်းၵၢင်ၸႂ်ၼႆယဝ်ႉ ။