ၾင်ႇမိူင်းၶႄႇ ႁပ်ႉသိုဝ်ႉဢွႆႈ – ၶဝ်ႈၵၢပ်ႇ တၢင်းၾင်ႇမိူင်းတႆး – မိူင်းမၢၼ်ႈယဝ်ႉ ၶူဝ်းၵုၼ်ႇဢၼ်လုၵ်ႉတၢင်း မိူင်းၶႄႇ တေႃႉၶဝ်ႈမႃးတၢင်းမိူင်းတႆးတႄႉ တိုၵ်ႉထုၵ်ႇပိၵ်ႉဢိုတ်းဝႆႉယူႇ ပႆႇပၼ်ၶဝ်ႈ ဝႃႈၼႆ။

ယၢမ်းလဵဝ် ၸွမ်းၵဵတ်ႉ/ လၢၼ်ႇလႅၼ်လိၼ်တႆး – ၶႄႇ မိူၼ်ၼင်ႇ – ပၢင်ႇသၢႆး၊ သၢမ်ၸဵင်ႇၶမ်း (ၵျိၼ်ႊသၢၼ်ႊၵျေႃႉ) ၼႂ်းၸႄႈဝဵင်းမူႇၸေႊလႄႈ တီႈဝဵင်းၼမ်ႉၽႃႈ (ၵျိၼ်ႊသူၺ်ႇႁေႃႇ) ၼႂ်းၸိုင်ႈတႆးပွတ်းႁွင်ႇ ၸိူဝ်းၼႆႉ ၾင်ႇမိူင်းၶႄႇ ပိုတ်ႇၽၵ်းတူမိူင်း ႁပ်ႉသိုဝ်ႉဢွႆႈၶဝ်ႈၵၢပ်ႇယဝ်ႉ ဝႃႈၼႆ။

ၵူၼ်းဝဵင်းၼမ်ႉၽႃႈ လၢတ်ႈၽူႈတွႆႇႁွၵ်ႈဝႃႈ – “ၶူဝ်းၵုၼ်ႇ ဢၼ်လုၵ်ႉတၢင်းမိူင်းမၢၼ်ႈ – မိူင်းတႆး မိူၼ်ၼင်ႇ – ဢွႆႈ၊ ၶဝ်ႈ ၵၢပ်ႇတႄႉ သူင်ႇၶဝ်ႈတၢင်းမိူင်းၶႄႇ လႆႈယဝ်ႉ။ ၵူၺ်းၵႃႈ ၶူဝ်းၵုၼ်ႇတၢင်းမိူင်းၶႄႇတႄႉ ၶဝ်ဢမ်ႇပွႆႇ ဢွၵ်ႇမႃးတၢင်းၼႆႉသေမဵဝ်း။ ၵႃးတၢင်ႇဢွႆႈ၊ ၶဝ်ႈၵၢပ်ႇတႄႉ ပေႃးထိုင်တီႈလၢၼ်ႇယဝ်ႉ ၵူၼ်းၾၢႆႇမိူင်းၶႄႇၶဝ် မႃးပၼ်ႇပုတ်ႈႁေႃႈၶဝ်ႈၵႂႃႇႁဵတ်းၼၼ်ဢေႃႈ။ ၵူၼ်းၾင်ႇၼႆႉတႄႉ ႁေႃႈၶဝ်ႈဢမ်ႇလႆႈ”- ဝႃႈၼႆ။

တီႈၽၵ်းတူမိူင်း ဝဵင်းၼမ်ႉၽႃႈ – မိူင်းတိင်ၼႆႉ ၵမ်ႈၼမ် ၶူဝ်းၵုၼ်ႇ ဢၼ်လုၵ်ႉတၢင်းမိူင်းတႆး သူင်ႇၸူးသမ်ႉ တေပဵၼ် ဢွႆႈၶဝ်ႈၵၢပ်ႇ ၵမ်ႈၼမ်။ ယၢမ်းလဵဝ် ၵႃးတၢင်ႇဢွႆႈ၊ ၶဝ်ႈၵၢပ်ႇ တေႃႇသူင်ႉၶဝ်ႈမိူင်းၶႄႇ ၼိုင်ႈ ဝၼ်းလႂ် မွၵ်ႈ 50 လမ်း ဝႃႈ ၼႆ။

ယၢမ်းလဵဝ် ၶၼ်ဢွႆႈၼႆႉ ၼမ်ႉၼၵ်း ၼိုင်ႈတၼ်ႊလႆႈ 370 ယႂၼ်ႊ (ငိုၼ်းၶႄႇ)။ ၶဝ်ႈၵၢပ်ႇသမ်ႉ ၼိုင်ႈတၼ်ႊ 1,560 ယႂၼ်ႊ ပီၵၢႆၵေႃႈ လႆႈၶၼ်မၼ်းပဵင်းၼႆႉၵူၺ်း ဢမ်ႇပေႃးပိူင်ႈၵၼ် ဝႃႈၼႆ။

တႃႇၽုၵ်ႇဢွႆႈ ပီၼႆႉ ယွၼ်ႉလႆႈလူင်းတိုၼ်းလၢင်း ၸဵမ်ၵႃႈႁႅင်း၊ ၵႃႈၾုၼ်ႇထၢတ်ႈ ၸိူဝ်းၼႆႉ ၼမ်လိူဝ်ၵူႈပီလႄႈ ၸဝ်ႈသူၼ်ဢွႆႈၶဝ် ဢမ်ႇလႆႈၼမ်ႉမႅတ်ႈၼမ်ႉတွၼ်းၼမ်။ ယဝ်ႉၵေႃႈ ငဝ်းလၢႆး ၸွမ်းလႅၼ်လိၼ် လႅၵ်ႈလၢႆႈယူႇၵူႈၶၢဝ်းလႄႈ ၼႆႉၵေႃႈ ပဵၼ်လွင်ႈယၢပ်ႇၽိုတ်ႇဝႆႉထႅင်ႈ ဝႃႈၼႆ။

ၸဝ်ႈသူၼ်ဢွႆႈ လႅၼ်လိၼ်တႆး – ၶႄႇ လၢတ်ႈၽူႈတွႆႇႁွၵ်ႈဝႃႈ – “ပီၼႆႉ ၸဝ်ႈသူၼ်ဢွႆႈတႄႉ မၼ်းဢမ်ႇ ၶူပ်းတိုၼ်းလၢင်း။ ယွၼ်ႉလႆႈလူင်းတိုၼ်းလၢင်းၼမ်။ မိူဝ်ႈၽုၵ်ႇသွမ်ႈၼၼ်ႉ ၸဵမ်ၵႃႈထႆ၊ ၵႃႈၽိူဝ်၊ ၵႃႈၾုၼ်ႇ၊ ၵႃႈသွမ်ႈ ၸိူဝ်းၼႆႉ ၵႃႈ ၵူႈမဵဝ်း တေႃႇပေႃးယဝ်ႉ။ ဢွႆႈၼႆႉ မႃးႁဵတ်းမတ်ႉသေ တေႃႉတၢင်ႇၵႃး ၼိုင်ႈ မတ်ႉ လႆႈလူင်းတိုၼ်းထႅင်း ဢမ်ႇယွမ်း 800 ပျႃး။ ပေႃးမီး 60-70 မတ်ႉ ၸင်ႇတေမီးၼိုင်ႈတၼ်ႊ။ ၼိုင်ႈ တၼ်ႊလႆႈငိုၼ်းၶႄႇ 370-390 ယႂၼ်ႊၵူၺ်း”- ဝႃႈ ၼႆ။

ၼွၵ်ႈလိူဝ် ၸဝ်ႈသူၼ်ဢွႆႈၶဝ် ဢမ်ႇပေႃးမီးၼမ်ႉတွၼ်းယဝ်ႉ ယွၼ်ႉၾင်ႇမိူင်းၶႄႇ ပိၵ်ႉဢိုတ်း ဢမ်ႇပၼ်တေႃႉၶူဝ်း ၵုၼ်ႇၶဝ်ႈမႃးတၢင်းမိူင်းတႆးလႄႈ ယၢမ်းလဵဝ် ၶူဝ်းၵုၼ်ႇၵိၼ်ယႅမ်ႉ ၵႃႈၶိုၼ်ႈၵူႈမဵဝ်း ၵူၼ်းမိူင်း ဢွၼ်ၵၼ်ထူပ်းတၢင်းယၢပ်ႇ။

ၵူၼ်းၵႃႉၶၢႆ ဝဵင်းၼမ်ႉၽႃႈ လၢတ်ႈၽူႈတွႆႇႁွၵ်ႈဝႃႈ – “ပေႃးမႃးတူၺ်း ဢၼ်ၶႄႇၶဝ် ႁဵတ်းၼႆႉ မၼ်းဢမ်ႇမီးလွင်ႈၽဵင်ႇပဵင်း။ မိူၼ်ႁဝ်းၶႃႈ ပိုတ်ႇႁၢၼ်ႉၶၢႆၵုၼ်ႇၼႆႉ ဢမ်ႇၸၢင်ႈတေႃႉၶူဝ်းၵုၼ်ႇၶဝ်ႈမႃး။ ပေႃးႁဵတ်းၼႆ ၵႂႃႇတိၵ်းတိၵ်းတႄႉ ႁဝ်းၶႃႈ တေဢမ်ႇၸၢင်ႈၶၢႆသင်ယဝ်ႉ။ ၶူဝ်းၵုၼ်ႇ ဢၼ်ၶဝ်ပၼ်ၶႂၢင်ႉတေႃႉတၢင်ႇ တီႈမူႇၸေႊၼၼ်ႉ လႆႈတေႃႉတင်းရူတ်ႉၶိူင်ႈ ဢဝ် လႆႈမႃးၵမ်းဢိတ်းၵူၺ်း။ တႃႇတဵမ်ရူတ်ႉၵႃး ၼိုင်ႈလမ်းၼႆႉ ဢမ်ႇငၢႆႈ။ ၶၼ်ၵုၼ်ႇၵေႃႈ ၶိုၼ်ႈၸွမ်းတိၵ်းတိၵ်း ၵူၼ်းမိူင်းတႄႉ ယၢပ်ႇဢေႃႈ”-ဝႃႈၼႆ။

တေႃႈလဵဝ် ၽၵ်းတူလူင် မိူင်းၶႄႇၼႆႉ လႆႈဝႃႈပိၵ်ႉဝႆႉၵူၺ်း ဢမ်ႇၸၢင်ႈတေႃႉတၢင်ႇၶဝ်ႈမႃးသင် ၼမ်ႉမၼ်း ၶိူင်ႈၸၢၵ်ႈ (ဢိၼ်ႊၵျိၼ်ႊဝၢႆႊ) ၼိုင်ႈတဝ်ႈဢွၼ်ႇၵူၺ်း ယင်းဢမ်ႇပၼ်တေႃႉၶဝ်ႈမႃး။ ယၢမ်းလဵဝ် ၶၼ်ၼမ်ႉမၼ်းၸိူဝ်ႉၾႆး ၼိုင်ႈပုင်း (ပုင်းႁၢတ်ႈ) ၼႆႉ လႆႈပၼ် 7,500 ပျႃး မၢင်တီႈ 6,500 ပျႃး။ ၵွၼ်ႇပႆႇပိၵ်ႉၽၵ်းတူ မိူင်းၼၼ်ႉ လႆႈပၼ် 2,500 ပျႃး ၵူၺ်း – ၵူၼ်းပိုၼ်ႉတီႈ ဝဵင်းပၢင်ႇသၢႆးလၢတ်ႈ။

ၽၵ်းတူလႅၼ်လိၼ်တႆး – ၶႄႇၼႆႉ လႆႈပိၵ်ႉဢိုတ်းမႃး မိူဝ်ႈဝၼ်းတီႈ 21/11/2024 ယူႇတီႈ ၾၢႆႇမိူင်းၶႄႇ ပိုၼ် ၽၢဝ်ႇဝႆႉ။ သင်ဝႃႈ ၾၢႆႇသိုၵ်းမၢၼ်ႈတင်း လူင်ပွင်ၸိုင်ႈၶႄႇၶဝ် ဢုပ်ႇဢူဝ်းတူၵ်းလူင်းလႆႈၸႂ်ၵၼ်ယဝ်ႉၼႆ ၽၵ်းတူၼႆႉ ၸင်ႇတေပိုတ်ႇပၼ်ၶိုၼ်းယူႇ ဝႃႈၼႆ။