ၼႂ်းဝၼ်းတီႈ 3 လိူၼ်ၵျႅၼ်ႊၼိဝ်ႊရီႊ ပီ 2026 ၼႆႉ ၶႄႇၵဝ်ႈၵၢင်ႉ MNDAA ပိုၼ်ၽၢဝ်ႇဢွၵ်ႇမႃး ပဵၼ်တၢင်းၵၢၼ်ဝႃႈ ၵႃးလူင် တၢင်ႇဢွႆႈ တၢင်ႇၶဝ်ႈၵၢပ်ႇလႄႈ တၢင်ႇၶူဝ်းႁႆႈၶူဝ်းသူၼ် ၶၢမ်ႈလႅၼ်လိၼ် ဝဵင်းၼမ်ႉၽႃႈ (ၶျိၼ်းသူၺ်ႇႁေႃႇ) ၸိုင်ႈတႆးပွတ်းႁွင်ႇသေ ၶဝ်ႈၾင်ႇမိူင်းၶႄႇ ၵူႈဝၼ်းယဝ်ႉ ဝႃႈၼႆ။

ယၢမ်းလဵဝ် ၵႃးလူင်တၢင်ႇဢွႆႈ ၶဝ်ႈၵၢပ်ႇ တိူဝ်းၼမ်မႃးႁႅင်း။ ၼိုင်ႈဝၼ်းၼႆႉ လတ်းလၢၼ်ႇ ၶျိၼ်းသူၺ်ႇႁေႃႇ ၶဝ်ႈၾင်ႇမိူင်းၶႄႇ 200 လမ်းပၢႆ။

ယွၼ်ႉပဵၼ်ၶၢဝ်းတႅပ်းဢွႆႈ ဢဝ်မၢၵ်ႇၶဝ်ႈတဝ်ႈၼမ်ႉ ၼႂ်းႁႆႈၼႂ်းသူၼ် ဢွၵ်ႇၶၢႆလႄႈ ရူတ်ႉၵႃးတေႃႉတၢင်ႇမၢၵ်ႇၶဝ်ႈတဝ်ႈၼမ်ႉ ၵမ်ႈၼမ် ပဵၼ်ဢွႆႈ 50 ပိူဝ်ႊသႅၼ်ႊပၢႆလႄႈ ပဵၼ်ၶဝ်ႈၵၢပ်ႇ 40 ပိူဝ်ႊသႅၼ်ႊပၢႆဝႃႈၼႆ။

ၵဝ်ႈၵင်ႉပိုၼ်ၽၢဝ်ႇဝႆႉဝႃႈ ယၢမ်းလဵဝ် ပဵၼ်ၶၢဝ်းမၢၵ်ႇၶဝ်ႈတဝ်ႈၼမ်ႉၼႂ်းၼႃႈလိၼ်ၵဝ်ႈၵၢင်ႉၵုမ်းၵမ်ၼၼ်ႉ ထုၵ်ႇလီဢဝ်ဢွၵ်ႇၶၢႆယဝ်ႉလႄႈ ၸင်ႇလႆႈၸွႆၶိုင်ပွင်တႃႇဢဝ်ဢွၵ်ႇၶၢႆလႆႈမိူင်းၶႄႇ ဝႃႈၼႆဝႆႉ။

မိူဝ်ႈပီၵၢႆႈၽွင်းလိူၼ်မၢတ်ႉၶျ်ၼႆႉၵေႃႈၾၢႆႇသိုၵ်းၵဝ်ႈၵၢင်ႉၶတ်းၸႂ်ပိုတ်ႇပၼ်လၢၼ်ႇလႅၼ်လိၼ်ၾၢႆႇတၢင်းၶဝ်ယူႇသေတႃႉ ၾၢႆႇမိူင်းၶႄႇသမ်ႉဢမ်ႇယွမ်းပိုတ်ႇလႄႈ ၵၢၼ်ၵႃႉၶၢႆလႅၼ်လိၼ်လႆႈၵိုတ်းၶၢင်ႉၶမ်ဝႆႉ။

မိူဝ်ႈၽႅၼ်ၵၢၼ်ယၼ်ႇသိုၵ်း 1027 ၼၼ်ႉ ၶႄႇၵဝ်ႈၵၢင်ႉ MNDAA ယိုတ်းၵုမ်းလႆႈဝႆႉ သုၼ်ၵႃႉၶၢႆ တီႈလႅၼ်လိၼ် ၶျိၼ်းသူၺ်ႇႁေႃႇ (ဝဵင်းၼမ်ႉၽႃႈ) ၼႂ်းၸိုင်ႈတႆးပွတ်းႁွင်ႇ။ ဝၢႆးလင်ၼၼ်ႉ ႁူဝ်လိူၼ် မၢတ်ႉၶျ် ပီ 2024 ၾၢႆႇၶႄႇၵဝ်ႈၵၢင်ႉ ပိုတ်ႇၶိုၼ်းၽၵ်းတူလႅၼ်လိၼ် ၶျိၼ်းသူၺ်ႇႁေႃႇသေတႃႉ ၾၢႆႇမိူင်းၶႄႇ သိုပ်ႇပိၵ်ႉဢိုတ်းဝႆႉ။

ယၢမ်းလဵဝ်သၢႆသဵၼ်ႈတၢင်းၵႃႉၶၢႆ ဝဵင်းလိူဝ်ႇလႄႈလႅၼ်လိၼ်ၶႄႇၼႆႉ သိုၵ်းမၢၼ်ႈလႄႈသိုၵ်းၵဝ်ၵၢင်ႉ ၵုမ်းၵမ်ဝႆႉၵေႃႉတွၼ်ႈတွၼ်ႈ။ သိုၵ်းမၢၼ်ႈတႄႉပိုၼ်ၽၢဝ်ႇဝႆႉဝႃႈသဵၼ်ႈတၢင်းၵႃးဝဵင်းလိူဝ်ႇ- မတ်ႉတယႃႇ- ၸိၼ်ႉၵူး-သပိတ်ႈၵျိၼ်း- မိူင်းၵုတ်ႈ တႄႉ ပိုတ်ႇပၼ်ၶိုၼ်းႁၢင်ပီ 2025 ယဝ်ႉဝႃႈၼႆ။