ဝၼ်းတီႈ28/12/2025 ဝၼ်းဢၼ်သိုၵ်းမၢၼ်ႈတဵၵ်းၸႂ်ႉႁဵတ်းပၢင်လိူၵ်ႈတင်ႈၼၼ်ႉ သိုၵ်းမၢၼ်ႈတီႈတပ်ႉဝဵင်းလွႆၶေႃ လၢမ်းလိမ်းယိုဝ်းၵွင်ႈလူင် ၵႂႃႇတူၵ်းတၢင်းဝၢၼ်ႈဢၼ်မီးၾၢႆႇဢွၵ်ႇဝဵင်းလွႆၶေႃ တူၵ်းတိူဝ်ႉၵူၼ်းမိူင်းတၢႆ ၵေႃႉၼိုင်ႈ မၢတ်ႇၸဵပ်း 2 ၵေႃႉ ႁွင်ႈၵၢၼ်ၶၢဝ်ႇ BBC ႁၢႆးငၢၼ်း ဝႆႉၼင်ႇၼႆ။

ၵူၼ်းမိူင်းဝဵင်းလွႆၶေႃလၢတ်ႈဝႃႈ-“ ၵူၼ်းၸၢႆးတၢႆ ၵေႃႉၼိုင်ႈ မၢတ်ႇၸဵပ်း 2 ၵေႃႉ။ ၼႂ်ၼႆႉဝၼ်းတီႈ 29/12/2025 သမ်ႉယိုဝ်းၵႂႃႇတၢင်းမႄႈၸႄႉပုၼ်ႉၼႆ။ ဢၼ်ယိုဝ်းၵႂႃႇတၢင်း ပေႃႇလၶႄးၵေႃႈမီး ” ၵူၼ်းမိူင်းယၢင်းလႅင် ၵေႃႉၼိုင်ႈလၢတ်ႈၼင်ႇၼႆ။

မၼ်းၸၢႆးလၢတ်ႈဝႃႈ သိုၵ်းမၢၼ်ႈလႅပ်ႈလုၵ်ႉတၢင်းတပ်ႉသိုၵ်းတၢင်းမိူင်းလွႆၶေႃသေယိုဝ်း မႃး 3 ၵမ်းလႄႈ ၸင်ႇဝႃႈတိူဝ်ႉၵူၼ်းဝၢၼ်ႈထိုင်တီႈလႆႈမၢတ်ႇၸဵပ်းလူႉတၢႆဝႃႈၼႆ။

“မၢၵ်ႇသျွတ်ႉၼႆႉ တူၵ်းလူင်းမႃး 3 လုၵ်ႈ။ တူၵ်းသႂ်ႇတီႈႁူင်းတွတ်ႈၶႅပ်းၵၢင်ၸႂ်မၢႆ 3 ဝဵင်းလွႆၶေႃၼၼ်ႉႁေ တူၵ်းတီႈ ႁူင်းတွတ်ႈၶႅပ်းၵၢင်ၸႂ်တီႈဝၢၼ်ႈသူၺ်ႇတွင်ႇ – ၼမ်ႉမေႃႇဝၢၼ် – မင်ႇၵလႃႇ ၸိူဝ်းၼႆႉ။ တႃႇလုၵ်ႈၼိုင်ႈၼႆႉဢမ်ႇတႅၵ်ႇ” – ဝႃႈၼႆ။

တီႈမိူင်းယၢင်းလႅင်ၼႆႉ ပၢင်လိူၵ်ႈတင်ႈၵမ်းထီႉ 1 ၼႆႉ ၸတ်းတီႈဝဵင်းလွႆၶေႃလႄႈ ပေႃႇလၶႄး 2 ဝဵင်းၵူၺ်း။ သိုၵ်းမၢၼ်ႈသမ်ႉမႃးလၢမ်းလိမ်းယိုဝ်းၵွင်ႈလူင်ၸိူင်ႉၼႆႉႁဵတ်းႁႂ်ႈတူၵ်းတိူဝ်ႉၵူၼ်းမိူင်းလၢႆလၢႆ။