ဝၼ်းတီႈ 4/1/2026 ဝၼ်းလွတ်ႈလႅဝ်းမိူင်းမၢၼ်ႈ ၶွပ်ႈတဵမ် 78 ပီၼႆႉသိုၵ်းမၢၼ်ႈပူတ်းပွႆႇပၼ်ၵူၼ်းတူၵ်းၶွၵ်ႈ 6000 ပၢႆ ၼႂ်းၼၼ်ႉပႃး ၼၢင်းငၢမ်းႁၢင်ႈလဝ်း Sexy Model ၼၢင်းမူၺ်ၸၢမ် လႄႈ ဢူးယႄးထုတ်ႉ ဢၼ်ပဵၼ်ၽွင်းလူင်ၾၢႆႇပွင်ႇၶၢဝ်ႇၽွင်းပၢၼ်လူင်ပွင်ၸိုင်ႈဢူးတဵင်းၸဵင်ႇ ။
ၼၢင်းမူၺ်ၸၢမ်ၼႆႉသိုၵ်းမၢၼ်ႈၼႄးဝႃႈမၼ်းၼၢင်းၼုင်ႈၶူဝ်းပိတ်းပွတ်းပူၼ်ႉလိူဝ်သေထၢႆႇၶႅပ်းႁၢင်ႈလႄႈ ဝီႊတီႊဢူဝ်ႊတၢင်ႇၼိူဝ်ဢွၼ်ႊလၢႆႊ ၼႆသေတီႉၺွပ်းဢဝ်လိူင်ႈမၼ်းၼၢင်း မိူဝ်ႈပီ 2022 လူၺ်ႈ တၢင်းၽိတ်းပူၼ်ႉပႅၼ်မၢႆမီႈ ဢီႊလႅၵ်ႊထရေႃႊၼိၵ်ႉ မတ်ႉတႃ 33(ၵ) သေ တႅပ်းတတ်းပၼ်တူတ်ႈၶွၵ်ႈ 6 ပီ ။ မၼ်းၼၢင်းတၼ်းလႆႈယူႇၼႂ်းၶွၵ်ႈ 3 ပီသေ ၸင်ႇႁႃလွတ်ႈဢွၵ်ႇၶွၵ်ႈမႃးၼႂ်းဝၼ်းလွတ်ႈလႅဝ်းၶွပ်ႈတဵမ် 78 ပီၼႆႉ။
ဢၼ်ပဵၼ်ၽွင်းလူင်ၵဝ်ႇ ဢူးယႄးထုတ်ႉၼၼ်ႉသမ်ႉ သိုၵ်းမၢၼ်ႈၼႄးဝႃႈမၼ်းၸၢႆးတႅမ်ႈလိၵ်ႈတၢင်ႇၼိူဝ်ၾဵတ်ႉသ်ပုၵ်ႉသုၼ်ႇတူဝ် ဢၼ်ႁဵတ်းႁႂ်ႈတုမ်ႉတိူဝ်ႉၸိုဝ်ႈသဵင်ၵူၼ်းလႄႈမူႇၸုမ်းၼႆသေ တီႉၺွပ်းမိူဝ်ႈလိူၼ်ဢွၵ်ႊထူဝ်ႊပိူဝ်ႊပီ 2023 ။ ပၼ်တူတ်ႈတၢမ်ႇလူၺ်ႈ မတ်ႉတႃ 505 ၵ လႄႈ 124 ၵ (တင်ႈၸႂ်ႁဵတ်းႁႂ်ႈၸိုဝ်ႈသဵင်ၸုမ်းၽွင်းငမ်းဝၢၼ်ႈမိူင်းလူႉ) တူတ်ႈၶွၵ်ႈ 10 ပီ။ မၼ်းၸၢႆးတၼ်းလႆႈယူႇၼႂ်းၶွၵ်ႈ 2 ပီပၢႆသေ ပူၼ်ႉလွတ်ႈမႃးၼႂ်းဝၼ်းလွတ်ႈလႅဝ်းၼႆႉၼင်ႇၵဝ်ႇ။
ၵူၼ်းတူၵ်ႈၶွၵ်ႈဢၼ်ထုၵ်ႇလူတ်းယွၼ်ႇပူတ်းပွႆႇမႃးၼႂ်းဝၼ်းတီႈ 4/1/2026 ဝၼ်းမိူဝ်ႈၼႆႉမီး 6134 ၵေႃႉ။ ၼႂ်းၼၼ်ႉပႃးၵူၼ်းၼွၵ်ႈမိူင်း 52 ၵေႃႉသေ သိုၵ်းမၢၼ်ႈသူင်ႇပွၵ်ႈၶိုၼ်းမိူင်းယဝ်ႉ ပိုၼ်ၽၢဝ်ႇလၢတ်ႈပႃးဝႃႈ ႁၢမ်ႈၶဝ်ႈမိူင်းမၢၼ်ႈမႃးၶိုၼ်းတေႃႇၸူဝ်ႈသုတ်းပၢၼ်ဝႃႈၼႆဝႆႉ။
လွင်ႈပွႆႇၵူၼ်းတူၵ်းၶွၵ်ႈပွၵ်ႈၼႆႉၸွမ်ၸိၵ်းသိုၵ်းမၢၼ်ႈပိုၼ်ၽၢဝ်ႇလၢတ်ႈဝႃႈ – ၼွၵ်ႈလိူဝ်ပွႆႇၵူၼ်းတူၵ်းၶွၵ်ႈ 6000 ပၢႆၼႆႉယဝ်ႉ ၵူၼ်းၸိူဝ်းမီးယူႇၼႂ်းၶွၵ်ႈပတ်းပိုၼ်ႉၸိုင်ႈမိူင်းၼၼ်ႉၵေႃႈ လူတ်းယွၼ်ႇတူတ်ႈတၢမ်ႇပၼ် 6 ပုၼ်ႈ 1 ပုၼ်ႈ ဝႃႈၼႆ။
ၵူၺ်းၵႃႈဢၼ်သိုၵ်းမၢၼ်ႈပွႆႇပၼ်ၵူၼ်းတူၵ်းၶွၵ်ႈၼႂ်းဝၼ်းမိူဝ်ႈၼႆႉ ၼၢင်းဢွင်ႇသၢၼ်းၸူႉၵျီႇလႄႈ ၵူၼ်းတူၵ်းၶွၵ်ႈၵၢၼ်မိူင်းၸိုဝ်ႈသဵင်ယႂ်ႇၸိူဝ်းၼၼ်ႉတႄႉဢမ်ႇပႃးမႃးသေဢမ်ႇၵႃး ၼႂ်းလွင်ႈလူတ်းယွၼ်ႇတူတ်ႈတၢမ်ႇ 6 ပုၼ်ႈ 1 ပုၼ်ႈၼၼ်ႉၵေႃႈ ဢမ်ႇပႃး ဢွင်ႇသၢၼ်းၸူႉၵျီႇ လႄႈၸွမ်ၸိုင်ႈၵေႃႉၵဝ်ႇ ဢူးဝိၼ်းမျိၼ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ