မိူဝ်ႈၼႆႉ ဝၼ်းတီႈ 28/12/2025 ပဵၼ်ဝၼ်းသိုၵ်းမၢၼ်ႈယိုတ်းမိူင်းႁဵတ်းပၢင်လိူၵ်ႈတင်ႈ ၸႂ်ႉၵူၼ်းမိူင်း ၵႂႃႇပၼ်သဵင်တီႈႁူင်းတွတ်ႈၶႅပ်းပၼ်သဵင် ၸဵမ်မိူဝ်ႈ ယၢမ်းၵၢင်ၼႂ် 6 မူင်း ။
ၼႂ်းမိူင်းတႆးပွတ်းၸၢၼ်းၸတ်းႁဵတ်းပၢင်လိူၵ်ႈတင်ႈမီး 6 ဝဵင်း ။ ပဵၼ်ဝဵင်းတူၼ်ႈတီး ၊ ပၢင်လႃႈ ၊ ႁူဝ်ပူင်း ၊ ၼမ်ႉၸၢင် ၊ လၢင်းၶိူဝ်း ၊ လွႆလႅမ် ။
ၼၢင်းယိင်းၵူၼ်းမိူင်းၼမ်ႉၸၢင် ဢၼ်ၵႂႃႇပၼ်ၶႅပ်းၵၢင်ၸႂ်မႃး လၢတ်ႈၽူႈတွႆႇႁွၵ်ႈဝႃႈ -“မၼ်းဢမ်ႇလီတိုၼ်ႇတဵၼ်ႈသင် ၊ ဢမ်ႇလႆႈႁူႉၶေႃႈမုၼ်း လႄႈဢမ်ႇလႆႈဝူၼ်ႉဝႆႉလူင်ႈၼႃႈဝႃႈ တေသႂ်ႇပၼ်သင်လီ ၼႆၸိူဝ်းၼႆႉ၊ ႁၼ်သင်သႂ်ႇမႃးၼၼ်ႉၵူၺ်း ၊ ၵူၼ်းၵႂႃႇပဵၼ်သဵင်ၵၢင်ၸႂ် ၵေႃႈဢမ်ႇမီးၼမ် ၊ ပေႃးဢမ်ႇၵႂႃႇသႂ်ႇၵေႃႈ ဝၢႆးလင်မၼ်းမီးပၼ်ႁႃ ၼႆသေလႄႈဢမ်ႇၸၢင်ႈႁဵတ်းႁိုဝ်သေလႄႈၵႂႃႇသႂ်ႇၵူၺ်း။ ”- ဝႃႈၼႆ ။
ၽွင်းၵႂႃႇတွတ်ႈၶႅပ်းၵၢင်ၸႂ်ၼၼ်ႉ လႆႈဢဝ်ၵႂႃႇမၢႆၾၢင် ၊ လႆႈလူင်းလၢႆးမိုဝ်းသေယဝ်ႉ လႆႈႁၼ် ၽူႈမီးပုၼ်ႈၽွၼ်း ဢဝ်ႁူမ်ႇလူမ်ႈဝႆႉ တၢင်းၼႃႈႁူင်းၸၢၵ်ႈပၼ် ၶႅပ်းၵၢင်ၸႂ် ၼႆယဝ်ႉ ။
တီႈဝဵင်းၼမ်ႉၸၢင်ၼႆႉ ပႃႇတီႇဢၼ်ၶဝ်ႈလိူၵ်ႈတင်ႈၼႆႉတေမီး ပႃႇတီႇသၢင်ႇသီႈ USDP ၊ ပႃႇတီႇ PPP ၊ ပႃႇတီႇၽွမ်ႉႁူမ်ႈၸၢဝ်းၶိူဝ်း (တသၺ) ပႃႇတီႇ ပျီႇတူႉၸိတ်ႉ PNO လႄႈ ပႃႇတီႇသိူဝ်ၽိူၵ်ႇ SNDP ၸိူဝ်းၼႆႉ ။
ၸွမ်းၼင်ႇ သဵၼ်ႈမၢႆၽူႈပၼ်သဵင် ဢၼ်ပိုၼ်ၽၢဝ်ႇဝႆႉ ပွၵ်ႈၵမ်း 3 ၼၼ်ႉသေ ၼႂ်းၸႄႈဝဵင်းၼမ်ႉၸၢင် လႄႈၼႂ်းဝဵင်းၶူဝ်လမ် တင်းမူတ်း မီးၵူၼ်းမီးသုၼ်ႇတွတ်ႈၶႅပ်းၵၢင်ၸႂ် 87,491 ၵေႃႉ ။ မီးႁူင်းတွတ်ႈ ၶႅပ်းၵၢင်ၸႂ် ဢၼ်မၵ်းမၼ်ႈဝႆႉ 78 တီႈ ၼႂ်း 20 ဢိူင်ႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ