မိူဝ်ႈၼႆႉ ဝၼ်းတီႈ 28/12/2025 ပၢင်လိူၵ်ႈတင်ႈတီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ ၵူၼ်းမိူင်းၵမ်ႈၽွင်ႈ ဢၼ်ဝႃႈ ဢမ်ႇႁူႉတီႈပၼ်ၶႅပ်းၵၢင်ၸႂ်လႄႈ ဢမ်ႇလႆႈၵႂႃႇသႂ်ႇၶႅပ်း ၵၢင်ၸႂ် ၼႆၵေႃႈမီး။
ႁူင်းပၼ်ၶႅပ်းၵၢင်ၸႂ် တီႈဝဵင်းတူၼ်ႈတီးၼႆႉ တႄႇပိုတ်ႇပၼ် ယၢမ်းၵၢင်ၼႂ် 6 မူင်း ထိုင် ႁူဝ်ၶမ်ႈ 4 မူင်း ။ ၵူၼ်းၼႂ်းဝဵင်းတႄႉ ထုၵ်ႇသိုၵ်းမၢၼ်ႈ တဵၵ်းတဵင်မိပ်ႇငႅၼ်းဝႆႉလႄႈ ဢမ်ႇၶႂ်ႈၵႂႃႇပၼ်သဵင်ၵၢင်ၸႂ်ၵေႃႈဢမ်ႇၸၢင်ႈႁဵတ်းႁိုဝ် – ၵႃႈလႆႈၵႂႃႇပၼ်။ ၵူၺ်းၵႃႈၸိူဝ်းယူႇတၢင်းဝၢၼ်ႈ ၵမ်ႈၽွင်ႈ ၵမ်ႈၼမ် ဢမ်ႇႁူႉဝႃႈတေလႆႈၵႂႃႇပၼ်သဵင်ၵၢင်ၸႂ်တီႈလႂ်၊ ၸွင်ႇၸဝ်ႈၵဝ်ႇမီးသုၼ်ႇပၼ်သဵင်ၵၢင်ၸႂ် ၸိူဝ်းၼႆႉဢမ်ႇႁူႉလႄႈ ဢမ်ႇလႆႈၵႂႃႇပၼ်သဵင်ၵၢင်ၸႂ်ၵေႃႈမီးတင်းၼမ်ဝႃႈၼႆ။
ၵူၼ်း ၵႂႃႇတွတ်ႈၶႅပ်းၵၢင်ၸႂ် တီႈဝဵင်းတူၼ်ႈတီးၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ –“မီးပီႈၼွင်ႉတၢင်းဝၢၼ်ႈ လၢတ်ႈမႃးဝႃႈ ၶဝ်ဢမ်ႇႁူႉဝႃႈ တေလႆႈၵႂႃႇပၼ်သဵင်ၵၢင်ၸႂ်တီႈလႂ်လႄႈ ဢမ်ႇလႆႈၵႂႃႇပၼ်ၵေႃႈမီးၼႆဝႃႇ။ ပႃႈႁဝ်းလုင်းႁဝ်း(ၵူၼ်းဢႃယုယႂ်ႇ) ၸိူဝ်းယူႇၼႂ်းဝဵင်းၼႆႉတင်း- ၶဝ်လၢတ်ႈဝႃႈ ၶဝ်ႁူႉၸၵ်းပႃႇတီႇသၢင်ႇသီႈၵူၺ်းလႄႈ ၶဝ်တဵၵ်းဢၼ်ၼၼ်ႉမႃးၵူၺ်းၼႆ။ တၢင်ႇဢၼ်တႄႉၶဝ်ဢမ်ႇႁူႉၸၵ်းၼႆ လူးၵွၼ်ႇဢေႃႈ”– ဝႃႈၼႆ ။
ၼႂ်းမိူင်းတႆးပွတ်းၸၢၼ်းၸတ်းႁဵတ်းပၢင်လိူၵ်ႈတင်ႈမီး 6 ဝဵင်း ။ ပဵၼ်ဝဵင်းတူၼ်ႈတီး ၊ ပၢင်လႃႈ ၊ ႁူဝ်ပူင်း ၊ ၼမ်ႉၸၢင် ၊ လၢင်းၶိူဝ်း ၊ လွႆလႅမ် ။ တီႈဝဵင်းတူၼ်ႈတီး ယၢမ်းၵၢင်ၼႂ်ၼႆႉ ၵူၼ်းၵႂႃႇတွတ်ႈၶႅပ်းၵၢင်ၸႂ် မီးၵမ်ႈဢႄႇ ၵူၺ်းသေ ၊ တီႈဝဵင်းတူၼ်ႈတီးၼႆႉ မီးႁူင်းၸၢၵ်ႇ 190 ႁူင်း မီးပွၵ်ႉ 51 ပွၵ်ႉ ၊ ဢိူင်ႇ 24 ဢိူင်ႇ လႆႈႁူႉၼင်ႇၼႆ ။
မိူဝ်ႈဝၼ်းတီႈ 26/12/2025 ဝၼ်းပၼ်သဵင်ၵၢင်ၸႂ်လူင်ႈၼႃႈၼၼ်ႉၵေႃႈ ပႃႇတီႇသၢင်ႇသီႈ (USDP) လႆႈဝႆႉၶႅပ်းမႄးလူင်ႈၼႃႈ ၼမ်လိူဝ်ပိူၼ်ႈသုတ်း ၼႂ်းၸႄႈဝဵင်းတူၼ်ႈတီး လႄႈ ၵၢတ်ႇလေႃႉ – သိုၵ်းမၢၼ်ႈပိုၼ်ၽၢဝ်ႇဝႆႉၼင်ႇၼႆ။
ၽွၼ်းၵၢၼ်ပၢင်လိူၵ်ႈတင်ႈလူင်ႈၼႃႈ ၼႂ်းၸႄႈဝဵင်းတူၼ်ႈတီးၼႆႉ ၶႅပ်းမႄး (သဵင်ၵၢင်ၸႂ်) တႃႇသၽႃး ၵူၼ်းမိူင်း ပႃႇတီႇသၢင်ႇသီႈ USDP လႆႈၵႂႃႇ 2344 ၶႅပ်း ၊ ပႃႇတီႇသိူဝ်ၽိူၵ်ႇ (SNDP) 11 ၶႅပ်း၊ ပႃႇတီႇၸိူဝ်ႉၸၢတ်ႈပဢူဝ်း (PNO) လႆႈ 4 ၶႅပ်း – လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ