မိူဝ်ႈဝၼ်းတီႈ 28/04/2025 ယၢမ်းတၢမ်းၶမ်ႈမွၵ်ႈ 5 မူင်း သိုၵ်းၵဝ်ႈၵၢင်ႉ MNDAA ပူတ်းတုင်းသိုၵ်းၵဝ်ႈၵၢင်ႉဢွၵ်ႇသေ ဢဝ်တုင်း (ၸွမ်ပိဝ်) မိူင်းႁူမ်ႈတုမ် သႂ်ႇၶိုၼ်း တီႈၽၵ်းတူၶၢမ်ႈလႅၼ်လိၼ် မိူင်းၶႄႇ ပၢင်ႇသၢႆး – ဝၼ်းတဵင်ႈ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ။

ဝၢႆးလင် ၽႅၼ်ယၼ်ႇသိုၵ်း 1027 မႃး သိုၵ်းၵဝ်ႈၵၢင်ႉ ယိုတ်းၵုမ်းလႆႈ ဝဵင်းပၢင်ႇသၢႆး၊ ဝဵင်းမိူင်းၵူဝ်း ၸိူဝ်းၼႆႉ လႄႈ ၵုမ်းၵမ်လႆႈပႃး ၽၵ်းတူၶၢမ်ႈလႅၼ်လိၼ်မိူင်းၶႄႇၵႂႃႇ မွၵ်ႈသၢမ်တီႈ။ တင်ႈတႄႇၼၼ်ႉမႃး သိုၵ်းၵဝ်ႈၵၢင်ႉ ပူတ်းလူင်းတုင်း (ၸွမ်ပိဝ်) မိူင်းႁူမ်ႈတုမ်သေ ဢဝ်တုင်းသိုၵ်းၵဝ်ႈၵၢင်ႉၶဝ်သႂ်ႇဝႆႉၼႆ ၵူၼ်းမိူင်းၼႂ်းပိုၼ်ႉတီႈ ဝဵင်းပၢင်ႇသၢႆး ၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“တီႈၽၵ်းတူၶၢမ်ႈလႅၼ်လိၼ် တီႈပၢင်ႇသၢႆး – ဝၼ်းတဵင်ႈၼႆႉ ၵူႈပွၵ်ႈသိုၵ်းၵဝ်ႈၵၢင်ႉၶဝ်သႂ်ႇဝႆႉတုင်း (ၸွမ်ပိဝ်) ၶဝ်။ ယူႇယူႇၵေႃႈ မႃးပူတ်းဢွၵ်ႇပႅတ်ႈႁႄ သႂ်ႇပၼ်ၶိုၼ်းတုင်းမိူင်းႁူမ်ႈတုမ်ၶိုၼ်း။ ငဝ်းလၢႆးတေလႅၵ်ႈ လၢႆႈၸိူင်ႉႁိုဝ်ဢမ်ႇႁူႉ။ ပေႃးႁဝ်းလၢမ်းတႄႉ ၾၢင်ႁၢင်ႈၸိူင်ႉၼႆ မိူၼ်ၼင်ႇ သိုၵ်းၵဝ်ႈၵၢင်ႉၶဝ် တေဢၢပ်ႈပၼ်ႁႂ်ႈၾၢႆႇလူင်ပွင်ၸိုင်ႈသိုၵ်းမၢၼ်ႈ မႃးၵုမ်း ၶိုၼ်းၵေႃႈ ၸၢင်ႈပဵၼ်လႆႈယူႇ”။

ယၢမ်းလဵဝ် တီႈၽၵ်းတူၶၢမ်ႈလႅၼ်လိၼ် မိူင်းတႆး – မိူင်းၶႄႇ တီႈၵဵတ်ႉ/ လၢၼ်ႇ ပၢင်ႇသၢႆး ဝၼ်းတဵင်ႈၼႆႉ ၾၢႆႇလူင်ပွင်ၸိုင်ႈ မိူင်းၶႄႇ ယင်းပႆႇပိုတ်ႇပၼ် ႁႂ်ႈၵူၼ်းမိူင်းတင်းသွင်ၾင်ႇ တေႃႉၶူဝ်းၵုၼ်ႇၶဝ်ႈဢွၵ်ႇ လွတ်ႈလႅဝ်း ၸွမ်းၼင်ႇၵၢင်ၸႂ်ၼႆ – ၵူၼ်းမိူင်းၼႂ်းပိုၼ်ႉတီႈ ၸႄႈတွၼ်ႈမူႇၸေႊ ၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“မိူဝ်ႈလဵဝ် ပဵၼ်ၵူၼ်းမိူင်းၶႄႇၵူၺ်း ၶဝ်ႈဢွၵ်ႇလႆႈ။ တေႃႉတႄႉတေႃႉလႆႈၶူဝ်းၵိၼ်တၢင်းယႅမ်ႉ ၶဝ်ႈမုၼ်းၶဝ်ႈ ပွင်း၊ လႅၼ်းယႃႈတင်း ၵုၼ်ႇယွႆႈဢွၼ်ႇ ဢိတ်းဢွတ်း ၸွမ်းၼင်ႇပွင်ပဵၼ်လႆႈၼၼ်ႉၵူၺ်း။ ဢဝ်ၵႃးႁႄ တေႃႉၵုၼ်ႇၶၢမ်ႈလၢၼ်ႇ ၵႂႃႇၵႂႃႇမႃးမႃးတႄႉပႆႇလႆႈ။ ၾၢႆႇမိူင်းၶႄႇ ပႆႇပိုတ်ႇပၼ်သဵၼ်ႈတၢင်း”။

ယွၼ်ႉလူင်ပွင်ၸိုင်ႈမိူင်းၶႄႇ ဢမ်ႇပိုတ်ႇပၼ်သဵၼ်ႈတၢင်း ဢိုတ်းၵဵတ်ႉ/ လၢၼ်ႇ ၽၵ်းတူလႅၼ်လိၼ် ၶၢမ်ႈမိူင်း မိူင်းတႆး – မိူင်းၶႄႇလႄႈ ႁဵတ်းႁႂ်ႈၵူၼ်းမိူင်းတႆးပွတ်းႁွင်ႇ ၵႃႉၶၢႆယၢပ်ႇၵိၼ်းလိူဝ်ၵဝ်ႇမႃးလႄႈ ၶၼ်ၵုၼ်ႇၼႂ်းပိုၼ်ႉတီႈၵေႃႈ ပုင်ႈၶိုၼ်ႈႁႅင်း။ ၵူၼ်းမိူင်းၸိူဝ်းႁႃၵိၼ်လဵင်ႉတွင်ႉ ၸွမ်းဝၼ်းတႄႉ ႁူပ်ႉလွင်ႈယၢပ်ႇၽိုတ်ႇၸွမ်း တင်းၼမ်။

တင်ႈတႄႇ သိုၵ်းၵဝ်ႈၵၢင်ႉ MNDAA တင်း သိုၵ်းမၢၼ်ႈ ဢုပ်ႇဢူဝ်း တူၵ်းလူင်းလႆႈၸႂ်ၵိုတ်းတိုၵ်းၵၼ် တီႈ ဝဵင်းၶုၼ်ႊမိင်ႊ ၼႂ်းမိူင်းၶႄႇယဝ်ႉ ၾၢႆႇလူင်ပွင်ၸိုင်ႈမိူင်းၶႄႇ ပိုတ်ႇပၼ်ၶိုၼ်း ၵဵတ်ႉ/ လၢၼ်ႇ ၽၵ်းတူၶၢမ်ႈ လႅၼ်လိၼ် ၸွမ်းၼႂ်းၼႃႈတီႈ သိုၵ်းၵဝ်ႈၵၢင်ႉ MNDAA တင်း သိုၵ်းဝႃႉ UWSA ၵုမ်းၵမ်ဝႆႉၼၼ်ႉၶိုၼ်း။ ဝႃႈၼၼ်သေတႃႉ ယင်းတိုၵ်ႉမီး ၶေႃႈႁၢမ်ႈယူႇလႄႈ ၵူၼ်းမိူင်းယင်းပႆႇၵႃႉငၢႆႈၶၢႆလီ ႁဵတ်းလႆႈထၢင်ႇႁၢင်ႈလွတ်ႈ လႅဝ်းမိူၼ်ၵဝ်ႇ ဝႃႈၼႆ။

ဝၢႆးလင် ၽႅၼ်ယၼ်ႇသိုၵ်း 1027 မႃး သိုၵ်းမၢၼ်ႈၵုမ်းၵမ်ဝႆႉ ၽၵ်းတူၶၢမ်ႈလႅၼ်လိၼ် မိူင်းၶႄႇ – မိူင်းမၢၼ်ႈ သၢမ်တီႈ 1) ၽၵ်းတူၸၢင်ႉၽိူၵ်ႇ (ဆင်ဖြူပေါက်) ၊ 2) မၢၼ်ႈဝဵင်း (မန်ဝိန်းပေါက်) ၊ 3) ၽၵ်းတူလူင် (နန်း တော်ပေါက်)။ သိုၵ်းၵဝ်ႈၵၢင်ႉ MNDAA ၵုမ်းၵမ်ဝႆႉ 4 တီႈ မိူၼ်ၼင်ႇ – 1) ၵျိၼ်းသၢၼ်းၵျေႃႉ ၊ 2) ဝၼ်းတဵင်ႈ ၊ 3) လၢၼ်ႇမိူင်းၵူဝ်း လႄႈ 7) လၢၼ်ႇဝဵင်းၼမ်ႉၽႃႈ (ၶျိၼ်ႊသူၺ်ႇႁေႃႇ)။ သိုၵ်းတႆး (SSPP/SSA) ၵုမ်းၵမ်ဝႆႉ ၼိုင်ႈတီႈ ပဵၼ်တီႈၵဵတ်ႉမၢၼ်ႈႁဵဝ်း (မန့်ဟီးရိုး)။ ၽၵ်းတူၶၢမ်ႈလႅၼ်လိၼ် မိူင်းတႆး – မိူင်းၶႄႇ ၼႂ်းၸႄႈ  တွၼ်ႈမူႇၸေႊၼႆႉ တင်းမူတ်းမီးယူႇ 8 တီႈ။

တႅမ်ႈ – ၽူၺ်းၼုမ်ႇ