ႁူဝ်ပဝ်ႈမႂ်ႇ ဢႃႊသီႊယၼ်ႊ တိုၵ်းသူၼ်း ၸွမ်ၸိုၵ်းသိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇထႅင်ႈဝႃႈ ႁႂ်ႈၽေႃႇၼမ်ႉၼႄတူဝ် ၶေႃႈတူၵ်းလူင်းဢႃႊသီႊယၼ်ႊ 5ၶေႃႈၼၼ်ႉ ဝႃႈၼႆ။

ၼႂ်းပီ 2026 ၼႆႉ ၸွမ်ၸိုင်ႈမိူင်း ၾိလိပ်ႉပိၼ်ႊသ်  မႃႊၵူဝ်ႉသ်ၵျူႊၼီႊယႃႊ  ႁပ်ႉပဵၼ် ႁူဝ်ပဝ်ႈမႂ်ႇ ဢႃႊသီႊယၼ်ႊ။ တႃႇတေၶဝ်ႈဢွၵ်ႇဢုပ်ႇဢူဝ်းသိုၵ်းမၢၼ်ႈသမ်ႉ ႁႂ်ႈၽွင်းလူင်ၵၢၼ်ၼွၵ်ႈမိူင်း မိူင်းၾိလိပ်ႉပိၼ်ႊသ် ၼၢင်းထေႊရေႊသႃႊ ရႃႊသႃႊရူဝ်ႊ ႁပ်ႉႁဵတ်းပဵၼ် ၽွင်းတၢင်ဢႃႊသီႊယၼ်ႊ ၵဵဝ်ႇၵပ်းမိူင်းမၢၼ်ႈ။

ၼႂ်းဝၼ်းတီႈ 6/1/2026 (မိူဝ်ႈဝႃး) ၼႆႉ ၽွင်းတၢင်ဢႃႊသီႊယၼ်ႊ ၵဵဝ်ႇၵပ်းမိူင်းမၢၼ်ႈ ႁူပ်ႉထူပ်းတင်း ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ တီႈၼေႇပျီႇတေႃႇ။ သိုၵ်းမၢၼ်ႈႁၢႆးငၢၼ်းၼႄလွင်ႈပၢင်လိူၵ်ႈတင်ႈမိူင်းမၢၼ်ႈ ။ ၼၢင်းထေႊရေႊသႃႊ  ဢုပ်ႇဢူဝ်းလၢတ်ႈၵႂႃႇ တႃႇႁႂ်ႈသိုၵ်းမၢၼ်ႈ ၽေႃႇၼမ်ႉၼႄတူဝ် ၶေႃႈတူၵ်းလူင်းဢႃႊသီႊယၼ်ႊ 5 ၶေႃႈ ဝႃႈၼႆ။

ၽွင်းလူင်ၾၢႆႇၼွၵ်ႈမိူင်း မိူင်းၾိလိပ်ႉပိၼ်ႊသ် လၢတ်ႈဝႃႈ – တႃႇတေၵႄႈလိတ်ႈပၼ်ႁႃလွင်ႈၵပ်ႉၵိၼ်း မိူင်းႁူမ်ႈတုမ်မၢၼ်ႈၼၼ်ႉ တေသိုပ်ႇႁဵတ်းသၢင်ႈၽေႃႇၼမ်ႉၼႄတူဝ်ၵႂႃႇ ၸွမ်းၼင်ႇၶေႃႈတူၵ်းလူင်း ၸုမ်းဢႃႊသီႊယၼ်ႊ 5 ၶေႃႈမီးဝႆႉၼၼ်ႉ ဝႃႈၼႆ။

မိၼ်းဢွင်ႇလၢႆႇတႄႉ ဢုပ်ႇဢူဝ်းလၢတ်ႈၼႄ လွင်ႈလႆႈၸတ်းပၢင်လိူၵ်ႈတင်ႈပွၵ်ႈၵမ်းၼိုင်ႈ လႄႈ လွင်ႈႁၢင်ႈႁႅၼ်းဝႆႉ တႃႇတေၸတ်းႁဵတ်းထႅင်ႈ ပၢင်လိူၵ်ႈတင်ႈ ပွၵ်ႈၵမ်းသွင်၊ ၵမ်းသၢမ်။ လိူဝ်ၼၼ်ႉ ၼႄၶေႃႈဢၢင်ႈထႅင်ႈဝႃႈ မိူဝ်ႈပၢင်လိူၵ်ႈတင်ႈ 2020 ၼၼ်ႉ ယွၼ်ႉဢမ်ႇမီးလွင်ႈပူင်ႇသႂ်လႄႈ တပ်ႉသိုၵ်း ၸင်ႇလႆႈယိုတ်းဢႃႇၼႃႇၸိုင်ႈမိူင်း ဝႃႈၼႆ။