မိူဝ်ႈၼႆႉ ဝၼ်းတီႈ 28/12/2025 ဝၼ်းပၢင်လိူၵ်ႈတင်ႈၵမ်းထိ 1 ၵူၼ်းဢမ်ႇၶႅင်ႁႅင်းၼႂ်းဝဵင်းႁူဝ်ပူင်း ၸိုင်ႈတႆးပွတ်းၸၢၼ်းၼၼ်ႉ သိုၵ်းမၢၼ်ႈၵဵပ်းသဵၼ်ႈၸိုဝ်ႈၶဝ်ၵႂႃႇလႄႈ ၵူၼ်းမိူင်းမႆႈၸႂ်ဝႃႈ သိုၵ်းမၢၼ်ႈတေၵႂႃႇသႂ်ႇၶႅပ်းၵၢင်ၸႂ်တႅၼ်းတၢင်ပၼ်ႁင်းၵူၺ်းႁိုဝ်ၼႆယူႇ။
တီႈဝဵင်းႁူဝ်ပူင်းၼႆႉ မီးႁူင်းပၼ်သဵင် 78 ႁူင်း ။ ဢမ်ႇမီးပၢင်လိူၵ်ႈတင်ႈလူင်ႈၼႃႈ ။ သိုၵ်းမၢၼ်ႈလွၵ်ႇငိုတ်ႇၵူၼ်းမိူင်းဝႆႉဝႃႈ တေလႆႈမႃးပၼ်သဵင်ၼႂ်းဝၼ်းပၢင်လိူၵ်ႈတင်ႈၼၼ်ႉၵူၺ်း။ ၽႂ်ဢမ်ႇမႃးသႂ်ႇၶႅပ်းၵၢင်ၸႂ်တေတီႉၺွပ်းဝႃႈၼႆသေတႃႉ ၵူၼ်းမိူင်းဢမ်ႇသူၼ်ၸႂ်ၼႂ်းၵၢၼ်လိူၵ်ႈတင်ႈ – ဢၼ်မႃးသႂ်ႇၶႅပ်းၵၢင်ၸႂ်မီးၵမ်ႈဢႄႇၵူၺ်း – ၵူၼ်းပိုၼ်ႉတီႈလၢတ်ႈ ။
ၵူၼ်းၸၢႆးဝဵင်းႁူဝ်ပူင်းလၢတ်ႈၽူႈတွႆႇႁွၵ်ႈဝႃႈ -“ၼႂ်းဝဵင်းတႄႉ ၵူၼ်းၵႂႃႇသႂ်ႇၶႅပ်းၵၢင်ၸႂ်ၵမ်ႈဢႄႇၵူၺ်း ၊ တီႈတၢင်းဝၢၼ်ႈတႄႉ သိုၵ်းမၢၼ်ႈလွၵ်ႇငိုတ်ႈ ဝႆႉဝႃႈ ပေႃးၽႂ်ဢမ်ႇၵႂႃႇသႂ်ႇၶႅပ်းၵၢင်ၸႂ် တေတီႉၺွပ်းၼႆ ၊ ၵူၼ်းၸိူဝ်းမီးသုၼ်ႇတွတ်ႈၶႅပ်းၵၢင်ၸႂ်သေ ပၢႆးယူႇလီဢမ်ႇတဵမ်ထူၼ်ႈၼၼ်ႉ သိုၵ်းမၢၼ်ႈဢမ်ႇမႃးၵဵပ်းၶႅပ်းၵၢင်ၸႂ်လူင်ႈၼႃႈ။ ၵၢင်ႉၵႄႇၼႂ်းပွၵ်ႉလႄႈ ပလိၵ်ႈသိုၵ်းမၢၼ်ႈ မႃးၵဵပ်းသဵၼ်ႈၸိုဝ်ႈၶဝ်ၵႂႃႇ ။ ၵူၼ်းဝၢၼ်ႈမႆႈၸႂ်ၵူဝ်သိုၵ်းမၢၼ်ႈၵႂႃႇသႂ်ႇၶႅပ်းၵၢင်ၸႂ်တႅၼ်းတၢင်ပၼ်။ ”- ဝႃႈၼႆ ။
ၼႂ်းဝၼ်းပၼ် ၶႅပ်းၵၢင်ၸႂ် တႃႇပၢင်လိူၵ်ႈတင်ႈၼႆႉ သိုၵ်းမၢၼ်ႈႁူမ်ႈပျီႇတူႉၸိတ်ႉ ဢဝ်ႁူမ်ႇလူမ်ႈ တီႈႁူင်းပၼ်ၶႅပ်းၵၢင်ၸႂ်လႄႈ ဢဝ်ၵႃးပၼ်ႇလဵပ်ႈၼႂ်းဝဵင်း ႁဵတ်းႁႂ်ႈၵူၼ်းမိူင်း မႆႈၸႂ်လွင်ႈႁူမ်ႇလူမ်ႈ – ၼႆယဝ်ႉ။
ပၢင်လိူၵ်ႈတင်ႈ ၸုပ်ႈၼိုင်ႈၼႆႉ ဢၼ်သိုၵ်းမၢၼ်ႈယိုတ်းမိူင်း ၸတ်းႁဵတ်း ၼႂ်းမိူင်းတႆးမီး 12 ဝဵင်း ။ ၸုပ်ႈသွင်ၼႆႉ တေၸတ်းႁဵတ်းၵႂႃႇ ၼႂ်းလိူၼ်ၼႃႈ ပီ 2026 ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ