ဝၢႆးသိုၵ်းမၢၼ်ႈတင်း သိုၵ်းၵဝ်ႈၵၢင်ႉ ဢုပ်ႇဢူဝ်းတူၵ်းလူင်းလႆႈၸႂ်ၵိုတ်းတိုၵ်းၵၼ် တီႈဝဵင်းၶုၼ်ႊမိင်ႊ မိူင်းၶႄႇယဝ်ႉၼၼ်ႉ ၽၵ်းတူလႅၼ်လိၼ်တႆး – ၶႄႇ ဢၼ်မီးၼႂ်းၼႃႈတီႈသိုၵ်းၵဝ်ႈၵၢင်ႉ – ဝႃႉ ၵုမ်းၵမ်ဝႆႉ ၸိူဝ်းၼၼ်ႉၵေႃႈ ပိုတ်ႇပၼ်ၶိုၼ်းမူတ်းယဝ်ႉ ဝႃႈၼႆသေတႃႉ တီႈပၢင်ႇသၢႆးၼႆႉ ယင်းပႆႇပၼ်တေႃႉၶူဝ်းၵုၼ်ႇၵႂႃႇ မႃးလႆႈထၢင်ႇႁၢင်ႈ။

တႄႇဢဝ် ဝၼ်းတီႈ 20/01/2025 ၼႆႉမႃး တၢင်းၾင်ႇမိူင်းၶႄႇ ပိုတ်ႇပၼ်ၽၵ်းတူလႅၼ်လိၼ် မႃးယဝ်ႉသေတႃႉ တီႈ ၽၵ်းတူပၢင်ႇသၢႆး – ဝၼ်းတဵင်ႈၼႆႉ ၸဵမ်ၶူဝ်းၵုၼ်ႇ၊ ၵူၼ်းပိုၼ်ႉတီႈ ၸိူဝ်းၼႆႉ တၢင်းၾင်ႇမိူင်းၶႄႇ ယင်းပႆႇပၼ်ၶဝ်ႈ ဝႃႈ ၼႆ။

ၵူၼ်းပၢင်ႇသၢႆး ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၽၵ်းတူတႄႉ ပိုတ်ႇယဝ်ႉဝႃႈၼႆသေတႃႉ ၵူၺ်းၵႃႈ ၵူၼ်းမိူင်းၶႄႇ ၶူဝ်းၵုၼ်ႇၶဝ်တႄႉ တေႃႉၶဝ်ႈမႃးလႆႈယူႇ။ မိူၼ်ၼင်ႇ ၶူဝ်းၵုၼ်ႇ၊ ၵူၼ်းမိူင်းမၢၼ်ႈ တၢင်းၾင်ႇၼႆႉသမ်ႉ ၾင်ႇမိူင်းၶႄႇၶဝ် ပႆႇပၼ်ၶဝ်ႈၶႃႈ။ တေလႆႈဝႃႈ ပႆႇမီးလွင်ႈထၢင်ႇႁၢင်ႈၶဝ်ႈဢွၵ်ႇၵႂႃႇမႃးၶႃႈ”- ဝႃႈၼႆ။

ယၢမ်းလဵဝ် တီႈၽၵ်းတူလႅၼ်လိၼ်ပၢင်ႇသၢႆး – ဝၼ်းတဵင်ႈၼႆႉ ပဵၼ်ၼႃႈတီႈ သိုၵ်းၶႄႇတင်း သိုၵ်းၵဝ်ႈၵၢင်ႉ MNDAA ၵုမ်းၵမ်ၵူတ်ႇထတ်းဝႆႉ ဝႃႈၼႆ။

“ၶူဝ်းၵုၼ်ႇ ဢၼ်လုၵ်ႉတၢင်းမိူင်းၶႄႇ ၶဝ်ႈမႃးသမ်ႉ ပိူင်လူင်မၼ်း တေပဵၼ်ၶူဝ်းၵုၼ်ႇၶွင်ၵိၼ်ယႅမ်ႉ ၸိူဝ်း ၼႆႉၵူၺ်း။ မိူၼ်ၼင်ႇ ၶိူင်ႈၸၢၵ်ႈ ၸိူဝ်းၼၼ်ႉတႄႉ ၶဝ်ပႆႇပၼ်ဢွၵ်ႇမႃးၶႃႈ။ ၶွင်ၵိၼ်ယႅမ်ႉ ဢၼ်တေႃႉ ဢွၵ်ႇမႃးၼႆႉၵေႃႈ သိုၵ်းၶႄႇၶဝ် တေပိုတ်ႇၸီးတူၺ်းၵူႈဢၼ်သေ ၸင်ႇပၼ်ဢွၵ်ႇမႃးဢေႃႈ”- ၵူၼ်းပိုၼ်ႉတီႈ ဝဵင်းပၢင်ႇသၢႆး သိုပ်ႇလၢတ်ႈ ၼႄၼင်ႇၼႆ။

ဢိင်ၼိူဝ် လွင်ႈၵၢၼ်ပိုတ်ႇၽၵ်းတူလႅၼ်လိၼ်ပၢင်ႇသၢႆး – ဝၼ်းတဵင်ႈၼႆႉသေ ၵူၼ်းပိုၼ်ႉတီႈ ပၢင်ႇသၢႆး တႄႉ ႁူမ်ၸူမ်းၸွမ်းယူႇသေတႃႉ ၵူၺ်းၵႃႈ ၵူၼ်းၵႃႉၶၢႆၶဝ်တႄႉ ဝူၼ်ႉၵႂင်ၸွမ်း လွင်ႈၶူဝ်းၵုၼ်ႇဢၼ်လႆႈ သိုဝ်ႉဝႆႉၵႃႈၶၼ်ယႂ်ႇ ၸိူဝ်းၼၼ်ႉ တေႁဵတ်းႁိုဝ်ၶၢႆၶိုၼ်း ၸဵမ်ၸိူဝ်းၼႆႉ။

ၵူၼ်းၶၢႆၵုၼ်ႇ ဝဵင်းပၢင်ႇသၢႆး ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၶဝ်ၵိုင်ႉၵၢင်ႉ ပိုတ်ႇၽၵ်းတူမႃးၸိူင်ႉၼႆသေ ၶူဝ်း ၵုၼ်ႇဢၼ်လႆႈသိုဝ်ႉဝႆႉ ၵႃႈၶၼ်ယႂ်ႇ ၸိူဝ်းၼၼ်ႉ ႁဝ်းၶႃႈ တေလႆႈၶၢႆၶိုၼ်းၸိူင်ႉႁိုဝ် ဢၼ်ဝႃႈၼၼ်ႉ ဝူၼ်ႉပေႃးဢမ်ႇဢွၵ်ႇယဝ်ႉၶႃႈ။ တေၶၢႆထုၵ်ႇၵေႃႈသုမ်း၊ တေၶၢႆၵႃႈၵေႃႈ ပိူၼ်ႈတေဢမ်ႇသိုဝ်ႉယဝ်ႉ။ ၵမ်ႈၼမ် ၶူဝ်းၵုၼ်ႇ ၸိူဝ်းၼႆႉ လႆႈသိုဝ်ႉတၢင်းမူႇၸေႊမႃးၶၢႆ”- ဝႃႈၼႆ။

သိုပ်ႇလၢတ်ႈဝႃႈ – မိူၼ်ၼင်ႇ ၵူၼ်းၵႃႉၼိူဝ်ႉ/ ပႃ ၶဝ်ၸိူဝ်းၼႆႉ လႆႈသႂၢင်းၶွၼ်ႇဝႆႉသေ တေႃႉတၢင်းမူႇၸေႊ မႃးၶၢႆလႄႈ ၵမ်းၼႆႉ လုၵ်ႉတၢင်းမိူင်းၶႄႇသေ တေႃႉမႃးၶၢႆၵမ်းသိုဝ်ႈၸိူင်ႉၼႆ ႁဵတ်းႁႂ်ႈၵူၼ်းၶၢႆၼိူဝ်ႉ/ ပႃၶဝ် ဢွၼ်ၵၼ်ၶၢင်းၼၼ်ႉယဝ်ႉ ယွၼ်ႉၵိုင်ႉၵၢင်ႉလႅၵ်ႈလၢႆႈလႄႈ ဢမ်ႇတၼ်းလႆႈတင်ႈတူဝ်”- ဝႃႈၼႆ။

မိူၼ်ၼင်ႇ ၼမ်ႉမၼ်းၵိၼ် တီႈဝဵင်းပၢင်ႇသၢႆးၼႆႉ မိူဝ်ႈၽၵ်းတူလႅၼ်လိၼ်ပႆႇပိုတ်ႇၼၼ်ႉ ၼိုင်ႈပုင်းလႂ် (3 ၸွႆႉ) ငိုၼ်း ၶႄႇ 100 ယႂၼ်ႊ။ ယၢမ်းလဵဝ် ၼိုင်ႈပုင်းလႂ် 55 ယႂၼ်ႊ ၶၼ်မၼ်းယွမ်းလူင်းမႃး ၼိုင်ႈၶိုင်ႈ ၼႆယဝ်ႉ။

တႄႇဢဝ် ဝၼ်းတီႈ 28/11/2023 ၼၼ်ႉမႃး သိုၵ်းၵဝ်ႈၵၢင်ႉ MNDAA ယိုတ်းၵုမ်းလႆႈ ဝဵင်းပၢင်ႇသၢႆးၼႆႉမႃး ႁၢၼ်ႉတေႃႇထိုင်ယၢမ်းလဵဝ် မီးမႃးၶၢဝ်းတၢင်း ပီပၢႆယဝ်ႉ။ ဢိင်ၼိူဝ် လွင်ႈၽႅၼ်ယၼ်ႇသိုၵ်း 1027 ၼၼ်ႉမႃး သေ ဢၼ်ယူႇတီႈ တပ်ႉသိုၵ်းၵဝ်ႈၵၢင်ႉ ယိုတ်းၵုမ်းလႆႈဝႆႉ ၼႂ်းမိူင်းတႆးပွတ်းႁွင်ႇၼႆႉသမ်ႉ မိူၼ်ၼင်ႇ – ဝဵင်း ပၢင်ႇသၢႆး၊ မိူင်းၵူဝ်း၊ မိူင်းပေႃႈ၊ လႃႈသဵဝ်ႈ၊ သႅၼ်ဝီ၊ ၵုၼ်လူင်၊ ဝဵင်းၼမ်ႉၽႃႈ (သျိၼ်းသူၺ်ႇႁေႃႇ) လႄႈ လၢဝ်ႇၵၢႆး ၸိူဝ်းၼႆႉ။